Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Wénwala binérisi emi kúchuwala

 BINELÍWAMI 12

Echi Pablo sobrínowala ke majáami nili

Echi Pablo sobrínowala ke majáami nili

Mi ni raʼíchima bilé towí kitra japi tibuli echi Pablo kiti ke miʼárami nima. Tasi ta machí chu riwéami nili, we be nalí ata machí japi Pablo sobrínowala nili. Echi towí ko tasi majáami nili. ¿Mi ni ruyema piri isilá?...

Pablo ko pachá erta asali Jerusalén mi. Erta asali kiti binériami nili echi pagótami Jesús kitra. Jaré echi pagótami we kichili Pablo kiti bela raʼíchika nokali japi chúriká risoa olama. Jéaniká nokali japi echi walúala sontarsi yúa simama alí japi jéanema: “Nulé echi sontarsi kiti tomea echi Pablo japoná oyériwa”. Echi ko jéaniká nokali japi chiná uchuma buwea, echi Pablo ubuchími simíriachi ¡chapika miʼama!

Echi Pablo sobrínowala suwaba ruyeli echi ratéchali alí echi walúala sontarsi japi námili

Echi Pablo sobrínowala ko námili échaníachi. ¿Piri mi ko isílalé mayé? Echi ko a simili ku suwaba ruyesia echi ratéchali japi námili. Pablo ko kárika ruyésiwa sapú ku júali nawisánilia jéaneka “Sapú simiká japoná atí echi walúala sontarsi suwaba ruyeli japi mi námili”. ¿Acha simíliré Pablo sobrínowala echomí?... Ayena, chíkoré echi walúala wilíami nili echi sontarsi alí we natéami, echi Pablo sobrínowala ko tasi majali yúa simía echi sontarsi.

Echi walúala sontarsi ko a kipuli echi Pablo sobrínowala. Echi ko Pablo si tibuli, kiti bela biléana ubúchi simárinila nulela ko Cesarea mi. 500 sontarsi júali kiti si simama, jéaneli: “Jipi rokó toká”. ¿Echi rejoy a cha oláliré echi Pablo a miʼáliré japi aniká nokali? ¿Chu mi animea?... ¡Tasi namú olali! Ke omerili cha olaya.

¿Piri mi biné japi ikili chabé?... ¡Mujé ayénachó mi ke majáami nima japi riká echi Pablo sobrínowala! Ata ke majaka binérisaré echi pagótami Jeobá kitra. ¿Ami ma ke majaka binérisimiré echi pagótami Jeobá kitra?... We natéami ju japi ta binéripa echi pagótami Onorúami kitra. Echi riká ta nokisáaká wiká pagótami omérima sinibí pirea.

LEERIPO ECHI BIBLIA:

  • Hechos 23:12-24

  • Mateo 24:14; 28:18-20

  • 1 Timoteo 4:16