Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Raʼíchali kalabé japi Onorúami nawesa

 BINELÍWAMI 9

¿Piri nokisáré echi wénwala alí kúchuwala kiti kaníliami nima?

¿Piri nokisáré echi wénwala alí kúchuwala kiti kaníliami nima?

1. ¿Chúsiá echi niwíkami osisáré bilé oselí japi riká nulá echi gobierno?

Jeobá ko nijí echi kalabé raʼíchali, echi ko ju echi Onorúami we kaníliami alí echi ko nijí echi raʼíchali kalabé alí nakí kiti echi wénwala alí kúchuwala we kaníliami nima (1 Timoteo 1:11). Echi ko ju japi niwali echi niwíkami. Japalí echi niwíkami osá bilé oselí japi riká nulá echi gobierno, jepuná kuʼiro japalí kúchitisa kiti napawika pirélima echi wénwala yúa alí kaníliami nima. Echi Jesús najátami ko a nijéwisaré japi echi gobierno nulé japi a niwínali ko. Leeri Lucas 2:1, 4, 5.

Onorúami ko nakí japalí niwisa bilé rejoy bilé mukí yúa, japi ke siné ku rojama. Jeobá ko ke nakí kiti echi kunala alí upila pagótami iseni yúa nasawima (Hebreos 13:4). Echi ko kichí echi rojaníwami (Malaquías 2:16). We be nalí riwé japi bilé pagótami ku rojama alí che ku niwima, japiré echi kunala, upila ma, nasawísaká bilecho yúa. Leeri Mateo 19:3-6, 9.

2. ¿Chúriká nísaré echi niwíkami?

Japalí Jeobá niwali echi rejoy alí mukí echi ko nakiyé japalí niwisa anakupi niraa nakúrika nokimea (Génesis 2:18). Echi kunala ju echi nuláami, kiti bela a iyásaré japi newalé echi kúchuwala alí upila, ayénachó binérisaré Onorúami kitra. Ayénachó nakí echi binói upila kiti bela isimí namuti echi kitra tako we jilí ke. Echi niwíkami a nakisáré alí riwíwisaré anakupi niraa. Kiti a kaníliami nima, a binésaré wikáwika nokayá anakupi niraa, kiti okuánika ke sinibí aʼlá noká. Leeri Efesios 4:31, 32; 5:22-25, 33, alí 1 Pedro 3:7.

3. ¿A ku rojásaré echi niwíkami japi ke kaníliami ju?

Bilé niwíkami naʼáwika pirélisaká, okuánika we jiwérika nakisáré anakupi niraa (1 Corintios 13:4, 5). Echi Onorúami Raʼicháala ko ke aní japi echi niwíkami ku rojásaré kiti  kariwema echi namuti japi ke me natéami ju. Leeri 1 Corintios 7:10-13.

4. ¿Piri nakí Onorúami echi kúchuwala kitra?

Jeobá ko nakí japi echi kúchuwala kaníliami nima. Kiti bela bineri japi nokisáré kiti kaníliami nima japalí kulí ochérami ju. Ayénachó nakí kiti echi wénwala kitra binema echi namuti kalabé japi echi machí alí japi nokali (Colosenses 3:20). Ayénachó Jeobá nakí japi echi nóchilima alí echi Nolá, kiti echi riká kaníliami nima. Leeri Eclesiastés 11:9–12:1; Mateo 19:13-15, alí 21:15, 16.

5. ¿Piri nokisáré echi wénwala kiti echi kúchuwala kaníliami nima?

Echi wénwala jiwérika nokisáré kiti iyama echi kúchuwala japi koʼmea, japoná pirélima alí japi napáchima (1 Timoteo 5:8). We be nalí ke echi bi ju. Ayénachó binérisaré kiti nakimea Jeobá alí japi binema echi kitra (Efesios 6:4). Japalí echi wénwala a né bichíwali nakí Jeobá, echi kúchuwala newalá alí echi riká cho nokinali. A binérisaká, néeka echi Onorúami Raʼicháala, jepuná ko kuʼiro kiti aʼlá natama. Leeri Deuteronomio 6:4-7 alí Proverbios 22:6.

Japalí aʼlá nokisaa echi kúchuwala, echi wénwala anésaré japi aʼlá nokali, jepuná ko kuʼiri echi kúchuwala. Ayénachó busuré iyásaré alí iyónisaré kiti ke cháriká nokimea. Jepuná binelíwami tibú kiti ke chati nokimea alí kiti kaníliami nima (Proverbios 22:15). Ke siné risoa olásaré echi kúchuwala. Leeri Colosenses 3:21.

Echi testigo Jeobá a niwali jaré oselí japi kuʼiro echi wénwala alí kúchuwala. Suwaba echi oselí aní japi echi Biblia raʼicha. Leeri Salmo 19:7, 11.

 

Che machiwaami

NIWÍKAMI ALÍ KÚCHUWALA ATA MI KANÍLIAMI NIPO

Nokisí japi Onorúami aní kiti ta mi okuaka kanílipo

Okuá náriwami uchuwi japi mi ané chúriká mi isima mujé niwíkami

NIWÍKAMI ALÍ KÚCHUWALA ATA MI KANÍLIAMI NIPO

Chúriká ta mi okuaka katúwika nokiboa

A ta mi machiboa japi chúriká ta mi okuaka katúwika nokiboa kiti kanilia pirélipo.