Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Raʼíchali kalabé japi Onorúami nawesa

 BINELÍWAMI 13

¿Piri ikísima echi bichíwiliami kitra?

¿Piri ikísima echi bichíwiliami kitra?

1. ¿A aʼlá keʼré suwaba echi bichíwiliami?

Suwaba echi bichíwiliami olá pagótami japi aʼláala ju. Jeobá ko we natéami niraa iné jepuná pagótami. We be nalí we omonárami ju machiwaa japi wiká bichíwiliami nokali namuti we chati (2 Corintios 4:3, 4; 11:13-15). Wiká ata kipúami ju japi jaré bichíwiliami a nakówili, a oʼyali wiká pagótami alí tábili echi kuuchi kaachi. Jepuná ko we omonarti echi aʼlá bichíyami. Leeri Mateo 24:3-5, 11, 12.

Echi bichíwiliami né bichíwali kaníliti Jeobá, we nalí echi bichíwiliami ke bichíwali ko chijunti echi. Echi bichíwiliami ke bichíwali bineri ikaléwami Onorúami kitra alí bineri kiti echi suwíkami a bijí piré, alí jarecho si namuti japi ke Bíbliachi oserúa uchuwi. Nalí be Jeobá ko nakí japi echi pagótami machimea echi bichíwali echi kitra. Leeri Ezequiel 18:4 alí 1 Timoteo 2:3-5.

2. ¿Chu aní echi Biblia japi ikísima echi bichíwiliami kitra?

Onorúami ko ke kalé echi bichíyami japi mi nakiyá ruyá aní echi, alí japi né bichíwali nakí suwaba japi Satanás níwala ju (Santiago 4:4). Echi Biblia ko rewá suwaba echi bichíwiliami ke bichíwali Waʼlú Babilonia, kiti echi riká rewéami nili echi chabéwami ciudad japoná jona chotásili echi bichíwiliami ke bichíwali japalí ma nawali Echi Walubé Ukí. Onorúami ko ma kéayó suwábima echi bichíwiliami japi eki alí japi risoa olá echi pagótami. Leeri Apocalipsis 17:1, 2, 5, 16, 17 alí 18:8.

We be nalí Jeobá ko newalá echi pagótami aʼláala japi olá echi bichíwiliami ke bichíwali, alí Jeobá ko napabúsimi jepuná pagótami. ¿Chúriká isimí? Binérika echi bichíwali. Leeri Miqueas 4:2, 5.

 3. ¿Piri nokisáré echi pagótami aʼláala?

Echi bichíwiliami né bichíwali bineri kiti ta nakiká nokiboa anakupi niraa

Jeobá ko we nakí echi pagótami japi nakí echi bichíwali alí japi nokinali echi aʼláala. Kiti bela ané japi riwema echi bichíwiliami japi ke bichíwali ju. A né bichíwali nakiyáaká Onorúami, a nokiméalé japi echi nakí. Leeri Apocalipsis 18:4.

Echi bachá siglo, japalí echi julárami raʼíchili echi pagótami Onorúami kitra, echi pagótami ko we kanili japalí kipuli. Jeobá ko binérili echi pagótami chúriká aʼlá pirélima riweili alí jepuná ko we kanílitili. Tamujé ayénachó japi riká echi nísaré, ata nijéwisaré suwaba japi Jeobá nulá alí né bachá nóchilisaré echi. Leeri 1 Tesalonicenses 1:8, 9 alí 2:13.

Jeobá ko we kanílika naré echi pagótami japi riwé echi bichíwiliami ke bichíwali alí japi yúa napawí echi bichíwiliami japi né bichíwali ju. Sinéami echi, Onorúami amígowala ju, alí we nakirúami ju echi rejimá kitra alí sinibí pirélima. ¿Acha mi né kanílisa nili narea jepuná namuti kalabé? Leeri Marcos 10:29, 30 alí 2 Corintios 6:17, 18.

4. ¿Piri isiima Onorúami kiti echi pagótami kanílika pirélima alí kilii omáana Wichimóbachi?

Japalí Jeobá suwábisa echi bichíwiliami ke bichíwali, echi pagótami ma ke risoa olárami nima. Echi bichíwiliami ke bichíwali ma ke ékima alí ke rojama echi pagótami. Sinéami echi pagótami bilepi bi Onorúami né bichíwali nijéwima. ¿Ke cha ko raʼíchali kalabé ju? Leeri Apocalipsis 18:20, 21 alí 21:3, 4.