Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Raʼíchali kalabé japi Onorúami nawesa

 BINELÍWAMI 12

¿Chúriká ta omero muliwia Onorúami?

¿Chúriká ta omero muliwia Onorúami?

1. ¿A kipúiré Onorúami suwaba echi amachíkiwami?

Onorúami ko bayé echi pagótami omáana piréami kiti mulíwima echi amachíkika (Salmo 65:2). We nalí echi ko ke aniwáami ju japi Onorúami kipusú alí kaníliti suwaba echi amachíkiliami. Echi Biblia ko aní japalí bilé rejoy ochosa binói upila alí amachiki, Onorúami ke kipú (1 Pedro 3:7). Alí japalí echi israelitas chótali nokayá echi namuti chati, Onorúami ko ke kipúnalami nili. We be nalí echi ko a kipusú echi pagótami japi amachiki japalí chati namuti isiili alí we omona nílisa echi namuti chati kitra japi isiili, alí ma ke che echi riká isimí. Leeri Isaías 1:15 alí 55:7.

2. ¿Chúriká ta amachíkisaré?

Echi amachíkiwami ko ju aliwa walubéala bilé rikamti, kiti bela pe Jeobá bi amachíkisaré (Mateo 4:10; 6:9). Ayénachó, kiti ta namuti chati nokáami ju, ata amachíkisaré Jesús rewalá néeka, kiti echi ko mukuli kiti ta niyúbitami niba echi chati kitra (Juan 14:6). Jeobá ko ke nakí kiti ta amachíkipa raʼíchika echi bi raʼíchali wisabé niraa, kecho leérika biléana oselichi oserúa uchúwami, nalí né sulachí jonsa amachíkisaré. Leeri Mateo 6:7 alí Filipenses 4:6, 7.

Jeobá ayénachó kipú japalí ta pe nátaka bi amachiki (1 Samuel 1:12, 13). Echi ko bayé kiti ta sinibí amachíkipa, japalí ta busuré biʼyá, kecho ku ochiyá rokó, kecho koʼyá, alí japalí ta risoa nílisa. Leeri Salmo 55:22 alí Mateo 15:36.

3. ¿Chúriká nikuuro echi napawíliami?

Ata mulíwika piréami ju echi pagótami japi ke bichíwami ju Onorúami, alí japi kawéliami ju kiti ke mayé japi Onorúami we baʼóami niwama echi Wichimóbachi. Isini kaachi jepuná isimí kiti ta ma ke mulíwinali echi (2 Timoteo 3:1, 4; 2 Pedro 3:3, 13). Kiti bela ata napawísaré echi rejimá yúa kiti ta anakupi niraa kanílipa. Leeri Hebreos 10:24, 25.

 Ata yúa napawísaká echi japi a nakíami ju Onorúami, we ta mulíwipa echi. Japalí ta simía echi napawíliami japi niwá echi testigo Jeobá ata biné japi chu me nakiyá echi rejimá Jeobá. Leeri Romanos 1:11, 12.

4. ¿Chúriká mi oméroma muliwia Onorúami?

Ami mulíwima echi, ami nátasaká japi mi ma bineli echi kitra echoná Bíbliachi. Natá echi namuti japi niwali, echi busuréliami japi nijí alí japi isiima. Ami nátasaká alí amachíkisa, ami machimea chu me nakiyá, alí chu me aʼlá nátami ka Onorúami. Leeri Josué 1:8 alí Salmo 1:1-3.

Ami mulíwima Onorúami pe echi bi bichíwika. We nalí echi bichíwiliami ko ju japi riká bilé siwásili: sinibí rawé roʼésaré echi baʼwí, alí kiti muwésima echi bichíwiala, sinibí rawé ata natásaré chúsiá japi ta bichiwi né bichíwali ju. Leeri Mateo 4:4 alí Hebreos 11:1, 6.

5. ¿Piri namuti kalabé mi narema ami mulíwisaká Onorúami?

Jeobá ko we natéami niraa iné echi japi we nakíami ju echi. Echi ko a omero kuʼiria kiti ta ke riwepa bichiiya alí kiti ta sinibí pirélipa (Salmo 91:1, 2, 7-10). Aní piri namuti nayunti alí risoa níliti alí bineri chúriká aʼlá pirélima. Leeri Salmo 73:27, 28 alí Santiago 4:4, 8.

 

Che machiwaami

TAA BILÉ BINELÍWAMI ECHI BIBLIA KITRA

¿Chúsiá mi binésaré echi Biblia?

Wiká milloni pagótami ma machí japi aní echi Biblia alí echoná aká machili japi machinali chabé. Mujé ru, ¿Ami cho machinali japi aní echi biblia?