Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Raʼíchali kalabé japi Onorúami nawesa

 BINELÍWAMI 11

¿Chúriká ta kuʼíriwa echi Biblia kitra?

¿Chúriká ta kuʼíriwa echi Biblia kitra?

1. ¿Chúsiá ta newalé japi ta busuréwitami niba?

¿Chúriká nikuuro echi busuréliami kiti ta nátika nokiboa? (SALMO 36:9)

Jeobá, tamujé Onolá, niwali suwaba echi namuti, alí wabé aʼlá nátami ju. Ayénachó, we nakíami ju alí machinali japi ta ikí. Ata niwárami ju kiti ta mulipi yúa mochibo echi (Jeremías 10:23). Ayénachó japi riká echi kuuchi newalé japi anema echi wénwala japi nokisáré, echi pagótami ayénachó newalé japi Onorúami anema japi nokisáré (Isaías 48:17, 18). Echi busuréliami japi echoná Bíbliachi oserúa uchúi bilé chiliwéliami ju japi Onorúami nijí. Leeri 2 Timoteo 3:16.

Echi nulalíwami alí busuréliami japi Onorúami nijí bineri japi chúriká aʼlá kanílika pirélipa jipi alí chúriká sinibí pirélipa pe aminana mi. Echi kitra ta niwárami nili, kiti bela echi ko nakí japi ta kanílika nijéwipa. Leeri Salmo 19:7, 11 alí Apocalipsis 4:11.

2. ¿Piri ju echi busuréliami japi echoná Bíbliachi oserúa uchúi?

Echi busuréliami japi echoná Bíbliachi oserúa uchúi nikuuro kiti ta machiboa japi chúriká nakí Onorúami japi ta nokiboa. Echi nulalíwami ko ke chopi iyiri ju, echi nulalíwami ko a nijéwiliwa né japi riká aní echi nulalíwami (Deuteronomio 22:8). Kiti ta machiboa chúriká nijéwisaré echi busuréliami, bachá aʼlá natásaré piri aniwáami ju (Proverbios 2:10-12). ¿Chúriká ju jepuná? Echi Biblia bineri japi tamujé piréala, Onorúami chiliwéala ju. Machiwaa jepuná a nikúuroma, japoná ta nocha, japoná ta piré alí japalí ta basalowa éena, kiti ta newaláriwa japi ta sinibí tibuka nokisáré. Leeri Hechos 17:28.

3. ¿Chu iyiri ju okuá busuréliami wabé natéami japi echoná Bíbliachi oserúa uchúi?

Jesús raʼíchali jepuná okuá busuréliami kitra. Echi bachá ko ta binériwa chúsiá ta niwárami nili: kiti ta machiboa Onorúami, kiti ta nakiboa  alí kiti ta sinibí nijéwinilipa. Suwaba japi ta noká néwariwélisaré japi ta ke wikawi jepuná (Proverbios 3:6). Echi japi ke wikawi ko jepuná, Onorúami amígowala nima, we kanílika pirélima alí sinibí. Leeri Mateo 22:36-38.

Echi okuá busuréliami kitra ta kuʼíriwa kiti ta sinéami chopi riká simárika olaba (1 Corintios 13:4-7). Ata nokisáaká jepuná, japi riká ta Jeobá nipa, kiti echi ko sinéami chopi riká simárika olá. Leeri Mateo 7:12 alí 22:39, 40.

4. ¿Chúriká ta kuʼíriwa echi busuréliami kitra japi echoná Bíbliachi oserúa uchúi?

Echi busuréliami japi echoná Bíbliachi oserúa uchúi a nikuuro kiti ta nakiboa alí tibupa japi ta yúa piré (Colosenses 3:12-14). Echi Onorúami Raʼicháala ayénachó tibú japi tamó yúa piré, kiti bineri kiti echi niwíkami ke siné ku rojásaré. Leeri Génesis 2:24.

Nijéwiliwa echi busuréliami japi echoná Bíbliachi oserúa uchúi ata kuʼíriwa kiti ta tibupa echi winomí alí kiti ta kanílika pirélipa. Wiká pagótami nakí japi echi yúa nochama japi a nijewi ko echi busuréliami japi echoná Bíbliachi oserúa uchúi, pagótami japi ke ikaléami ju, japi ke chikó, alí japi aʼlá nocha (Proverbios 10:4, 26; Hebreos 13:18). Ayénachó, echi Onorúami Raʼicháala kitra ta binériwa japi ta kanílika pirélisaré echi namuti bi olaká japi ta newalé alí japi we natéami ko ju Onorúami amígowala níliwa alí ke me natéami ju wiká namuti oliwá. Leeri Mateo 6:24, 25, 33 alí 1 Timoteo 6:8-10.

Echi busuréliami japi echoná Bíbliachi oserúa uchúi ayénachó nikuuro kiti ta ke nayupa alí ke risoa olayá echi ripokala. Echi Onorúami nuláala aní japi ta ke tékisaré, ata nijéwisaká, ke me nayupa alí ta che wiká bamíali pirélipa (Proverbios 14:30; 22:24, 25; 23:20). Ata machí japi Jeobá riwé japi ta taa bajibo, we nalí ke nakí japi rikupa (Salmo 104:15; 1 Corintios 6:10). Echi busuréliwami japi echoná Bíbliachi oserúa uchúi, tibú echi pagótami kiti aʼlá nokimea alí kiti aʼlá natama (Salmo 119:97-100). Nalí be, echi Jesús najátami ko pe ke bi riwiwi echi busuréliami kiti ta aʼlá kanílika pirélipa, nalí ta nijewi kiti ta kanílitipa Jeobá, tamujé Onolá. Leeri Mateo 5:14-16.

 

Che machiwaami

TAA BILÉ BINELÍWAMI ECHI BIBLIA KITRA

Taa bilé binelíwami echi Biblia kitra

Naré binelíwami echi Biblia kitra ke natétika alí japoná mi nakí alí japalí mi nakí.