Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Niwíkami alí kúchuwala ata mi kaníliami nipo

 SECCIÓN 7

Chúriká mi binérisaré mujé kúchuwala

Chúriká mi binérisaré mujé kúchuwala

“Jepuná raʼíchali japi ni mi nulé jipi japi mi isima né sulachí niraa nijewi; alí mi binérisaré mujé kúchuwala.” (Deuteronomio 6:6, 7)

Jeobá niwali echi niwíkami alí echi kúchuwala, kiti bela Jeobá ko nulela ko echi wénwala kiti aʼlá tibuma aboni kúchuwala (Kolosenses 3:20). Echi wénwala ju japi binérima echi kúchuwala Jeobá kitra, kiti ma ochérisa ke chati nokáami nima (2 Timoteo 1:5; 3:15). Ayénachó mi machisáré mujé ranala sulala, echi ko aniwáami ju japi mi machimea japi chu nili mujé ranala, mujé binoy aʼlá isisaká mujé kúchuwala echi riká cho isima japi mi isimí. Bachá biné japi aní echi Biblia kiti mi aʼlá ruyema echi kuuchi (Salmo 40:8).

 1 IWIRI MUJÉ KÚCHUWALA KITI MI YÚA RAʼICHAMA

JAPI ANÍ ECHI BIBLIA: “Galabela kipusa mapalí auché jaré ʼyemi mi raʼícha” (Santiago 1:19). Ami kanili japi mujé kúchuwala mi raʼíchima japi mi anema japi nili binói. Kiti mi yúa raʼichánilima mujé ko sinibí mi we aʼlá kipuma. Kilii mochika raʼichasi japi anénali (Santiago 3:18). Ami we iyóniami nísaká mujé kúchuwala. Ke mi anémalé japi nili aboni kiti mayema japi mi iyónima. Sinibí jéané japi mi we nakí alí kiti sapú yúa iyó (Mateo 3:17; 1 Corintios 8:1).

JAPI MI ISIMA:

  • Japalí mujé kúchuwala mi yúa raʼichánilisa, yúa raʼichá aʼlá kipú japi mi ané

  • Kecho risoa níliachi mujé kúchuwala, sinibí yúa raʼichá

2 NÉ AʼLÁ MACHÍ JAPI CHU NILIA ANÍ

JAPI ANÍ ECHI BIBLIA: “Japi bachá aʼlá machí ko japi chu anema we aʼlá nátami ju” (Proverbios 16:20). Isini kaachi mi aʼlá nátika isima chúsiá mujé kúchuwala échinília. Echi kuuchi isini kaachi raʼicha japi ke bichíwali ju, aní ma japi ke anínali. Japalí mi yúa raʼíchachi aʼlá kipú kiti sapú iyóami niika, alí ma suwénachi raʼichá (Proverbios 18:13; Proverbios 19:11).

JAPI MI ISIMA:

  • Japalí mi yúa raʼíchachi mujé ranala, kiti raʼichá kecho suwénachi raʼicha, kiti iyó japi mi anema mujé ranala

  • To natabo japalí mi bamibi japi ikí bamibi jipi mujé ranala, ¿piri namuti mi kalé?

 3 OKUAKA NAKÚRIKA BINÉRISI ECHI KUUCHI

JAPI ANÍ ECHI BIBLIA: “ʼYemi ʼwéntami ketasi chuwé yóniga naʼáwatasi echi jaré ʼyemi kúchuwala, chopi galá nijéwiyami ochébanatasi, ne galá ruwigá” (Efesios 6:4). Jeobá ko nuleli echi kuuchi kiti nijéwima echi onolá alí echi iyela. Japi ta mi kúchuwami ju aʼlá raʼámisi echi kuuchi kiti aʼlá nijéwami nima echi wénwala alí riwíwami jarecho (Efesios 6:1-3). Echi kuuchi ko machí japalí echi wénwala ke tasi “chópiriga niráa ʼnata[...]” (1 Corintios 1:10). Kiti bela, japalí ta mi ke anárika natásaká, kiti naʼáwisi japalí echi kuuchi muchúwachi, echi riká ta mi nokisáaká emi kúchuwala ke mi riwíwima.

JAPI MI ISIMA:

  • Okuaka raʼichasi japi ta mi chúriká raʼámipo emi kúchuwala

  • Japalí ta mi binérnali emi kúchuwala, okuaka sinúrika ta mi binéripolé, to natabo: “¿Chúsiá echi riká nalí binérnali?”

 4 BACHÁ NATÁ JAPI MI BINÉRIMARÉ

JAPI ANÍ ECHI BIBLIA: “Bineri echi kuuchi kiti machimea chu iyiri buwérili simama” (Proverbios 22:6). Ami aʼlá binérinalaká mujé kúchuwala ami iwerika isísaré, bachá natá japi chúriká mi binérima mujé kúchuwala alí piri mi isima japalí chati isisa (Salmo 127:4; Proverbios 29:17). Mujé kúchuwala chati isisaká raʼami, bachá aʼlá ruyé japi ke aʼlá nili japi isili kiti machimea japi ke aʼlá ju (Proverbios 28:7). Ayénachó bineri japi aʼlá binénilima echi Onorúami Raʼicháala, kiti machimea echi busuré japi echoná uchuwi (Salmo 1:2). Echi ko we kanílika pirélima a nokisáaká japi we aʼlá ju (Hebreos 5:14).

JAPI MI ISIMA:

  • We iwérili isí bineria mujé kúchuwala Onorúami kitra, kiti aboni machimea japi né bichíwali bité Onorúami alí japi echi ju japi tibú

  • Bineri echi kuuchi japi ke inema echi chati namuti japi buyaami ju echoná Internet alí echi redes sociales. Ayénachó ané mujé kúchuwala piri nokimea kiti a nirú echi chati pagótami japi tábiami ju

“Bineri echi kuuchi kiti machimea chu iyiri buwérili simama”