Malaui

Napawíliami japoná ta aneliwa chúriká nawisaba

Nawesa jari

Napawíliami japi napawí echi ochérami bi

Echi Oserúami Griegas Cristianas a we raʼicha echi Bernabé alí echi julárami Pablo kitra. Jepuná pagótami oʼwéala ochérami nili japi simíbali japoná napawíliwi. ¿Chúsiá echi riká nokali? Kiti nakiyé japi we kanílika nóchilima Jeobá. Pablo ko né inili checho ku siminália inesia echi rejimá chúriká nóchilia muchuwa Jeobá. Chíkoré we miká nili japomí piree, kiti kanílitima (Hechos 15:36). Jipi, echi riká cho noká echi oʼwéala ochérami circuito japi si echoná napawíliwachi usani niraa michá.

A si kiti ta ke siwepa. Echi walúala ochérami circuito ibili congregación simiba bilé bamíali niraa osá simari, bilé tarali rojorá. Ata binésaré japi isimí echi rejimá. Jaré oʼwéala ochérami circuito ko ma niwíkami ju alí echi upila ayénachó nakuuri. We kanili kulí ochérami yúa raʼicha alí echi wéakami ma, ayénachó tamujé yúa simiba nawisasia echi raʼíchali kalabé alí simiba tamujé yúa echi pagótami pirélachi binérisia echi Biblia kitra. Echi rejimá japi nawá napawíliwachi alí echi ochérami okuaka simiba echi rejimá bitélachi busuré iyasia; alí ayénachó nijí echi nawésali japoná ta napawí alí ayénachó japalí napawí wiká pagótami japi bilé rawé ju kiti ta jiwérika nokísipa (Hechos 15:35).

Echi kitra ta we natéami ju. Echi oʼwéala ochérami circuito japi si echoná napawíliwachi we natéami niraa iné echi rejimá alí nakí japi we kanílika nóchilima Jeobá. A napawí echi ochérami alí echi jaré nakúurami rejoy yúa alí raʼicha japi chúriká aʼlá nochama echoná napawíliachi, alí busuré iʼaliwa japi chúriká nochásaré. Ali ayénachó kuʼíriwa echi precursores kiti aʼlá nawesami nima alí kiti alá kuʼírima jarecho. Echi oʼwéala ochérami ne kanili machiyá japi echi pagótami ma napawísimi tamujé yúa alí ma nokísimi japi Jeobá nakí. Ibili rejimá we jiwérika noká nocha “Mapu [ta] kuʼwír[itami]” nipa (2 Corintios 8:23). Japi noká echi rejimá, nijéwipa kití bichíwi Onorúami (Hebreos 13:7).

  • ¿Chúsiá si echi oʼwéala ochérami circuito japoná napawiwa?

  • ¿Piri mi isíisaré kiti mi simea japalí nawáachi echi walúala ochérami?