Echi Abrahán kúchuwala ko we aʼlá pireili. Onorúami ko a tibuli José japalí Egíptochi biteili

JEOBÁ ko a machili kiti siné rawemti echi Nolá we nakiwáami a nijima riweili binói bitéala. Génesis 3:15 anili japi echi riká ikimea. Kiti echi pagótami machimea echi waʼlú okolí japi echi olama riweili japalí echi Nolá mukusaa, echi ko isiili kiti osimea echoná Bíbliachi japi ikili japalí echi aneli Abrahán kiti miʼlimea Isaac, echi binói nolá, japi echi we nakili.

Ke ta bilé wekawásaré japi Onorúami aneli Abrahán kiti echi Niyúbiami ko nawama riweili echi Isaac jona. Echi ko a we bichíwili japi Jeobá aneli, kiti bela Abrahán ko a machili kiti Onorúami a oméroma ku wilasia echi nolá. Alí biché, Abrahán ko ma a nijéwali alí ma miʼlimea riké Isaac. We nalí, japalí kecho miʼali, Jeobá ko júali bilé ángel kiti anema Abrahán kiti ke miʼlimea Isaac. Kiti bela Onorúami ko anili kiti Abrahán ko we bichíwiami nili, alí a aneli japi iyama riweili wikabé namuti aʼláala.

Pe aminana ko, Isaac ma olali okuá kúruwi: Esaú alí Jacob. Bineli bi Jacob we nakíami nili echi namuti japi Onorúami níwala nili, alí kiti bela nareli wiká namuti kalabé. Onorúami ko iyali bilecho rewalá, jipi ko rewéami nili: Israel. Echi makoy okuá kúchuwala nili japi chótali makoy okuá pueblos Israel. We nalí be ¿chúriká najítili jepuná makoy okuá kúchuwala wabé walubé pueblo?

Suwaba jepuná ko chótali japalí echi wéala bachirúami José kitra nakili japi José olali. Tasi bilé nakiwáami nili echi José, alí kiti bela ralineili pa japi riká bilé pioni. Echi japi ralali, ma tóoli mi jemi Egíptochi alí japalí ma echoná biteili, we jilili. We nalí, Onorúami ko a kuʼíroli jepuná remalí aʼlá nijéwami alí japi ke majáami nili, alí siné rawé, echi silíami Egíptochi nuláami a wilali walúala wilíami José. Echi riká a oméroli kuʼiria echi wéala bachirúami japalí ma ke olali koʼwáami alí Jacob ko júali echi mi Egíptochi kiti ralimea koʼwáami. ¿Jépuká ralinéwili echi koʼwáami echoná Egíptochi? ¡Echi japi ralinéwili ko José nili! Japalí ma riwisaa echi wéala bachirúami ma nalali echi yúa, echi ko we omónali kiti echi wéala bachirúami nokali namuti japi ke aʼlá ju, we nalí José ko a be wikáwilipa kiti we mi omona nili japi nokali alí aneli kiti pama echi onolá, alí sinéami echi téemala. Echi silíami Egíptochi bitéami iyali bilé weʼé we aʼláala, alí echi José téemala wiká muwésili echoná alí ma chotásili olayá wiká namuti. José ko a machili kiti Jeobá nikúuroli kiti né a echi riká ikimea namuti japi riká Jeobá anili.

Jacob ko biteili echoná Egíptochi, echi pagótami yúa japi echi we nakili, alí echoná mukuli. Japalí kecho mukuyá a anili kiti echi Niyúbiami nima riweili bilé silíami we jiwérami alí kiti jepuná ko nawama riweili echi binói nolá Judá jona. Pe wabé aminana bamíali, José ko anili kiti Onorúami bujanama riweili echoná Egíptochi jona sinéami echi Jacob kúchuwala.

(Jepuná ko uchúi echoná Génesis capítulos 20-50 alí Hebreos 11:17-22.)