Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Echi Biblia, ¿piri ju japi aní?

 BINELÍWAMI 7

Onorúami ko niyúbili echi israelitas

Onorúami ko niyúbili echi israelitas

Jeobá júali namuti chati ikiwáami mi jemi Egíptochi, alí Moisés ko buyánali echoná jona echi israelitas. Néeka Moisés, Onorúami ko iyá Nulalíwami

ECHI israelitas ko wiká muwésili echi mi jemi Egíptochi alí wiká namuti olali. Alí biché chotásili nulasia bilé kulíwami silíami, japi faraón anelíwami nili alí japi ke machili José, jepuná ko we chati nili alí ke wachía isiili. Echi ko mayeli japi echi israelitas ma wiká muwésili, kiti bela nulali pa kiti pioni niwaba alí kiti silinárami nima echi kuuchi muchi, japi kúruwi nili, echoná bakochi japi Nilo anilíachi nili. We nalí be, bilé mukí japi ke majali, rikali binói múchuwala biléana walírili alí chinásili chaliwachi ayé japi niruili echoná bakochi. Echi faraón malala riwali, alí Moisés rewarali, echi taa muchi ko ochérili echoná silíami bitélachi.

Japalí Moisés olali 40 bamíali, riwali japi bilé walúala wilíami egipcio wipisoli bilé israelita alí Moisés ko kuʼíroli echi israelita, we nalí jepuná ko tasi me kuʼíroli Moisés, kiti bela we miká simili pa echoná Egipto jonsa. Japalí olali 80 bamíali, Onorúami jéaneli kiti ku roʼima Egíptochi alí japi nulema faraón japi buyanama echi israelitas echoná Egipto jonsa.

Faraón ko ke nijewánalami nili, kiti bela Onorúami ko rikírili echi egipcios makoy cha ikiwáami kitra. Japalí Onorúami kecho júali bilé namuti cha ikiwáami, Moisés ko simili japi mi ayásili echi faraón alí nárili acha nakiima japi echi israelita buyama. We nalí be echi faraón sinibí we niráami nili, alí echi ko nikónalami nili Moisés yúa alí Jeobá yúa. Echi kuwachimi cha ikiwáami japi júuliru echi egipcios, Jeobá ko júali bilé ángel kiti koʼwimea sinéami kuuchi kúruwi, japi bachá ranarúami nili, japi pireili echoná Egíptochi. Echi ángel ko ke simíroli echoná israelitas pirélachi japi a nijéwiami nili ko Jeobá, alí japi a iyókili ko suweki ayé iyéwichi echi bowá lalá kitra japi miʼali. Kiti ke wikawama jepuná ikiwáami, echi riká nokaká néwalayé echi omowalíwami Pascua anelíwami.

Pe aminana japalí mukuli echi faraón bacháwala nolá, faraón nuleli Moisés alí israelitas japi buyama Egíptochi jonsa. We sapuka jepuná ko nokali japi newaleli kiti buyama Egíptochi jonsa. We nalí japalí echi riká ikiyé, faraón ko ma ke nakili japi buyama alí machíinisili najátisia echi sontarsi yúa alí carro japi kitra nakowi. Japalí siili né suwé ayé mar Sitákami anilíachi, echi egipcios ko mayeli kiti echi israelitas ko etia ikili alí japi ke oméroma buyaa. We nalí be Jeobá ko irápili echi mar Sitákami, alí echi pueblo simárili buichimi japoná wakichea wilili. Japalí echi egipcios júmisili kiti sibama, Onorúami ma ke chéwili echi baʼwí alí faraón alí echi sontarsi ma silili echoná marchi Sitákami.

Jaré rawé pe aminana, echi israelitas ko ripili mulipi ayé rabó Sinaí anilíachi, alí echoná Jeobá ko isiili bilé katúwiliami echi yúa. Jeobá ko néeli Moisés alí iyali nulalíwami echi israelitas, jepuná nulalíwami ko tibuli alí iyali suwaba japi newaleli kiti aʼlá pirélima. Echi a nijéwiami nísaká Jeobá alí ke sineti riwésaká, Jeobá a sinibí kuʼíroma riweili alí echi ko néerami nima riweili kiti kuʼírima jarecho pueblos.

We nalí be, né nokí sinéami echi israelitas nokali japi a néwariwéili japi ke bichíwili Jeobá. Onorúami ko rikírili alí nakili kiti 40 bamíali pirélima biléana japoná ke wesi pireili alí japoná ke iteili baʼwí. Alí biché, Moisés ko jéaneli Josué, bilé israelita nijéwami, japi echi nulema riweili echi israelitas. Alí biché, nawali echi rawé japi echi israelitas moʼimea riké weʼérili japi Onorúami aneli Abrahán japi iyama riké.

(Jepuná ko uchúi echoná Éxodo, Levítico, Números, Deuteronomio, Salmo 136:10-15 alí Hechos 7:17-36.)