Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Echi Biblia, ¿piri ju japi aní?

 BINELÍWAMI 4

Onorúami ko a isiili bilé katúwiliami Abrahán yúa

Onorúami ko a isiili bilé katúwiliami Abrahán yúa

Abrahán ko a nijewi Onorúami. Echi ko a wabé bichíwiami nili Jeobá, kiti bela echi ko aneli kiti iyama riweili wiká kúchitiwami

MA SIMÍROLI 350 bamíali japalí jona nawali Echi Walubé Ukí. Abrahán ko biteili echoná Urchi, jepuná ko biléana puéblochi nili japoná wabé mewi winomí, alí jepuná pueblo ko nili japi jipi Irak ju. Echi ko bilé rejoy nili japi we bichíwiami nili Onorúami, we nalí a machiboa riweili chi iyena me wabé bichíwiami nila Onorúami kiti bitélima riweili rawemti we jilírami. Ma ineba chi ikila.

Jeobá ko aneli Abrahán kiti riwema echi kalí japoná biteili alí kiti simea bitélisia biléana cho paísichi: Canaán. Abrahán ko we jiyáwika nijéwali. Simili echoná biléanachi japoná we miká nili kipi upí yúa, Sara, alí sinéami echi japi echi yúa pireili, ayénachó Lot, echi Abrahán bachilá nolá, echi yúa simili. Echoná Canaanchi ke pi pe biléana bi mi bitea isiili pa, wikaná mi bitea ijósili alí echi kalí ko pe chiʼní nili. Jeobá ko isiili bilé katúwiliami Abrahán yúa: echi ko aneli japi sinéami pagótami omáana Wichimóbachi piréami a narema riweili namuti kalabé kiti Abrahán ko aʼlá nijéwami nili, alí echi kúchuwala né wabé walubé pueblo nima riweili, alí echi país Canaán, echi níwala nima riweili.

Abrahán alí Lot a olali wiká bowaka alí waasi. Abrahán ko we aʼláala pagótami nili kiti aneli echi Lot kiti animea chu iyiri weʼé chapimea riweili japoná uchuchama riweili echi namuti jákami echi bukula. Lot ko chapili echi weʼé we aʼláala echoná mulipi ayé bakochi Jordán anelíachi, alí simili bitélisia echi mi mulipi Sodómachi. We nalí echi pagótami japi echoná pireili nokali namuti wabé chati; we omonáriami nili Jeobá.

Japalí Abrahán ma ke yúa biteili Lot, Jeobá ko aneli kiti wiká kúchiami nima riweili, echi riká japi riká echi sipolí japi nirú ripá siyónachi. Abrahán ko a bichíwiami nili Jeobá, we nalí Sara, japi echi upila nili, tasi oméroli olayá kúchuwala. Alí biché, japalí echi olali 99 bamíali alí Sara né nokí 90, Onorúami ko aneli kiti olama riweili bilé towí. Alí a echi riká ikili: echi ko a ranali taa muchi japi rewairu Isaac. Tako Abrahán ko a olali jarecho kúchitiwami, echi Niyúbiami japi aniiru japi nawama riweili echoná Edenchi, Isaac jona nawama riweili.

Echalí rawemti, Lot ko biteili echoná Sodómachi kipi upí yúa alí echi okuá aʼmalala. We nalí echi ko ke pi isíiami nili chati namuti japi riká nokáami nili echi pagótami japi echoná pueblo piréami nili, kiti echi ko né aʼláala pagótami nili. Kiti bela, japalí Jeobá koʼwinaili echoná Sodómachi piréami, bachá júali okuá ángeles kiti anérami nima riweili Lot chi ikimea echoná. Echi ángeles ko a nuleli echi Lot, echi upila, alí echi aʼmalala kiti né jiyáwika buyasa riweili echoná Sodómachi jona alí ke wesi inenasa riweili upaka. Alí biché, Onorúami isiili kiti rujima ripáana siyónachi jona echi naʼiki alí azufre. Echi riká suwábali echi pagótami chati japi echoná Sodómachi pireili alí, ayénachó, japi pireili echoná Gomórrachi. Lot alí echi okuá aʼmalala a niyuli echi mukuwáami kitra. We nalí echi upila ko upaka ineli, japiré kiti echi riká isiila kiti we nakili echi namuti japi riweli echoná Sodómachi. Mukuli kiti ke nijéwali japi riká aneiru.

(Jepuná ko uchúi echoná Génesis 11:10–19:38.)