Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Echi Biblia, ¿piri ju japi aní?

 BINELÍWAMI 21

Jesús ku wilásiliru

Jesús ku wilásiliru

Jesús ko néwaikili kiti riwirúami nima riweili kipi najátowala kitra kiti kami nilia nílitima alí iyama kulíwami nulalíwami

JAPALÍ bikiá rawé mukuká boʼili Jesús, jaré umukí simíali risochí japoná tora boʼili alí riwali irápita wilíachi. Bilé rikamti iyéliré echi rité japi póoli echi risochí, alí ke wesi iteili echoná risochí.

Alí biché okuá ángeles néwaikili. Bilé ángel jéaneli echi umukí: “Yémitamo amí echi Jesusi echoná Nasarétachi bitéami [...]. [¡]Ma ku owínari!” (Marcos 16:6). Alí sapuka, echi umukí júmisili anemia echi julárami. Buichimi natépiliru echi Jesús, alí echi ko jéaneli: “Ke tasi majasi. Ma ku simíbaga ruyébasi echi jaré Nijé ritémawara [...]. Jéanesi mapurigá aboni simama echoná Galiléachi aniríwachi kawírari. ¡Echoná aboni tamí riwimea!” (Mateo 28:10).

Alí biché pe aminana ko, japalí okuá najátami japi Jerusalenchi jona síirami nili alí japi simíbami nili mi jemi Emaús, natépili bilé rikamti japi ke machili alí mulíwili alí nárili piri raʼíchali. Echi ko Jesús nili, we nalí echi ko ke machili kiti echi ripokala ko ma ke japi iyiri nili japi riká nili pe chabénalaká. Echi ko aneli né wabé omónaka kiti raʼíchali kipi Binériami kitra alí echi rejoy ko ma ruyeli suwaba japi anili echi Oserúami echi Mesías kitra. Jesús ko a isiili japi riká anili echi oserúami japi isiima riweili echi Mesías. * Japalí ma machili kiti Cristo yúa raʼíchali alí kiti ma japi riká bilé ángel nili, echi ko ma ke néwaikili.

Echi okuá najátami ku roʼili Jerusalenchi alí simíali inesia echi julárami, japi napawika mochili era érika. Japalí jéaneli japi ikili, sinéami japi echoná mochili majali kiti Jesús checho a néwaikili. “¿Churékurátamo siʼwináriga nata echoná yemi surárachi?”, nárili. Alí jéaneli: “Echi riká osirúami ju mapu arigá wérari nili mapurigá Nijé ni wabé risúu orárami nimi, [...] ayénachó mapurigá baikiyá chiʼrigá Nijé ni ku owínama riwéari” (Lucas 24:38, 46).

A wisabé riwirúami nili 40 rawé. Bilé rawé, 500 pagótami riwali. Mayeliwa japi echalí rawé iyairu kipi najátowala jepuná we natéami nóchali: “Ku simíbaga yemi, aʼlá bichíiraga binérasi né sinéami echi jaré pagótami, né suníami jenaʼí wichimóbachi piréami [...]. Né aʼlá binérasi echi jaré pagótami mapurigá aboni aʼlá nijéwaga orama né suwaba namuti mapurigá Nijé ni yemi mi nuleli. Ayénachó né aʼlá machisí mapurigá Nijé ni yemi mi yúa atí sinibí rawé, echalí né jubá wichimóbachi suwibáriachi rawé iyénasi” (Mateo 28:19, 20).

Echi kuwachimi rawé japi napawili echi makoy bilé najátami japi nijéwami nili jéaneli: “Chopi japalí echi Wabé Alabé Riosi [jiwérala] yemi mi yúa moba nawama, echalí Riosi [jiwérala] yemi mi káraga nulema [...]. Alí bichétamo né suníami niraa nawisásiya simabo Nijé Raʼíchara [...]. Ayena chótamo nawésabo echoná suníami né wabé mikabéana jenaʼí wichimóbachi” (Hechos 1:8). Alí biché pe aminana ko chotásili ku moosia ripari siyónachi, alí kilipi kilipi niraa echi nolí isiili kiti ma ke che inema echi julárami.

(Jepuná ko uchúi echoná Mateo capítulo 28, Marcos capítulo 16, Lucas capítulo 24, Juan capítulos 20 alí 21 alí 1 Corintios 15:5, 6.)

^ parr. 3 Echoná binelíwami 14, 15 alí 16 jepuná oserúachi mi riwiméaré jaré namuti japi isiili Jesús japi ma aniyé echi oserúami japi isiima riké echi Mesías alí ayénachó echoná apéndice japi aní “Jesucristo, el Mesías prometido” echoná oselichi ¿Qué enseña realmente la Biblia?