Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Echi Biblia, ¿piri ju japi aní?

 BINELÍWAMI 9

Echi israelitas ko tali bilé silíami

Echi israelitas ko tali bilé silíami

Echi japi né bachá silíami nili echoná Israelchi, japi Saúl rewéami nili, tasi nijéwili Jeobá. Onorúami ko isimí bilé katúwiliami echi silíami yúa japi pe aminana wilairi, japi David rewéami nili, alí aneliwa kiti echi gobiérnowala ko ke sineti suwibama

PE AMINANA japalí mukuli Sansón, biteili mi jemi Israel bilé juez alí nawésami japi Samuel rewéami nili. Echi israelitas ko nínalami nili japi riká echi jarecho pueblos, alí kiti bela aneli Samuel kiti echi ko nakili bilé silíami. Jepuná ko isiili japi we mi omonaa nílima Jeobá, we nalí echi riká isiili alí jéaneli Samuel japi wilama Saúl japi riká bilé silíami. Saúl ko bilé rejoy we aʼláala nili, we nalí pe aminana ko chati ayenli alí niráami, ke nijéwili Onorúami. Kiti bela Jeobá ko ma ke nakili japi silíami nima alí jéaneli Samuel japi jéanema David japi echi nima riweili echi silíami pe aminana mi. We nalí, wiká bamíali simároli japi David silíami nima mi jemi Israel.

Siné rawé, David simili inemia wéala bachirúami, echi ko Saúl sontársiwala nili alí niruli nakówami. David ineli japi echi sontarsi we majali. ¿Chu ikiyé? Bilé sontarsi wabé wilibé filisteo, japi Goliat rewéami nili, kawéliami nili echi israelitas alí echi Onorúamiwala alí nakili kiti nakoma echi yúa. David ko we iyoli alí ayena nikónili echi yúa, chíkoré David ko pe taa bilé remalí nili larú. Bilé onda alí pe okuaa rité, David machínisili nikosia echi Goliat yúa japi né wilí nili, né nokí bikiá metros. Goliat ko pe mi kawelia nili, we nalí be David ko jéaneli japi niyúrima kiti nikoma echi Jeobá nikúurowala kitra. Bilé riteti kitra basibuka rikábili. Pe alínala ko ma iyeli echi waʼlú piyaka alí jepuná kitra ripúnali echi moʼola. Japalí jarecho sontarsi filisteos riwali, machínisili we júmaka kiti we mi majaa nili.

Saúl ko we kaleli japi isiili David alí kiti bela iyali bilé wiliwáami we natéami echi sontarsi kitra. We nalí japalí David chotásili niyuria nikowa, Saúl ko ma chotásili mi kichía nilia David alí mi miʼlinalia nili. David ko másili, kiti ke miʼliboa. Tako a wiká bamíali simírili larú ichípika isiá, a sinibí be riwiili Saúl ba. ¿Chúsiá? Kiti echi ko ma a machili kiti Jeobá wilali silíami niraa Saúl. Pe aminana ko, Saúl mukuli biléana nakóliwachi. Alí biché, David kulíwami silíami najítili, echi riká japi riká Jeobá aneli.

“Nijé isiima japi binói gobiérnowala né wabé jiwérami nima sinibimti.” (2 Samuel 7:13)

David ko niwánalami nili Jeobá kalila. We nalí be Onorúami ko aneli japi echi ko ke niwama riweili, nalí niwama riweili kipi nolá. Echi japi niwali ko Salomón nili. David ko ke tasi bela niwali larú, Jeobá ko pe ariká be iyali bilé namuti rikamti we natéami: isiili bilé katúwiliami echi yúa, aneli kiti echi wiká isélikami we natéami echi kitra jona nawama riweili alí kiti echi ko bachá nima riweili. Ayénachó aneli kiti jepuná isélikami kitra machíinama riweili echi Niyúbiami japi anili mi jemi Edenchi japi nawama riweili. Echi Niyúbiami ko machirúami nima riweili japi riká echi Mesías, echi pagótami japi Jeobá néema riweili kiti Silíami nima echi Onorúami Gobiérnowala, bilé gobierno japi ke siné rawé suwibama.

Kiti matétara iyama Jeobá, David ko napabuli wiká namuti we semati kiti echi kitra niwama ruli echi Jeobá kalila. Ayénachó, Jeobá nikúurala kitra osali wiká salmos, jepuná ko ju wikaráliami japi kitra anema matétaraba Jeobá. Japalí kecho mukúa, David ko anili japi Jeobá kuʼíroli isiá suwaba japi echi isiili, kiti bela osali pa: “Echi Jeobá jiwérala nili japi tamí kuʼíroli raʼicha, alí echi raʼicháala echoná nijé chamelálachi chukuli” (2 Samuel 23:2).

(Jepuná ko uchúi echoná 1 Samuel, 2 Samuel, 1 Crónicas, Isaías 9:7, Mateo 21:9, Lucas 1:32 alí Juan 7:42.)

Che machiwaami

Echi Biblia, ¿piri ju japi aní?

Isélikami aʼláala alí ke aʼláala

¿Chúriká rojali okuá pueblos Israel?