Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Echi Biblia, ¿piri ju japi aní?

 BINELÍWAMI 13

Isélikami aʼláala alí ke aʼláala

Isélikami aʼláala alí ke aʼláala

Echi pueblo Israel okuaná niraa rojaní, alí wiká isélikami Israelchi nirúami pe riweli Jeobá. Echi babilonios ko suwábali Jerusalén

PE AMINANA japalí Salomón ma riweli Jeobá, Israel ko rojaní okuaná niraa alí jawa okuá isélikami, echi riká japi riká anili Jeobá. Rehoboam, echi Salomón nolá, wilairu silíami niraa alí echi ko we chati nili echi pueblo yúa, kiti bela makoy pueblos, japi pireili echoná nórtechi, rojanálami nili pa. Echi jarecho okuá pueblos riwiili echi David gobiérnowala japi Jerusalenchi nuláami nili. Echi ko machirúami nili japi riká gobierno echoná Judá nirúami, jepuná ko mi surchi nili.

Ke wesi jepuná okuá jáwami sinibí kilii kanílika pireili, kiti ke bilé nijéwami nili alí tasi bilé bichíwiami nili Jeobá. We nalí echi gobierno japi niruili echoná Israelchi echoná nórtechi né wabé chati nili, kiti echi isélikami né chokichí jona nokali kiti echi pueblo ke nijéwima Jeobá alí kiti nakimea jarecho onorúami japi ke bichíwali nili. Tako Onorúami ko a bela júali larú nawésami japi riká Elías alí Eliseo, echi ko ke pi bilé nijéwami nili pa tako a riwali larú japi jepuná nawésami a jawásili jaré suwíami. Alí biché, Onorúami ko a riweli kiti echi Asiria suwábama echi Israel bi.

Pe wabé wikabé bamíali pe aminana, echi gobierno japi niruili echoná Judá, mi jemi surchi, ayénachó rikíritami nili Onorúami kitra. Echi japi nawésami ju Onorúami kitra ko a aneli echi wéala jáwami japi ikimea riweili, we nalí pe okuáabi kipuli alí nakili kiti echi pueblo nijewama. Bilé ko echi silíami Josías nili, echi ko a nakili kiti echi pueblo riwema echi onorúami japi ke bichíwali nili japi olali alí kariweli echi Jeobá kalila. Japalí nóchali echoná kalírili, riwiiru echi Moisés Nulalíwala. Kiti bela Josías ko aminabi we kanílika nóchali kiti suwábama riké echi namuti chati japi nokayé echi pueblo.

We nalí, sinéami japi nulali japalí ma ke biteili Josías echi ko ke pi japi iyiri Josías nili pa. Kiti bela Jeobá ko riweli kiti Babilonia suwábima Jerusalén alí echi Jeobá kalila. Echi japi ke suwili japalí nakoiru, echi ko tóoiru echoná Babilóniachi alí Onorúami ko anili kiti 70 bamíali pioni nima riweili echoná Babilóniachi alí pe aminana ko ma ku roʼima riweili echoná japoná pireili chabénalaká. We nalí echoná weʼérili Judá anilíachi, tasi wesi pirélima riké.

Japi iyena ko nawama riweili echi Silíami japi aniiru japi nawama riweili, echi Mesías, ke wesi echi David kúchuwala nima riweili isélikami. Nokí sinéami echi isélikami japi machíinali echi David kitra, a néwariwélitili kiti echi pagótami ke omero aʼlá nulayá. Echi Mesías bineli bi oméroma riweili isiá jepuná. Kiti bela, Jeobá ko aneli echi kuwachimi silíami: “Echi corona [...] tasi wesi níwala nima we nalí né japi iyena ko nawama echi japi bineli olásaré, alí nijé ko echi nalí iyama jepuná” (Ezequiel 21:26, 27).

(Jepuná ko uchúi echoná 1 Reyes, 2 Reyes, 2 Crónicas capítulos 10-36 alí Jeremías 25:8-11.)