Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Echi Biblia, ¿piri ju japi aní?

 BINELÍWAMI 26

Echi Wichimóbachi checho a ku we baʼóami nima

Echi Wichimóbachi checho a ku we baʼóami nima

Jeobá ko né aʼlá biʼwíami niwama echi binói riwalá néeka echi Mesías Gobiérnowala, suwábima echi namuti chati alí echi riká sinéami machimea japi echi bineli bi ju japi nulésaré echi pagótami

ECHI kuwachimi oselí japi Bíbliachi uchúi, Apocalipsis, bilé buwelíami iyá sinéami pagótami. Echi julárami Juan osali. Onorúami ko inértili japi ikimea riké. Jaré namuti japi riwali japi nokiwái suwaba japi Jeobá nakí japi nokiboa.

Bachá japi inértilirú Juan echi ko nili Jesús wilísikami japi nikuuro alí japi ruyé echi jaré bichíwiami japi piréami nili wikanamti rikáachi. Ayénachó iné chúriká ju japoná Jeobá nulá alí ritiwá kiti echi ángeles ko nochi Jeobá.

Pe chabénala japalí kecho niwali suwaba namuti japi Onorúami nátali né chokichí jona, echi Méchuli (Jesucristo) nareli bilé oserúami japi olá kichao bawelá. Japalí irapi echi naó bachá bawelá, a nirú naó pagótami japi machiina aseka kawé. Echi né bacháwala ko Jesús ju, japi ma wilairu japi riká Silíami alí aseka inaro bilé kawé rosákami. Echi jarecho bikiá pagótami ko kawé aseka siiro suwinárika colores alí jepuná aniwáami ju: nakówami, lochéwami, alí nawilí, namuti japi ikísimi jipi echoná Wichimóbachi, we nalí jepuná ko ma kéayó suwibama. Japalí irápiwa echi kichao bawelá kipúriwa japalí kichao niraa simeliwa echi trompeta, alí jepuná ko aniwáami ju japi a nawesalia Onorúami rikíriwala. Alí kiti Onorúami ko we iyóampá kiti bela checho jaré kichao rikíriwami juula.

Pe aminana ko, Juan ritiwá japi ranarúami nili bilé towí, jepuná ko aniwáami ju japi ma chotásimi nulasia echi Onorúami Gobiérnowala ripá siyónachi. Chotásimi bilé waʼlú nakówami, alí echi Satanás alí echi demonios machí awátami nili ripá siyónachi jona alí jenaʼí rilé Wichimóbachi awátami nili. Alí biché kipúriwa bilé raʼíchali we jiwérika japi jéanili: “Chopi né wabé simírami risúu orárami nima echi jaré mapu a bijí jenaʼí Wichimóbachi piré ko”. ¿Chúsiá? Kiti echi Diablo ko a machí japi we sapú miʼlirúami nima alí we iyoa iyena (Apocalipsis 12:12).

Jesús checho a néwaikí ripá siyónachi, we nalí japi riká bilé méchuli, alí echi yúa 144,000 pagótami nirú japi Onorúami chapili kiti “kuʼwírama Jesucristo japalí Binói né [silíami] nima”. Echoná Apocalipsis ju japoná aní kipu pagótami nulama Jesús yúa alí echi ko ju 144,000 pagótami (Apocalipsis 14:1; 20:6).

Pe aminana, echi isélikami jenaʼí Wichimóbachi piréami napawima “echoná [...] Aramajerónachi” alí jepuná ko ju echi Onorúami nikóala, echi japi Né Wabé Jiwérami ju, alí echi isélikami ko nakó japi kawé rosákami aseka inaro yúa, echi ko Jesús ju, alí kipi sontársiwala yúa japi ripá siyónachi nirúami ju. ¿Chúriká sunima echi nakówami? Echi isélikami koʼwirúami nima alí echi Satanás ko értami nima. Jesús alí echi 144,000 nulema jenaʼí Wichimóbachi piréami mili bamíali, alí japalí ma suwibasa echi mili bamíali, Satanás ayénachó miʼlirúami nima (Apocalipsis 16:14; 20:4).

¿Piri isiima echi Cristo gobiérnowala japi nulama mili bamíali japi kuʼíroma echi pagótami? Juan osá: “[Jeobá] aʼlá ku kaníratama aboni, mapurigá ma ke tasi omóniga narákama [...]. Ma ke tasi suwimea, nibiré auché narákama, nibiré auché risúu animea, nibiré auché okoma; mapu kiti suwaba mapu ikí chabénala nirúari ko, ma káraga simárari” (Apocalipsis 21: 4). Echi riká ju, ¡checho echi Wichimóbachi we baʼóami nima!

Apocalipsis ju echi kuwachimi oselí japi aní japi bineri echi Biblia. ¿Piri ju? Kiti Jeobá biʼwama kipi riwalá néeka echi Mesías Gobiérnowala, alí machibóalé né sinibí japi echi bineli bi ju japi nulésaré echi pagótami.

(Jepuná ko uchúi echoná oselí Apocalipsis.)