Inea japi nirú echoná

Inea echi okuá menú

Inea: Jena’í mi riwimea

Testigo Jeobá

ralámuli

Echi Biblia, ¿piri ju japi aní?

 BINELÍWAMI 23

Raʼicháliwa Onorúami Gobiérnowala kitra omáana Wichimóbachi

Raʼicháliwa Onorúami Gobiérnowala kitra omáana Wichimóbachi

Echi julárami Pablo omáana Wichimóbachi alí waʼlú baʼwírili isimí raʼicha echi Onorúami Gobiérnowala kitra

JAPALÍ ma najítili Jesús najátami, Pablo ko we kanílika chótali raʼicha echi Onorúami Gobiérnowala kitra. We nalí jipi ko echi ko anachama riweili kiti né wabé risoa olaba riweili. Jepuná julárami ko né wabé miká iyénami nili kiti jarecho a kipuma echi namuti kalabé echi Onorúami Gobiérnowala kitra alí echi namuti kalabé japi Onorúami nakili kiti narema echi pagótami.

Japalí né bachá machíinali, simili Lístrachi alí echoná saʼweli bilé rejoy japi ke oméroli iyena né sinibí japi jona biteili. Wiká pagótami japi riwali japalí saʼweiru jepuná rejoy, né we jiwérika sinaka anili kiti Pablo alí Bernabé onorúami nili. Echi ko ke riweli kiti echi pagótami nijima echi chiliwéliami. We nalí be, aminana ko echi pagótami ko kipuli echi Pablo sayérala alí basibuli. Echi ko mayeli kiti ma mukuli, we nalí pe ke mukuli, alí pe aminana ko ma ku roʼili echoná pueblo kiti kuʼírima echi Jesús najátami.

Pe aminana, jaré Jesús najátami japi judíos nili ko nakiyé japi echi bichíwiami japi ke judíos nili kiti a nijewama jaré nulalíwami japi uchúi echoná Moisés Nuláala. Kiti kariwema echi naʼáwiliami, Pablo ko simili nárimia echi julárami alí echi ancianos japi Jerusalenchi piréami nili. Japalí ma we aʼlá binesa echi Oserúami alí tánisa Onorúami jiwérala, jepuná ko osiili echi bichíwiami alí nuleiru kiti ke nóchima jarecho onorúami japi ke bichíwali nili, alí ayénachó aneiru kiti ke koʼmea echi la, kecho echi sapá japi we léami nili, alí kecho nasawisa riweili ke niwíkami nísaká. Jepuná nulalíwami ko “namuti néwalelíwami” nili, we nalí be ke pi suwaba nijewasa riweili echi Moisés Nuláala (Hechos 15:28, 29NM).

Che osáami japalí simili Pablo, echalí ko simili Beréachi anilíachi, biléana pueblo japi jipi Grecia ju. Echi judíos japi echoná pireili we kanílika nijéwali japi Pablo binérili, we nalí sinibí rawé leériami nili echi Oserúami kiti echi machinaili acha né bichíwali nila japi aneiru. Pe aminana ko, ichípili kiti echi Pablo sayérala checho a najátili. Echi ko simili Atenas anilíachi, alí echoná iyénali pagótami yúa japi wabé binékami nili. Echoná nijili bilé nawésali kiti ke ta siné wikawaba, kiti Pablo ko we aʼlá riwiili japi echi pagótami bichíwili alí isiili kiti né aʼlá sinéami aʼlá námima japi echi anili.

Pe aminana japalí ma besáami simili, Pablo ko simili Jerusalenchi mi. Japalí simili echoná Jeobá kalílachi, jaré judíos miʼlináliami nili Pablo. We nalí echi sontarsi romanos ke tasi riweli alí Pablo ko ma tóoiru alí wiká namuti náriliru. Pablo ayénachó a romano nili, kiti bela a riweiru kiti raʼichama echi silíami yúa Félix rewéami. Echi judíos ke siné oméroli néwariwélitia japi Pablo cha isíiami nili. We nalí Festo, japi chotásili nulayá japalí Félix ma ke nulali, iyánalami nili echi judíos kiti miʼliboa. Kiti ke echi riká ikimea, Pablo raʼichánalami nili echi silíami yúa Rómachi bitéami, alí Festo ko jéaneli: “Nijé nimí jurama echoná Rómachi, echi né walubéala silíami yúa” (Hechos 25:11, 12).

Echoná Rómachi owéropa riweili. Kiti bela Pablo bakili biléana bárcochi alí simili Roma alí simírili Italia ayé, we nalí echi barco ko butuwili, kiti bela suwaba japalí romo nili ripili echoná biléana íslachi japi Malta anilíachi nili. Japalí ma nawali echoná Rómachi, okuá bamíali biteili biléana kalírili japi ke echi níwala nili. Echi sontarsi ko we tibúami nili Pablo alí echi ko we kami nílika riká raʼíchiami nili sinéami yúa japi simíali inebia echi Onorúami Gobiérnowala kitra.

(Jepuná uchúi echoná Hechos 11:22–28:31.)