Skip to content

Skip to secondary menu

பொருளடக்கத்திற்குச் செல்

யெகோவாவின் சாட்சிகள்

தமிழ்

ஆன்லைன் பைபிள் | புதிய உலக மொழிபெயர்ப்பு

எசேக்கியேல் 43:1-27

முக்கியக் குறிப்புகள்

  • ஆலயம் யெகோவாவின் மகிமையால் நிரம்பியிருக்கிறது (1-12)

  • பலிபீடம் (13-27)

43  பின்பு, கிழக்கே பார்த்தபடி இருந்த நுழைவாசலுக்கு அவர் என்னைக் கொண்டுபோனார்.+  அப்போது, இஸ்ரவேலின் கடவுளுடைய மகிமை கிழக்கிலிருந்து வருவதைப் பார்த்தேன்.+ அவருடைய சத்தம் வெள்ளப்பெருக்கின் சத்தத்தைப் போல இருந்தது.+ அவருடைய மகிமையால் பூமியே பிரகாசித்தது.+  நகரத்தைப் பாழாக்க நான்* வந்தபோது* நான் பார்த்த தரிசனத்தைப் போலவே அது இருந்தது. கேபார் ஆற்றுக்குப்+ பக்கத்தில் நான் பார்த்ததைப் போலவே அது இருந்தது. உடனே சாஷ்டாங்கமாக விழுந்தேன்.  அப்போது, கிழக்கே பார்த்தபடி இருந்த நுழைவாசலின் வழியாக யெகோவாவின் மகிமை ஆலயத்துக்குள் வந்தது.+  ஒரு சக்தி* என்னை மேலே எழுப்பி, உட்பிரகாரத்துக்குக் கொண்டுபோனது. ஆலயம் முழுவதும் யெகோவாவின் மகிமையால் நிறைந்திருந்ததை நான் பார்த்தேன்.+  பின்பு, ஆலயத்திலிருந்து ஒரு மனுஷர் என்னிடம் பேசுவதைக் கேட்டேன். அவர் எனக்குப் பக்கத்தில் வந்து நின்றார்.+  அவர் என்னிடம், “மனிதகுமாரனே, இது என்னுடைய சிம்மாசனம் இருக்கிற இடம்.+ இது நான் கால் வைக்கிற இடம்.+ இங்குதான் இஸ்ரவேலர்களோடு என்றென்றும் நான் தங்குவேன்.+ இஸ்ரவேல் ஜனங்களும் அவர்களுடைய ராஜாக்களும் இனி எனக்குத் துரோகம் செய்து மற்ற தெய்வங்களையோ இறந்துபோன அவர்களுடைய ராஜாக்களுடைய உடல்களையோ* வணங்கி, என்னுடைய பரிசுத்தமான பெயரைக் கெடுக்க மாட்டார்கள்.+  முன்பு, எனக்கும் அவர்களுக்கும் நடுவில் ஒரு சுவர் மட்டும் இருக்கும்படி என்னுடைய ஆலயத்தின் வாசலுக்குப் பக்கத்திலேயே அவர்களுடைய ஆலயத்தின் வாசலையும், என்னுடைய ஆலயத்தின் கதவு நிலைகளுக்குப் பக்கத்திலேயே அவர்களுடைய ஆலயத்தின் கதவு நிலைகளையும் வைத்தார்கள்.+ எல்லா அருவருப்பான காரியங்களையும் செய்து என்னுடைய பரிசுத்தமான பெயரைக் கெடுத்தார்கள். அதனால் நான் கோபத்தில் அவர்களை அழித்தேன்.+  இப்போது, எனக்குத் துரோகம் செய்வதை அவர்கள் விட்டுவிடட்டும். அவர்களுடைய ராஜாக்களுடைய உடல்களை என் முன்னாலிருந்து தூரமாக வீசியெறியட்டும். அப்போது, நான் அவர்களோடு என்றென்றும் இருப்பேன்.+ 10  மனிதகுமாரனே, இஸ்ரவேல் ஜனங்கள் தாங்கள் செய்த குற்றங்களை நினைத்து வெட்கப்பட வேண்டும்.+ அதனால், நீ பார்த்த ஆலயத்தைப் பற்றி அவர்களிடம் விளக்கிச் சொல்.+ அதன் வடிவமைப்பை அவர்கள் ஆராய்ந்து பார்க்கட்டும். 11  அவர்கள் செய்த அக்கிரமத்தையெல்லாம் நினைத்து அவர்கள் வெட்கப்பட்டால், ஆலயத்தின் வரைபடத்தை அவர்களுடைய கண் முன்னால் வரைந்து காட்டு. அதன் எல்லா பகுதிகளையும், உள்ளே போகிற வாசல்களையும், வெளியே போகிற வாசல்களையும், நுணுக்கமான மற்ற விவரங்களையும் வரைந்து காட்டு.+ ஆலயம் சம்பந்தப்பட்ட எல்லா சட்டதிட்டங்களையும் அவர்களுக்கு எடுத்துச் சொல். அப்போதுதான், அவர்கள் அதன் கட்டமைப்பைப் பற்றி விவரமாகத் தெரிந்துகொள்வார்கள், அதற்குரிய சட்டதிட்டங்களின்படி செய்வார்கள்.+ 12  ஆலயத்தைப் பற்றிய சட்டம் இதுதான்: மலை உச்சியில் இருக்கிற மொத்த இடமும் மகா பரிசுத்தமான இடமாக இருக்கும்.+ இதுதான் ஆலயத்தைப் பற்றிய சட்டம். 13  முழங்களின் கணக்குப்படி பலிபீடத்தின் அளவுகள் இவைதான்.+ (ஒவ்வொரு முழமும் நம்முடைய கை முழத்தைவிட நான்கு விரலளவு அதிகமானது).* தரையிலுள்ள அதன் முதல் அடுக்கின் உயரம் ஒரு முழம், அதன் அகலம் ஒரு முழம். இந்த அடுக்கைச் சுற்றிலும் ஒரு சாண்* அகலத்தில் ஒரு மேல்பகுதி இருக்கிறது. இதுதான் பலிபீடத்தின் முதல் அடுக்கு. 14  இரண்டாம் அடுக்கின் உயரம் இரண்டு முழம். அது மூன்றாம் அடுக்கைவிட ஒரு முழத்துக்கு வெளியே நீட்டிக்கொண்டிருக்கிறது. மூன்றாம் அடுக்கின் உயரம் நான்கு முழம். அது நான்காம் அடுக்கைவிட ஒரு முழத்துக்கு வெளியே நீட்டிக்கொண்டிருக்கிறது. 15  நான்காம் அடுக்குதான் நெருப்பு எரியும் பகுதி. அதன் உயரம் நான்கு முழம். அதன் முனைகளில் நான்கு கொம்புகள் இருக்கின்றன.+ 16  நெருப்பு எரியும் பகுதி சதுரமானது. அதன் நீளம் 12 முழம், அகலம் 12 முழம்.+ 17  நான்கு பக்கங்களிலும் உள்ள அதன் விளிம்பின் நீளம் 14 முழம், அகலம் 14 முழம். அதைச் சுற்றிலும் அரை முழத்துக்கு ஒரு மேல்பகுதி இருக்கிறது. அடியிலுள்ள முதல் அடுக்கு, எல்லா பக்கத்திலும் ஒரு முழத்துக்கு இருக்கிறது. அதன் படிக்கட்டுகள் கிழக்கே பார்த்தபடி இருக்கின்றன” என்றார். 18  பின்பு அவர் என்னிடம், “மனிதகுமாரனே, உன்னதப் பேரரசராகிய யெகோவா சொல்வது இதுதான்: ‘பலிபீடத்தைச் செய்த பின்பு, அதன்மேல் தகன பலிகளைச் செலுத்தும்போதும் இரத்தத்தைத் தெளிக்கும்போதும் இந்த அறிவுரைகளைப் பின்பற்ற வேண்டும்.’+ 19  ‘நீ ஒரு இளம் காளையைப் பாவப் பரிகாரப் பலியாகக் கொடுக்க வேண்டும்.+ அதை என்னுடைய சன்னிதியில் சேவை செய்கிற சாதோக்கின் வம்சத்தைச் சேர்ந்த லேவியர்களான குருமார்களிடம் கொடுக்க வேண்டும்’+ என்று உன்னதப் பேரரசராகிய யெகோவா சொல்கிறார். 20  ‘அதன் இரத்தத்தில் கொஞ்சத்தை எடுத்து பலிபீடத்தின் நான்கு கொம்புகளின் மீதும், விளிம்பின் நான்கு மூலைகளிலும், சுற்றிலும் உள்ள மேல்பகுதியின் மீதும் பூசு. அதைப் பாவத்திலிருந்து தூய்மைப்படுத்தவும், அதற்காகப் பாவப் பரிகாரம் பண்ணவும் இப்படிச் செய்.+ 21  பின்பு, பாவப் பரிகாரப் பலியாகிய இளம் காளையை எரிப்பதற்காக, ஆலயத்தின் பரிசுத்தமான இடத்துக்கு வெளியே ஒதுக்கப்பட்டிருக்கிற இடத்துக்கு அதைக் கொண்டுபோ.+ 22  இரண்டாம் நாளில், குறையில்லாத ஒரு வெள்ளாட்டுக் கடாவைப் பாவப் பரிகாரப் பலியாகக் கொடு. குருமார்கள் இளம் காளையைச் செலுத்தி பலிபீடத்தைப் பாவத்திலிருந்து தூய்மைப்படுத்தியது போலவே இதையும் செலுத்தி பலிபீடத்தைத் தூய்மைப்படுத்துவார்கள்.’ 23  ‘பலிபீடம் பாவத்திலிருந்து தூய்மைப்படுத்தப்பட்ட பின்பு, நீ குறையில்லாத ஒரு இளம் காளையையும் குறையில்லாத ஒரு செம்மறியாட்டுக் கடாவையும் கொடு. 24  அவற்றை யெகோவாவுக்குக் கொடு. குருமார்கள் அவற்றின் மேல் உப்பைத் தூவி,+ யெகோவாவுக்குத் தகன பலியாகச் செலுத்துவார்கள். 25  தினம்தினம் செலுத்தப்படுகிற பாவப் பரிகாரப் பலிக்காக, நீ ஒரு வெள்ளாட்டையும் இளம் காளையையும் செம்மறியாட்டுக் கடாவையும் ஏழு நாட்களுக்குக் கொடுக்க வேண்டும்.+ அவை எந்தக் குறையும் இல்லாதவையாக இருக்க வேண்டும். 26  குருமார்கள் ஏழு நாட்களுக்குப் பலிபீடத்துக்காகப் பாவப் பரிகாரம் செய்து, அதைத் தூய்மைப்படுத்தி, அதை அர்ப்பணம் செய்ய வேண்டும். 27  ஏழு நாட்களுக்குப் பின்பு, எட்டாம் நாளிலும்+ அதற்குப் பின்பும், குருமார்கள் உங்களுடைய* தகன பலிகளையும் சமாதான பலிகளையும் பலிபீடத்தில் செலுத்துவார்கள். அப்போது, நான் உங்களைப் பிரியத்தோடு ஏற்றுக்கொள்வேன்’+ என்று உன்னதப் பேரரசராகிய யெகோவா சொல்கிறார்” என்றார்.

அடிக்குறிப்புகள்

அல்லது, “அவர்.”
அநேகமாக, “அதன் அழிவைப் பற்றிச் சொல்ல வந்தபோது.”
அல்லது, “தேவதூதர்.”
ஒருவேளை, “சிலைகளையோ.”
இது பெரிய முழத்தைக் குறிக்கிறது. இணைப்பு B14-ஐப் பாருங்கள்.
இணைப்பு B14-ஐப் பாருங்கள்.
அதாவது, “ஜனங்களுடைய.”