10  அவர் அங்கிருந்து புறப்பட்டு, யோர்தானைக் கடந்து யூதேயாவின் எல்லைப் பகுதிகளுக்குப் போனார்; மறுபடியும் மக்கள் அவரிடம் கூட்டமாக வந்தார்கள், வழக்கம்போல் அவர்களுக்குக் கற்பிக்க ஆரம்பித்தார்.+ ²  அப்போது அவரைச் சோதிப்பதற்காக பரிசேயர்கள் வந்து, ‘ஒருவன் தன் மனைவியை விவாகரத்து செய்வது சரியா?’+ என்று கேட்டார்கள். ³  அதற்கு அவர், “மோசே உங்களுக்கு என்ன கட்டளையிட்டார்?” என்று கேட்டார். ⁴  “விவாகரத்துப் பத்திரத்தை எழுதிக் கொடுத்துவிட்டு மனைவியை விவாகரத்து செய்துகொள்ள மோசே அனுமதி கொடுத்தார்”+ என்று சொன்னார்கள். ⁵  ஆனால் இயேசு, “உங்களுடைய இதயம் இறுகிப்போயிருந்த காரணத்தால்தான்+ இந்தக் கட்டளையை அவர் உங்களுக்குக் கொடுத்தார்.+ ⁶  இருந்தாலும், கடவுள் ஆரம்பத்தில் மனுஷர்களைப் படைத்தபோது, ‘அவர்களை ஆணாகவும் பெண்ணாகவும் படைத்தார்.+ ⁷  இதன் காரணமாக, மனிதன் தன்னுடைய அப்பாவையும் அம்மாவையும் விட்டுப் பிரிந்திருப்பான்;+ ⁸  அவனும் அவன் மனைவியும்* ஒரே உடலாக* இருப்பார்கள்.’ இப்படி, அவர்கள் இரண்டு பேராக இல்லாமல், ஒரே உடலாக இருப்பார்கள்.+ ⁹  அதனால், கடவுள் இணைத்து வைத்ததை* எந்த மனிதனும் பிரிக்காமல் இருக்கட்டும்”+ என்று அவர்களிடம் சொன்னார். ¹⁰  அவர் மறுபடியும் வீட்டுக்குள் வந்தபோது சீஷர்கள் இதைப் பற்றி அவரிடம் கேட்டார்கள். ¹¹  அப்போது அவர்களிடம், “மனைவியை விவாகரத்து செய்துவிட்டு வேறொரு பெண்ணைத் திருமணம் செய்துகொள்கிறவன் முறைகேடான உறவுகொள்கிறான்;+ இப்படி, தன் மனைவிக்குத் துரோகம் செய்கிறான். ¹²  கணவனை விவாகரத்து செய்துவிட்டு வேறொரு ஆணைத் திருமணம் செய்துகொள்கிறவள் முறைகேடான உறவுகொள்கிறாள்”+ என்று சொன்னார். ¹³  பின்பு, சின்னப் பிள்ளைகளை அவர் தொடுவதற்காக மக்கள் அவர்களைக் கொண்டுவர ஆரம்பித்தார்கள்; ஆனால், அந்த மக்களைச் சீஷர்கள் திட்டினார்கள்.+ ¹⁴  இயேசு இதைப் பார்த்துக் கோபப்பட்டு, “சின்னப் பிள்ளைகளை என்னிடம் வரவிடுங்கள், அவர்களைத் தடுக்காதீர்கள்; இப்படிப்பட்டவர்களுக்கே கடவுளுடைய அரசாங்கம் சொந்தமாகும்.+ ¹⁵  உண்மையாகவே உங்களுக்குச் சொல்கிறேன், ஒரு சின்னப் பிள்ளையைப் போலிருந்து கடவுளுடைய அரசாங்கத்தை ஏற்றுக்கொள்ளாத எவனும் அதில் அனுமதிக்கப்படவே மாட்டான்”+ என்று சொன்னார். ¹⁶  பின்பு, அந்தச் சின்னப் பிள்ளைகளை அணைத்துக்கொண்டு, அவர்கள்மேல் கைகளை வைத்து ஆசீர்வதித்தார்.+ ¹⁷  அங்கிருந்து அவர் போய்க்கொண்டிருந்தபோது ஒருவன் ஓடிவந்து அவர் முன்னால் மண்டிபோட்டு, “நல்ல போதகரே, முடிவில்லாத வாழ்வைப் பெற நான் என்ன செய்ய வேண்டும்?”+ என்று கேட்டான். ¹⁸  அதற்கு இயேசு அவனிடம், “என்னை ஏன் நல்லவன் என்று சொல்கிறாய்? கடவுள் ஒருவரைத் தவிர வேறு யாரும் நல்லவர் கிடையாது.+ ¹⁹  ‘கொலை செய்யாதே,+ மணத்துணைக்குத் துரோகம் செய்யாதே,+ திருடாதே,+ பொய் சாட்சி சொல்லாதே,+ மோசடி செய்யாதே,+ அப்பாவுக்கும் அம்மாவுக்கும் மதிப்புக் கொடு’+ என்ற கட்டளைகளெல்லாம் உனக்குத் தெரியுமே” என்று சொன்னார். ²⁰  அதற்கு அவன், “போதகரே, இவை எல்லாவற்றையும் சிறுவயதிலிருந்தே கடைப்பிடித்து வருகிறேன்” என்று சொன்னான். ²¹  இயேசு அன்போடு அவனைப் பார்த்து, “நீ செய்ய வேண்டிய இன்னொரு காரியமும் இருக்கிறது; நீ போய் உன்னிடம் இருப்பதையெல்லாம் விற்று ஏழைகளுக்குக் கொடுத்துவிட்டு, என்னைப் பின்பற்றி வா; அப்போது, பரலோகத்தில் உனக்குப் பொக்கிஷம் சேரும்”+ என்று சொன்னார். ²²  இதைக் கேட்டதும் அவனுடைய முகம் வாடியது, அவன் துக்கத்தோடு திரும்பிப் போனான்; ஏனென்றால், அவனிடம் நிறைய சொத்துகள் இருந்தன.+ ²³  அப்போது இயேசு சுற்றிலும் இருந்தவர்களைப் பார்த்துவிட்டுத் தன் சீஷர்களிடம், “பணக்காரர்கள் கடவுளுடைய அரசாங்கத்துக்குள் நுழைவது எவ்வளவு கஷ்டம்!”+ என்று சொன்னார். ²⁴  இதைக் கேட்டு அவர்கள் ஆச்சரியப்பட்டார்கள். இயேசு அவர்களிடம், “பிள்ளைகளே, கடவுளுடைய அரசாங்கத்துக்குள் நுழைவது எவ்வளவு கஷ்டம்! ²⁵  கடவுளுடைய அரசாங்கத்துக்குள் ஒரு பணக்காரன் நுழைவதைவிட ஊசியின் காதுக்குள் ஒரு ஒட்டகம் நுழைவது சுலபம்”+ என்றார். ²⁶  அவர்கள் இன்னும் அதிக பிரமிப்போடு, “அப்படியானால், யாரால் மீட்புப் பெற முடியும்?”+ என்று கேட்டார்கள்.* ²⁷  இயேசு அவர்களை நேராகப் பார்த்து, “மனுஷர்களால் இது முடியாது; ஆனால் கடவுளால் முடியும்; ஏனென்றால், கடவுளால் எல்லாமே செய்ய முடியும்”+ என்று சொன்னார். ²⁸  பேதுரு அவரிடம், “இதோ! நாங்கள் எல்லாவற்றையும் விட்டுவிட்டு உங்களைப் பின்பற்றி வந்திருக்கிறோமே”+ என்று சொன்னார். ²⁹  அதற்கு இயேசு, “உண்மையாகவே உங்களுக்குச் சொல்கிறேன், எனக்காகவும் நல்ல செய்திக்காகவும் வீட்டையோ சகோதரர்களையோ சகோதரிகளையோ அம்மாவையோ அப்பாவையோ பிள்ளைகளையோ வயல்களையோ தியாகம் செய்கிறவன்,+ ³⁰  இந்தக் காலத்தில் துன்புறுத்தல்களோடுகூட, 100 மடங்கு அதிகமாக வீடுகளையும் சகோதரர்களையும் சகோதரிகளையும் அம்மாக்களையும் பிள்ளைகளையும் வயல்களையும் பெறுவான்;+ வரப்போகும் காலத்தில்* முடிவில்லாத வாழ்வையும் நிச்சயம் பெறுவான். ³¹  ஆனால், முந்தினவர்கள் பலர் பிந்தினவர்களாகவும், பிந்தினவர்கள் முந்தினவர்களாகவும் ஆவார்கள்”+ என்று சொன்னார். ³²  எருசலேமுக்குப் போகும் வழியில், சீஷர்களுக்கு முன்னால் இயேசு போய்க்கொண்டிருந்தார்; அதைப் பார்த்து சீஷர்கள் ஆச்சரியப்பட்டார்கள்; பின்னால் போன மற்றவர்களோ பயப்பட ஆரம்பித்தார்கள். அவர் மறுபடியும் பன்னிரண்டு பேரையும்* தனியாகக் கூப்பிட்டு, தனக்கு நடக்கப்போகும் சம்பவங்களைப் பற்றிச் சொல்ல ஆரம்பித்தார்.+ ³³  “இதோ! நாம் எருசலேமுக்குப் போய்க்கொண்டிருக்கிறோம், மனிதகுமாரன் முதன்மை குருமார்களிடமும் வேத அறிஞர்களிடமும் ஒப்படைக்கப்படுவார்; அவர்கள் அவருக்கு மரண தண்டனை விதித்து, மற்ற தேசத்தாரிடம் அவரை ஒப்படைத்துவிடுவார்கள். ³⁴  அவர்கள் அவரைக் கேலி செய்து, அவர்மேல் துப்பி, அவரை முள்சாட்டையால் அடித்து, பின்பு கொலை செய்வார்கள்; ஆனால், மூன்றாம் நாளில் அவர் உயிரோடு எழுப்பப்படுவார்”+ என்று சொன்னார். ³⁵  செபெதேயுவின் மகன்களான யாக்கோபும் யோவானும்+ அவரிடம் வந்து, “போதகரே, நீங்கள் எங்களுக்கு ஒன்று செய்ய வேண்டுமென்று கேட்டுக்கொள்கிறோம்”+ என்றார்கள். ³⁶  அதற்கு அவர், “என்ன செய்ய வேண்டும்? சொல்லுங்கள்” என்று கேட்டார். ³⁷  அப்போது அவர்கள், “நீங்கள் ராஜ மகிமையில் உட்கார்ந்திருக்கும்போது, எங்களில் ஒருவரை உங்கள் வலது பக்கத்திலும் இன்னொருவரை இடது பக்கத்திலும் உட்கார வைக்க வேண்டுமென்று கேட்டுக்கொள்கிறோம்”+ என்றார்கள். ³⁸  ஆனால் இயேசு, “நீங்கள் என்ன கேட்கிறீர்கள் என்றே உங்களுக்குத் தெரியவில்லை. நான் குடிக்கும் கிண்ணத்தில் உங்களால் குடிக்க முடியுமா? நான் பெறும் ஞானஸ்நானத்தை உங்களால் பெற முடியுமா?”+ என்று கேட்டார். ³⁹  அதற்கு அவர்கள் “முடியும்” என்று சொன்னார்கள். அப்போது இயேசு, “நான் குடிக்கும் கிண்ணத்தில் நீங்கள் குடிப்பீர்கள், நான் பெறும் ஞானஸ்நானத்தை நீங்களும் பெறுவீர்கள்.+ ⁴⁰  ஆனால், என்னுடைய வலது பக்கத்திலோ இடது பக்கத்திலோ உங்களை உட்கார வைக்க எனக்கு அதிகாரம் இல்லை. அதற்காகத் தேர்ந்தெடுக்கப்பட்டவர்கள்தான் அங்கே உட்கார முடியும்” என்று சொன்னார். ⁴¹  நடந்ததைக் கேள்விப்பட்ட மற்ற பத்துப் பேரும் யாக்கோபின் மேலும் யோவானின் மேலும் கோபப்பட்டார்கள்.+ ⁴²  இயேசுவோ அவர்களைத் தன்னிடம் கூப்பிட்டு, “மற்ற தேசத்து ஆட்சியாளர்கள்* மக்களை அடக்கி ஆளுவதும், உயர் அதிகாரிகள் அவர்கள்மேல் அதிகாரம் செலுத்துவதும் உங்களுக்குத் தெரியும்.+ ⁴³  ஆனால், நீங்கள் அப்படி இருக்கக் கூடாது. உங்களில் உயர்ந்தவனாக இருக்க விரும்புகிறவன் உங்களுக்குச் சேவை செய்கிறவனாக இருக்க வேண்டும்.+ ⁴⁴  உங்களில் முதலாவதாக இருக்க விரும்புகிறவன் எல்லாருக்கும் அடிமையாக இருக்க வேண்டும். ⁴⁵  ஏனென்றால், மனிதகுமாரனும் மற்றவர்களுடைய சேவையைப் பெறுவதற்கு வராமல், மற்றவர்களுக்குச் சேவை செய்வதற்கும்+ பலருடைய உயிருக்கு ஈடாகத் தன்னுடைய உயிரை மீட்புவிலையாகக் கொடுப்பதற்குமே வந்தார்”+ என்று சொன்னார். ⁴⁶  அவர்கள் எரிகோவுக்கு வந்து சேர்ந்தார்கள். பின்பு, அவரும் அவருடைய சீஷர்களும் திரளான மக்களும் எரிகோவைவிட்டுப் போய்க்கொண்டிருந்தபோது, பார்வையில்லாத ஒரு பிச்சைக்காரன் பாதையோரம் உட்கார்ந்திருந்தான். அவன் பெயர் பர்திமேயு, அவன் திமேயுவின் மகன்.+ ⁴⁷  நாசரேத்தூர் இயேசு போகிறார் என்பதைக் கேள்விப்பட்டு, “தாவீதின் மகனே,+ இயேசுவே, எனக்கு இரக்கம் காட்டுங்கள்!”+ என்று அவன் சத்தமாகக் கத்த ஆரம்பித்தான். ⁴⁸  அமைதியாக இருக்கச் சொல்லி நிறைய பேர் அவனை அதட்டினார்கள்; ஆனாலும், “தாவீதின் மகனே, எனக்கு இரக்கம் காட்டுங்கள்!” என்று இன்னும் சத்தமாகக் கத்திக்கொண்டே இருந்தான். ⁴⁹  அதனால் இயேசு நின்று, “அவனை என்னிடம் கூட்டிக்கொண்டு வாருங்கள்” என்று சொன்னார். அவர்கள் அவனிடம், “தைரியமாக எழுந்து வா, அவர் உன்னைக் கூப்பிடுகிறார்” என்று சொல்லி அவனைக் கூப்பிட்டார்கள். ⁵⁰  உடனே, அவன் தன்னுடைய மேலங்கியைத் தூக்கியெறிந்துவிட்டு, துள்ளியெழுந்து இயேசுவிடம் போனான். ⁵¹  இயேசு அவனிடம், “உனக்காக நான் என்ன செய்ய வேண்டும்?” என்று கேட்டார். பார்வையில்லாத அந்த மனிதன், “ரபூனி,* தயவுசெய்து எனக்குப் பார்வை கொடுங்கள்” என்று சொன்னான். ⁵²  அதற்கு இயேசு, “உன் விசுவாசம் உன்னைக் குணமாக்கியிருக்கிறது,+ நீ போகலாம்” என்று சொன்னார். உடனே அவன் பார்வை பெற்று,+ அவர் போன வழியில் அவரைப் பின்பற்றிப் போனான்.