Mawu Yehuwa seng něgělị standar moral gunang taumata. Contone, i Sie něngatorẹ̌ tadeạu pẹ̌kakawing tawe wotonge mạběsụ. (Mat 19:4-6, 9) I Sie mawěnsing su kěbị kakanoạ amoral. (1Kor 6:9, 10) I Sie lai něnadia prinsip soal u pakeang dingangu penampilan tadeạu manga ělang’E nẹ̌tatěntang dingangu taumata su dunia.—Pang 22:5; 1Tim 2:9, 10.

Orasẹ̌ ini lawọ taumata tawe tụtol᷊e standar i Yehuwa. (Rm 1:18-32) I sire tụtol᷊e kapulung taumata l᷊awọ soal u mẹ̌papakeang, penampilan, dingangu kakanoạ. Lawọ lụluasẹ̌ ual᷊ingu barang nẹ̌sal᷊a nikoạ i sire kụ i sire mělẹ̌heghesẹ̌ si saing tawe timol᷊e kakanoạ i sire.—1Ptr 4:3, 4.

Ual᷊ingu i kitẹ Sahiding Yehuwa, i kitẹ harusẹ̌ bahani tumol᷊e standar u Mawu. (Rm 12:9) Kerea carane? I kitẹ harusẹ̌ pakatahuěna měhabarẹ̌ su taumata wal᷊inẹ apa ikẹ̌kapulung Mawu. Katewe i kitẹ lai harusẹ̌ tumol᷊e standar moral i Yehuwa su pěbawiahẹ̌. Contone, su tempong měmile pakeang, i kitẹ botonge mẹ̌tiněna, ’Apa ini něnodẹ standar i Yehuwa arau standar u dunia? Apa pakeang dingangu penampilanku něnodẹ iạ kai tau Sahani kụ měnẹ̌němbah Mawu?’ Arau su tempong měmile film, i kitẹ botonge mẹ̌tiněna, ’Apa Yehuwa mal᷊uasẹ̌ mạeng iạ mẹ̌biala ini? Film ini tụtol᷊e standar moral i sai? Apa hiburan nipileku ini sarung makal᷊ome standar moral seng dẹ̌diagatengku? (Mzm 101:3) Apa ini sarung makakoạ keluarga arau taumata wal᷊inẹ masangkong?’—1Kor 10:31-33.

Kawe nụe penting si kitẹ tumol᷊e standar moral i Yehuwa? Seng mal᷊ighạ Yesus Kristus měminasa manga wangsa dingangu kěbị karal᷊akisẹ̌. (Yeh 9:4-7) Kětạeng i sire apang měkẹ̌koạ kapulung Mawu sarung masal᷊amatẹ̌. (1Yoh 2:15-17) Hakị u ene, mahịe i kitẹ tumol᷊e standar moral i Yehuwa tadeạu taumata wal᷊inẹ makasilo kakanoạ i kitẹ mapia kụ mẹ̌dalo Mawu.—1Ptr 2:11, 12.

Apa nilahẹ u pakeang dingangu penampilanku soal u standar moralku?

PẸ̌BIALẠE VIDEO MENJADI SAHABAT YEHUWA—SATU PRIA, SATU WANITA, BỌU ENE SIMBAHE PIRAM BAỤ KAKIWAL᷊O INI:

  • Kawe nụe tumol᷊e standar i Yehuwa ene kai kakanoạ mapelesa?

  • Kawe nụe matatimadẹ̌ harusẹ̌ měněntiro standar i Yehuwa su manga anạ i sire dongkeng bědang kadodọ?

  • Kerea mangangudạ dingangu matatimadẹ̌ botonge mẹ̌tul᷊ung taumata wal᷊inẹ makaěbạ al᷊amatẹ̌ bọu kapiang Yehuwa?