Langsung ke konten

Langsung ke menu sekunder

Langsung ke daftar isi

Sahiding Yehuwa

Sangir

Těntiroi Anạ I Kamene

 PĚNGANGĚNDUNGANG 10

Yesus Anạ Matuhụ

Yesus Anạ Matuhụ

Apa i kau turusẹ̌ matuhụ si papạ dingangi mamạ u?Pẹ̌sěnsul᷊ẹ tumuhụ si sire ene tawe gampang. Apa i kau masingkạ, i Yesus turusẹ̌ matuhụ si Yehuwa, lai si papạ dingangi mamạ e?Mạeng i kau mẹ̌basa běkeng i Yesus, ene mẹ̌tul᷊ung si kau tadeạu matuhụ si papạ dingangi mamạ u, maning ene tawe gampang. Mahi i kitẹ mẹ̌basa běkene.

Su tempong i Yesus bědang tawe nẹ̌tanạ su dunia, i sie nẹ̌tanạ su sorga dingangi Papạ e, i Yehuwa. Katewe, su tempong i sie nẹ̌tanạ su dunia, i sie lai piạ papạ dingangi mamạ e. Areng i rẹ̌dua, i Yusuf dingangi Maria. Kerea i Yusuf dingangi Maria sarang nakoạ papạ dingangi mamạ i Yesus?

I Yehuwa něngal᷊ing si Yesus bọu sorga sarang tiang i Maria, tadeạu i Yesus botonge malahirẹ̌ su dunia. Kětạeng i Yehuwa botonge měkoạ kerene. Bọu ene, i Yesus kakạguwạe su tiang i Maria, mẹ̌sul᷊ung dariọ kadodọ su ral᷊ungu tiang i mamạ e. Su tempong seng sio wul᷊ang, i Yesus nalahirẹ̌. Kerene běkene sarang i Yusuf dingangi Maria nakoạ papạ dingangi mamạ i Yesus.

I Yesus masayang si Papạ e, i Yehuwa. Su tempong umure 12 su taunge, i sie něnodẹ kerea i sie masayang si Yehuwa. Su tempo ene, i Yesus dingangu keluargane nakoạ sarang Yerusalem tumol᷊e Paskah. Su tempong i Yusuf dingangi Maria su ral᷊eng mapul᷊ẹ sarang bal᷊e, i rẹ̌dua buhudeng nakasingkạ i Yesus tawe dịe dingangi sire. Apa i kau masingkạ su apa i Yesus?

Apa nikoạ i Yesus su bait?

I Yusuf dingangi Maria apidu něbal᷊ị sarang Yerusalem nědeạ si Yesus. I sire matakụ i Yesus mailang. Katewe, su katělu ěllone, i Yesus nikaěbạ su bait! Apa nikoạ i Yesus su bait?I sie něngěndung kerea i Papạ e, i Yehuwa. I sie masayang si Yehuwa, kụ i sie mapulu masingkạ kerea měkoạ naung i Yehuwa mal᷊uasẹ̌. Su tempong i Yesus seng gěguwạ, i sie turusẹ̌ matuhụ si Yehuwa. I Yesus matuhụ maning ene tawe gampang. Apa i Yesus lai matuhụ si Yusuf dingangi Maria?Iya, Alkitapẹ̌ nẹ̌bera i sie matuhụ si sire.

Kerea i kau botonge mẹ̌těno si Yesus?— I kau harusẹ̌ matuhụ si papạ dingangi mamạ u, maning ene tawe gampang. Apa i kau mapulu tumuhụ si rẹ̌dua?

BASA SU ALKITAPẸ̌

  • Lukas 1:30-35; 2:45-52

  • Efesus 6:1

  • Ibrani 5:8