I Ribka makěndagẹ̌ si Yehuwa. Kawinge arenge Ishak. Ishak lai makěndagẹ̌ si Yehuwa. Apa i kau masingkạ, kerea i rẹ̌dua nẹ̌sombang? Kere apa i Ribka někoạ naung i Yehuwa mal᷊uasẹ̌? Ndaị e i kitẹ mẹ̌basa běkene.

Ishak anạ i Abraham děduang Sara. I sire nẹ̌tanạ su Kanaan, taumata sene tawe měngẹ̌ngibadah si Yehuwa. Katewe, i Abraham mapulu anạe mẹ̌kawing dingangu taumata měngẹ̌ngibadah si Yehuwa. Hakị u ene, i Abraham něngoro si Eliezer, ělange, pědeạ kawing si Ishak su Haran, tampạ anạu sěngkataungi Abraham.

I Ribka tamai-ramahi něngal᷊ạ akẹ gunang manga unta

I Eliezer natamai dingangu ělang i Abraham bal᷊inẹ. Ual᷊ingu i sire dumal᷊eng marau-rau, i sire nẹ̌bawa mapul᷊o unta, kụ su wowone piạ kaěng dingangu lawọ hadiah. Kerea i Eliezer botonge makaěbạ wawine mapia gunang Ishak? Su Haran piạ pahighi, i sire něngirul᷊e ndaị sene, ual᷊ingu i Eliezer masingkạ lawọ taumata měngal᷊ạ akẹ su pahighi ene. Bọu ene Eliezer nědoa si Yehuwa, kụ nẹ̌bera: ’Mạeng iạ mědorong akẹ su sěngkatau wawine, kụ i sie měgělị akẹ si siạ dingangu su manga untaku, iạ masingkạ ndaị ene wawine nipile-Nu.’

Bọu i Eliezer nědoa, i Ribka nasongo su pahighi ene. Alkitapẹ̌ nẹ̌bera i Ribka wawine masadadạ. I Eliezer nẹ̌dorong akẹ si sie, kụ i Ribka simimbahẹ̌: ’Iya botonge. Iạ měngal᷊ạ akẹ si kau dingangu kěbị  untanu lai.’ I kau masingkạ, unta mạeng marou měnginung lawọ akẹ! Hakị u ene, i Ribka tamai-ramahi něngal᷊ạ akẹ. Apa i kau nakasilo su gambarẹ̌ kerea karadinge i Ribka?I Eliezer mal᷊uasẹ̌ ual᷊ingu Yehuwa dimaringihẹ̌ doane.

I Eliezer něgělị lawọ hadiah mapaelẹ̌ si Ribka. Bọu ene, i Ribka němaringang si Eliezer dingangu manga ělang bal᷊inẹ mẹ̌sombang dingangu keluargane. I Eliezer nẹ̌běke kawe nụe i Abraham něngoro si sie sarang ene, kụ lai kerea Yehuwa němile si Ribka tadeạu makoạ kawing i Ishak. Keluargang i Ribka mapulu i Ribka mẹ̌kawing dingangi Ishak.

I Ribka natamai dingangi Eliezer sarang Kanaan, kụ nẹ̌kawing dingangi Ishak

Katewe, apa i Ribka mapulu mẹ̌kawing dingangi Ishak?I Ribka masingkạ i Yehuwa něngoro si Eliezer. Hakị u ene, su tempong keluargane nakiwal᷊o apa i sie mapulu mẹ̌kawing dingangi Ishak, i sie nẹ̌bera: ’Iya, iạ mapulu.’ Bọu ene i Ribka natamai dingangi Eliezer. Su tempong i sire nahumpạ su Kanaan, i Ribka nẹ̌kawing dingangi Ishak.

Ual᷊ingu i Ribka někoạ naung i Yehuwa mal᷊uasẹ̌, Yehuwa něgělị al᷊amatẹ̌ si sie. I Ribka nakoạ i upung i Yesus! Mạeng i kau lai mapulu měkoạ naung i Yehuwa mal᷊uasẹ̌, Yehuwa lai sarung měgělị al᷊amatẹ̌ si kau.