Langsung ke konten

Langsung ke menu sekunder

Langsung ke daftar isi

Sahiding Yehuwa

Sangir

Alkitapẹ̌ Něněntiro Apa si Kitẹ?

 PASALẸ̌ PITU

Taumata Nate Sarung Ipěbiahẹ̌!

Taumata Nate Sarung Ipěbiahẹ̌!

1-3. I kitẹ nipenjarangu apa, kụ kerea Yehuwa mapakawebasẹ̌ si kitẹ?

KĚNANG pẹ̌tiněna mạeng i kau nipenjara ual᷊ingu pẹ̌sasal᷊a tawe nikoạu kụ i kau tawe makasěbang. I kau seng kinailangeng pělaharapẹ̌ dingangu tawe makakoạ apa-apa. Katewe piạ taumata piạ kawasane gunang mẹ̌tul᷊ung, nẹ̌diandi sarung mapakawebasẹ̌ si kau! Kerea pěndangu?

2 I kitẹ kěbị nipenjarangu papate. Maning apa koateng, i kitẹ mang tawe mawebasẹ̌. Katewe Yehuwa piạ kawasa gunang mapakawebasẹ̌ si kitẹ bọu papate. I Sie nẹ̌diandi, ”Dokạ arau sědụ pangěnsueěnge sarung ikawatạ, ute kai papate.”​—1 Korintus 15:26.

3 Kěnang pẹ̌tiněna i kau seng tawe matakụ piạ papate! Yehuwa bal᷊inẹ kětạeng mapakailangu papate, katewe lai saụ mapakawiahẹ̌ taumata nate. Apa mangal᷊ene hal᷊ẹ̌ ini si kau? Yehuwa nẹ̌diandi i sire ”apan seng marěngụ nate” sarung saụ měbiahẹ̌. (Yesaya 26:19) Alkitapẹ̌ nẹ̌běke piạ taumata nate saụ nipěbiahẹ̌.

SU TEMPONG TAUMATA IKẸ̌KĚNDAGẸ̌ NATE

4. (a) Apa makahiborẹ̌ su tempong piạ anạu sěngkatau arau hapị i kitẹ nate? (b) I sai-sai hapị i Yesus?

4 Su tempong piạ anạu sěngkatau arau hapị nate,  tantu naung i kitẹ masusah. I kitẹ tawe makakoạ apa-apa gunang saụ mapakawiahẹ̌ taumata nate ene. Katewe, apa niul᷊ị su Alkitapẹ̌ makahiborẹ̌ si kitẹ. (Basa 2 Korintus 1:3, 4.) Su Alkitapẹ̌ piạ contoh něnodẹ Yehuwa dingangi Yesus mapulu saụ mapakawiahẹ̌ taumata ikẹ̌kěndagi kitẹ apang seng nate. Su tempong su dunia, Yesus hanesẹ̌ mẹ̌tiwo si Lazarus dingangu manga wawinene, i Marta dingangi Maria. I sire tělu ene hapị i Yesus. Alkitapẹ̌ naul᷊ị, ”[Tuang] Yesus e kụkěndagi Marta, i Maria, ringangi Lazarus.” Katewe, su sěngkatempo i Lazarus nate.​—Yohanes 11:3-5.

5, 6. (a) Apa nikoạ i Yesus su tempong nakasilo anạu sěngkatau dingangu hapị i Lazarus sụsangị? (b) Kawe nụe makasingkạ pěndang i Yesus soal u papate makahiborẹ̌ si kitẹ?

5 Yesus natamai gunang měhiborẹ̌ si Marta dingangi Maria. Su tempong nakasingkạ Yesus diměnta, Marta apidu nẹ̌sombang i Yesus. I sie mal᷊uasẹ̌ i Yesus simongo, katewe bọu ene i sie naul᷊ị, ”[Tuang], kai mangạewe [Tuang] ene sini su tempo ene, ute nal᷊ahẹ u mahuaneku e wiahẹ̌ bue.” Su tiněnang i Marta i Yesus seng nal᷊atẹ̌. Bọu ene, Yesus nakasilo si Maria sụsangị, i sie lai nasusah naunge kụ simangị dingang. (Yohanes 11:21, 33, 35) Yesus masingkạ kerea pěndang i kitẹ su tempong nitěntang taumata ikẹ̌kěndagi kitẹ.

6 Masingkạ kerea pěndang i Yesus su tempong piạ taumata nate, ene makahiborẹ̌ si kitẹ. Pěndang i Yesus mẹ̌sul᷊ungu pěndang i Amange. (Yohanes 14:9) Yehuwa piạ kawasa gunang mapakailang papate sarang karěngụe, kụ seng mal᷊ighạ i Sie měkoạ ene.

”LAZARUS SẸ̌BANGKE!”

7, 8. Kawe nụe Marta madiri watu ene al᷊ingang bọu kubul᷊i Lazarus, katewe apa nikoạ i Yesus?

7 Su tempong i Yesus nahumpạ su kubul᷊i Lazarus, kubul᷊ẹ̌ ene kạtatutu dingangu  watu gěguwạ. Yesus naul᷊ị, ”Al᷊ingko watu ěndaị.” Katewe i Marta madiri, ual᷊ingu i Lazarus seng nate ěpạ u ěllo. (Yohanes 11:39) I sie wěga Yesus měkoạ ene gunang mẹ̌tul᷊ung mahuanene.

Anạu sěngkatau dingangu hapị i Lazarus mal᷊ua-l᷊uasẹ̌ su tempong i sie saụ nipěbiahẹ̌! —Yohanes 11:38-44

8 Yesus nẹ̌kui si Lazarus, ”Lazarus sẹ̌bangke!” Bọu ene i Marta dingangi Maria nakasilo hal᷊ẹ̌ makạlaherang. ”Tangu simẹ̌bangke taumata nạung seng nate ene. Limane ringangu laede wẹ̌dang kạpapikungu hekạ kakěngkaing.” (Yohanes 11:43, 44) Lazarus saụ něbiahẹ̌! I sie saụ nẹ̌sombang dingangu anạu sěngkataune lai manga hapịe. I sire botonge mělahěkụ, měngumbelẹ, lai mẹ̌bisara dingange. Ini mukjizat! Yesus napakawiahẹ̌ si Lazarus.

”MOMỌ, IẠ MẸ̌BERA SI KAU: PẸ̌BANGUNGKE!”

9, 10. (a) I sai něgělị si Yesus kawasa gunang mapakawiahẹ̌ taumata nate? (b) Kawe nụe běkeng Alkitapẹ̌ soal u taumata saụ nipěbiahẹ̌ ene makahiborẹ̌ si kitẹ?

9 Apa i Yesus něpakẹ kawasane hala gunang mapakawiahẹ̌ taumata nate? Tala. Su tempong Yesus bědang tawe napakawiahẹ̌ si Lazarus, i sie nẹ̌doa si Yehuwa kụ Yehuwa něgělị kawasa gunang mapakawiahẹ̌ si Lazarus. (Basa Yohanes 11:41, 42.) Taumata saụ nipěbiahẹ̌ bọu papate bal᷊inẹ kětạeng i Lazarus. Alkitapẹ̌ lai nẹ̌běke piạ sěngkatau anạ wawine umure 12 su taunge masakị matědụ. I papạe, Yairus, seng běga měnsang měkoạ apa. I sie nẹ̌dorong tul᷊ung si Yesus tadeạu mapakapiang anạe. Anạe kětạeng sěmbaụ ene. Su tempong i sie kạpẹ̌bisarane dingangi Yesus, piạ u naul᷊ị, ”Ahus’i Tuang bawine e seng naněntang, . . . tawe wahal᷊uasẹ̌ i Tuang mapakasusa Mawu Yesus e wědang.” Katewe, Yesus naul᷊ị,  ”Abe katakụ, měngkate pangimang, kụ anạu mul᷊e arau mapia wue.” Bọu ene, i Yesus nakoạ sarang wal᷊eng i Yairus kụ i sie nakasilo taumata sụsangị. I Yesus naul᷊ị si sire, ”Abe pěmpẹ̌sangị. Dariọ ene bal᷊inewe nate, kaiso kětạeng mětẹ̌tikị!” Matimade tawe nakahěngang bawerang i Yesus. Yesus něngoro taumata pasěbang bọu kamaru dariọ ene. Katewe matimadu dariọ ene nipasuẹ̌ su ral᷊ungu kamarẹ̌. Yesus něngumbelẹ limang dariọ ene kụ nẹ̌bera, ”Momọ, Iạ mẹ̌bera si kau: pẹ̌bangungke!” Tantu matimadu rariọ ene mal᷊ua-l᷊uasẹ̌ nakasilo anạe saụ něbiahẹ̌. Yesus saụ napakawiahẹ̌ anạ i sire. (Markus 5:22-24, 35-42; Lukas 8:49-56) Něnětạ tempo ene, sabang i sire měmanda dariọ ene, i sire makatahěndung apa seng nikoạ i Yehuwa bọu i Yesus. *

10 Taumata bọu nipakawiahi Yesus samurine saụ nate. Katewe běkeng Alkitapẹ̌ soal i sire makahiborẹ̌ si kitẹ. Yehuwa mapulu dingangu sarung mapakawiahẹ̌ taumata nate.

TĚNTIRO BỌU ALKITAPẸ̌ SOAL U TAUMATA SAỤ NIPĚBIAHẸ̌

Rasul Petrus napakawiahẹ̌ si Dorkas.—Munara’m Manga Rarolohang 9:36-42

Elia napakawiahẹ̌ anạ u wawine wal᷊u.

1 Manga Ratu 17:17-24

11. Apa nikaěndungang i kitẹ bọu Měnanasẹ̌ 9:5 soal i Lazarus?

11 Alkitapẹ̌ naul᷊ị, ”Taumata nate e wěgaweng apa-apa.” Lazarus lai kerene. (Měnanasẹ̌ 9:5) Kere seng niul᷊ị i Yesus, Lazarus mẹ̌sul᷊ungu taumata mětẹ̌tikị. (Yohanes 11:11) Su tempong i Lazarus nate i sie seng ”wěgaweng apa-apa”.

12. Kerea i kitẹ nakasingkạ i Lazarus kahěngang-hěngang saụ něbiahẹ̌?

12 Lawọ taumata nakasilo su  tempong i Yesus saụ napakawiahẹ̌ si Lazarus. Manga sědụ i Yesus lai masingkạ běke soal u mukjizat ene. I Lazarus  něbiahẹ̌ kụ ini něnodẹ taumata nate botonge saụ měbiahẹ̌. (Yohanes 11:47) Lawọ taumata němanda si Lazarus kụ i sire nangimang Yesus kai nirolohu Mawu. Manga sědụ i Yesus nẹ̌pědu hakị u ene i sire mapulu měmate si Yesus dingangi Lazarus.​—Yohanes 11:53; 12:9-11.

13. Kawe nụe i kitẹ mangimang Yehuwa botonge mapakawiahẹ̌ taumata nate?

13 Yesus naul᷊ị, ”Patikụ taumata nate” sarung ipěbiahẹ̌. (Yohanes 5:28) Ini mangal᷊ene kěbị taumata tẹ̌tahěndungang i Yehuwa sarung saụ ipěbiahẹ̌. Katewe, tadeạu Yehuwa botonge mapakawiahẹ̌ si sire, i Sie harusẹ̌ mẹ̌tahěndung si sire sarang hal᷊ẹ̌ kakadodọkange. Apa Yehuwa makatahěndung kěbị ene? Piạ lawọ bituing su langị. Alkitapẹ̌ naul᷊ị Yehuwa masingkạ arengu kěbị bituing. (Basa Yesaya 40:26.) Mạeng Yehuwa makatahěndung kěbị arengu bituing, tantu i Sie botonge lai mẹ̌tahěndung si sire apang seng nate sarang hal᷊ẹ̌ kakadodọkange. Bọu ene lai, Yehuwa něndiadi kěbị haghi, hakị u ene Yehuwa piạ kawasa gunang mapakawiahẹ̌ taumata nate.

14, 15. Apa nikaěndungang i kitẹ bọu bawerang i Ayub soal u taumata nate?

14 I Ayub mangimang taumata nate sarung saụ měbiahẹ̌. I sie nẹ̌bera, ”U kamagengu taumata e mate, botonge i sie mẹ̌biahẹ̌ kapia?” I sie saụ nẹ̌bera si Yehuwa, ”Tangu i Kau e sarung mẹ̌kui siạ, dingangu iạ e sarung mẹ̌gěllị u sasimbange; i Kau e sarung lai tumal᷊ěntụ u iạ, diadikang niriadin’U e.” I Ayub masingkạ Yehuwa mapulu-pulu saụ mapakawiahẹ̌ taumata nate.​—Ayub 14:13-15.

 15 Kerea pěndangu nakasingkạ taumata nate sarung saụ ipěbiahẹ̌? Tantu i kau mapulu masingkạ, ’Apa anạu sěngkatauku dingangu hapịku seng nate botonge saụ měbiahẹ̌?’ I kitẹ tantu mal᷊uasẹ̌ ual᷊ingu nakasingkạ Yehuwa mapulu mapakawiahẹ̌ taumata nate. Alkitapẹ̌ lai naul᷊ị i sai-sai sarung ipěbiahẹ̌ kụ i sire sarung mětanạ su apa.

I SIRE ”MAKARINGIHẸ̌ TINGIH’E MASE SUMẸ̌BANG”

16. Pěbawiahẹ̌ kere apa sarung kapěndangengu taumata saụ nipěbiahẹ̌ su dunia?

16 Su tempong tamai, i sire apang saụ nipěbiahẹ̌ nẹ̌sombang dingangu anạu sěngkatau lai manga hapịe su dunia. Ini lai mariadi su ěllo mahi, katewe limembong mapaelẹ̌. Kawe nụe? Ual᷊ingu i sire apang saụ nipěbiahẹ̌ su dunia, makaěbạ pělaharapẹ̌ gunang měbiahẹ̌ sarang karěngụe kụ seng tawe mate. I sire sarung mětanạ su tampạ mapaelẹ̌ nẹ̌tatěntang dingangu orasẹ̌ ini. Seng tawẹ apa sekẹ, karal᷊akisẹ̌ dingangu kasasakị.

17. I sai-sai sarung saụ ipěbiahẹ̌?

17 I sai-sai sarung saụ ipěbiahẹ̌? Yesus nẹ̌bera, ”Patikụ taumata nate makaringihẹ̌ tingih’E. Mase sumẹ̌bang bọu kubul᷊ẹ̌.” (Yohanes 5:28, 29) Pělal᷊ahẹ 20:13 lai naul᷊ị si kitẹ, ”Bọu ene tangu l᷊audẹ̌ e něnarakangu taumata nate apang su ral᷊unge. Papate ringangu Dunia’m Papate e mal᷊aing něnarakangu apan taumata nate kụ ene su ral᷊unge.” Jutane taumata saụ měbiahẹ̌. Rasul Paulus lai naul᷊ị, ”Taumata mapapia [kakanoạe matul᷊idẹ̌, NW] arau taumata ewe lai raral᷊aị [tawẹ tul᷊ide, NW]” su těngong Mawu sarung saụ ipěbiahẹ̌. (Basa Munara’m Manga Rarolohang 24:15.) Apa mangal᷊ene bawera ene?

I sire apang saụ nipěbiahẹ̌ sarung mẹ̌sombang dingangu taumata ikẹ̌kěndage su Firdaus

18. I sai ”taumata kakanoạe matul᷊idẹ̌” sarung saụ ipěbiahẹ̌ su tempo mahi?

18 ”Taumata kakanoạe matul᷊idẹ̌” i sire ene kai manga ělang i  Yehuwa apang něbiahẹ̌ su tempong Yesus bědang tawe diměnta su dunia. Kere i Noakẹ̌, Abraham, Sara, Musa, Rutẹ̌, dingangi Ester sarung saụ ipěbiahẹ̌ su dunia. Běkeng pěbawiahẹ̌ i sire niwohẹ su bukẹ̌ Ibrani pasalẹ̌ 11. Kụ kerea manga ělang i Yehuwa apang seng nate orasẹ̌ ini? I sire lai ”taumata kakanoạe matul᷊idẹ̌” kụ sarung saụ ipěbiahẹ̌.

19. I sai ”taumata kakanoạe tawẹ tul᷊ide”? Kụ apa botonge koateng i sire ual᷊ingu Yehuwa saụ mapakawiahẹ̌ si sire?

 19 ”Taumata tawẹ tul᷊ide” i sire ene kai taumata bědang tawe nakasingkạ i sai Yehuwa. Maning i sire seng nate, Yehuwa tawe niwul᷊eng i sire. Yehuwa sarung saụ mapakawiahẹ̌ taumata nate, tadeạu i sire botonge makasingkạ i sai Yehuwa kụ makoạ ělang’E.

20. Kawe nụe tawe kěbị taumata sarung saụ ipěbiahẹ̌?

20 Apa kěbị taumata nate sarung saụ měbiahẹ̌? Tala. Yesus naul᷊ị sarung piạ taumata tawe  ipěbiahẹ̌. (Lukas 12:5, Terjemahan Dunia Baru) I sai měmutusẹ̌ taumata sarung saụ ipěbiahẹ̌ arau tala? Yehuwa makoạ Hakim kasamuriange. Katewe, i Sie lai něgělị kawasa si Yesus gunang ”makoạ měnggaghuta arau hakim waugu taumata wiahẹ̌ dingangu nate”. (Munara’m Manga Rarolohang 10:42) Taumata tawe tumuhụ si Yehuwa kụ madiri mẹ̌bal᷊ui seng tawe ipěbiahẹ̌.​—Pěmanda Catatan 19.

I SIRE APANG SAỤ NIPĚBIAHẸ̌ GUNANG MĚTANẠ SU SORGA

21, 22. (a) Kerea taumata apang měbiahẹ̌ su sorga? (b) I sai kahumotongange saụ nipěbiahẹ̌ sarang sorga?

21 Alkitapẹ̌ lai naul᷊ị piạ taumata sarung měbiahẹ̌ su sorga. Su tempong nipěbiahẹ̌ su sorga i sire seng tawe měpakẹ badangu taumata katewe měpakẹ badang rohkẹ̌.

22 Yesus kahumotongange nipěbiahẹ̌ sarang sorga. (Yohanes 3:13) Su katělu ěllone Yesus nate, Yehuwa saụ napakawiahẹ̌ si sie. (Mazmurẹ̌ 16:10; Munara’m Manga Rarolohang 13:34, 35) Yesus tawe nipakawiahẹ̌ dingangu wadangu taumata. Rasul Petrus naul᷊ị, ”I Sie nipate tuhụ mawadang, kaiso kawe niapẹ̌bangung kapia tuhụ marohkẹ̌.”  (1 Petrus 3:18) Yesus nipěbiahẹ̌ dingangu wadangu rohkẹ̌ kụ nakoạ matogha-toghasẹ̌! (1 Korintus 15:3-6) Katewe, Alkitapẹ̌ lai naul᷊ị bal᷊inẹ kětạeng i Yesus sẹ̌sane nipěbiahẹ̌ sarang sorga.

23, 24. I sai ”rekenange mahal᷊i” niul᷊ị i Yesus, kụ pira kal᷊awọe i sire?

23 Su tempong i Yesus bědang tawe nate, i sie naul᷊ị su manga murite, ”Iạ e kai rumal᷊eng měndiahing tampạ baug’i kamene.” (Yohanes 14:2) Ini mangal᷊ene piạ pirang katau murite sarung měbiahẹ̌ su sorga. Pira kal᷊awọe? Yesus nẹ̌bera, i sire ”rekenange mahal᷊i”. (Lukas 12:32) Rasul Yohanes naul᷊ị kal᷊awọe i sire, su tempong i sie nakasilo i Yesus ”rụdarisị su wowom Bul᷊ud’u Sion [sorga]. Dingange piạ i sire 144.000 su kataune”.​—Pělal᷊ahẹ 14:1.

24 Kange i sire 144.000 tau Sahani ene saụ ipěbiahẹ̌? Alkitapẹ̌ naul᷊ị ene mariadi su tempong i Yesus seng mẹ̌parenta su sorga. (1 Korintus 15:23) I kitẹ měbẹ̌biahẹ̌ su tempo ene, kụ kal᷊awokange bọu 144.000 seng něbiahẹ̌ su sorga. I sire apang bědang měbẹ̌biahẹ̌ su dunia, kụ mate orasẹ̌ ini apidu nipěbiahẹ̌ sarang sorga. Katewe, kal᷊awokange taumata, sarung ipěbiahẹ̌ su Firdaus su dunia.

25. Apa sarung ěndungang i kitẹ su pasalẹ̌ 8??

25 Seng mal᷊ighạ Yehuwa měnal᷊amatẹ̌ taumata bọu papate, kụ papate sarung ipakailang sarang karěngụe! (Basa Yesaya 25:8.) Katewe, apa sarung koateng i sire apang měbiahẹ̌ su sorga? Alkitapẹ̌ naul᷊ị i sire sarung mẹ̌parenta makoạ datu dingangi Yesus su Kararatuang u Mawu. I kitẹ sarung makasingkạ mal᷊awọ soal u Kararatuang u Mawu ene su pasalẹ̌ 8.

^ par. 9 Alkitapẹ̌ lai nẹ̌běke soal u taumata saụ nipěbiahẹ̌. Piạ u maghurang, mangudạ, esẹ, wawine, tau Israelẹ̌ dingangu taumata bọu wangsa wal᷊inẹ. I kau botonge mẹ̌basa su 1 Manga Ratu 17:17-24; 2 Manga Ratu 4:32-37; 13:20, 21; Matius 28:5-7; Lukas 7:11-17; 8:40-56; Munara’m Manga Rarolohang 9:36-42; 20:7-12..