Langsung ke konten

Langsung ke menu sekunder

Langsung ke daftar isi

Sahiding Yehuwa

Sangir

Alkitapẹ̌ Něněntiro Apa si Kitẹ?

 PASALẸ̌ MAPUL᷊O ĚPẠ

Keluarganu Botonge Mararame

Keluarganu Botonge Mararame

1, 2. Apa kapulung Yehuwa gunang keluarga?

MAWU YEHUWA někoạ pẹ̌kakawing kahumotongange. Alkitapẹ̌ naul᷊ị, Yehuwa někoạ wawine humotong kụ ”niwawane sorong anun taumata ene”. Adam mal᷊uasẹ̌ kụ naul᷊ị, ”Ini e i sie taumata e kụ mẹ̌sul᷊ungu iạ e, ruhine wọu ruhiku ringangu ghẹ̌sine wọu ghẹ̌siku.” (Pěndariadi 2:22, 23) Ini nělahẹ si kitẹ Yehuwa mapulu keluarga mararame.

2 Katewe, orasẹ̌ ini lawọ keluarga tawe mararame. Maning kerene, su Alkitapẹ̌ piạ lawọ prinsip makatul᷊ung sěntahanakeng mararame.​—Lukas 11:28.

APA DẸ̌DORONGANGU MAWU BỌU KAWING ESẸ

3, 4. (a) Kerea esẹ harusẹ̌ měkoạ kawinge? (b) Kawe nụe sěngkawingang harusẹ̌ mẹ̌gaghělị ampung?

3 Alkitapẹ̌ naul᷊ị esẹ mapia ene kai makěndagẹ̌ dingangu měngarěga kawinge. Pẹ̌basạe Efesus 5:25-29. Esẹ harusẹ̌ turusẹ̌ makěndagẹ̌ su kawinge. I sie lai měndiagạ, mẹ̌padul᷊i, dingangu tawe měndariha kawinge.

4 Katewe apa koatengu esẹ mạeng kawinge nẹ̌sal᷊a? Kawing esẹ nioro, ”I kamene manga esẹ! Kẹ̌kěndagěbeng kawingi kamene. Abe ral᷊ahětu  mẹ̌koạ si sire.” (Kolose 3:19) Kawing esẹ, pẹ̌tahěndung i kamene lai měkẹ̌koạ pẹ̌sasal᷊a. Mạeng i kau mapulu ampungangu Mawu, i kau lai harusẹ̌ měgělị ampung su kawingu. (Matius 6:12, 14, 15) Mạeng sěngkawingang mẹ̌gaghělị ampung, pẹ̌kakawing i rẹ̌dua sarung mararame.

5. Kawe nụe esẹ harusẹ̌ měngarěga kawinge?

5 Yehuwa něngoro esẹ měngarěga kawinge. Esẹ harusẹ̌ mapadul᷊i su kebutuhan u kawinge. Ene kai hal᷊ẹ̌ penting. Mạeng esẹ dal᷊akị měkoạ kawinge, Yehuwa tawe měnarimạ kakal᷊iomanenge. (1 Petrus 3:7) Makakoạ pẹ̌sěngkatau maarěga su těngong Mawu bal᷊inẹbe apa i sie esẹ arau wawine, katewe kai kakěndage su Mawu.

6. Apa mangal᷊ene sěngkawingang seng ”bal᷊inewe rarua, kaiso kawe sěmbaụ”?

6 Yesus naul᷊ị sěngkawingang ene seng ”bal᷊inewe rarua, kaiso kawe sěmbaụ”. (Matius 19:6) I sire harusẹ̌ satia sěmbaụ su wal᷊inẹ kụ abe pědeạ bal᷊inẹ. (Baweran Salomo 5:15-21; Ibrani 13:4) Sěngkawingang abe kětạeng mẹ̌tiněna kapulung batangeng hala, mạeng mẹ̌sěngkawadang. (1 Korintus 7:3-5) Kawing esẹ harusẹ̌ mẹ̌tahěndung ”tawẹu sarang sěngkatau taumata měbẹ̌binsịu ghěsine sẹ̌sane. Kaiso i sie měpẹ̌padul᷊i ringangu měděndiagạ”. Hakị u ene i sie harusẹ̌ kuměndagẹ̌ dingangu mapadul᷊i su kawinge. Něngalembong penting, wawine mapulu kawinge mapia dingangu makěndagẹ̌ si sie.​—Efesus 5:29.

 APA DẸ̌DORONGANGU MAWU BỌU KAWING WAWINE

7. Kawe nụe keluarga harusẹ̌ piạ těmbonange?

7 Kěbị keluarga harusẹ̌ piạ těmbonange, ene kai sěngkatau esẹ měngahạ keluargane tadeạu makoạ mararame. Alkitapẹ̌ naul᷊ị su 1 Korintus 11:3, ”Makoạ těmbonang u manga esẹ u ute kai i Kristus, dingangu makoạ těmbonangu kawinge ute kai esẹ e mase těmbonang i Kristus e kai Mawu Ruata e.”

8. Kerea wawine měnodẹ i sie měngadatẹ̌ kawinge?

8 Esẹ lai měkẹ̌koạ pẹ̌sasal᷊a. Katewe, mạeng kawinge tumol᷊e putusang kụ sěngkapěhal᷊ẹ̌ dingange, lawọ al᷊amate su sěntahanakeng. (1 Petrus 3:1-6) Alkitapẹ̌ naul᷊ị, ”I kamene manga wawine sěngkatau-sěngkatau e kěnangko pẹ̌tawakal᷊i měngadatẹ̌ kawinge.” (Efesus 5:33) Kerea mạeng kawinge pangangimange nẹ̌tatěntang?  I sie harusẹ̌ tatapẹ̌ měngadatẹ̌ su kawinge. Alkitapẹ̌ lai naul᷊ị, ”I kamene manga wawine, pakasasuměllung arau pakaadatẹ̌ su kawing’i kamene tadeạu kamagengu wọu tal᷊oaran sire e piạ u tawe měmpangimangu hengetangu Mawu Kasěllahenge, ute kakanoạ i kamene mapia e makakawal᷊uin sire kụ měmpangimang.” (1 Petrus 3:1, 2) Kakanoạ mapia makatul᷊ung kawinge makaěna dingangu měngarěga pangangimange.

9. (a) Apa koatengu wawine mạeng putusangu kawinge tawe nẹ̌tatahino si sie? (b) Sasasa apa niwohẹ su Titus 2:4, 5 gunang manga wawine?

9 Apa koatengu wawine mạeng putusang kawinge tawe nẹ̌tatahino si sie? I sie harusẹ̌ maudupẹ̌ mẹ̌bisarang hal᷊ẹ̌ ene. Contone, i Sara naul᷊ị sěmbaụ hal᷊ẹ̌ kụ i Abraham madiri měnarimạ, katewe Yehuwa naul᷊ị si sie, ”Tuhukeko kapulun Sara.” (Pěndariadi 21:9-12) Mạeng putusang nikoạ u kawing esẹ nẹ̌tatahino dingangu těntirong Alkitapẹ̌, wawine harusẹ̌ tumol᷊e putusang ene. (Munara’m Manga Rarolohang 5:29; Efesus 5:24) Wawine mapia sarung měngurusẹ̌ keluargane. (Basa Titus 2:4, 5.) Mạeng kawinge dingangu manga anạe makasilo i sie marading, i sire sarung kuměndagẹ̌ dingangu měngarěgang sie.​—Baweran Salomo 31:10, 28.

Kerea i Sara nakoạ tatěnoěng mapaelẹ̌ su kawing wawine?

10. Apa niul᷊ị u Alkitapẹ̌ soal u mẹ̌tal᷊ei arau mẹ̌cere?

10 Pẹ̌sěnsul᷊ẹ sěngkawingang masahawụ měmutusẹ̌ mẹ̌tal᷊ei. Katewe, Alkitapẹ̌ naul᷊ị, ”Sěngkatau wawine kụ seng bọu nẹ̌kawinge ute kumbahangbe  maněntangu kawinge,” dingangu, ”Sěngkatau esẹ e tawe wotonge mapẹ̌tal᷊ein kawinge.” (1 Korintus 7:10, 11) Ěndịu piạ barang makakoạ sěngkawingang mẹ̌tal᷊ei, katewe ene harusẹ̌ tiněnang pakapia. Kerea mạeng mẹ̌cere? Alkitapẹ̌ naul᷊ị sěngkawingang botonge mẹ̌cere mạeng kawinge někoạ hubungan seks dingangu taumata wal᷊inẹ.​—Matius 19:9.

APA DẸ̌DORONGANGU MAWU BỌU MATIMADẸ̌

Yesus kai tatěnoěng mapaelẹ̌ su kěbị anggota keluarga

11. Apa hal᷊ẹ̌ penting harusẹ̌ koateng matatimadẹ̌?

11 Matatimadẹ̌, sadiako tempo gunang manga  anạ i kamene. Manga rariọ mapulu matimade ene dingangi sire, kụ limembong penting lai matatimadẹ̌ harusẹ̌ měněntiro titang Yehuwa su manga anạe.​—Pangangonggọ u Toratẹ̌ Kapia 6:4-9.

12. Apa harusẹ̌ koateng matatimadẹ̌ gunang měndiagạ manga anạ i sire?

12 Duniang Setang orasẹ̌ ini sauneng kakạdal᷊akịe, kụ piạ taumata mapulu měnilakạ manga rariọ su hal᷊ẹ̌ seksual. Pẹ̌sěnsul᷊ẹ matatimadẹ̌ madiri mẹ̌bisara soal u hal᷊ẹ̌ ini dingangu manga rariọ. Katewe matatimadẹ̌ harusẹ̌ měněntiro kerea mẹ̌těngkarau bọu taumata ral᷊akị. Matatimadẹ̌, i kamene harusẹ̌ měndiagạ manga anạ i kamene. *1 Petrus 5:8.

13. Kerea matatimadẹ̌ měněntiro manga anạ i sire?

13 Měněntiro kakanoạ mapia su anạ ene kai hal᷊ẹ̌ u matatimadẹ̌. Kerea carane měněntiro si sire? Manga rariọ harusẹ̌ těntirong, katewe abe kasarẹ̌. (Yeremia 30:11) Hakị u ene, kumbahang měgělị disiplin su tempong pědu. I kau tantu madiri mạeng baweranu makoạ kere ”pilị u peda” makatědụ si sire. (Baweran Salomo 12:18) Paul᷊ị su manga anạ i kamene kawe nụe i sire harusẹ̌ matuhụ.​—Efesus 6:4; Ibrani 12:9-11; pěmanda Catatan 30.

 APA DẸ̌DORONGANGU MAWU BỌU MANGA RARIỌ

14, 15. Kawe nụe manga rariọ harusẹ̌ matuhụ su matatimadẹ̌?

14 Yesus tatapẹ̌ matuhụ si Amange, maning pẹ̌sěnsul᷊ẹ tawe gampang. (Lukas 22:42; Yohanes 8:28, 29) Yehuwa lai mapulu manga rariọ matuhụ su matimadẹ̌.​—Efesus 6:1-3.

15 Pẹ̌sěnsul᷊ẹ, tawe gampang tumuhụ su matimadẹ̌, katewe mạeng i kamene matuhụ, Yehuwa dingangu matimadẹ̌ sarung mal᷊uasẹ̌. *Baweran Salomo 1:8; 6:20; 23:22-25.

Apa makatul᷊ung mangangudạ tatapẹ̌ satia su Mawu maning piạ u měngahạ měkoạ barang dal᷊akị?

16. (a) Kerea Setang měngahạ mangangudạ tadeạu měkoạ barang nẹ̌sal᷊a? (b) Kawe nụe harusẹ̌ měmile hapị makěndagẹ̌ si Yehuwa?

16 Setang měpakẹ hapị arau taumata wal᷊inẹ tadeạu měngahạ si kau měkoạ barang nẹ̌sal᷊a.  I sie masingkạ tawe tumol᷊e kapulung sire ene tawe gampang. Contone, Dina, anạ i Yakub, hapịe bal᷊inẹ ělang i Yehuwa. Ini nakarěntang kasasusah si sie dingangu keluargane. (Pěndariadi 34:1, 2) Mạeng hapịu tawe kụkěndagẹ̌ si Yehuwa, i sie sarung měngahạ si kau měkoạ barang ikẹ̌kawěnsing i Yehuwa, kụ ini makarěntang lawọ kasasusah si kau, keluarganu, dingangu su Mawu. (Baweran Salomo 17:21, 25) Hakị u ene mapaelẹ̌ mạeng mědal᷊ahapị dingangi sire apang makěndagẹ̌ si Yehuwa.​—1 Korintus 15:33.

KELUARGANU BOTONGE MARARAME

17. Apa harusẹ̌ koatengu kěbị anggota keluarga?

17 Mạeng sěntahanakeng tumol᷊e těntirong Mawu, ene makarau bọu kasasusah. Hakị u ene, mạeng i kau sěngkatau esẹ, pakakěndagẹ̌ bue su kawingu. Mạeng i kau wawine, i kau harusẹ̌ pakaadatẹ̌ su kawingu dingangu tol᷊e kakanoạ mapaelẹ̌ bọu kawing wawine nilahẹ su Baweran Salomo 31:10-31. Mạeng i kau matimadẹ̌, těntiroi anạu tadeạu kuměndagẹ̌ su Mawu. (Baweran Salomo 22:6) Mạeng i kau matimadẹ̌ esẹ, ’pakapelesa měngatorẹ̌ dal᷊ohong bal᷊enu’. (1 Timotius 3:4, 5; 5:8) Bọu ene manga rariọ, pakatatuhụ bue su matatimadẹ̌. (Kolose 3:20) Pẹ̌sěngkatau su keluarga měkẹ̌koạ pẹ̌sasal᷊a, hakị u ene pakasanạ naung dingangu pẹ̌gaghělịe ampung sěmbaụ su wal᷊inẹ. Alkitapẹ̌ makaahạ sěntahanakeng ual᷊ingu lohone kai bọu Yehuwa.

^ par. 12 I kamene botonge makasingkạ mal᷊awọ soal u měndiagạ manga rariọ su pasalẹ̌ 32 bọu bukẹ̌ Belajarlah dari sang Guru Agung, nikoạ u Sahiding Yehuwa.

^ par. 15 Mạeng parentang matimadẹ̌ tawe nẹ̌tatahino dingangu parentang Mawu, manga rariọ abe tuhụ.​—Munara’m Manga Rarolohang 5:29.