Langsung ke konten

Langsung ke menu sekunder

Langsung ke daftar isi

Sahiding Yehuwa

Sangir

Alkitapẹ̌ Něněntiro Apa si Kitẹ?

 PASALẸ̌ HUMOTONG

I Sai Mawu?

I Sai Mawu?

1, 2. Taumata masau mẹ̌kiwal᷊o apa?

MANGA RARIỌ masau mẹ̌kiwal᷊o. I kau ěndịu měbẹ̌bisarang sěmbaụ hal᷊ẹ̌ dingange, katewe i sie nẹ̌kiwal᷊o, ’Kawe kerene?’ Bọu ene su tempong i kau maul᷊ị sasimbahe, i sie saụ nẹ̌kiwal᷊o, ’Katewe kawe kerene?’

2 Apa i kitẹ bědang mangudạ arau seng maghurang, i kitẹ masau mẹ̌kiwal᷊o. Ěndịu i kitẹ mẹ̌kiwal᷊o soal u apa kanengang, paketang, arau wěliang. Arau i kitẹ ěndịu piạ kakiwal᷊o penting soal u pěbawiahẹ̌ dingangu kerea ěllo mahi. Katewe su tempong i kitẹ tawe nakaěbạ sasimbahu kakiwal᷊o ene, ěndịu i kitẹ apidu měngědo mědeạ sasimbahe.

3. Kawe nụe pirang katau nẹ̌tiněna tawe gampang makaěbạ sasimbahu kakiwal᷊ong i sire?

3 Apa su ral᷊ungu Alkitapẹ̌ piạ sasimbahu kakiwal᷊o penting ene? Pirang katau ěndịu nẹ̌tiněna kerene, katewe i sire nẹ̌pěndang Alkitapẹ̌ tawe gampang kaěnang. I sire nẹ̌pikirẹ̌ kětạeng těmbonang dingangu guru agama botonge sumimbahẹ̌. Bọu ene pirang katau lai mamea maul᷊ị i sire wěga sasimbahe. Kerea tumuhụ si kau?

4, 5. I kau mapulu masingkạ sasimbahu kakiwal᷊o penting apa, kụ kawe nụe harusẹ̌ turusẹ̌ mědeạ sasimbahe?

4 I kau ěndịu mapulu makasingkạ sasimbahu  kakiwal᷊o, kere: Apa timonang biahẹ̌ ini? Apa mariadi su tempong iạ mate? Mawu, kerea i Sie? Yesus, Guru kapaelange, naul᷊ị, ”Pěmpẹ̌dorong, tangu i kamene onggol᷊ang. Pěmpědeạ, tangu i kamene makahombang. Pěmpěnengkel᷊ẹ̌, tangu i kamene sarung pěnopeěng tukadẹ̌.” (Matius 7:7) Abe pěngědo mědeạ sarang i kau makaěbạ sasimbahu kakiwal᷊o botonge kapěngimangengu.

5 Mạeng ’mẹ̌tawakal᷊i mědeạ’, i kau sarung makaěbạ sasimbahe su ral᷊ungu Alkitapẹ̌. (Baweran Salomo 2:1-5) Sasimbahe gampang kaěnang. Apa niěndungangu sarung makal᷊uasẹ̌ si kau orasẹ̌ ini dingangu makaghělị pělaharapẹ̌ su tempo mahi. Humotong, mahịe i kitẹ mědeạ sasimbahu sěmbaụ kakiwal᷊ong taumata lawọ.

APA MAWU MAPADUL᷊I SI KITẸ?

6. Kawe nụe taumata mẹ̌pikirẹ̌ Mawu tawe měpẹ̌padul᷊i su tempong piạ kasasigěsạ?

6 Lawọ měpẹ̌pikirẹ̌ Mawu tawe měpẹ̌padul᷊i si kitẹ. I sire mẹ̌pěndang mạeng Mawu mapadul᷊i, dunia tawe makoạ kere ini. Su lawọ tampạ i kitẹ nakasilo piạ sekẹ, pẹ̌sasitori, dingangu kasasusah. Taumata masakị, masigěsạ, bọu ene mate. Hakị u ene, lawọ taumata mẹ̌bera, ’Mạeng Mawu mapadul᷊i, kawe nụe i sie němala kěbị ini nariadi?’

7. (a) Kerea těmbonangu agama něněntiro Mawu kai tawẹ apa pěndange? (b) Kawe nụe i kitẹ mangimang bal᷊inẹbe Mawu někoạ barang dal᷊akị?

7 Těmbonangu agama lai nakakoạ taumata mẹ̌pikirẹ̌ Mawu tawẹ apa pěndange arau  tawe mapadul᷊i. Mạeng piạ hombang nariadi, i sire mẹ̌bera ene kai kapulung Mawu. Su tempong i sire mẹ̌bera kerene, sěběnarẹ̌e i sire maul᷊ị Mawu nẹ̌sal᷊a. Katewe Alkitapẹ̌ něněntiro Mawu bal᷊inẹbe simbul᷊u barang dal᷊akị. Yakobus 1:13 nělahẹ si kitẹ Mawu tawe měnẹ̌nal᷊ukạ taumata dingangu barang dal᷊akị. Sene niul᷊ị, ’Kereu pẹ̌sěngkatau sẹ̌sal᷊ukateng, abe pẹ̌berau, ”Sasal᷊ukạ ini asal᷊e kai bọu anung Mawu,” batụu Mawu tawe kẹ̌kasal᷊ukatengu ral᷊aị, dingangu lai tawe měnal᷊ukạ si sai-sai.’ Ini mangal᷊ene maning Mawu němala barang dal᷊akị nariadi, katewe bal᷊inẹ i Sie někoạ ene nariadi. (Basa Ayub 34:10-12.) Kěnang pẹ̌tiněna contoh ini.

8, 9. Kawe nụe tawẹ adile maul᷊ị Mawu nẹ̌sal᷊a mạeng piạ kasasusah nariadi? Gělịko contoh.

8 Piạ sěngkatau anạ umbaseng mětẹ̌tanạ dingangu matimade. I papạe makěndagẹ̌ kụ něněntiro si sie kerea měkoạ putusang mapaelẹ̌. Bọu ene umbaseng ene tawe dimaringihẹ̌ si papạe kụ siměbang bọu wal᷊e. I sie někoạ barang dal᷊akị kụ nasigěsạ. Apa i kau maul᷊ị i papạe nẹ̌sal᷊a ual᷊ingu němala anạe siměbang bọu wal᷊e? Tantu tala! (Lukas 15:11-13) Mẹ̌sul᷊ung matimadẹ̌ esẹ kanini, Mawu tawe nẹ̌sěding taumata měmile měkoạ barang dal᷊akị arau tawe dumaringihẹ̌ si Sie. Hakị u ene su tempong piạ hombang nariadi, pẹ̌tahěndung ene asal᷊e bal᷊inẹ bọu Mawu. Tawẹ adile mạeng i kitẹ maul᷊ị Mawu nẹ̌sal᷊a.

9 Piạ alasange Mawu němala barang dal᷊akị nariadi. Pasalẹ̌ 11 sarung mělahẹ apa niul᷊ị u Alkitapẹ̌ soal u hal᷊ẹ̌ ene. Katewe i kau botonge mangimang Mawu makěndagẹ̌ si kitẹ dingangu bal᷊inẹ i Sie někoạ barang dal᷊akị kẹ̌kahombangeng i kitẹ. Su tempone, Mawu sarung měminasa kěbị barang dal᷊akị.​—Yesaya 33:2.

10. Kawe nụe i kitẹ mangimang Mawu sarung mapakailang kasasusah ual᷊ingu kakakoạ u taumata dal᷊akị?

10 Mawu kai masusi. (Yesaya 6:3) Kěbị apang nikoạ’E ene mapaelẹ̌ dingangu burěsi. Hakị u ene i kitẹ botonge mangimang si Sie. Mạeng taumata bal᷊inẹ kerene. I sire pẹ̌sěnsul᷊ẹ měkẹ̌koạ barang nẹ̌sal᷊a. Maning lai piạ pěměrenta kapaelange, i sire tawẹ apa kawasa gunang mapakailang kasasusah. Tawẹ apa taumata piạ kawasa mẹ̌sul᷊ungu Mawu. I Sie botonge dingangu mapulu mapakailang kasasusah ual᷊ingu kakakoạ u taumata  dal᷊akị. I Sie sarung měminasa kěbị karal᷊akisẹ̌ sarang karěngụe.​—Basa Mazmurẹ̌ 37:9-11.

KEREA PĚNDANGU MAWU SU TEMPONG TAUMATA NAKAHOMBANG KASASUSAH?

11. Kerea pěndangu Mawu su tempong i kau nakahombang kasasusah?

11 Kerea pěndangu Mawu su tempong nakasilo apa nariadi su dunia dingangu su pěbawiahu? Alkitapẹ̌ naul᷊ị Mawu ’puluang su kal᷊aadilẹ̌’. (Mazmurẹ̌ 33:5) Hakị u ene i Sie měmẹ̌manda barang nẹ̌sal᷊a arau dal᷊aị. I Sie madiri taumata makahombang kasasusah. Alkitapẹ̌ naul᷊ị Mawu ”nasusa naunge” su tempong nakasilo dunia tempong tamai napenẹu karal᷊akisẹ̌. (Pěndariadi 6:5, 6) Mawu tawe nẹ̌bal᷊ui. (Maleakhi 3:6) Alkitapẹ̌ naul᷊ị Mawu mapadul᷊i si kau.​—Basa 1 Petrus 5:7.

Alkitapẹ̌ naul᷊ị Yehuwa, Měndariadi kěbị haghi kai Mawu makěndagẹ̌

12, 13. (a) Kawe nụe i kitẹ makěndagẹ̌ dingangu mapadul᷊i su taumata wal᷊inẹ, kụ kerea pěndang i kitẹ su tempong nakasilo kasasusah su dunia ini? (b) Kawe nụe i kitẹ mangimang Mawu sarung mapakailang kasasusah dingangu kěbị apang tawẹ adile?

12 Alkitapẹ̌ naul᷊ị Mawu něndiadi si kitẹ mẹ̌papangawẹ i Sie. (Pěndariadi 1:26) Ini mangal᷊ene i kitẹ nighělịkangu sipatẹ̌ mapaelẹ̌ mẹ̌sul᷊ungu sipat’E. Hakị u ene mạeng nasusah naung su tempong nakasilo taumata nakahombang sigěsạ, Mawu lai limembong nasusah naung’E! Kerea i kitẹ botonge makasingkạ hal᷊ẹ̌ ene?

13 Alkitapẹ̌ něněntiro si kitẹ ’Mawu kai kakěndagẹ̌’. (1 Yohanes 4:8, 16) Kěbị apang nikoạ u Mawu ene ual᷊ingu kakěndag’E. Hakị u ene i kitẹ makěndagẹ̌ ual᷊ingu Mawu makěndagẹ̌. Kěnang pẹ̌tiněna: Mạeng i kau piạ kawasa, apa i kau mapulu mapakailang kasasusah dingangu kěbị apang tawẹ adile bọu dunia ini? Tantu mapulu, ual᷊ingu i kau makěndagẹ̌ su taumata. Mạeng Mawu kerea? Si Sie piạ kawasa, bọu ene lai ual᷊ingu makěndagẹ̌ si kitẹ, i Sie sarung mapakailang kasasusah dingangu kěbị  apang tawẹ adile. I kau botonge mangimang kěbị dianding Mawu seng nilahẹ su bageang humotong bọu bukẹ̌ ini sarung mariadi! Katewe tadeạu mangimang, i kau harusẹ̌ masingkạ Mawu kerea seng někoạ diandi ene.

MAWU MAPULU I KAU MASINGKẠ SI SIE

Mạeng mapulu mědal᷊ahapị, tantu i kau maul᷊ị arengu kal᷊imona. Mawu nělahẹ areng’E su ral᷊ungu Alkitapẹ̌

14. I sai arengu Mawu, kụ kawe nụe i kitẹ harusẹ̌ měpakẹ areng ene?

14 Mạeng i kau mapulu mědal᷊ahapị, apa kahumotongange sěbạkengu? Tantu arengu. Apa Mawu piạ areng’E? Lawọ agama naul᷊ị areng’E kai Mawu arau Ruata, katewe ndaị ene bal᷊inẹ arengu Mawu. Ene kai titelẹ̌, kere ”datu” arau ”presiden”. Mawu naul᷊ị si kitẹ areng’E kai Yehuwa. Mazmurẹ̌ 83:18 (Terjemahan Dunia Baru, NW) naul᷊ị, ”Tadeạu i sire masingkạ arengu Yehuwa, kětạeng i Kau Limembong Karangetange su kasělahu dunia.” Su ral᷊ungu Alkitapẹ̌, arengu Mawu niwohẹ hiwune su sul᷊ẹe. Ene mangal᷊ene Yehuwa mapulu i kau  masingkạ areng’E bọu ene mẹ̌sěbạ areng’E ene. I Sie naul᷊ị areng’E ual᷊ingu i Sie mapulu i kau mědal᷊ahapị dingang’E.

15. Apa mangal᷊ene areng i Yehuwa?

15 Arengu Mawu, Yehuwa, něnodẹ sěmbaụ hal᷊ẹ̌ mapaelẹ̌. Ene mangal᷊ene kapulu-Ne dingangu apa seng niriandi-Ne sarung mariadi.  Tawẹ apa makasěding si Sie. Kětạeng Yehuwa piạ areng kerene. *

16, 17. Apa mangal᷊ene titelẹ̌ (a) ”Kasěllahenge”? (b) ”Datu kěkalẹ̌”? (c) ”Měndariadi”?

16 Kere seng niwasang i kitẹ, Mazmurẹ̌ 83:18 naul᷊ị, ”Kětạeng i Kau [Yehuwa] Limembong Karangetange.” Pěndariadi 35:11 lai naul᷊ị Yehuwa ene Mawu ”Kasěllahenge”. Apa mangal᷊ene titelẹ̌ ”Kasěllahenge”? Ene mangal᷊ene tawẹ apa makasul᷊ung kawasang i Yehuwa. Su Yeremia 10:10 Yehuwa nisěbạ ’Datu kěkalẹ̌’. ’Datu kěkalẹ̌’ ene mangal᷊ene Yehuwa kai tatapẹ̌ ene. Mazmurẹ̌ 90:2 naul᷊ị Mawu tawẹ apa panětakenge ringangu tawẹ apa pěngěnsuenge. Ini kahěngang-hěngang mapaelẹ̌!

17 Kětạeng Yehuwa nisěbạ Měndariadi kěbị haghi. Pělal᷊ahẹ 4:11 naul᷊ị, ”O Mawu, o Ruatang kami! Samatang i Kau Mawu e wotonge makatarimạ u raralo, adatẹ̌ dingangu kawasa. U kai i Kau něndiadi patikụ sabarange, ringangu kai su ral᷊ungu  kapulun’U l᷊ai patikụ e seng nariadi dingangu nẹ̌biahẹ̌.” Ini něnodẹ, Yehuwa něndiadi kěbị haghi. Yehuwa něndiadi manga malaekatẹ̌ su sorga, manga wituing, manga bua, dingangu manga kinạ.

APA I KAU BOTONGE MAKOẠ HAPỊ I YEHUWA?

18. Kawe nụe taumata mẹ̌pikirẹ̌ i sire tawe makapẹ̌dal᷊ahapị dingangu Mawu? Apa niul᷊ị u Alkitapẹ̌?

18 Su tempong pirang katau nakasingkạ manga  sipatẹ̌ mapaelẹ̌ bọu i Yehuwa, i sire matakụ kụ nẹ̌pikirẹ̌, ’Mawu ene makawasa, masusi, dingangu marau bọu iạ, kahěngang bue i Sie mapadul᷊i si siạ?’ Katewe, apa Mawu mapulu i kitẹ mẹ̌pikirẹ̌ kerene? Tantu tala. Yehuwa mapulu mědal᷊ahapị dingangi kitẹ. Alkitapẹ̌ naul᷊ị, ”Ruata e tawẹ kararaune wọu anung kitẹ sěngkatau-sěngkatau e.” (Munara’m Manga Rarolohang 17:27) Mawu mapulu i kau mědal᷊ahapị dingang’E, i Sie nẹ̌diandi ’sarung humaung si [kau]’.​—Yakobus 4:8.

19. (a) Kerea tadeạu i kau botonge makoạ hapị i Yehuwa? (b) I kau mapulu sipatẹ̌ sude bọu i Yehuwa?

19 Kerea tadeạu i kau botonge makoạ hapị  i Yehuwa? Yesus naul᷊ị, ’Kai ini e pẹ̌bawiahẹ̌ tutune ringangu kakalẹ̌, tadeạu i sai masingkạ i Amang mang sěmbaụ kụ Duata kahěngang, dingangu makạkiral᷊a si Yesus Kristus kụ niroloh’i Amang.’ (Yohanes 17:3) Turusẹ̌ e pěngěndung, kụ i kau sarung makasingkạ si Yehuwa dingangi Yesus. Bọu ene i kau sarung makaěbạ pěbawiahẹ̌ kěkalẹ̌. Contone, i kitẹ seng něngěndung ’Mawu kai kakěndagẹ̌’. (1 Yohanes 4:8,16) Katewe, Yehuwa lai piạ sipat’E wal᷊inẹ kụ mapaelẹ̌. Yehuwa ”makěndagẹ̌ dingangu matal᷊ěntụ, masabarẹ̌, napenẹu kakěndagẹ̌ dingangu kasasatia”. (Mazmurẹ̌ 86:15) Yehuwa ene ’mapia dingangu makěhagẹ̌ měngonggọu ampung’. (Mazmurẹ̌ 86:5) Mawu ene lai masatia. (Sasěbang 34:6) I kau botonge makasingkạ mal᷊awọ sipatu Mawu su tempong mẹ̌basa Alkitapẹ̌.

20-22. (a) Kerea i kau botonge mědal᷊ahapị dingangi Yehuwa maning i kau tawe nakasilo si Sie? (b) Apa harusẹ̌ koatengu mạeng piạ taumata mẹ̌sěding si kau měngěndung Alkitapẹ̌?

20 Kerea i kau botonge mědal᷊ahapị dingangi Yehuwa maning tawe nakasilo si Sie? (Yohanes 1:18; 4:24; 1 Timotius 1:17) Su tempong mẹ̌basa Alkitapẹ̌, i kau sarung makapěndang Yehuwa kahěngang-hěngang ene. (Mazmurẹ̌ 27:4; Roma 1:20) Mạeng makasingkạ mal᷊awọ kerea i Yehuwa, i kau sarung limembong kuměndagẹ̌ si Sie lai mědal᷊ahapị mapia dingang’E.

Kakěndagi Yehuwa si kitẹ limembong gěguwạ bọu kakěndagu matimadẹ̌ esẹ su anạe

21 I kau sarung makaěna Yehuwa ene kai i Amang i kitẹ. (Matius 6:9) I Sie něgělị si kitẹ pěbawiahẹ̌ kụ i Sie mapulu i kitẹ mal᷊unsemahẹ̌. Mẹ̌sul᷊ung sěngkatau matimadẹ̌ esẹ kụ mapulu anạe mal᷊uasẹ̌. (Mazmurẹ̌ 36:10) Alkitapẹ̌ naul᷊ị i kau botonge makoạ hapị i Yehuwa. (Yakobus 2:23) Kěnang pẹ̌tiněna hal᷊ẹ̌ ene. Yehuwa, Měndariadi kěbị haghi, mapulu i kitẹ makoạ hapị’E!

22 Pirang katau ěndịu mẹ̌sěding si kau měngěndung Alkitapẹ̌. I sire ěndịu matakụ mạeng i kau měngal᷊ing agama. Katewe, abe wala taumata wal᷊inẹ makakoạ si kau tawe mědal᷊ahapị dingangi Yehuwa. I Sie kai Hapị kapaelange.

23, 24. (a) Kawe nụe i kitẹ tawe wotonge mamea mẹ̌kiwal᷊o? (b) Apa sarung ěndungang i kitẹ su pasalẹ̌ 2?

23 Su tempong i kau něngěndung Alkitapẹ̌, ěndịu piạ tawe kinaěnaěngu. Abe kamea mẹ̌kiwal᷊o arau mẹ̌dorong tul᷊ung. Yesus naul᷊ị i kitẹ harusẹ̌ piạ kasasanạ u naung kere manga rariọ. (Matius 18:2-4) Manga rariọ puluang mẹ̌kiwal᷊o. Mawu mapulu i kitẹ makaěbạ sasimbahe. Hakị u ene, pěngěndungke Alkitapẹ̌ pakapia tadeạu i kau kahěngang-hěngang makaěna těntirong Alkitapẹ̌.​—Basa Munara’m Manga Rarolohang 17:11.

24 Měngěndung Alkitapẹ̌ kai cara kapaelange makasingkạ kerea i Yehuwa. Su pasalẹ̌ 2, i kitẹ sarung makasingkạ kawe nụe Alkitapẹ̌ nẹ̌tatěntang dingangu bukẹ̌ bal᷊inẹ.

^ par. 15 Mạeng su Alkitapẹ̌ u tawẹ apa areng i Yehuwa, arau mạeng i kau mapulu masingkạ mal᷊awọ apa mangal᷊ene areng i Yehuwa dingangu kerea areng ene nisěbạ, pěmanda su Catatan 1.