Langsung ke konten

Langsung ke menu sekunder

Langsung ke daftar isi

Sahiding Yehuwa

Sangir

Sasimbahẹ̌ Bọu 10 Kakiwal᷊ong Mangangudạ

 KAKIWAO 3

Kerea Tadeạu Iạ Botonge Mẹ̌bisara Dingangi Papạ Mamạ?

Kerea Tadeạu Iạ Botonge Mẹ̌bisara Dingangi Papạ Mamạ?

KAWE ENE PENTING

Mạeng i kau tawe mẹ̌dal᷊ia dingangi papạ mamạ, pěbawiahu sarung mal᷊uasẹ̌.

APA SARUNG KOATENGU?

Kěnang pẹ̌pikirẹ̌ ini: Su arěbạ hěbi, i Jef, 17 su taunge, seng někoạ kěbị hal᷊ẹ̌ e su wal᷊e. Bọu ene i sie kimaiang su kaderane, sadia mẹ̌biala televisi!

Sěngkělěndịu, i papạ e seng su tukadẹ̌, kụ nẹ̌pědu.

”Jefri! I kau měngkate měbẹ̌biala televisi, bal᷊inẹbe i kau harusẹ̌ mẹ̌tul᷊ung tuarinu měkoạ PR? I kau turusẹ̌ lụlawang parentang i papạ mamạ!”

”Huuu měnětạ ndaị,” ěngkuěng i Jef, mal᷊ahẹ nikaringihang i papạ e.

Papạ e naul᷊ị, ”I kau naul᷊ị apa kanini?”

”Tala pạ,” ěngkuěng i Jef, katewe gatine seng pědu.

Papạ e lai seng nẹ̌pědu. ”Abe paul᷊ị kerene si papạ!”

Mạeng ini nariadi si kau, apa sarung koatengu tadeạu tawe mẹ̌dal᷊ia dingangi papạ mamạ?

PĚHĚDO, KỤ PẸ̌PIKIRẸ̌!

Mẹ̌bawěke dingangi papạ mamạ mẹ̌sul᷊ung mẹ̌bawa oto. Mạeng dal᷊enge natutu, i kau botonge mědeạ dal᷊eng bal᷊inẹ.

 CONTONE:

”Iạ tawe gampang mẹ̌bisara dingangi papạ,” ěngkuěng anạ wawine arenge Lea. ”Pẹ̌sěnsul᷊ẹ, iạ seng nẹ̌bisara marěngụ dingange, katewe i papạ naul᷊ị, ’Oh, i kau nẹ̌bisara dingangi papạ?’”

PIẠ TATĚLU BOTONGE KOATENG I LEA.

  1. Mẹ̌bisara dingangu tingihẹ̌ maihạ si papạ e.

    Lea naul᷊ị, ”Ini penting pạ! Daringihẹ̌ko!”

  2. Mạdiri mẹ̌bisara dingangi papạ e.

    Lea seng mạdiri mẹ̌bisara masalahne.

  3. Mědeạ tempo bal᷊inẹ gunang mẹ̌bisara masalah ene.

    Lea botonge saụ mẹ̌bisara dingangi papạ e, arau maul᷊ị ene su suratẹ̌.

Tumuhụ si kau, sude harusẹ̌ koateng i Lea?

PẸ̌PIKIRẸ̌: Papạ i Lea měkẹ̌koạ hal᷊ẹ̌ bal᷊inẹ—ual᷊ingu ene papạ e běga i Lea piạ masalah. Hakị u ene, mạeng i Lea měmile Bageang A, mẹ̌bisara dingangu tingihẹ̌ maihạ, papạ e tawe makaěna apa niwerane. Ene lai něnodẹ i Lea tawe něngadatẹ̌ si papạ e. (Efesus 6:2) Bageang ini tawẹ makatul᷊ung si Lea.

Mạeng dal᷊eng natutu ene bal᷊inẹbe seng tawẹ apa ral᷊eng, i kau botonge mědeạ dal᷊eng bal᷊inẹ gunang mẹ̌bisara dingangi papạ mamạ

Maning Bageang B gampang koateng, ini bal᷊inẹbe dal᷊eng kapaelange. Kawe kerene? Tadeạu botonge tumatěngo masalah ene, i Lea harusẹ̌ mẹ̌bisara dingangi papạ e—kụ mạeng i papạ e mapulu mẹ̌tul᷊ung si sie, papạ e harusẹ̌ masingkạ kal᷊imona apa nariadi si Lea. Masalah tawe masue mạeng tawe bisaraěng.

Mạeng měpakẹ Bageang C, i Lea tawe němala dal᷊eng nahěping ini makakoạ si sie tawe mẹ̌bisara dingangi papạ e, i sie hědo mẹ̌bisara masalah ene su tempo bal᷊inẹ. Bọu ene, mạeng i sie měmohẹ suratẹ̌ si papạ e, i Lea sarung matenang.

Suratẹ̌ lai makatul᷊ung si Lea měmohẹ pakapaelẹ̌ apa sarung ul᷊ikange. Su tempong mẹ̌basa suratẹ̌ ene, i papạ e makasingkạ apa paul᷊ikang i Lea, kụ ini makatul᷊ung si sie makaěna masalah nikaěbạ u anạ e. Bageang C makatul᷊ung si Lea dingangi papạ e. Mẹ̌bisara langsung arau bọu suratẹ̌, bageang ini timol᷊e sasasa su Alkitapẹ̌ ”timonang kitẹ e měngkai sěntiniạ makạkaděntang pẹ̌gaghaghighilẹ̌”.Roma 14:19.

Apa hal᷊ẹ̌ bal᷊inẹ lai botonge koateng i Lea?

Kěnang pẹ̌pikirẹ̌ apa koatengu. Pẹ̌pikirẹ̌ lai apa hasile mạeng měkoạ ene.

 ABE SARANG MATIMADẸ̌ MẸ̌SAA PIKIRẸ̌

Tahěndunge, apa niul᷊ị u dingangu apa nipikirẹ̌ i papạ mamạ u, ěndịu nẹ̌tatěntang.

CONTONE:

Papạ mamạ u makiwal᷊o, kawe i kau marěmasẹ̌. I kau naul᷊ị, ”Iạ malasẹ̌ mẹ̌bisara.”

Katewe papạ mamạ u nẹ̌pikirẹ̌, ”Iạ ta’mangimang si kamene. Ěndọkangbe iạ mẹ̌bisara dingangu manga hapịku, bal᷊inẹ dingangi rua.”

Pẹ̌pikirẹ̌ mạeng i kau piạ masalah, kụ papạ mamạ u mapulu mẹ̌tul᷊ung si kau. Katewe, i kau naul᷊ị, ”Kuhạe, tawe apa-apa.”

  • Apa nipikirẹ̌ i papạ dingangi mamạ u?

  • Kapaělange i kau maul᷊ị apa?