Langsung ke konten

Langsung ke menu sekunder

Langsung ke daftar isi

Sahiding Yehuwa

Sangir

Sasimbahẹ̌ Bọu 10 Kakiwal᷊ong Mangangudạ

 KAKIWAO 2

Kerea Mạeng Iạ Gụgěnggang Soal Penampilanku?

Kerea Mạeng Iạ Gụgěnggang Soal Penampilanku?

KAWE ENE PENTING

Piạ hal᷊ẹ̌ limembong penting bọu apa kẹ̌kasilongu su kasěnaěng.

APA SARUNG KOATENGU?

Kěnang pẹ̌pikirẹ̌ ini: Su tempong i Julia nẹ̌kasěnaěng i sie němanda badange tumanịu matawa. ”Iạ harusẹ̌ mẹ̌těngkahusụ,” ěngkuěng i sie—katewe papạ, mamạ dingangu manga hapị e maul᷊ị i sie bědang ”mahusụ”.

Buhu ini, i Julia měpẹ̌pikirẹ̌ kumaěng mahal᷊i tadeạu běhạ u wadange lumintụ, maning ”tawe nakaěbạ tělung kilo”. Tadeạu běhạ u wadange mal᷊intụ, i sie harusẹ̌ mẹ̌tatahangu lunusẹ̌ pira ěllo . . .

Mạeng pěndangu mẹ̌sul᷊ung i Julia, apa sarung koatengu?

PĚHĚDO, KỤ PẸ̌PIKIRẸ̌!

I kau měmanda wadangu, ěndịu kere měmanda gambarẹ̌ su kasěnaěng narusa

Bal᷊inẹ barang nẹ̌sal᷊a mạeng i kau mapandung su penampilan u. Su Alkitapẹ̌ niwohẹ, piạ pirang katau esẹ dingangu wawine mal᷊ěnggihẹ̌. Contone, i Sara, Rahel, Abigail, Yusuf, dingangi Daud. Alkitapẹ̌ lai naul᷊ị, piạ sěngkatau wawine arenge Abisyag, i sie kai ”mahuala masadadạ-sadadạ”.—1 Manga Ratu 1:4.

Maning kerene lawọ mangangudạ tumanịu gụgěnggang soal penampilan i sire. Ene nakakoạ masalah gěguwạ. Contone:

  • Bọu sěmbaụ penelitian, 58 persen anạ wawine maul᷊ị i sire tumanịu matawa, katewe sebenarẹ̌e, kětạeng 17 persen bọu i sire kahěngang-hěngang matawa.

  • Bọu penelitian wal᷊inẹ lai, 45 persen wawine sebenarẹ̌e mahusụ, měpẹ̌pikirẹ̌ i sire tumanịu matawa!

  • Gunang mẹ̌těngkahusụ, pirang katau mangangudạ nasakị ual᷊ingu anoreksia—ene kai tawe kụkaěng ual᷊ingu i sire matakụ matawa.

 Mạeng i kau piạ gejala anoreksia, i kau harusẹ̌ pẹ̌dorong tul᷊ung. Paul᷊ị ene si papạ mamạ u, arau taumata wal᷊inẹ botonge kapěngimangengu. Alkitapẹ̌ naul᷊ị, ”Sěngkatau hapị hanesẹ̌ satia su hapị e, arawe sěngkatau anạ u sěmbaụ mal᷊aing menanggung sigěsạ dingang.”—Baweran Salomo 17:17.

KAPAELANGE BOTONGE KOATENGU!

Sebenarẹ̌e bọu dal᷊ung u naunge, sěngkatau kasilong masadadạ arau tala. Contone i Absalom, anạ i Datu Daud. Alkitapẹ̌ naul᷊ị,

”Su kaguwạu wanuang Israel tawẹ apa taumata kere i Absalom kal᷊ěnggihang u wadange . . . bọu pal᷊edu laede sorong pondol᷊u utạ e mang tawẹ kurange.”2 Samuel 14:25.

Katewe Absalom ini kai maobotẹ̌, ambisi, dingangu pengkhianat! Hakị u ene Alkitapẹ̌ tawe naul᷊ị i sie mapaelẹ̌; Alkitapẹ̌ naul᷊ị i sie kai tawe mamamea, tawe satia, dingangu tahapate.

Ual᷊ingu ene Alkitapẹ̌ něněntiro si kitẹ:

’Pakẹko pẹ̌bawiahẹ̌ buhu arau sipatẹ̌ buhu.’Kolose 3:10.

”Karal᷊ěnggih’i kamene abe kawe kětạeng mělẹ̌lěnggihẹ̌ likude. . . . Kaiso ral᷊ěgahi kamene kěnangko pasěpụ bọu ral᷊ungu naung.”1 Petrus 3:3, 4.

Bal᷊inẹ barang nẹ̌sal᷊a mạeng mělěnggihẹ̌ badang, katewe hal᷊ẹ̌ limembong penting bọu penampilan, ene kai sipatẹ̌ u. Taumata limembong mapulu sipatẹ̌ mapaelẹ̌, bal᷊inẹ piạ otot gěguwạ arau gahị mal᷊ěnggihẹ̌! ”Gahị mal᷊ěnggihẹ̌ lawọ taumata měmẹ̌manda,” ěngkuěng anạ wawine arenge Felicia, ”katewe tẹ̌tahěndungang u taumata, ene kai sipatẹ̌ mapaelẹ̌ arau kerea dal᷊ung u naungu.”

PARIKĚSAI KEREA I KAU MĚMANDA PENAMPILAN U

Apa i kau pẹ̌sěnsul᷊ẹ mạdiri penampilan u?

Apa i kau bọu nẹ̌pikirẹ̌ měkọa diet ekstrem arau operasi plastik tadeạu mal᷊ěnggihẹ̌?

Mạeng botonge, i kau mapulu měmal᷊ui bageang sude bọu wadangu? (Pilee sude i kau mapulu.)

  • DANGẸ U WADANG

  • WĚHẠ U WADANG

  • UTẠ

  • KEREA WADANGU

  • GAHỊ

  • PISI

Mạeng i kau simbimbahẹ̌ iya su darua kakiwal᷊o humotong, arau měmile tatělu arau lebe su kakiwal᷊o katělune, pěpikirẹ̌ ini: Kal᷊awokange taumata tawe měmanda si kau kere i kau měmanda wadangu. Gampang si kitẹ makoạ tumanịu guměnggang soal penampilan i kitẹ.1 Samuel 16:7.