Langsung ke konten

Langsung ke daftar isi

Sahiding Yehuwa

Pilih bahasa Sangir

 PĚNGANGĚNDUNGANG 13

Apa Sarung Mariadi su Agama?

Apa Sarung Mariadi su Agama?

1. Apa kěbị agama mapia?

Piạ taumata kahěngang-hěngang mědeạ Mawu su kěbị agama. Mawu měmẹ̌manda dingangu kụkěndagẹ̌ si sire. Ene habarẹ̌ mapia. Katewe, agama seng nipakẹ gunang měkoạ barang dal᷊akị. (2 Korintus 4:3, 4; 11:13-15) Tumuhụ habarẹ̌, lawọ agama tụtol᷊e sekẹ, terorisme, měmẹ̌mate taumata lawọ bọu suku wal᷊inẹ, di-ngangu mětẹ̌tingkaị mangarariọ. Ene makasusah naung u taumata mangimang su Mawu!Basa Matius 24:3-5, 11, 12.

Agama kahěngang měmẹ̌mantugẹ̌ areng u Mawu, mạeng agama palsu makatědụ naungE. Agama palsu měnẹ̌něntiro apang tawe niwohẹ su Binohẹ Susi, contone, těntiro nẹ̌sal᷊a nělahẹ i sai Mawu dingangu apa nariadi su taumata nate. Katewe, Yehuwa mapulu kěbị taumata makasingkạ i sai i Sie.Basa Yehezkiel 18:4; 1 Timotius 2:3-5.

2. Apa sarung mariadi su agama?

Piạ habarẹ̌ mapia, Mawu tawe kakontiang u agama maul᷊ị kuměndagẹ̌ si Sie, katewe sěběnarẹ̌e kụkěndagẹ̌ duniang setang. (Yakobus 4:4) Hengetang u Mawu naul᷊ị kěbị agama palsu ene ”Babel Gěguwạ”. Babel ene sěmbaụ soa tempong kangerẹ, tampạ u agama palsu něnětạ nariadi. Seng mal᷊ighạ Mawu sarung měminasa kěbị agama palsu.Basa Pělal᷊ahẹ 17:1, 2, 5, 16, 17; 18:8.

Piạ lai habarẹ̌ mapia wal᷊inẹ. Yehuwa tawe miwul᷊e apang taumata kụkěndagi Sie su kěbị agama, su dunia ini. I Sie měngomol᷊ẹ̌ kěbị taumata, kụ měněntiro apang nihino si sire.Basa Mikha 4:2, 5.

 3. Apa harusẹ̌ koạteng u taumata mapulu makal᷊uasẹ̌ naung u Mawu?

Agama nihino makakoạ taumata su patikụ u dunia masěmbaụ

Yehuwa měpẹ̌padul᷊i apang taumata kụkěndagẹ̌ barang kahěngang. I Sie něngoro si sire, pakal᷊ighạ měněntang u agama palsu. Kěbị apang taumata kụkěndagu Mawu, mapulu mẹ̌mal᷊ui kakanoạ i sire tadeạu makal᷊uasẹ̌ naungE.Basa Pělal᷊ahẹ 18:4.

Su abad kahumotongange, su apang taumata nakaringihẹ̌ habarẹ̌ mapia bọu manga murit i Yesus, naung i sire mal᷊uasẹ̌. I sire něngěndung dal᷊engu pěbawiahẹ̌ buhu bọu Yehuwa. I sire nakasingkạ timonang biahi sire, piạ pělaharapẹ̌, dingangu pěbawiahi i sire mal᷊unsemahẹ̌. I sire nakoạ tatěnoěng si kitẹ orasẹ̌ ini, ual᷊ingu i sire dimaringihẹ̌ habarẹ̌ mapia dingangu měkoạ kapulung Mawu kai kahumotongange su pěbawiahi sire.Basa 1 Tesalonika 1:8, 9; 2:13.

Yehuwa měnarimạ sarang organisasi-Ne taumata apang něněntang u agama palsu. Mạeng anạu sěmbaụ měnarimạ ga-ghausẹ̌ i Yehuwa, anạu sěmbaụ sarung makoạ hapị’E, masuẹ̌ su ral᷊ungu organisasi-Ne, dingangu makaěbạ pěbawiahẹ̌ kěkalẹ̌.Basa Markus 10:29, 30; 2 Korintus 6:17, 18.

4. Kere apa Mawu měkoạ taumata su dunia sarung mal᷊uasẹ̌?

Tempong Mawu měminasa agama palsu, ene kai habarẹ̌ mapia. Agama palsu seng tawe makaahạ taumata sarang barang nẹ̌sal᷊a. Kěbị taumata sarung masěmbaụ měněmbah Mawu.Basa Pělal᷊ahẹ 18:20, 21; 21:3, 4.