Langsung ke konten

Langsung ke menu sekunder

Langsung ke daftar isi

Sahiding Yehuwa

Sangir

Habarẹ̌ Mapia Bọu Mawu!

 PĚNGANGĚNDUNGANG 5

Apa sarung koạteng u Mawu su dunia ini?

Apa sarung koạteng u Mawu su dunia ini?

1. Kawe nụe Mawu někoạ dunia ini?

Yehuwa něgělị dunia ini su taumata. Ini pẹ̌tatanakeng i kitẹ. I Adam dingangi Hawa tawe nikoa gunang pětana su sorga. Mawu seng někoạ malaekatẹ̌, i sire mětẹ̌tana su sorga. (Ayub 38:4, 7) Bọu ene, Mawu němělọ si Adam su firdaus, su Eden. (Pěndariadi 2:15-17) Yehuwa mapulu i Adam dingangu hitene měbiahẹ̌ su dunia.Basa Mazmurẹ̌ 37:29; 115:16.

Humotong, firdaus ene kětạeng su Eden. I Adam děduang Hawa harusẹ̌ měngurusẹ̌ dunia ini dingangu dal᷊ohone, tadeạu firdaus makoạ su patikụ dunia. (Pěndariadi 1:28) Dunia ini tawe mawinasa. Ini kai sarung makoạ pẹ̌tatanakeng u taumata.Basa Mazmurẹ̌ 104:5.

2. Kawe nụe dunia orasẹ̌ ini bal᷊inẹbe firdaus?

I Adam dẹ̌duang Hawa limawang Mawu, hakị u ene Yehuwa něnokol᷊ẹ̌ si rědua bọu tampạ ene. Firdaus nailang, kụ tawẹ apa taumata saụ makakoạ firdaus. Binohẹ̌ Susi naul᷊ị: ”dunia ini nisarakang su měnggaghohaeng”.Ayub 9:24.Basa Pěndariadi 3:23, 24.

Apa kapulung Yehuwa seng tawe mariadi? Tantu mariadi! I Sie makawasa. Apang kapulu-Ne mang mariadi. (Yesaya 45:18) I Sie saụ měkoạ taumata mẹ̌tanạ su dunia ini měsul᷊ungu kapulu-Ne humotong.Basa Mazmurẹ̌ 37:11, 34.

3. Kere apa firdaus saụ koạteng?

Firdaus saụ mariadi su dunia, su tempong Yesus makoạ Datu. Su Armagedon arau ěllong pělahukung, Yesus dingangu malaekat u Mawu duměnta gunang měhukung taumata apang lụlawang Mawu. Bọu ene, setang hanteěng karěngụe 1.000 su taunge. Ělang u Mawu sarung masal᷊amatẹ̌ bọu pěmaminasang ndaị ene, ual᷊ingu Yesus sarung měngahạ dingangu měndiagạ si sire. I sire sarung měbiahẹ̌ sarang karěngụe su firdaus, su dunia.Basa Pělal᷊ah20:1-3; 21:3, 4.

 4. Kange kasasusah sarung ipakailang?

Kange Mawu sarung měminasa karal᷊akisẹ̌ bọu dunia ini? Yesus něgělị ”tatiala”, kụ ene nělahẹ tempong pělahukung seng mal᷊ighạ duměnta. Mạeng barang dal᷊akị orasẹ̌ ini turusẹ̌ mariadi, ini sarung makawinasa taumata, kụ ini něnodẹ, i kitẹ měbẹ̌biahẹ̌ su ”pěngěnsueěngu dunia”.Basa Matius 24:3, 7-14, 21, 22.

Su tempong 1.000 su taunge Yesus měpẹ̌parenta bọu sorga, i sie sarung měminasa kěbị kasasusah. (Yesaya 9:6, 7; 11:9) I sie lai sarung měngampung dosang taumata apang makěndagẹ̌ su Mawu. Bọu i Yesus, Mawu něnodẹ kawasane, su tempo mahi seng tawẹ apa taumata makoạ maghurang, masakị arau mate.Basa Yesaya 25:8; 33:24.

5. I sai sarung měbiahẹ̌ su firdaus?

Su pěngangibadang, anạu sěmbaụ sarung mẹ̌sombang taumata kụkěndagu Mawu dingangu mapulu měngěndung kerea makal᷊uasẹ̌ naungE

Taumata matuhụ su Mawu sarung měbiahẹ̌ su firdaus. (1 Yohanes 2:17) Yesus něngoro manga murite pědeạ taumata apang naunge masanạ, kụ pěněntiro kerea tadeạu i sire maka- l᷊uasẹ̌ naung u Mawu. Orasẹ̌ ini, Yehuwa měnẹ̌něntiro jutane taumata tadeạu sadia měbiahẹ̌ su firdaus. (Zepanya 2:3) Su pě-ngangibadang Sahiding Yehuwa, taumata lawọ botonge měngěndung kerea tadeạu makoạ kawing mapia, dingangu makoạ i papạ arau i mamạ matal᷊ěntụ su mangarariọ. Matatimadẹ̌ dingangu mangarariọ botonge měngibadah kụ lai měngěndung sěngkasio, kerea carane tumuhụ parentang Mawu su pěbawiahi sire.Basa Mikha 4:1-4.