Langsung ke konten

Langsung ke menu sekunder

Langsung ke daftar isi

Sahiding Yehuwa

Sangir

Měhabarẹ̌—Gunang Pěngangěndungang  |  September 2017

’Pẹ̌tumbahani kụ Tětạ e Hal᷊ẹ̌ Ene’

’Pẹ̌tumbahani kụ Tětạ e Hal᷊ẹ̌ Ene’

”I kau e hinong měngiaking dingangu mẹ̌tumbahani. Tětạ e hal᷊ẹ̌ ene ringangu kumbahang matakụ u manga apa. [Yehuwa] . . . sarung mẹ̌tul᷊ung i kau.”​—1 KARARATUANG 28:20.

KAKANTARỊ: 6029

1, 2. (a) Tugasẹ̌ penting apa nitarimạ i Salomo? (b) Kawe nụe Daud gụgěnggang i Salomo?

SALOMO nakaěbạ tugasẹ̌ istimewa. Yehuwa němile si sie nakoạ těmbonang gunang měmětị bait su Yerusalem. Ini kai sěmbaụ proyek pembangunan sěbạe penting su kanandụu tempo! Bait ene harusẹ̌ ”mawantugẹ̌” tadeạu timeleng ual᷊ingu kal᷊ěnggihe. Kụ limembong penting lai, ene sarung makoạ ”Bal᷊em Mawu”.​—1 Kar. 22:1, 5, 9-11.

2 Datu Daud mangimang Mawu sarung mẹ̌tul᷊ung si Salomo. Katewe Salomo ”wědang mangudạ”. Apa i Salomo wahani měnarimạ tugasẹ̌ ene? Arau, apa i sie tawe měnarimạ ual᷊ingu bědang mangudạ dingangu tawẹ apa pengalaman? Tadeạu makakoạ měmětị bait, Salomo harusẹ̌ bahani dingangu měnětạ měhal᷊ẹ̌.

3. Apa nikaěndungang i Salomo bọu i papạe soal u kawawahani?

 3 Salomo tantu seng něngěndung lawọ soal u kawawahani bọu i amange, i Daud. Su tempong bědang mangudạ, Daud limawang binatang buas měnẹ̌němbo manga dombang i amange. (1 Sam. 17:34, 35) I sie lai něnodẹ kawawahani su tempong limawang angsuang matoghasẹ̌ kụ makạtatakụ, i Goliat. Ual᷊ingu tul᷊umangu Mawu dingangu sěmbaụ batu, Daud nakawatạ si Goliat.​—1 Sam. 17:45, 49, 50.

4. Kawe nụe i Salomo harusẹ̌ bahani?

4 Hakị u ene, i Daud kai taumata kapaelange měmahansang si Salomo gunang mẹ̌těngkawahani dingangu měmětị bait. (Basa 1 Kararatuang 28:20.) Mạeng i Salomo tawe wahani, katatakụ makal᷊ome si sie, kụ i sie tawe makatětạ hal᷊ẹ̌ ene. Ene limembong dal᷊aị sul᷊ungu tawe makatěpasẹ̌ hal᷊ẹ̌ ene.

Pẹ̌dorong tul᷊ung si Yehuwa tadeạu bahani dingangu měkoạ hal᷊ẹ̌ seng nighělị’E si kitẹ

5. Kawe nụe i kitẹ harusẹ̌ bahani?

5 Kere i Salomo, i kitẹ lai harusẹ̌ mẹ̌dorong tul᷊umang bọu Yehuwa tadeạu bahani dingangu měkoạ hal᷊ẹ̌ seng nighělị’E si kitẹ. Hakị u ene, mahịe i kitẹ měngěndung soal u taumata seng něnodẹ kawawahani su tempong tamai. Bọu ene i kitẹ mẹ̌tiněna kerea i kitẹ botonge mawahani dingangu mapakasueng hal᷊ẹ̌ i kitẹ.

TATĚNOĚNG SOAL U KAWAWAHANI

6. Apa nakakoạ si kau mạherang soal u kawawahaning i Yusup?

6 Yusup něnodẹ kawawahani su tempong kawingi Potifar měngẹ̌ngologẹ̌ si sie měkoạ barang amoral. I sie tantu masingkạ mạeng i sie madiri, ene makawahaya si sie. Katewe i sie nẹ̌tumbahani kụ tawe timol᷊e kapulung wawine ene.​—Pěnd. 39:10, 12.

7. Kerea i Rahab něnodẹ kawawahani? (Pěmanda gambarẹ̌ humotong su pěngangěndungang ini.)

7 Rahab lai taumata wahani. Su tempong mata-matang Israel nakoạ sarang bal᷊ene su Yerikho, i sie botonge měmile tawe mẹ̌tul᷊ung si rẹ̌dua ual᷊ingu matakụ. Katewe ual᷊ingu mangimang si Yehuwa, i sie bahani němuni dingangu nẹ̌tul᷊ung mata-mata ene timal᷊ang. (Yos. 2:4, 5, 9, 12-16, Terjemahan Dunia Baru) Rahab mangimang Yehuwa kai Mawu kahěngang kụ sarung měgělị ěntanang Kanaan su tau Israel. I sie tawe němala katatakụ su taumata, lai su datung Yerikho dingangu manga tentarane, makakoạ si sie mělome. Katewe, i sie tatapẹ̌ bahani kụ i sie dingangu keluargane nasal᷊amatẹ̌.​—Yos. 6:22, 23.

8. Apa pengaruh kawawahaning i Yesus su manga rasul?

8 Manga rasul masatia lai něnodẹ kawawahani. I sire nakasilo kawawahaning i Yesus, kụ ene nakatul᷊ung si sire nẹ̌těno si sie. (Mat. 8:28-32; Yoh. 2:13-17; 18:3-5) Su tempong tau Saduki nẹ̌sěding si sire měněntiro soal i Yesus, manga rasul ene tawe něngědo.​—MMR. 5:17, 18, 27-29.

9. Apa kaěndungang i kitẹ bọu 2 Timotius 1:7 soal u kawawahani?

9 Yusup, Rahab, Yesus, dingangu manga rasul turusẹ̌ někoạ barang nihino.  I sire bahani bal᷊inẹ ual᷊ingu katatoghasi sire hala, katewe ual᷊ingu mangimang si Yehuwa. Su tempong harusẹ̌ měnodẹ kawawahani, i kitẹ lai harusẹ̌ mangimang si Yehuwa bal᷊inẹ su watangeng. (Basa 2 Timotius 1:7.) Mahịe i kitẹ měngěndung kerea měnodẹ kawawahani su ral᷊ungu keluarga dingangu sidang.

MĚNODẸ KAWAWAHANI SU HAGHING SITUASI

10. Kawe nụe mangangudạ Sahani harusẹ̌ bahani?

10 Mangangudạ Sahani, harusẹ̌ měnodẹ kawawahani su haghing situasi. I sire botonge mẹ̌těno si Salomo, ual᷊ingu i sie bahani němutusẹ̌ měmětị bait. Maning mangangudạ harusẹ̌ ahakengu matatimadi sire, piạ putusang penting harusẹ̌ koateng i sire hala. (Baw. 27:11) I sire harusẹ̌ bahani měmutusẹ̌ mědal᷊ahapị dingangi sai, hiburan kerea pileng i sire, kerea tatapẹ̌ burěsi secara moral, dingangu kange i sire sahaniang. I sire harusẹ̌ bahani ual᷊ingu putusang i sire kai nẹ̌tatěntang dingangu kapulung Setang, malaekatẹ̌ seng něhinakang Mawu.

11, 12. (a) Kerea i Musa něnodẹ kawawahani? (b) Kerea mangangudạ botonge mẹ̌těno si Musa?

11 Mangangudạ lai harusẹ̌ bahani měmutusẹ̌ cita-cita koateng i sire. Su piram baụ negeri, mangangudạ lẹ̌orong pẹ̌sikol᷊ah pakarangẹ dingangu pědeạ hal᷊ẹ̌ gajine mal᷊awọ. Su negeri wal᷊inẹ lai, pěbawiahẹ̌ masusah, kụ mangangudạ nẹ̌pěndang i sire harusẹ̌ měhal᷊ẹ̌ gunang mẹ̌tul᷊ung keluargang i sire. Mạeng i kau nakapěndang kerene, pẹ̌tahěndung contoh Musa. I sie nihikingu sangiang i Firaun, kụ sěběnarẹ̌e i sie botonge piạ cita-cita makoạ taumata kalạ dingangu timeleng. Kěnang pẹ̌tiněna apa lẹ̌ul᷊ikangu keluargane tau Misirẹ̌, manga guru, dingangu měnanasane! Katewe i Musa bahani němile makoạ ělang i Yehuwa. Su tempong Musa něněntangu Misire dingangu haghing kakakalạe, i sie dingangu kaguwạu naunge mangimang si Yehuwa. (Ibr. 11:24-26) Pul᷊ise, Yehuwa něgělị al᷊amatẹ̌ gěguwạ si sie, dingangu sarung měngal᷊amatẹ̌ si sie su tempo mahi.

12 Mạeng mangangudạ bahani měmile makoạ ělang i Yehuwa dingangu měkoạ hal᷊ẹ̌ u Kararatuang kahumotongange, Yehuwa sarung měngal᷊amatẹ̌ si sire. I Sie sarung mẹ̌tul᷊ung si sire měnadia kebutuhan keluargang i sire. Su abad humotong, umbaseng arenge Timotius něpakẹ pěbawiahe gunang měkoạ kapulung Mawu, kụ i kamene lai botonge mẹ̌těno si sie. * (Pěmanda catatan kaki.)—Basa Filipi 2:19-22.

Apa i kau mapulu měnodẹ kawawahani su pěbawiahu?

(Pěmanda paragraf 13-17)

13. Kerea kawawahani nakatul᷊ung sěngkatau saudari nakakoạ cita-citane?

13 Sěngkatau saudari su Alabama, AS, harusẹ̌ měnodẹ kawawahani měkoạ cita-cita rohani. I sie němohẹ, ”Dongkeng kadodọ, iạ meaěng. Iạ tawe wahani mẹ̌bawěke dingangu taumata su Banalang Kararatuang, něngalembong lai harusẹ̌ měnětụ tukadu wal᷊eng taumata buhudeng pẹ̌sombangengku.”  Ual᷊ingu tul᷊umangu matimade dingangu taumata wal᷊inẹ su sidang, i sie nakakoạ cita-citane gunang makoạ perintis biasa. I sie naul᷊ị, ”Duniang Setang mapulu i kitẹ harusẹ̌ mẹ̌sikol᷊ah marangẹ, měnahusu roitẹ̌, měngomol᷊ẹ̌ arětạ, dingangu makoạ timeleng.” Katewe i sie lai masingkạ kal᷊awokange taumata tawe nakaěbạ kěbị ene, kụ nakakoạ si sire stres dingangu nasigěsạ. I sie lai naul᷊ị, ”Katewe měkoạ kapulung Yehuwa nakakoạ si siạ sěbạe mal᷊uasẹ̌.”

14. Su tempo kerea matimadẹ̌ Sahani harusẹ̌ měnodẹ kawawahani?

14 Matatimadẹ̌ lai harusẹ̌ měnodẹ kawawahani. Contone, bosẹ̌u aramanung měngoro si kau pěhal᷊ẹ̌ lembur su ěllo piạ ibadat keluarga, měnginjilẹ̌, arau měngibadah. I kau harusẹ̌ bahani maul᷊ị tala su bosẹ̌ tadeạu i kau makoạ tatěnoěng su manga anạu. Arau, i kau ěndịu mẹ̌sěding manga anạu měkoạ sěmbaụ hal᷊ẹ̌, katewe pirang katau matimadẹ̌ Sahani wal᷊inẹ němala manga anạe někoạ ene. Su tempong manga anạu mẹ̌kiwal᷊o alasange, apa i kau bahani mělahẹ  pakapia si sire?

15. Kerea Mazmurẹ̌ 37:25 dingangu Ibrani 13:5 makatul᷊ung matatimadẹ̌?

15 I kitẹ harusẹ̌ bahani mẹ̌tul᷊ung manga anạ i kitẹ měkoạ cita-cita rohani. Contone, piạ matatimadẹ̌ ěndịu madiri anạ i sire makoạ perintis, měngal᷊ing sarang tampạ mahal᷊i penyiar, měhal᷊ẹ̌ su Betel, arau mẹ̌tul᷊ung měkoạ Banalang Kararatuang arau Balai Kebaktian. Aramanung i sire matakụ manga  anạ i sire tawe makaurusẹ̌ si sire su tempong maghurang. Katewe, matimadẹ̌ matahuěna sarung měnodẹ kawawahani dingangu mangimang Yehuwa mang měkoạ apa seng niriandi-Ne. (Basa Mazmurẹ̌ 37:25; Ibrani 13:5.) Mạeng matimadẹ̌ měnodẹ kawawahani dingangu mangimang si Yehuwa, ini sarung makatul᷊ung manga anạ mẹ̌těno si sire.​—1 Sam. 1:27, 28; 2 Tim. 3:14, 15.

16. Kerea matatimadẹ̌ seng nẹ̌tul᷊ung manga anạ i sire někoạ cita-cita rohani, kụ apa gunane su manga anạ i sire?

16 Sěngkawingang su Amerika Serikat nẹ̌tul᷊ung anạ i sire měkoạ kapulung Yehuwa. I papạe naul᷊ị, ”Těntal᷊ang manga anạ i kami bědang tawe nakaral᷊eng dingangu makawisara, i kami seng nẹ̌běke si sire kerea merintis dingangu mẹ̌tul᷊ung sidang nakakoạ pěbawiahi kami mal᷊uasẹ̌. Orasẹ̌ ini, ene cita-citang i sire.” I sie lai naul᷊ị ual᷊ingu manga anạe seng nakakoạ cita-cita rohani, i sire botonge lumawang sasal᷊ukạ u duniang Setang kụ tatapẹ̌ někoạ kapulung Yehuwa. Sěngkatau saudara piạ anạe rarua němohẹ, ”Lawọ matatimadẹ̌ mětẹ̌tawakal᷊i tadeạu anạ i sire makakoạ cita-citang i sire su bidang olahraga, sikol᷊ah, dingangu su hal᷊ẹ̌ kẹ̌kapulung i sire. Katewe, limembong masuẹ̌ su akal᷊ẹ̌ mạeng i kitẹ mẹ̌tawakal᷊i mẹ̌tul᷊ung anạ mědal᷊ahapị dingangi Yehuwa. I kami mal᷊ua-l᷊uasẹ̌ bal᷊inẹ kětạeng ual᷊ingu mangạ anạ i kami seng nakakoạ cita-cita rohaning i sire, katewe lai ual᷊ingu i kami nakatul᷊ung si sire.” Matatimadẹ̌ apang nẹ̌tul᷊ung manga anạ i sire někoạ cita-cita rohani tantu nakal᷊uasẹ̌ naungu Mawu Yehuwa.

MĚNODẸ KAWAWAHANI SU SIDANG

17. Gělịko contoh kawawahani su ral᷊ungu sidang.

17 I kitẹ lai harusẹ̌ měnodẹ kawawahani su sidang. Contone, manga penatua harusẹ̌ bahani mạeng piạ u někoạ pẹ̌sasal᷊a gěguwạ arau su tempong mẹ̌tul᷊ung anạu sěmbaụ mạeng piạ u masakị mawěhạ. Pirang katau penatua dụděnta su penjara gunang měněntiro Alkitapẹ̌ dingangu měkoạ perhimpunan. Manga saudari tawe někẹ̌kawing lai botonge měnodẹ kawawahani su tempong měkoạ kapulung Yehuwa. I sire botonge makoạ perintis, měngal᷊ing sarang tampạ mahal᷊i penyiar, mẹ̌tul᷊ung program Rancang Bangun Setempat, dingangu tumol᷊e Sekolah bagi Penginjil Kerajaan. Piạ lai nakaěbạ undangan tumol᷊e Sekolah Gilead.

18. Kerea saudari seng maghurang botonge měnodẹ kawawahani?

18 I kitẹ makěndagẹ̌ su manga saudari seng maghurang, kụ i kitẹ mal᷊uasẹ̌ i sire ene su sidang! Maning pirang katau seng tawe makakoạ mal᷊awọ hal᷊ẹ̌ u Mawu, katewe i sire bědang botonge měnodẹ kawawahani. (Basa Titus 2:3-5.) Contone, saudari maghurang harusẹ̌ bahani su tempong penatua makitul᷊ung si sie mẹ̌bisara su saudari mangudạ soal u mẹ̌papakeang maudupẹ̌. I sie tawe mětaradạ si saudari ene ual᷊ingu carane mẹ̌papakeang, katewe i sie mẹ̌bisara pakapia dingangu mẹ̌tul᷊ung saudari ene mẹ̌tiněna apa pengaruh pakeange su taumata wal᷊inẹ. (1 Tim. 2:9, 10) Mạeng saudari seng maghurang měnodẹ kakěndagẹ̌ kerene, i sire sarung makatoghasẹ̌ sidang.

19. (a) Kerea tadeạu saudara seng bọu nisahani botonge mawahani? (b) Kerea Filipi 2:13 dingangu Yesaya 12:2 makatul᷊ung saudara-saudara mawahani?

 19 Saudara apang bọu nisahani lai harusẹ̌ měnodẹ kawawahani dingangu mapulu měhal᷊ẹ̌. Mạeng i sire mapulu makoạ hamba pelayanan dingangu penatua, sidang sarung makaěbạ al᷊amatẹ̌. (1 Tim. 3:1) Katewe, ěndịu piạ u gụgěnggang. Sěngkatau saudara aramanung bọu někoạ pẹ̌sasal᷊a, kụ i sie nẹ̌pěndang tawe layak makoạ hamba pelayanan arau penatua. Arau, saudara wal᷊inẹ lai ěndịu mẹ̌tiněna i sie tawe makamampo měkoạ hal᷊ẹ̌ ene. Mạeng pěndangu kerene, Yehuwa botonge mẹ̌tul᷊ung si kau tadeạu mawahani. (Basa Filipi 2:13; Yesaya 12:2.) Pẹ̌tahěndung si Musa. I sie lai nẹ̌pěndang tawe makamampo měkoạ apa dẹ̌dorongang i Yehuwa. (Sas. 3:11) Katewe Yehuwa nẹ̌tul᷊ung si sie mawahani dingangu nakakoạ hal᷊ẹ̌e. Kerea saudara bọu nisahani lai botonge mawahani? I sie botonge mẹ̌doa dingangu mẹ̌basa Alkitapẹ̌ ěllo-ěllo. I sie botonge mẹ̌tiněna contoh taumata wahani su Alkitapẹ̌. I sie lai botonge mẹ̌dorong penatua měněntiro si sie kụ i sie lai botonge mẹ̌tul᷊ung sidang su haghing cara. I kami měgausẹ̌ kěbị saudara apang bọu nisahani měnodẹ kawawahani dingangu měhal᷊ẹ̌ gunang sidang!

’[YEHUWA] MẸ̌TUL᷊UNG SI KAU’

20, 21. (a) Daud něgělị laingatẹ̌ apa si Salomo? (b) I kitẹ botonge mangimang apa?

20 Datu Daud něgělị laingatẹ̌ si Salomo Yehuwa sarung mẹ̌tul᷊ung si sie sarang bait ene masueng koạe. (1 Kar. 28:20) Salomo tantu mětẹ̌tiněna bawera ene, hakị u i sie něnarimạ hal᷊ẹ̌ ene maning i sie bědang tawẹ apa pengalaman dingangu bědang mangudạ. I sie něnodẹ kawawahani, kụ ual᷊ingu tul᷊umang i Yehuwa i sie nakakoạ bait ene su ral᷊ungu pitu taung stenga.

21 Yehuwa nẹ̌tul᷊ung si Salomo, kụ i Sie lai mẹ̌tul᷊ung si kitẹ tadeạu bahani dingangu makakoạ hal᷊ẹ̌ i kitẹ, su ral᷊ungu keluarga arau lai su sidang. (Yes. 41:10, 13) Mạeng i kitẹ bahani měkoạ kapulung Yehuwa, i kitẹ botonge mangimang Yehuwa sarung měngal᷊amatẹ̌ si kitẹ orasẹ̌ ini dingangu su tempo mahi. Hakị u ene ’pẹ̌tumbahani kụ tětạ e hal᷊ẹ̌ ene’.

^ par. 12 Piạ lawọ těgu mapaelẹ̌ soal u cara měkoạ cita-cita rohani su artikel ”Gunakanlah Cita-Cita Rohani untuk Memuliakan Pencipta Saudara”, su Menara Pengawal 15 Juli 2004.