Langsung ke konten

Langsung ke menu sekunder

Langsung ke daftar isi

Sahiding Yehuwa

Sangir

Měhabarẹ̌—Gunang Pěngangěndungang  |  Juni 2017

Yehuwa Měhiborẹ̌ si Kitẹ su Tempong Sigěsạ

Yehuwa Měhiborẹ̌ si Kitẹ su Tempong Sigěsạ

’Mawu kụ nangonggọu kuatẹ̌ . . . měnoghasẹ̌ naungi kami su tempong sigěsạ.’2 KORINTUS 1:3, 4.

KAKANTARỊ: 38, 56

1, 2. Kerea Yehuwa něhiborẹ̌ si kitẹ su tempong sigěsạ, kụ apa niriandi-Ne su Alkitapẹ̌?

SĚNGKATAU umbaseng mětẹ̌tiněna bawera su 1 Korintus 7:28, ayatẹ̌ ene nělahẹ apang bọu nẹ̌kawing sarung ’mẹ̌sombangu haghing sigěsạ’. Bọu ene, i sie nẹ̌kiwal᷊o su penatua seng marěngụ nẹ̌kawing, ”Apa ’haghing sigěsạ’ sarung kahombangeng mạeng iạ mẹ̌kawing, kụ kerea iạ tumatěngo ene?” Penatua ene něngoro si sie pẹ̌tiněna bawerang Paulus nělahẹ Yehuwa kai ”Ruata kụ nangonggọu kuatu pangangimang su taumata. I Sie mạnoghasẹ̌ naung i kami suapan tempon sigěsạ”.2 Kor. 1:3, 4.

2 I kitẹ masingkạ i Amang i kitẹ, Yehuwa, makěndagẹ̌ kụ sadia měhiborẹ̌ su tempong sigěsạ. I kau ěndịu nakatahěndung su tempong Yehuwa nẹ̌tul᷊ung dingangu něngahạ si kau bọu Hengetang’E. I kitẹ botonge mangimang Yehuwa mapulu apa kapaelange gunang i kitẹ,  kere seng nikoạ’E su manga ělang’E tempong tamai.Basa Yeremia 29:11, 12.

3. Kakiwal᷊o apa sarung simbaheng i kitẹ?

3 Biasane i kitẹ gampang tumatěngo sigěsạ mạeng masingkạ kawe nụe ene nariadi. Hakị u ene, kawe nụe piạ sigěsạ su pẹ̌kakawing arau keluarga? I sai makoạ tatěnoěng su Alkitapẹ̌ arau orasẹ̌ ini kụ makahiborẹ̌ si kitẹ? Mahịe i kitẹ mědeạ sasimbahe tadeạu makatahang su tempong sigěsạ.

SIGĚSẠ SU PẸ̌KAKAWING

4, 5. Sigěsạ apa kahombangengu sěngkawingang?

4 Su tempong wawine humotong niriadi, Yehuwa nẹ̌bawa si sie sarang esẹ ene, kụ i sie nakoạ kawinge. Bọu ene Yehuwa naul᷊ị, ”Ual᷊ingu ene tau esẹ e maněntang i amange ringangi ninange, kụ mẹ̌těngkasěmbaụ dingangu kawinge kụ irẹ̌dua e makoạ sěmbaụ.” (Pěnd. 2:24) Tantu orasẹ̌ ini i kitẹ kěbị tawe nasukụ. (Rm. 3:23) Hakị u ene, su tempong esẹ dingangu wawine nẹ̌kawing, i sire sarung makahombang sigěsạ. Contone, su tempong bědang tawe nẹ̌kawing, wawine tumuhụ su matimade. Katewe Alkitapẹ̌ naul᷊ị mạeng bọu nẹ̌kawing těmbonangu wawine kai esẹ. (1 Kor. 11:3) Humotong, ěndịu tawe gampang su esẹ měmihing kawinge. Wawine lai tawe gampang měnarimạ kawinge měmihing si sie, bal᷊inẹ matimade. Su tempong bọu nẹ̌kawing lai, sěngkawingang ěndịu kurang gighile dingangu gaghurang mantu arau ipagẹ̌, kụ ini makoạ sungkal᷊e.

5 Kěnang pẹ̌tiněna pěndangu sěng-kawingang su tempong kawing wawine piạ kal᷊uwaenge. Ěndịu i sire mal᷊uasẹ̌ lai gụgěnggang. I sire ěndịu nẹ̌tiněna sarang anạ malahirẹ̌, apa i mamạe dingangu rariọ mapia wue. I sire lai masingkạ kakạl᷊awọe doitẹ̌ masěbang. Su tempong anạ nalahirẹ̌, piạ lai hal᷊ẹ̌ buhu. Wawine sarung hanesẹ̌ měngurusẹ̌ anạ. Hakị u ene, sěngkawingang tawẹ apa lawọ tempo gunang i rẹ̌dua hala kere kangerẹ. Esẹ lai piạ limembong lawọ tanggung jawab ual᷊ingu měhiking kawing dingangu anạe.

6-8. Kerea pěndangu sěngkawingang mạeng tawe makaěbạ anạ?

6 Piạ lai pẹ̌kakawing nakahombang sigěsạ bal᷊inẹ. I sire mapulu piạ anạ, katewe tawe nakaěbạ. Su tempong wawine tawe makaěbạ anạ, mạsusah naunge. (Baw. 13:12) Su tempong Alkitapẹ̌, mẹ̌kawing dingangu piạ anạ ene penting su manga wawine. Hakị u ene kawingi Yakub, i Rahel, sěbạe nasusah naunge ual᷊ingu tawe makaěbạ anạ arawe tuhange piạ anạe. (Pěnd. 30:1, 2) Orasẹ̌ ini, su lawọ tampạ taumata mẹ̌pěndang piạ lawọ anạ ene penting. Manga utusan injil mětẹ̌tanạ su tampạ kerene hanesẹ̌ kiwal᷊ong kawe nụe i sire tawẹ apa anạ. Maning seng bọu niul᷊ikang pakapia apa alasange, bědang piạ u maul᷊ị, ”Oh, i kami hědo mẹ̌doa gunang kamene!”

 7 Kěnang pẹ̌tiněna contoh wal᷊inẹ. Sěngkatau saudari su Inggris mapulu piạ anạ. Su tempong nakasingkạ i sie tawe makaěbạ anạ, nasusah-susah naunge. Bọu ene i sie dingangu kawinge němutusẹ̌ měhengkẹ anạ. Katewe, pẹ̌sěnsul᷊ẹ bědang mạsusah naunge. I sie naul᷊ị, ”Iạ masingkạ nẹ̌tatěntang pěndange měhengkẹ anạ dingangu měhiking anạ u watangeng.”

8 Alkitapẹ̌ naul᷊ị sěngkatau wawine ”maambangu pěmamantelẹ̌ anạ”. (1 Tim. 2:15) Katewe ini bal᷊inẹbe i sie sarung měbiahẹ̌ kěkalẹ̌ ual᷊ingu piạ anạe. Mạeng kerene, apa mangal᷊ene ayatẹ̌ ene? Matimadẹ̌ wawine kai masibukẹ̌ měngurusẹ̌ anạ dingangu wal᷊e. Hakị u ene, si sie tawẹ apa tempo gunang mẹ̌sampuhẹ̌ arau měngurusẹ̌ urusangu tau wal᷊inẹ. (1 Tim. 5:13) Maning kerene, i sie mang makahombang sigěsạ su pẹ̌kakawing dingangu keluarga.

Yehuwa něgělị lawọ diandi makahiborẹ̌ si kitẹ su tempong sigěsạ

9. Sigěsạ apa lai ěndịu nikahombangeng i sire apang seng bọu nẹ̌kawing?

9 Sigěsạ bal᷊inẹ lai kẹ̌kahombangengu sěngkawingang, ene kai mạeng kawinge nate. Maning piạ u nẹ̌tiněna tawe makahombang hal᷊ẹ̌ ene, lawọ bọu i sire harusẹ̌ tumatěngo sigěsạ ene. Tau Sahani mangimang su diandi taumata nate saụ ipěbiahẹ̌, kụ ene nakahiborẹ̌ si sire. (Yoh. 5:28, 29) Yehuwa, i Amang i kitẹ, něgělị lawọ diandi su Alkitapẹ̌ makahiborẹ̌ si kitẹ su tempong sigěsạ. Mahịe i kitẹ měmanda kerea Yehuwa něhiborẹ̌ dingangu nẹ̌tu-l᷊ung manga ělang’E.

Mạeng kawingu seng něněntang, apa wotonge makahiborẹ̌ si kau? (Pěmanda paragraf 9, 12)

PĚLAHIBORẸ̌ SU TEMPONG SIGĚSẠ

10. Apa nakahiborẹ̌ si Hana? (Pěmanda gambarẹ̌ humotong su pěngangěndungang ini.)

10 Kěnang pẹ̌tiněna apa nariadi si Hana, kawing i Elkana. I sie mapulu piạ anạ katewe tawe makaěbạ. Arawe kawingi Elkana karuane, Penina, lawọ anạe. (Basa 1 Samuel 1:4-7.) I Penina mělẹ̌heghesẹ̌ si Hana ”wọu taung sarang taung” ual᷊ingu i Hana tawẹ anạe. I Hana sěbạewe nasusah naunge. Bọu ene apa nikoạe? I sie nẹ̌doa si Yehuwa. I Hana lai nakoạ sarang bal᷊eng Mawu kụ marěngụ mědẹ̌doa sene. I sie nẹ̌dorong anạ esẹ si Yehuwa, kụ i sie mangimang Yehuwa mang mẹ̌tul᷊ung si sie. Nasueng doane, i sie seng ”tawe saụ nasusa naunge”. (1 Sam. 1:12, 17, 18) I sie mangimang Yehuwa sarung měgělị anạ esẹ arau měhiborẹ̌ si sie dingangu cara wal᷊inẹ.

11. Kerea daroa makahiborẹ̌ si kitẹ?

11 Ual᷊ingu tawe nasukụ dingangu měbẹ̌biahẹ̌ su duniang Setang, i kitẹ bědang makahombang sigěsạ. (1 Yoh. 5:19) Katewe i kitẹ botonge mẹ̌doa si Yehuwa, ’Mawu kụ nangonggọu kuatẹ̌’. Ene nikoạ i Hana. I sie nẹ̌běke kěbị pěndange si Yehuwa kụ nẹ̌dorong  tul᷊ung. Kerene lai, su tempong piạ sigěsạ, abe kětạeng mẹ̌doa manibụ si Yehuwa. I kitẹ harusẹ̌ mẹ̌dorong tu-l᷊ung dingangu mẹ̌běke si Sie kěbị apa nikapěndangeng i kitẹ.Flp. 4:6, 7.

12. Kawe nụe Hana tatapẹ̌ mal᷊uasẹ̌ maning nakahombang sigěsạ?

12 Mạeng i kitẹ tawe makaěbạ anạ arau taumata ikẹ̌kěndagẹ̌ nate, i kitẹ tantu sěbạe masusah naung. Katewe piạ makahiborẹ̌ si kitẹ. Pẹ̌tiněnạe soal i Hana. Hana ini měbẹ̌biahẹ̌ su tempong i Yesus. Pitu taung bọu nẹ̌kawing, kawinge nate. Kụ ěndịu i sie tawẹ apa anạe. Apa nakahiborẹ̌ si sie? I sie ”mang tawe naněntangu Wal᷊em Mawu”. Maning umure seng 84 su taunge, Hana bědang marading sarang bal᷊eng Mawu gunang mẹ̌doa dingangu maněmbah si Yehuwa. (Luk. 2:37) Ene nakahiborẹ̌ si sie, hakị u ene i sie tatapẹ̌ mal᷊uasẹ̌ maning nakahombang sigěsạ.

13. Kerea hapị makahiborẹ̌ si kitẹ mạeng keluarga nakasusah naungi kitẹ?

13 Hapị su sidang lai botonge makahiborẹ̌ si kitẹ. (Baw. 18:24) Paula umure lima taung su tempong i mamạe něněntang si Yehuwa. Paula nasusah naunge kụ i sie lai nasigěsạ. Katewe piạ sěngkatau saudari perintis, arenge Ann, turusẹ̌ něnoghasẹ̌ dingangu měpẹ̌padul᷊i si sie. Paula nẹ̌běke, ”Maning i Ann bal᷊inẹ anạ u sěngkatauku, i sie mapadul᷊i kụ nẹ̌tul᷊ung si siạ. Ene nakatul᷊ung si siạ tatapẹ̌ maněmbah si Yehuwa.” Orasẹ̌ ini, Paula mal᷊uasẹ̌ ual᷊ingu i mamạe saụ nẹ̌bal᷊ị sarang sidang. Ann lai mal᷊uasẹ̌ seng nẹ̌tul᷊ung si Paula turusẹ̌ maněm-bah si Yehuwa.

14. Apa gunane mạeng i kitẹ měhiborẹ̌ taumata wal᷊inẹ?

14 Mạeng masau měkoạ barang mapia gunang taumata wal᷊inẹ, biasane i kitẹ mịbul᷊eng sigěsạ i kitẹ hala. Contone, lawọ saudari bědang mahuala  arau bọu nẹ̌kawing, masingkạ su tempong měnginjilẹ̌, i sire sěngkapěhal᷊ẹ̌ dingangi Yehuwa kụ měkoạ kapulu-Ne. Ini nakal᷊uasẹ̌ si sire. Sěběnarẹ̌e, i kitẹ kěbị botonge měnodẹ i kitẹ mapadul᷊i su taumata wal᷊inẹ mạeng měmahiạ habarẹ̌ mapia si sire. Kụ mạeng i kitẹ měkoạ barang mapia su anạu sěmbaụ, i kitẹ sarung mědal᷊ahapị mapia dingangi sire. (Flp. 2:4) Hal᷊ẹ̌ ene nikoạ i rasul Paulus. I sie mapadul᷊i su taumata wal᷊inẹ kere ”sěngkatau ghaghurang bawine měndiagạ anạ e”. Paulus lai něhiborẹ̌ dingangu něnoghasẹ̌ anạu sěmbaụ e ”kere sěngkatau i amang miẹ̌bạ anạ e”.Basa 1 Tesalonika 2:7, 11, 12.

 PĚLAHIBORẸ̌ SU RAL᷊UNGU KELUARGA

15. Tanggung jawab i sai měněntiro anạ soal i Yehuwa?

15 Kerea i kitẹ botonge měhiborẹ̌ manga keluarga su sidang? Piạ anạu sěmbaụ bědang buhu ěndịu nẹ̌dorong tul᷊ung si kitẹ měněntiro anạ i sire soal i Yehuwa. Alkitapẹ̌ naul᷊ị Yehuwa něgělị tanggung jawab su matimadẹ̌ gunang měněntiro manga anạ i sire. (Baw. 23:22; Ef. 6:1-4) Maning taumata wal᷊inẹ botonge mẹ̌tul᷊ung, katewe penting su matimadẹ̌ měněntiro hala anạ i sire. Matatimadẹ̌ harusẹ̌ masau mẹ̌bisara dingangu manga anạ i sire.

Matatimadẹ̌ harusẹ̌ masau mẹ̌bisara dingangu manga anạ i sire

16. Su tempong měněntiro manga rariọ apa harusẹ̌ tahěndungang i kitẹ?

16 Mạeng piạ matimadẹ̌ Sahani mẹ̌dorong si kitẹ pěněntiro Alkitapẹ̌ su anạe, pakatahěndung i kitẹ bal᷊inẹbe matimadu anạ ene. Pẹ̌sěnsul᷊ẹ i kitẹ ěndịu měněntiro Alkitapẹ̌ su anạ kụ matimade bal᷊inẹ Sahiding Yehuwa. Su tempong měněntiro anạu taumata wal᷊inẹ, kapaelange su wal᷊ene kụ matimade ene sene arau piạ tau Sahani matělang wal᷊inẹ, arau měněntiro su tampạ piạ lawọ taumata. Mạeng měkoạ kerene taumata wal᷊inẹ tawe mẹ̌sal᷊a tiněna. Kakạrěngụe, ěndịu matimade seng makakoạ měněntiro hala anạ i sire.

17. Apa botonge koateng manga rariọ gunang měhiborẹ̌ keluargang i sire?

17 Manga rariọ apang seng něngěn-dung soal i Yehuwa botonge měhiborẹ̌ dingangu měnoghasẹ̌ keluargang i sire hala. Kerea carane? Mạeng i sire měngadatẹ̌ dingangu mẹ̌tul᷊ung matimadi sire. Bọu ene lai, mạeng manga rariọ tatapẹ̌ masatia si Yehuwa, ene makatoghasẹ̌ keluargane. Su tempong Lěbạ Maihạ bědang tawe nariadi, piạ sěngkatau elangi Yehuwa arenge Lamekh. I sie nẹ̌bera mạanung anạ e, i Noakẹ̌, ”Dariọ ini sarung makahaěng su tempong i kitẹ e mělẹ̌hal᷊ẹ̌ masěgadẹ̌ mẹ̌kẹ̌karadiahang ěntana wọu nianeng MAWU e.” Nasueng Lěba Maihạ, bawera ini naghanapẹ̌ su tempong Yehuwa něngěmụ laane gunang ěntana. (Pěnd. 5:29; 8:21) Orasẹ̌ ini lai, manga rariọ apang masatia si Yehuwa, botonge měhiborẹ̌ dingangu mẹ̌tul᷊ung keluargang i sire, tadeạu tatapẹ̌ masatia su tempong piạ sigěsạ orasẹ̌ ini dingangu su ěllo mahi.

18. Apa makatul᷊ung si kitẹ tumatěngo haghing sigěsạ?

18 Manga ělangi Yehuwa orasẹ̌ ini nakaěbạ pělahiborẹ̌ bọu daroa, mẹ̌tiněna contoh bọu Alkitapẹ̌, kụ mědal᷊ahapị mapia dingangu anạu sěmbaụ. (Basa Mazmurẹ̌ 145:18, 19.) I kitẹ masingkạ Yehuwa sadia měhiborẹ̌ dingangu mẹ̌tul᷊ung si kitẹ su tempong tumatěngo haghing sigěsạ!