Langsung ke konten

Langsung ke menu sekunder

Langsung ke daftar isi

Sahiding Yehuwa

Sangir

Měhabarẹ̌—Gunang Pěngangěndungang  |  Juni 2017

Apa i Kau Masingkạ?

Apa i Kau Masingkạ?

Kawe nụe nihino Yesus nẹ̌sěbạ apang mẹ̌bawal᷊ụ su wal᷊eng Mawu ene kai ”tahapěhampasẹ̌”?

SU INJILẸ̌ Matius niwěke, ”Bọu e Mawu Yesus simuẹ̌ e su Wal᷊em Mawu, kụ nanokol᷊ẹ̌ patikụ taumata apang měmpẹ̌bẹ̌bawělli sene. I Sie namal᷊intuị manga meda’m mananal᷊iu roitẹ̌ dingangu kakaianeng u mẹ̌bawal᷊ụ paluma. Mase i Sie něhengetang si sire u, ’Su ral᷊ungu Winohẹ Susi e kạbawohẹ u Mawu Ruata e kai něhengetang, ”Bal᷊e-Ku e sarung isěbạ bal᷊e pẹ̌kakal᷊iomanengang.” Kutẹu kahiang kamene kawe nịkakoạ baes’u tahapěhampasẹ̌!’”—Mat. 21:12, 13.

Tumuhụ sejarah, mẹ̌bawal᷊ụ su wa-l᷊eng Mawu něngakal᷊ẹ̌ měmaměli kụ něgělị arěga marangẹ. Contone, arěgang burung paluma biasane mamura kụ botonge kawěliangu taumata masusah gunang sasěmbah. Katewe, catatan Yahudi kuno naul᷊ị su sěngkatempo su abad humotong, arěgang duam baụ burung paluma nịdatingu satu dinar bul᷊aeng. Ene mẹ̌sul᷊ungu gajing basẹ̌ něhal᷊ẹ̌ 25 su ěllone. Arěgang burung paluma sěbạe mal᷊ě-ghadẹ̌ hakị u taumata masusah tawe makawěli. (Imng. 1:14; 5:7; 12:6-8) Rabi Simeon anạ i Gamaliel nẹ̌pědu nakaringihẹ̌ hal᷊ẹ̌ ene. Hakị u ene i sie něngatorẹ̌ tadeạu sasěmbang tau Yahudi nipakahal᷊i. Ini nakakoạ arěgang burung paluma nal᷊intụ seratus kali lipat bọu arěga kal᷊imona.

Nal᷊ahẹ, i sire apang mẹ̌bawal᷊ụ su wal᷊eng Mawu sěbạewe maanggang su roitẹ̌ hakị u něngakal᷊ẹ̌ měmaměli. Ini alasange Yesus nẹ̌sěbạ i sire kai ”tahapěhampasẹ̌”.