FIKIRIA jambo hili: Unajifunza na mutu Biblia, munasoma andiko fulani, unamuona mara moja anafungua macho na anakuangalia kwa sababu anaelewa maana ya andiko hilo. Kwa sauti ya mushangao na ya upole anakuuliza, “Unamaanisha kweli kwamba Biblia inafundisha kama tunaweza kuishi milele katika paradiso​—hapa duniani?” Ndugu anayekusindikiza katika mahubiri anacheka kidogo na anamujibia hivi, “Tulia, unasoma nini katika Biblia?” Mwanafunzi anajaa na furaha, anatikisa kichwa na kusema, “Ni ajabu kabisa, hakuna siku nilifundishwa jambo hili!” Unakumbuka kwamba alisema pia maneno kama hayo kumekwisha pita majuma fulani, siku ile alijifunza kwa mara ya kwanza kwamba jina la Mungu ni Yehova.

Je, umekwisha kukutana na jambo kama hilo? Ndugu na dada wengi wamekwisha kukutana na jambo hilo. Kuna mambo machache ambayo yanaweza kutukumbusha zawadi ya maana sana ambayo tumepewa, ni kusema, ujuzi wa ile kweli! Kwa hiyo fikiri kidogo na ujiulize ni namna gani wewe ulifikia kujua ile kweli? Katika sehemu hii tutazungumuzia ulizo hilo. Namna watu wa Mungu walipata nuru ya kiroho hatua kwa hatua ni ushuhuda ulio wazi kwamba Ufalme wa Mungu ni jambo la kweli kabisa. Kwa miaka 100, Mufalme wa Ufalme huo, Yesu Kristo, amefanya yote ili watu wa Mungu wafundishwe ile kweli.