Ona video zinazopatikana

Ona habari zilizo ndani

 BIBLIA INABADILISHA MAISHA YA WATU

Nilipata Majibu ya Maulizo Yangu Yote Kupitia Mafundisho ya Biblia

Nilipata Majibu ya Maulizo Yangu Yote Kupitia Mafundisho ya Biblia
  • ALIZALIWA MWAKA WA: 1987

  • INCHI: AZERBAIJANI

  • ALIKUWA: MUTOTO WA BABA MUISLAMU NA MAMA MUYAHUDI

MAISHA YANGU YA ZAMANI:

Nilizaliwa katika muji wa Baku, inchi ya Azerbaijani, nilikuwa mutoto wa pili katika familia ya watoto wawili. Baba yangu alikuwa Muislamu, na mama yangu alikuwa Muyahudi. Wazazi wangu walipendana sana na hawakuhangaika kwa sababu ya kuwa na dini tofauti. Mama alikuwa anamutegemeza baba wakati alifunga katika mwezi wa Ramazani, na baba alimutegemeza mama wakati wa Pasaka. Katika nyumba yetu tulikuwa na Kurani, Torati, na Biblia.

Nilijiona kuwa Muislamu. Hata ikiwa sikukuwa na mashaka juu ya kuwapo kwa Mungu, kulikuwa mambo yaliyonisumbua katika akili. Nilijiuliza, ‘Sababu gani Mungu aliumba watu, na ni kwa kusudi gani mutu anaweza kusumbuka maisha yake yote na kuteswa tena milele katika moto wa mateso?’ Kwa kuwa watu wanasema kama kila jambo linalofanyika ni mapenzi ya Mungu, nilijiuliza, ‘Mungu analetea watu mateso na kufurahi wakati anawaona wanateseka?’

Wakati nilikuwa na miaka 12, nilianza kusali namaz, sala tano za Waislamu za kidesturi za kila siku. Wakati huo, Baba alituandikisha mimi na dada yangu kwenye masomo ya Wayahudi. Kati ya mambo mengine, tulifundishwa desturi na mafundisho ya Torati na luga ya Kiebrania. Kila siku mbele ya kuanza kusoma, tulisali kulingana na desturi ya Wayahudi. Kwa hiyo, asubuhi, nilisali namaz nyumbani, na muchana, nilisali sala za Wayahudi kwenye masomo.

Nilitamani kabisa kupata majibu mazuri kwa maulizo yangu. Kila mara niliwauliza marabi kwenye masomo: “Sababu gani Mungu aliumba watu? Mungu anamuona namna gani Baba yangu Muislamu? Yeye ni mutu muzuri, sasa, sababu gani anaonwa kuwa asiyekuwa safi? Sababu gani Mungu alimuumba?” Majibu kidogo nilipata hayakueleweka na hayakukuwa yenye kusadikisha.

BIBLIA ILIBADILISHA MAISHA YANGU:

Katika mwaka wa 2002, niliacha kumuamini Mungu. Juma moja tu kisha kuhamia Ujerumani, baba yangu alipata ugonjwa wa kupooza na akapoteza ufahamu. Kwa miaka mingi nilikuwa nimesali juu ya afya  na hali ya muzuri ya familia yangu. Kwa sababu nilikuwa hakika kuwa ni Mweza-yote tu mwenye kuwa na uwezo juu ya maisha na kifo, nilimuomba kila siku asaidie baba aendelee kuishi. Niliwaza, ‘Ni jambo jepesi sana kwa Mungu kutimiza ombi lenye kutoka moyoni la kijana mudogo mwanamuke.’ Nilikuwa hakika kuwa atajibia sala zangu. Lakini baba yangu akakufa.

Niliumizwa sana kuona kwamba Mungu alionekana kuwa asiyehangaikia watu na nikavunjika moyo sana. Niliwaza, ‘Inawezekana ninasali vibaya ao Mungu haiko.’ Nilishangaa sana na sikuweza tena kusali namaz. Sikuona dini zingine kuwa za maana, kwa hiyo, nikaamua kuwa Mungu haiko.

Miezi sita kisha hapo, Mashahidi wa Yehova walitutembelea. Kwa kuwa hatukukuwa tunawaza sana juu ya Ukristo, mimi na dada yangu tulitaka kuwaonyesha kwa njia ya adabu kuwa walifundisha uongo. Tuliwauliza: “Sababu gani Wakristo wanaabudu Yesu, musalaba, Maria, na sanamu zingine wakati Amri Kumi zinakataza kufanya hivyo?” Mashahidi wa Yehova walituhakikishia kupitia Maandiko kuwa ni mubaya kwa Wakristo wa kweli kuabudu sanamu na kwamba watu wanapaswa kusali kwa Mungu tu. Jambo hilo lilinishangaza.

Kisha tukawauliza hivi: “Munasema nini juu ya Utatu? Ikiwa Yesu ni Mungu, namna gani aliishi duniani na kuuawa na watu?” Tena, walitujibia kupitia Biblia na wakatufasiria kuwa Yesu haiko Mungu wala haiko sawa na Mungu. Mashahidi wa Yehova walituonyesha kuwa hiyo ndiyo sababu hawaamini Utatu. Nilishangaa sana na nikawaza, ‘Hawa ni Wakristo wa ajabu-ajabu kabisa.’

Lakini, nilitaka kujua sababu gani watu wanakufa na sababu gani Mungu anaacha watu wateseke. Mashahidi wa Yehova walinionyesha kitabu Ujuzi Uongozao Kwenye Uhai Udumuo Milele, * kilichokuwa na sura nzima-nzima zilizozungumuzia maulizo yangu. Walianza mara moja kunifundisha Biblia.

Kila wakati tulipojifunza, nilipata majibu ya muzuri na yenye kutegemea Biblia kwa maulizo yangu. Nilifikia kujua kuwa jina la Mungu ni Yehova. (Zaburi 83:18) Sifa yake kubwa ni upendo usiotafuta faida zake mwenyewe. (1 Yohana 4:8) Aliumba watu kwa sababu alitaka kuwapatia pia zawadi ya uzima. Nilifikia kuelewa kuwa hata ikiwa Mungu anaacha ukosefu wa haki uendelee, anauchukia sana na hivi karibuni atauondoa milele. Nilijifunza kuwa uasi wa Adamu na Eva umeletea watu matokeo mabaya. (Waroma 5:12) Kati ya matokeo hayo mabaya kuna kifo cha watu tunaowapenda, kama vile baba yangu. Lakini, Mungu ataondoa mateso hayo katika dunia mupya inayokuja, ambamo watu waliokufa watafufuliwa.—Matendo 24:15.

Nilipata majibu ya maulizo yangu yote kupitia mafundisho ya Biblia. Nilianza tena kumuamini Mungu. Wakati niliwajua Mashahidi wa Yehova muzuri, nilitambua kuwa wanaunda familia ya ndugu na dada duniani pote. Umoja na upendo ulio kati yao ulinipendeza sana. (Yohana 13:34, 35) Mambo nilijifunza juu ya Yehova yalinichochea nikuwe na nia ya kumutumikia, kwa hiyo nikaamua kuwa Shahidi wa Yehova. Nilibatizwa tarehe 8 Mwezi wa 1, 2005.

FAIDA YENYE NIMEPATA:

Maelezo ya Biblia yenye kusadikisha yalibadilisha kwa njia ya muzuri namna nilikuwa ninaona maisha. Maelezo hayo yenye kuaminika niliyopata kupitia Neno la Mungu yaliniletea amani katika moyo. Ninapata furaha nyingi sana na faraja kupitia tumaini la kumuona tena baba yangu wakati wa ufufuo ambao Neno la Mungu linaahidi.—Yohana 5:28, 29.

Kwa miaka sita niko na furaha katika ndoa pamoja na Jonathan, bwana anayemuogopa Mungu. Sisi wawili tumejifunza kuwa kweli juu ya Mungu iko yenye kueleweka na iko nyepesi, na wakati huohuo tunaiona kuwa kitu cha maana sana. Ndiyo sababu tunafurahia kuelezea wengine juu ya imani yetu na tumaini letu la muzuri sana. Leo ninajua kuwa Mashahidi wa Yehova hawako Wakristo wa “ajabu-ajabu” lakini ni Wakristo wa kweli.

^ fu. 15 Kilichochapishwa na Mashahidi wa Yehova lakini hakichapishwe tena.