“Kuwa na urafiki na Mungu kunakufanya ujisikie kuwa salama, muzima, na mwenye kutulia. Kunakufanya ujisikie kuwa Mungu anakutafutia mema sikuzote.”—CHRISTOPHER, KIJANA ANAYEISHI KATIKA INCHI YA GHANA.

“Mungu anaona magumu yako yote, na anakuonyesha upendo zaidi na kukuhangaikia zaidi kuliko vile ungeweza kumuomba.”—HANNAH ALIYE NA MIAKA 13, ANAYEISHI KATIKA ALASKA, AMERIKA.

“Kujua kama uko rafiki wa sana wa Mungu ni jambo la muzuri zaidi na linakufanya ujisikie kuwa mwenye kutulia!”—GINA, MWANAMUKE WA JAMAIKA MWENYE MIAKA KATI YA 41 NA 50.

Kuna watu wengine wanaojisikia kama Christopher, Hannah, na Gina. Watu wengi duniani wako hakika kuwa Mungu anawaona kuwa marafiki wake. Wewe pia unaona vile? Unajisikia kuwa rafiki wa sana wa Mungu? Ao ungependa kuwa rafiki yake ao rafiki yake wa sana? Labda unajiuliza: ‘Inawezekana kabisa mutu afanye urafiki wa sana na Mungu Mweza-Yote? Ikiwa ndiyo, namna gani?’

INAWEZEKANA KUWA RAFIKI YA MUNGU

Biblia inaonyesha kama inawezekana kufanya urafiki wa sana na wa pekee na Mungu. Inaonyesha kama Mungu alimuita Abrahamu muzee wa ukoo Muebrania “rafiki yangu.” (Isaya 41:8) Tena, ona mwaliko wenye upendo unaopatikana katika andiko la Yakobo 4:8: ‘Mumukaribie Mungu, naye atawakaribia ninyi.’ Kwa hiyo, ni wazi kuwa inawezekana kufanya uhusiano ao urafiki na Mungu. Lakini kwa kuwa Mungu haonekane, namna gani unaweza ‘kumukaribia’ na kufanya urafiki muzuri naye?

Ili kujibia ulizo hilo, fikiria namna watu wawili wanafanya urafiki. Mara nyingi watu wawili wanaanza urafiki kwa kuambiana kwanza majina. Kisha, wanapozungumuza mara kwa mara, kwa kubadilishana mawazo na kuambiana namna wanajisikia moyoni, urafiki wao unakomaa. Na wakati wanajikaza kusaidiana, urafiki wao unakuwa nguvu zaidi. Ni vile pia mutu anafanya urafiki na Mungu. Acha tuone namna gani mutu anaweza kufanya vile.