Ona video zinazopatikana

Ona mambo yaliyo katika kila habari

Ona habari zilizo ndani

Mashahidi wa Yehova

Kiswahili (Congo)

Munara wa Mulinzi  |  Na. 2 2017

 HABARI KUBWA | UTAKUBALI ZAWADI YA MUNGU YENYE KUWA KUBWA ZAIDI?

Zawadi ya Mungu Yenye Kuwa Kubwa Zaidi—Sababu Gani Ni ya Maana Sana?

Zawadi ya Mungu Yenye Kuwa Kubwa Zaidi—Sababu Gani Ni ya Maana Sana?

Ni nini inafanya uone zawadi kuwa ya maana kabisa kwako? Pengine mambo haya 4: (1) ni nani mwenye alikupatia zawadi hiyo, (2) sababu gani alikupatia zawadi hiyo, (3) alijinyima mambo gani ili kukupatia zawadi hiyo, na (4) kama zawadi hiyo ilitimiza jambo lenye ulikuwa nalo lazima kabisa. Kufikiri juu ya mambo hayo kunaweza kutusaidia tufurahie zaidi zabihu ya ukombozi ambayo ni zawadi ya Mungu yenye kuwa kubwa zaidi.

NI NANI ALITOA ZAWADI HIYO?

Tunaona zawadi fulani kuwa za maana kwa sababu zilitolewa na mutu fulani mwenye kuwa na mamlaka ao mwenye tunaheshimia sana. Zawadi zingine, hata kama ni za bei ya chini, tunaziona kuwa za maana kwa sababu zilitolewa na mutu wa familia mwenye tunapenda ao rafiki mwenye kutumainika. Ni hivyo ilikuwa kuhusu zawadi yenye Russell alipatia Jordan, mwenye tulizungumuzia katika habari yenye kutangulia. Namna gani hilo linahusu zawadi ya zabihu ya ukombozi?

Kwanza, Biblia inasema kwamba ‘Mungu alimutuma Mwana wake muzaliwa-pekee kuja ulimwenguni ili tupate uzima kupitia yeye.’ (1 Yohana 4:9) Hilo linafanya zawadi hiyo ikuwe ya maana kabisa. Hakuna mutu mwenye kuwa na mamlaka makubwa kuliko Mungu. Mwandikaji mumoja wa zaburi, alisema hivi kumuhusu: “Wewe, ambaye jina lako ni Yehova, wewe peke yako ndiye Uliye Juu Zaidi, juu ya dunia yote.” (Zaburi 83:18) Hakuna mutu mwengine mwenye kuwa na mamlaka kuliko yeye mwenye angeweza kututolea zawadi.

Pili, Mungu ni “Baba yetu.” (Isaya 63:16) Namna gani? Alitupatia uzima. Tena, kila mara anatuhangaikia kama vile baba mwenye upendo anahangaikia watoto wake. Wakati Mungu alikuwa anazungumuzia watumishi wake fulani wa zamani wenye aliita Efraimu, aliuliza hivi: ‘Je, Efraimu [haiko] mwana mwenye samani kwangu, ao mutoto anayetendewa kwa upendo? . . . Matumbo yangu yamekuwa na musukosuko kwa ajili yake. Kwa kuwa nitamuhurumia kabisa.’ (Yeremia 31:20) Mungu anajisikia hivyo pia kuhusu waabudu wake leo. Zaidi ya kuwa Muumbaji wetu mweza-yote, yeye ni Baba na Rafiki yetu mushikamanifu.  Hilo halifanye kila zawadi yenye anatutolea ikuwe ya maana sana?

SABABU GANI ALITOA ZAWADI HIYO?

Zawadi fulani ni za maana kwa sababu zilitolewa kwa upendo wa kweli, hapana kwa sababu mutu alilazimika kufanya hivyo. Mutu mwenye kutoa kwa upendo hangojee kulipwa kwa sababu ya jambo nzuri lenye alifanya.

Mungu alitoa Mwana wake kwa ajili yetu kwa sababu alitupenda. Biblia inasema hivi: ‘Kwa hili upendo wa Mungu ulifunuliwa kwa habari yetu, kwa sababu Mungu alimutuma Mwana wake muzaliwa-pekee.’ Alifanya hivyo sababu gani? Alifanya hivyo “ili tupate uzima kupitia yeye.” (1 Yohana 4:9) Mungu alilazimika kufanya hivyo? Hapana hata kidogo! “Fidia ambayo Kristo Yesu alilipa” inaonyesha ‘fazili zake [Mungu] zisizostahiliwa.’Waroma 3:24.

Sababu gani zawadi hiyo ya Mungu ni tendo la ‘fazili zisizostahiliwa’? Biblia inasema hivi: ‘Mungu hupendekeza upendo wake mwenyewe kwetu kwa kuwa, tulipokuwa tungali watenda-zambi, Kristo alikufa kwa ajili yetu.’ (Waroma 5:8) Upendo wa kweli ulichochea Mungu afanye jambo fulani kwa ajili ya wanadamu ambao ni zaifu, watenda-zambi, na wenye kuwa na lazima ya musaada. Hatukustahili upendo huo, na hatuwezi kumulipa hata siku moja. Zawadi hiyo ndiyo njia kubwa zaidi yenye kuonyesha upendo katika historia.

ALIJINYIMA NINI ILI KUTOA ZAWADI HIYO?

Zawadi fulani ni za maana kwa sababu watu wenye kuzitoa walijinyima sana ili kuzitoa. Wakati mutu iko tayari kuacha kitu cha maana sana kwake na kutupatia kitu hicho, tunaona zawadi hiyo kuwa ya maana sana kwa sababu mutu huyo alijinyima.

Mungu ‘alimutoa Mwana wake muzaliwa-pekee.’ (Yohana 3:16) Hakukuwa mutu mwengine mwenye Yehova anapenda kuliko Yesu ambaye angetutolea. Kwa miaka mingi yenye Mungu alikuwa anaumba ulimwengu, Yesu alitumika pamoja naye na alifikia kuwa ‘yule ambaye yeye alimupenda sana.’ (Methali 8:30) Yesu ni “Mwana wa upendo” wa Mungu na ni ‘mufano wa Mungu asiyeonekana.’ (Wakolosai 1:13-15) Hakuna viumbe vyenye akili ambavyo vimekuwa na urafiki wa karibu kama vile Yehova na Yesu.

Hata hivyo, Mungu “hakujizuia hata Mwana wake mwenyewe.” (Waroma 8:32) Yehova alitutolea jambo la muzuri zaidi ambalo alikuwa nalo. Hakuna zawadi ingine yenye imemuomba kujinyima sana kama hiyo.

ILITIMIZA JAMBO LENYE TULIKUWA NALO LAZIMA KABISA

Zawadi fulani ni za maana kwa sababu zinatimiza jambo lenye tulikuwa nalo lazima kabisa, ao hata kwa sababu zinatolewa kwa wakati wenye kufaa kabisa. Kwa mufano, tunaweza kuwa wenye shukrani kwa mutu mwenye anajitolea kutuuzia dawa zenye zinaweza kuokoa uzima wetu, zenye hatuna uwezo wa kuuza. Kwa kweli, zawadi hiyo itakuwa ya maana sana!

“Kwa maana kama vile katika Adamu wote wanakufa, vivyo hivyo pia katika Kristo wote watafanywa kuwa hai.” (1 Wakorintho 15:22) Kwa kuwa tuko wazao wa Adamu, sisi wote ‘tunakufa,’ hatuwezi kuepuka maumivu ya magonjwa na kifo ao kujipatanisha na Mungu na kuwa bila makosa mbele yake. Na kwa sababu tuko wanadamu wenye zambi hatuwezi kujipatia sisi wenyewe ‘uhai’ ao kuupatia mutu mwengine. Biblia inasema hivi: ‘Hakuna hata mumoja wao anayeweza kumukomboa hata ndugu, wala kumupa Mungu fidia kwa ajili yake . . . Imekoma mupaka wakati usio na kipimo.’ (Zaburi 49:7, 8) Tuko na lazima kabisa ya musaada kwa sababu hatuwezi kulipa bei ya zabihu ya ukombozi. Sisi wenyewe hatuwezi kufanya jambo lolote.

 Kwa upendo wake mukubwa, Yehova alikuwa tayari kutuuzia “dawa” yenye kuokoa uzima wetu yenye tulikuwa nayo lazima, ili kupitia Yesu “wote [wafanywe] kuwa hai.” Namna gani zabihu ya ukombozi inatimiza jambo hilo? ‘Damu ya Yesu Mwana wake hutusafisha kutoka katika zambi yote.’ Kwa kweli, damu yenye Yesu alimwanga inatoa nafasi ya kusamehewa zambi na kupata uzima wa milele. (1 Yohana 1:7; 5:13) Sasa, zabihu ya ukombozi itafanyia nini wapendwa wetu wenye wamekufa? “Kwa kuwa kifo ni kupitia mwanadamu, ufufuo wa wafu pia ni kupitia mwanadamu [Yesu].”—1 Wakorintho 15:21. *

Hakuna zawadi ingine yenye imekwisha kutolewa na mutu mwenye mamlaka zaidi ao yenye imechochewa na upendo mukubwa kuliko zabihu ya Yesu. Hakuna mutu mwenye amekwisha kujinyima sana kwa ajili yetu kama vile Yehova Mungu alifanya. Na hakuna zawadi yenye imetimiza jambo lenye tulikuwa nalo lazima sana kuliko zabihu yenye inatuweka huru kutoka katika zambi na kifo. Kwa kweli, hakuna zawadi yenye inaweza hata kufikia bei ya zabihu ya ukombozi; hakuna maneno yenye inaweza kufasiria bei ya zabihu hiyo.

 

^ fu. 19 Ili kupata habari zaidi juu ya kusudi la Mungu la kufufua watu wenye wamekufa, soma sura ya 7 ya kitabu Biblia Inafundisha Kabisa Nini? chenye kuchapishwa na Mashahidi wa Yehova na kinapatikana pia kwenye www.jw.org.