Matatizo fulani yenye tunapambana nayo katika maisha yanakamata muda murefu sana, wakati fulani yanaweza kufanya hata miaka; yanaweza kutia mizizi mbele hata tutambue jambo hilo. Je, Biblia inatupatia hekima ya kumaliza matatizo kama hayo yenye kukawia na yenye kuvunja moyo? Tuchunguze mifano fulani.

KUHANGAIKA KUPITA KIASI

Rosie anasema, “Nilikuwa ninajiletea mahangaiko fulani wakati nilikuwa ninafanya mambo kuwa ya mubaya zaidi katika akili yangu, mambo yenye kwa kweli hayakukuwa vile nilikuwa ninawazia.” Ni maandiko gani ya Biblia yenye yalimusaidia? Moja kati ya maandiko hayo ni Mathayo 6:34: ‘Musihangaike kamwe [ao, hata kidogo] juu ya kesho, kwa maana kesho itakuwa na mahangaiko yake yenyewe. Unatosha kila siku ubaya wake.’ Sasa, Rosie anasema kuwa maneno hayo ya Yesu yalimusaidia aache kuhangaika juu ya kile kinaweza kutokea kesho. Anaongeza hivi: “Bila kuongeza mahangaiko juu ya magumu yenye hayajatokea na yenye pengine hayatatokea, nilikuwa tayari na magumu mengi.”

Yasmine pia alijisikia kama vile mahangaiko yake yalianza kumutawala. Anasema hivi: “Nilikuwa ninalia siku mbili hivi katika juma, na usiku fulani sikukuwa ninapata usingizi. Nilijisikia kama vile mawazo ya mubaya yalikuwa yananiharibishia maisha yangu.” Ni andiko gani lilimusaidia? Anasema kuwa ni 1 Petro 5:7: ‘Mutupe mahangaiko yenu yote juu yake [Mungu], kwa sababu yeye anawajali [ao, anawahangaikia] ninyi.’ Yasmine anasema hivi: “Kadiri wakati uliendelea kupita, niliendelea kusali kwa Yehova, na alijibia sala zangu. Nilijisikia kama vile muzigo muzito umeondolewa juu ya mabega yangu. Mawazo yangu ya mubaya yanarudia mara kwa mara, lakini sasa ninajua namna ya kupambana nayo.”

 TABIA YA KUCHELEWESHA MAMBO

Kijana mumoja mwanamuke mwenye kuitwa Isabella anasema hivi: “Ninawaza mutu anariti tabia ya kuchelewesha mambo kutoka kwa wazazi wake kwa sababu baba yangu pia iko na tabia hiyo. Ninachelewesha mambo ya maana kwa sababu ninapenda tu kukaa; ili kujifurahisha ao kuangalia tu televizyo. Ni tabia ya mubaya sana kwa sababu inaongezea mutu mahangaiko na inamufanya atimize kazi yenye haiko ya muzuri.” Kanuni yenye ilimusaidia inaonyeshwa katika 2 Timotheo 2:15, yenye inasema hivi: ‘Fanya kabisa yote unayoweza ili ujitoe kwa Mungu ukiwa mutu aliyekubaliwa, mufanyakazi asiye na lolote la kuonea aibu [ao, haya].’ Isabella anasema, “Sikupenda Yehova asikilie kazi yangu haya kwa sababu tu nilichelewesha mambo.” Isabella alibadilika kabisa.

Kelsey pia, anaeleza hivi: “Ningekuwa na kazi ya kufanya palepale, lakini nilikuwa ninachunga mupaka dakika ya mwisho ili kuifanya. Nilikuwa ninalia, kukosa usingizi, na kuhangaika. Haikukuwa tabia ya muzuri kwangu.” Kelsey alipata musaada katika Methali 13:16: ‘Kila mutu aliye mwerevu atatenda kwa ujuzi, lakini mujinga ataeneza upumbavu kila mahali.’ Anaeleza jambo lenye alijifunza wakati alifikiri sana juu ya andiko hilo. Anasema hivi: “Ni jambo la hekima kuwa mwenye busara na kupanga mambo mbele ya wakati. Sasa niko na buku fulani lenye ninatumia ili kuandika ndani kazi yenye nitafanya, na hilo linanisaidia nijipange mimi mwenyewe, na kuepuka kuchunga mupaka dakika za mwisho ili kufanya jambo fulani.”

KUJISIKIA KUWA PEKE YAKO

Kirsten anasema hivi: “Bwana yangu alivunja ndoa yetu na kuniacha na watoto ine.” Ni kanuni gani ya Biblia yenye ilimusaidia? Methali 17:17 inasema hivi: “Rafiki wa kweli anapenda nyakati zote, naye ni ndugu aliyezaliwa kwa ajili ya wakati wa taabu.” Kirsten alitafuta musaada kwa watu wengine wenye wanamutumikia Yehova kama yeye. Alitambua jambo gani? Anasema hivi: “Marafiki wangu walinitegemeza katika njia nyingi sana! Wamoja waliniachia chakula na maua kwenye mulango. Mara tatu, kikundi kidogo cha watu walinisaidia mimi na watoto wangu kuhama. Mutu mumoja alinisaidia kupata kazi. Sikuzote, marafiki wangu walikuwa tayari kunisaidia.”

Delphine, mwenye tulizungumuzia mwanzoni, alipambana pia na hali ya kujisikia kuwa peke yake. Anakumbuka hivi kisha matatizo yote yenye yalimupata: “Nilijisikia kabisa kuwa peke yangu na mwenye kukosa furaha, na nilikuwa kama mutu mwenye kuangalia tu namna wengine wako wanafurahia maisha.” Andiko moja lenye lilimusaidia ni Zaburi 68:6: “Mungu anawafanya wapweke [ao, wenye kuwa peke yao] wakae katika nyumba.” Anaeleza hivi: “Nilijua kuwa andiko hilo halikumaanisha kwamba nitapata kabisa nyumba sasa. Lakini, nilifikia kuelewa kama Mungu anatutolea nyumba ya kiroho, mahali penye tunafanya urafiki wa kweli pamoja na watu wengine wenye kumupenda Yehova. Lakini nilijua kwamba nilipaswa kwanza kumukaribia Yehova zaidi mbele ya kukaribia watu wengine. Kwa hiyo Zaburi 37:4 ilinisaidia niweze kufanya jambo hilo. Inasema hivi: ‘Upate furaha tele katika Yehova, naye atakupa maombi ya moyo wako.’”

Anamalizia hivi: “Nilitambua kuwa nilikuwa na lazima ya kushikamana sana na Yehova. Yeye ni rafiki muzuri zaidi. Kisha nilifanya liste ya mambo yenye ningefanya pamoja na wengine, ili niweze kufanya urafiki pamoja na watu wenye kumupenda pia Yehova. Nilijifunza kuona mambo ya muzuri yenye wengine wanafanya na kuepuka kukaza akili juu ya uzaifu wao.”

Ni kweli kwamba, marafiki wenye wanamutumikia Mungu hawakamilike. Mashahidi wa Yehova wanapambana na matatizo kama watu wengine wote. Lakini mazoezi yenye Biblia inatoa yanachochea watu kusaidia wengine wakati inawezekana. Ni jambo lenye hekima kutafuta marafiki kama hao. Lakini, je, kanuni za Biblia zinaweza pia kusaidia mutu apambane na matatizo yenye hayawezi kumalizika leo, kama vile ugonjwa wenye kukawia na huzuni?

Kutumikisha kanuni za Biblia kunaweza kukusaidia kupata marafiki wenye wanaweza kukutegemeza