Ona video zinazopatikana

Ona mambo yaliyo katika kila habari

Ona habari zilizo ndani

Mashahidi wa Yehova

Kiswahili (Congo)

Munara wa Mulinzi—Gazeti la Funzo  |  Mwezi wa 5, 2017

Usiache Upendo Wako Upoe

Usiache Upendo Wako Upoe

Kwa sababu ya kuongezeka kwa uasi-sheria upendo wa walio wengi zaidi utapoa.MATHAYO 24:12.

NYIMBO: 60, 135

1, 2. (a) Maneno ya Yesu yenye kuwa katika Mathayo 24:12, yalihusu nani kwanza? (b) Namna gani kitabu cha Matendo kinaonyesha kuwa Wakristo wengi wa kwanza-kwanza waliendelea kutia nguvu upendo wao? (Ona picha kwenye mwanzo wa habari hii.)

WAKATI Yesu alikuwa katika dunia, alieleza namna watu wangetambua ‘umalizio wa mufumo wa mambo.’ Kati ya mambo mengine yenye alisema, alitabiri hivi: “Upendo wa walio wengi zaidi utapoa.” (Mathayo 24:3, 12) Wayahudi wa wakati wa mitume walijiona kuwa watu wa Mungu lakini walikuwa wameacha upendo wao kwa Mungu upoe.

2 Hata hivyo, Wakristo wengi wa wakati huo walikuwa na mawazo yenye kuwa tofauti. Walikuwa wanahubiri kwa bidii “habari njema juu ya Kristo” na kuonyesha upendo wao kwa Mungu, kwa Wakristo wenzao, na hata kwa wale wenye walikuwa hawajajua kweli. Wakristo hao waliendelea kutia nguvu upendo wao kwa Mungu. (Matendo 2:44-47; 5:42) Lakini, jambo la kuhuzunisha ni kwamba upendo wa Wakristo fulani wa kwanza-kwanza ulikuwa umepoa. Tunajua hilo namna gani?

3. Pengine ni mambo gani yalifanya upendo wa Wakristo fulani upoe?

 3 Yesu aliambia hivi Wakristo wa kwanza-kwanza wenye walikuwa wanaishi katika muji wa Efeso: ‘Mumeacha upendo muliokuwa nao mwanzoni.’ (Ufunuo 2:4) Pengine Wakristo wa muji wa Efeso walikuwa wanachochewa na watu wenye waliwazunguka wenye walitaka zaidi kujipendeza wao wenyewe. (Waefeso 2:2, 3) Muji wa Efeso ulikuwa tajiri na watu wa muji huo walihangaikia zaidi kuwa na maisha ya muzuri na ya raha kuliko jambo lingine lolote. Watu wengi katika Efeso walikuwa na mwenendo muchafu sana na hawakukuwa wanaheshimia sheria za Mungu. Walihangaikia mambo ya kujifurahisha kuliko kuonyesha upendo wa kweli kwa Mungu na kwa wengine.

4. (a) Namna gani upendo umepoa katika siku zetu? (b) Ni katika sehemu gani tatu tunapaswa kufanya upendo wetu uendelee kuwa nguvu?

4 Maneno ya Yesu juu ya kupoa kwa upendo yanahusu pia wakati wetu. Leo, upendo wa watu kwa Mungu unaendelea kupunguka. Kuliko kutumainia Mungu amalize magumu yote katika ulimwengu huu, mamilioni ya watu wanatumainia mashirika ya wanadamu. Upendo wao unaendelea kupoa. Hata upendo wa watumishi wa Yehova unaweza kupoa, kama vile hali ilikuwa katika kutaniko la zamani la Efeso. Tuzungumuzie basi sehemu tatu ambamo tunapaswa kufanya upendo wetu uendelee kuwa nguvu: (1) upendo kwa Yehova, (2) kupenda kweli ya Biblia, na (3) kupenda ndugu na dada zetu.

UPENDO KWA YEHOVA

5. Sababu gani tunapaswa kumupenda Mungu?

5 Ni nani tunapaswa kupenda zaidi? Yesu alisema hivi: “‘Lazima umupende Yehova Mungu wako kwa moyo wako wote na kwa nafsi yako yote na kwa akili yako yote.’ Hii ndiyo amri iliyo kubwa na ya kwanza.” (Mathayo 22:37, 38) Upendo wetu kwa Mungu unatusaidia kutii amri zake, kuvumilia, na kuchukia mambo ya mubaya. (Soma Zaburi 97:10.) Lakini Shetani na ulimwengu wake wanajaribu kuregeza na kuharibu upendo wetu kwa Mungu.

6. Ni nini inatokea wakati watu wanapoteza upendo wao kwa Mungu?

6 Watu wa ulimwengu wako na mawazo ya mubaya juu ya upendo. Kuliko kumupenda Mungu, watu wengi ‘wanajipenda wenyewe.’ (2 Timotheo 3:2) Wanakaza akili yao juu ya ‘tamaa ya mwili na tamaa ya macho na mutu kujionyesha mali yake maishani.’ (1 Yohana 2:16) Mutume Paulo alituonya juu ya mambo yenye yanaweza kutokea ikiwa tunajipendeza kwanza. Alisema hivi: ‘Kukaza akili juu ya mwili kunamaanisha kifo.’ Sababu gani? Kwa sababu watu wenye kufanya hivyo wanakuwa kabisa maadui wa Mungu. (Waroma 8:6, 7) Watu wenye wanatumia sana maisha yao ili kutafuta feza ao kutimiza tamaa zao za ngono wanafikia kuvunjika moyo sana.​—1 Wakorintho 6:18; 1 Timotheo 6:9, 10.

7. Wakristo wanaweza kuchochewa na mawazo gani yenye kuwa hatari leo?

7 Watu wengi wenye hawaamini Mungu, wale wenye kuamini kama mambo ya Mungu hayawezi kujulikana na wale wenye kuamini mageuzi, wanajaribu kuchochea wengine wasimupende Mungu ao hata wasiamini kama kuna Mungu. Wanafanya ionekane kuwa mutu mwenye kuwa pumbafu ao mwenye hakusoma ndiye anaweza tu kuamini kama kuko Muumbaji. Zaidi ya hilo, watu wengi wanaheshimia sana wanasayansi kuliko kumuheshimia Muumbaji. (Waroma 1:25) Hata Wakristo wanaweza kuchochewa na mawazo hayo. Urafiki wetu pamoja na Yehova unaweza kuwa zaifu, na upendo wetu unaweza kupoa.​—Waebrania 3:12.

8. (a) Ni hali gani zenye zinaweza kuvunja moyo watumishi wa Yehova? (b) Namna gani Zaburi ya 136 inatutia moyo?

8 Kwa sababu tunaishi katika ulimwengu muovu  wa Shetani, kuko mambo mengi yenye yanaweza kutuvunja moyo wakati fulani. (1 Yohana 5:19) Lakini ikiwa tunaacha mambo hayo yatuvunje moyo sana, imani yetu inaweza kuwa zaifu na upendo wetu kwa Mungu unaweza kupoa. Kwa mufano, tunaweza kupambana na magumu kwa sababu ya kuzeeka, magonjwa ao kuwa na magumu ya kupata feza. Ao tunaweza kuwa na huzuni kwa sababu hatuwezi kufanya mambo fulani muzuri kama vile tungependa kufanya. Tunaweza kuvunjika moyo kwa sababu mambo fulani katika maisha hayakufanyika namna tulikuwa tunatumainia. Hata kama tunapambana na magumu gani, hatupaswe kufikiri hata kidogo kuwa Yehova ametuacha. Fikiria maneno haya yenye kutia moyo yenye kupatikana katika Zaburi 136:23: ‘Alitukumbuka tulipokuwa katika hali ya chini: Kwa maana fazili zake zenye upendo [upendo wake mushikamanifu] ni za mupaka wakati usio na kipimo.’ Tunaweza kuwa hakika kuwa Yehova anasikiliza ‘sauti zetu za kusihi [kumulilia]’ na atajibia.​—Zaburi 116:1; 136:24-26.

9. Ni nini ilimusaidia Paulo aendelee kutia nguvu upendo wake kwa Mungu?

9 Mutume Paulo alikuwa mutumishi wa Mungu na alifikiri sana juu ya namna Yehova alimutegemeza, na kumusaidia aendelee kuwa mwenye nguvu. Aliandika hivi: ‘Yehova ni musaidizi wangu; sitaogopa. Mwanadamu anaweza kunitendea nini?’ (Waebrania 13:6) Kwa sababu mutume Paulo alimutumainia Yehova, hilo lilimusaidia apiganishe magumu mbalimbali katika maisha. Wakati Paulo alikuwa na magumu, hakuacha kumutumainia Yehova. Hata wakati alikuwa katika gereza, alisaidia Wakristo wenzake kwa kuandikia makutaniko barua zenye kutia moyo. (Waefeso 4:1; Wafilipi 1:7; Filemoni 1) Hata kama Paulo alipambana na magumu mbalimbali, aliendelea kutia nguvu upendo wake kwa Yehova. Alitegemea ‘Mungu wa faraja yote, ambaye anatufariji katika ziki [taabu] yetu yote.’ (2 Wakorintho 1:3, 4) Namna gani tunaweza kumuiga Paulo?

Onyesha upendo kwa Yehova (Picha hii inapatana na fungu la 10)

10. Namna gani tunaweza kuendelea kutia nguvu upendo wetu kwa Yehova?

10 Paulo alieleza njia moja yenye inaweza kutusaidia kuendelea kutia nguvu upendo wetu kwa Mungu. Aliandika hivi: ‘Musali bila kuacha.’ Kisha aliandika pia hivi: ‘Mudumu katika sala.’ (1 Wathesalonike 5:17; Waroma 12:12) Sababu gani sala inafanya tumukaribie Mungu zaidi? Wakati tunasali, tunazungumuza na Yehova. Hilo linatusaidia tukuwe na urafiki wa muzuri pamoja naye. (Zaburi 86:3) Wakati tunaambia Baba yetu wa mbinguni mawazo yetu yote na mambo yote yenye kuwa katika moyo wetu, tunamukaribia zaidi. (Zaburi 65:2) Pia, upendo wetu kwa Yehova unakomaa wakati tunaona namna anajibia sala zetu. Tuko hakika kama ‘Yehova yuko karibu na wote wanaomuitia.’ (Zaburi 145:18) Kwa sababu tuko hakika kama Yehova anatupenda na kututegemeza, hilo litatusaidia kupiganisha magumu yoyote yenye tunaweza kupata leo na wakati unaokuja.

KUPENDA KWELI YA BIBLIA

11, 12. Namna gani tunaweza kukomalisha upendo wetu juu ya kweli ya Biblia?

11 Sisi Wakristo, tunapenda kweli. Tunapata kweli katika Neno la Mungu. Yesu aliambia Baba yake hivi: “Neno lako ni kweli.” (Yohana 17:17) Ili tupende kweli ya Biblia, tunapaswa kwanza kujua mambo yenye kuwa katika Biblia. (Wakolosai 1:10) Lakini kuko mambo mengine ya kufanya. Ona namna muandikaji wa Zaburi ya 119 anatusaidia kuelewa mambo yenye tunapaswa kufanya. (Soma Zaburi 119:97-100.) Katika muchana wote, tunapaswa kutafakari, ao kufikiri sana juu ya mambo yenye tunasoma katika Biblia. Wakati tunaendelea kufikiri sana juu ya namna tunapata faida wakati tunatumia kweli ya Biblia katika maisha yetu, tutaipenda zaidi na zaidi.

 12 Muandikaji huyo wa zaburi alisema pia hivi: “Jinsi maneno yako yamekuwa laini katika kaakaa langu, kuliko asali kinywani mwangu!” (Zaburi 119:103) Vitabu vyenye kutegemea Biblia vyenye tengenezo la Mungu linatupatia viko kama chakula kitamu sana. Wakati tunakula chakula chenye tunafurahia, tunapenda kutumia wakati mwingi. Vilevile, tunapenda kutumia wakati mwingi ili kujifunza. Ikiwa tunafanya hivyo, tutafurahia kabisa “maneno yenye kupendeza” ya kweli, na itakuwa mwepesi kwetu kukumbuka mambo yenye tumesoma na kuyatumia ili kusaidia wengine.​—Mhubiri 12:10.

13. Ni nini ilimusaidia Yeremia apende maneno ya Mungu? Hilo lilikuwa na matokeo gani juu yake?

13 Nabii Yeremia alipenda maneno ya Mungu. Alisema hivi: ‘Maneno yako yalipatikana, nami nikayakula; na neno lako likakuwa kwangu furaha na kushangilia kwa moyo wangu; kwa maana jina lako limeitwa juu yangu, Ee Yehova Mungu wa majeshi.’ (Yeremia 15:16) Yeremia alifikiri sana juu ya maneno ya Mungu yenye kuwa ya maana sana, na aliyapenda. Alifurahia kumutumikia Yehova na kutangaza ujumbe wake. Ikiwa tunapenda kweli ya Biblia, tutaelewa kama tuko na pendeleo la pekee la kuwa Mashahidi wa Yehova na kuhubiri juu ya Ufalme katika siku hizi za mwisho.

Onyesha kuwa unapenda kweli ya Biblia (Picha hii inapatana na fungu la 14)

14. Ni jambo gani lingine lenye tunaweza kufanya ili tukomalishe upendo wetu juu ya kweli ya Biblia?

14 Ni jambo gani lingine lenye litatusaidia tukomalishe upendo wetu juu ya kweli ya Biblia? Tunapaswa kuenda kwenye mikutano yetu kwa ukawaida, kwa sababu tunafundishwa na Yehova huko. Funzo la kila juma la Biblia kupitia Munara wa Mulinzi ni njia moja kati ya njia zenye anatumia ili kutufundisha. Ikiwa tunapenda kupata faida kabisa kwenye mukutano huo, tunapaswa kujitayarisha mbele ya wakati. Kwa mufano, tunaweza kusoma kila andiko la Biblia lenye kutajwa. Leo, watu wanaweza kusoma kwa urahisi ao kuchukua kwenye Internete gazeti Munara wa Mulinzi la kielektroniki kwa sababu gazeti hilo linapatikana katika luga nyingi kwenye adresi yetu ya Internete jw.org na kwenye programu ya JW Library. Aina fulani ya vichapo vya kielektroniki zinatusaidia kupata haraka maandiko yenye kutajwa. Hata hivyo, wakati tunajifunza kila habari, tunapaswa kusoma maandiko kwa uangalifu na kufikiri sana juu ya maandiko  hayo. Ikiwa tunafanya hivyo upendo wetu juu ya kweli ya Biblia utakomaa.​—Soma Zaburi 1:2.

KUPENDA NDUGU NA DADA ZETU

15, 16. (a) Kulingana na Yohana 13:34, 35, ni amri gani yenye Yesu alitupatia? (b) Namna gani kumupenda Mungu na Biblia kunapatana na kupenda ndugu na dada zetu?

15 Katika usiku wake wa mwisho hapa duniani, Yesu aliambia hivi wanafunzi wake: ‘Ninawapa ninyi amri mupya, kwamba mupendane; kama vile ambavyo nimewapenda ninyi, ninyi nanyi mupendane vivyo hivyo. Kwa jambo hili wote watajua kwamba ninyi ni wanafunzi wangu, mukikuwa na upendo kati yenu wenyewe.’—Yohana 13:34, 35.

16 Kupenda ndugu na dada zetu kunapatana na kumupenda Yehova. Ikiwa hatumupendi Mungu, hatuwezi kuwapenda ndugu na dada zetu. Na ikiwa hatuwapendi ndugu na dada zetu, hatuwezi kumupenda Mungu. Mutume Yohana aliandika hivi: ‘Yeye ambaye hamupendi ndugu yake, ambaye amemuona, hawezi kuwa anamupenda Mungu, ambaye hajamuona.’ (1 Yohana 4:20) Upendo wetu kwa Yehova na kwa ndugu na dada zetu unapatana pia na kupenda Biblia. Sababu gani? Kwa sababu ikiwa tunapenda mambo yenye tunajifunza katika Biblia, tutakuwa tayari kutii amri zenye kupatikana humo zenye kutuomba tumupende Mungu na ndugu na dada zetu.​—1 Petro 1:22; 1 Yohana 4:21.

Onyesha upendo kwa ndugu na dada (Picha hii inapatana na fungu la 17)

17. Tunaweza kuonyesha upendo katika njia gani mbalimbali?

17 Soma 1 Wathesalonike 4:9, 10. Ni katika njia gani zenye kufaa tunaweza kuonyesha upendo wale wenye kuwa katika kutaniko letu? Ndugu ao dada mwenye kuzeeka anaweza kuwa na lazima ya musaada wa kuenda kwenye mikutano ya kutaniko na kurudia nyumbani. Mujane anaweza kuwa na lazima ya kusaidiwa kutengeneza kitu fulani katika nyumba yake. (Yakobo 1:27) Ndugu na dada wenye kuvunjika moyo, wenye kushuka moyo, ao wenye kupambana na magumu mengine wako na lazima tuwahangaikie, tuwatie moyo, na kuwafariji. (Methali 12:25; Wakolosai 4:11) Tunaonyesha kuwa tunapenda “wale ambao katika imani ni jamaa zetu” kwa maneno na matendo yetu.​—Wagalatia 6:10.

18. Ni nini itatusaidia kumaliza hali za kukosa kuelewana na ndugu na dada zetu?

18 Biblia ilisema kuwa katika “siku za mwisho” za ulimwengu huu muovu, watu wengi watajipenda wao wenyewe na watakuwa wenye pupa. (2 Timotheo 3:1, 2) Sisi Wakristo, tunapaswa kujikaza sana ili kuendelea kukomalisha upendo wetu kwa Yehova, Neno lake na kwa ndugu na dada zetu. Kwa sababu hatukamilike, wakati fulani tunaweza kukosa kuelewana na ndugu na dada zetu kwa sababu ya mambo madogo-madogo. Lakini kwa sababu tunapendana, tutajikaza kumaliza haraka na kwa upole hali yoyote ya kukosa kuelewana. (Waefeso 4:32; Wakolosai 3:14) Tusiache basi upendo wetu upoe hata kidogo! Lakini, tuendelee kuwa na upendo mwingi kwa Yehova, Neno lake, na kwa ndugu na dada zetu.