Mungu wa faraja yote . . . Anatufariji katika ziki yetu yote.’​—2 KOR. 1:3, 4.

NYIMBO: 38, 56

1, 2. Namna gani Yehova anatufariji katika ziki yetu, na Neno lake linatuhakikishia jambo gani?

NDUGU mumoja kijana mwenye hajaoa mwenye tunaweza kuita Eduardo, alizungumuzia mahangaiko yake pamoja na Stephen, muzee mumoja wa kutaniko mwenye alikuwa amefanya miaka mingi katika ndoa. Eduardo alikuwa anafikiria maneno haya yenye kuwa katika 1 Wakorintho 7:28: ‘Wale [wanaofunga ndoa] watakuwa na ziki katika mwili wao.’ Aliuliza hivi: “‘Ziki’ hiyo ni nini, na namna gani ninaweza kupambana nayo ikiwa ninaoa?” Mbele ya kujibia ulizo hilo, Stephen alimuomba Eduardo afikirie jambo lingine lenye mutume Paulo aliandika. Alisema kuwa Yehova ni ‘Mungu wa faraja yote, ambaye anatufariji katika ziki yetu yote.’​—2 Kor. 1:3, 4.

2 Kwa kweli, Yehova ni Baba mwenye upendo, na anatufariji wakati tunapatwa na magumu. Pengine umekwisha kuwa na magumu na Mungu alikutegemeza na kukutolea muongozo, mara nyingi kupitia Neno lake. Tunaweza kuwa hakika kuwa anapenda tukuwe na maisha ya muzuri, kama vile alipenda watumishi wake wa zamani  wakuwe na maisha ya muzuri.​—Soma Yeremia 29:11, 12.

3. Tutazungumuzia maulizo gani?

3 Kwa kweli, inaweza kuwa mwepesi kuvumilia magumu fulani ikiwa tunajua ni nini inaleta magumu ao ziki hiyo. Ni hivyo pia kuhusu magumu yenye kutokea katika maisha ya ndoa ao ya familia. Paulo alizungumuzia ‘ziki katika mwili;’ kwa hiyo, ni mambo gani fulani yenye yanaweza kuleta ziki hiyo? Ni mifano gani ya zamani na ya siku zetu yenye inaweza kutusaidia kupata faraja yenye tuko nayo lazima? Kujua mifano hiyo kunaweza kutusaidia kuvumilia.

MAGUMU​—‘ZIKI KATIKA MWILI’

4, 5. Ni mambo gani fulani yenye kuleta ‘ziki katika mwili’?

4 Mwanzo-mwanzo mwa historia ya wanadamu, Mungu alisema hivi: ‘Mwanaume atamuacha baba yake na mama yake naye atashikamana na muke wake nao watakuwa mwili mumoja.’ (Mwa. 2:24) Yehova alisema maneno hayo wakati alianzisha ndoa ya kwanza ya mwanadamu. Kwa sababu sisi wote hatukamilike, wakati mwanaume na mwanamuke wanaoana na kuanzisha familia, wanaweza kupata magumu katika ndoa yao. (Rom. 3:23) Kwa kawaida, mwanamuke mwenye alikuwa anajitiisha kwa wazazi wake, anapaswa sasa kujitiisha kwa bwana yake. Mungu anamupatia bwana daraka la kuwa kichwa cha bibi yake. (1 Kor. 11:3) Bibi na bwana fulani wenye wamefunga ndoa hivi karibuni, wanaona kuwa ni vigumu kufanya hivyo. Neno la Mungu linaonyesha kama bibi anapaswa kukubali kuwa ataongozwa na bwana yake kuliko kuongozwa na wazazi wake. Inaweza kuwa vigumu kuwa na uhusiano muzuri pamoja na watu wa familia ya bibi ao bwana na hilo linaweza kuleta magumu kwa wale wenye wameoana hivi karibuni.

5 Mahangaiko mengine yanatokea wakati bibi anaambia bwana yake hivi: “Niko na mimba.” Kwa kawaida, bibi na bwana wanafurahi kwa sababu watapata mutoto, lakini wanakuwa na mahangaiko pia juu ya mambo ya matunzo yenye yanaweza kutokea wakati wa mimba ao kisha mutoto kuzaliwa. Na watakuwa na lazima ya feza nyingi zaidi kwa ajili ya wakati huo na wakati wenye kuja. Pia inaomba kufanya mabadiliko zaidi wakati mutoto anazaliwa. Mama anaweza kuanza kutumia wakati mwingi ili kuhangaikia mutoto. Mara nyingi, bwana anajisikia kuwa ameachwa kwa sababu bibi yake anatumia wakati mwingi ili kuhangaikia mutoto wao. Kwa upande mwingine, baba anakuwa na madaraka mengine ya kutimiza. Madaraka yake yanaongezeka kwa sababu katika familia kumeongezeka mutu mwengine mwenye anapaswa kuhangaikia na kutimizia mahitaji yake.

6-8. Namna gani kukosa kuzaa watoto kunaweza kuleta huzuni?

6 Kuko magumu mengine yenye bibi na bwana fulani wanapata. Wanapenda sana kuzaa watoto, lakini hawazae. Wakati bibi hapate mimba, anaweza kuhuzunika sana. Kwa kweli, ndoa ao kuzaa watoto hakumalize mahangaiko, lakini wakati tumaini la kuzaa watoto halitimie, hilo linaweza kuleta ‘ziki katika mwili.’ (Met. 13:12) Wakati wa zamani, mutu mwenye hakukuwa na uwezo wa kuzaa alikuwa anazarauliwa. Raheli, bibi ya Yakobo, alionyesha huzuni yake wakati aliona dada yake anakuwa na watoto. (Mwa. 30:1, 2) Wamisionere wenye kutumikia katika inchi ambamo watu wako na desturi ya kuwa na watoto wengi, mara nyingi watu wanawauliza sababu gani hawana watoto. Hata kisha kuwafasiria muzuri na kwa hekima, wanaweza kuwaambia hivi: “Tutasali kwa ajili yenu!”

7 Ao fikiria mufano wa dada mumoja katika Uingereza mwenye alipenda sana kuwa na  mutoto lakini hakuzaa. Kisha, maisha yake yalibadilika. Alisema kuwa alihuzunika sana kwa sababu alitambua kuwa hangeweza kuzaa katika ulimwengu huu. Yeye na bwana yake waliamua kuchukua mutoto fulani na kumufanya kuwa mutoto wao. Hata hivyo, alisema hivi: “Lakini niliendelea kuwa na huzuni. Nilijua kama kufanya mutoto fulani kuwa wangu haingekuwa sawa na kuzaa mutoto wangu mimi mwenyewe.”

8 Biblia inasema kama mwanamuke Mukristo “atabaki salama kupitia kuzaa watoto.” (1 Tim. 2:15) Lakini hilo halimaanishe kuwa ikiwa mutu anazaa ao anakuwa na watoto atapata uzima wa milele. Linamaanisha kuwa wakati mwanamuke ana watoto wa kuhangaikia, na mambo mengine ya kufanya katika nyumba yake, hilo linamusaidia asikuwe na tabia ya kusema-sema mubaya juu ya wengine ao kujitia katika mambo ya wengine. (1 Tim. 5:13) Lakini, anaweza pia kupata magumu yenye kutokea katika maisha ya ndoa na ya familia.

Namna gani mutu anaweza kuvumilia kifo cha mupendwa wake? (Picha hizi zinapatana na fungu la 9, 12)

9. Namna gani kifo cha bibi ao bwana ni tatizo la pekee?

9 Wakati tunafikiria magumu yenye kutokea katika ndoa na katika familia, kuko tatizo moja lenye pengine hatuwezi kuwazia. Ni kifo cha mupendwa wetu. Tatizo la pekee lenye watu wengi wamepata ni kifo cha bibi ao bwana yao mupendwa. Hilo ni tatizo lenye pengine bibi ao bwana hakuwazia kuwa atapata katika ulimwengu huu. Wakristo wanaamini kabisa ahadi ya Yesu ya kufufua watu wakati unaokuja. (Yoh. 5:28, 29) Namna gani tumaini hilo linasaidia bibi ao bwana mwenye amebakia peke yake? Tumaini hilo linamufariji sana. Hiyo ni njia ingine yenye Baba yetu mwenye upendo anatumia ili kufariji na kutegemeza kupitia Neno lake wale wenye kupatwa na magumu. Tuchunguze sasa namna watumishi fulani wa Mungu walijisikia na namna Yehova aliwafariji.

TUNAFARIJIWA WAKATI TUNAPATWA NA MAGUMU

10. Hana alifanya nini ili apate kitulizo? (Ona picha kwenye mwanzo wa habari hii.)

10 Hana, bibi mupendwa wa Elkana, alipata magumu fulani. Hakukuwa anazaa watoto, lakini Penina, bibi mwengine wa Elkana alikuwa anazaa. (Soma 1 Samweli 1:4-7.) Penina alimuzarau Hana “mwaka baada ya mwaka.” Hilo lilimuletea Hana uchungu na huzuni nyingi. Alitafuta kitulizo kwa kumuelezea Yehova tatizo lake katika sala. Kwa hiyo, ‘alisali kwa muda murefu mbele za Yehova.’ Alikuwa na tumaini kuwa Yehova atajibia sala yake? Alipaswa kuwa na tumaini hilo. Na kuanzia hapo, “uso wake haukuonyesha tena kuhangaika.” (1 Sam. 1:12, 17, 18) Alikuwa na tumaini kwamba Yehova angemupatia uwezo wa kuzaa ao kumusaidia katika njia ingine.

11. Namna gani sala inaweza kutufariji?

11 Magumu na matatizo yataendelea kutokea kwa sababu hatukamilike na tunaishi katika ulimwengu huu wenye kuongozwa na Shetani. (1 Yoh. 5:19) Lakini ni muzuri kabisa kujua kama Yehova ni “Mungu wa faraja yote”! Sala ni njia moja yenye inaweza kutusaidia kupambana na magumu na matatizo yetu. Hana alimuambia Yehova mambo yote yenye yalikuwa katika moyo wake. Vilevile, wakati tuko na magumu hatupaswe tu kumuonyesha Yehova namna tunajisikia. Tunapaswa kumulilia, ni kusema, kumuambia namna tunajisikia kwa kusali sana kutoka moyoni.​—Flp. 4:6, 7.

12. Ni nini ilisaidia mujane Ana akuwe na furaha?

12 Hata kama tunajisikia kuwa wenye huzuni sana katika maisha yetu, iwe kwa sababu ya kukosa kuzaa watoto ao kwa sababu ya kifo cha mupendwa wetu, tunaweza kupata faraja. Fikiria nabii Ana mwenye aliishi katika siku za Yesu. Kisha Ana kufanya miaka saba tu katika ndoa, bwana yake alikufa. Biblia haiseme kama  alikuwa na watoto. Ana alikuwa angali anafanya nini hata kama alikuwa na miaka 84? Luka 2:37 inasema hivi: ‘Alikuwa hakose kamwe kuwa katika hekalu, akitoa utumishi mutakatifu usiku na muchana kwa kufunga na dua.’ Kwa kweli, Ana alipata faraja na furaha kwa sababu aliendelea kumuabudu Yehova.

13. Namna gani marafiki wa kweli wanaweza kutufariji hata wakati watu wa familia yetu wanashindwa kufanya hivyo? Toa mufano.

13 Wakati tunazoea kuwa pamoja na ndugu na dada zetu, tunapata marafiki wa kweli. (Met. 18:24) Paula anakumbuka namna alihuzunika sana kwa sababu wakati alikuwa na miaka tano mama yake aliacha kweli. Haikukuwa mwepesi kuvumilia magumu hayo. Lakini, dada mumoja painia wa kutaniko lao mwenye kuitwa Ann, alimutia moyo sana kwa kuhangaikia sana hali yake ya kiroho. Paula anaeleza hivi: “Hata kama Ann hakukuwa mutu wa familia yangu, niliona kuwa alinisaidia sana kwa sababu alinihangaikia kwa upendo. Hilo lilinisaidia niendelee kumutumikia Yehova.” Paula anaendelea kumutumikia Yehova kwa uaminifu. Pia, ni mwenye furaha sana kwa sababu mama yake amemurudilia Yehova, na wote wawili wanamutumikia pamoja katika kutaniko. Ann pia ni mwenye furaha kwa sababu amekuwa kama mama wa kiroho wa Paula.

14. Wale wenye kufariji wengine wanaweza kupata baraka gani?

14 Kwa kweli, wakati tunaonyesha wengine upendo, mara nyingi tunasahau magumu yetu wenyewe. Dada wenye wameolewa ao wenye  hawajaolewa wanajua kwamba wanapata furaha kubwa wakati wanatangazia wengine habari njema; wanafanya kazi pamoja na Mungu. Kusudi lao ni kumuletea Yehova utukufu kwa kufanya mapenzi yake. Wamoja wanaona hata kuwa kazi ya kuhubiri ni dawa. Kwa kweli, sisi wote tunasaidia kuwe umoja katika kutaniko wakati tunahangaikia wengine, wale wenye kuwa katika eneo letu na wale wenye kuwa katika kutaniko. (Flp. 2:4) Mutume Paulo alikuwa mufano muzuri. Alikuwa kama “mama mwenye kunyonyesha” kwa Wakristo wa kutaniko la Thesalonike; alikuwa pia kama baba yao wa kiroho.​—Soma 1 Wathesalonike 2:7, 11, 12.

FARAJA KATIKA FAMILIA

15. Ni nani wenye kuwa na daraka la kufundisha watoto kweli?

15 Tunapaswa kujikaza sana ili kufariji na kusaidia familia mbalimbali katika kutaniko. Wakati fulani, wapya wanaomba wahubiri wenye kukomaa kiroho wawasaidie kufundisha watoto wao kweli, wanawaomba hata wajifunze Biblia pamoja na vijana wao. Maandiko yanaonyesha kama wazazi ndio wako na daraka la kufundisha na kuzoeza watoto wao. (Met. 23:22; Efe. 6:1-4) Katika hali fulani, wengine wanaweza kusaidia, na musaada wao unaonwa kuwa wa maana sana. Lakini, hilo halichukue nafasi ya daraka la wazazi. Ni jambo la lazima wakuwe na mazungumuzo kwa ukawaida katika familia.

16. Tunapaswa kukumbuka nini wakati tunasaidia watoto?

16 Ikiwa muzazi anaamua kumuomba mutu fulani ajifunze pamoja na watoto wake, ule mwenye kufanya hivyo anapaswa kuepuka kuchukua daraka la wazazi. Wakati fulani Shahidi mumoja anaombwa ajifunze na watoto wa wazazi wenye hawapendezwe na kweli. Lakini, Shahidi huyo anapaswa kukumbuka kuwa hata kama anasaidia watoto hao wamujue Yehova, hilo halimaanishe kuwa amekuwa muzazi wao. Na ikiwa anaongoza funzo kama hilo, itakuwa jambo la hekima kufanya hivyo nyumbani kwao kwenye wazazi wake wanapatikana ao pamoja na Mukristo mwengine mwenye kukomaa, ao kwenye nafasi ingine yenye kufaa kwenye watu wanapatikana. Kwa hiyo, hakuna mutu mwenye atakuwa na mawazo ya mubaya juu ya jambo lenye wako wanafanya. Na pengine, kisha wakati fulani, wazazi wataweza kutimiza daraka lao lenye Mungu amewapatia, ni kusema, kusaidia watoto wao wakuwe marafiki wa Yehova.

17. Namna gani watoto wanaweza kutolea wengine faraja?

17 Vijana wenye wanajifunza kumupenda Mungu na kufuata mashauri yake wanaweza kufariji watu wengine wa familia. Wanaweza kufanya hivyo kwa kuonyesha wazazi wao heshima na kwa kuwatolea musaada mbalimbali wa kimwili. Jambo la maana zaidi, wanaweza pia kutoa musaada wa kiroho. Mbele ya Garika, Lameki muzao wa Sethi alikuwa anamuabudu Yehova. Baba huyo wa familia alisema hivi juu ya mutoto wake Noa: “Atatuletea faraja katika kazi yetu na katika maumivu ya mikono yetu yanayoletwa na udongo ambao Yehova amelaani.” Unabii huo ulitimia wakati laana juu ya udongo iliondolewa. (Mwa. 5:29; 8:21) Leo, watoto wenye wanabakia waaminifu kwa Yehova wanaweza pia kufariji watu wa familia yao kwa kuwasaidia wavumilie magumu yenye wako nayo sasa na waokoke jambo fulani lenye kuwa kubwa kuliko Garika.

18. Ni nini inaweza kutusaidia kuvumilia magumu ao matatizo yoyote yenye tunapata?

18 Kusali, kufikiri sana juu ya mifano yenye kuwa katika Biblia, na kujiunga na watumishi wa Yehova, kunasaidia mamilioni ya watu wapate faraja wakati wa magumu. (Soma Zaburi 145:18, 19.) Kujua kama Yehova anatoa faraja yenye kuendelea kutatusaidia kabisa kuvumilia magumu yoyote yenye tunapata leo ao yenye tunaweza kupata wakati unaokuja.