Ona video zinazopatikana

Ona habari zilizo ndani

 SEHEMU YA KUULIZA MAULIZO | ANTONIO DELLA GATTA

Sababu Iliyomufanya Padri Aache Kanisa Lake

Sababu Iliyomufanya Padri Aache Kanisa Lake

KISHA kusomea katika muji wa Roma kwa miaka kenda, Antonio Della Gatta aliwekwa kuwa padri katika mwaka wa 1969. Kisha, alitumika kama musimamizi, ao mukubwa wa seminere karibu na muji wa Naples, katika inchi ya Italia. Alipokuwa huko, kisha kujifunza na kufikiri sana, alifikia kuona kuwa mafundisho ya dini ya Katoliki hayategemee Biblia. Alizungumuza na Amuka! juu ya bidii aliyofanya ili kumutafuta Mungu.

Tafazali, tuambie kuhusu maisha yako wakati ulikuwa mutoto.

Nilizaliwa katika inchi ya Italia mwaka wa 1943. Nilikomaa pamoja na ndugu na dada zangu katika kijiji kidogo kwenye baba yangu alikuwa mulimaji na seremala. Wazazi wetu walitupatia mazoezi ili tukuwe Wakatoliki wazuri.

Sababu gani ulifurahia kuwa padri?

Nilipokuwa kijana mudogo, nilipenda kusikiliza mapadri katika kanisa. Nilipendezwa sana na sauti zao na desturi zenye kuvutia za dini. Kwa hiyo, nilitaka kabisa kuwa padri. Wakati nilikuwa na miaka 13, mama yangu alinipeleka kwenye masomo ya bweni (internat) iliyotayarisha vijana wanaume kwa ajili ya wakati unaokuja, ilikuwa na mafunzo ya hali ya juu kwa ajili ya upadri.

Ulijifunza pia Biblia wakati ulikuwa unasoma huko?

Hapana kabisa. Wakati nilikuwa na miaka 15, mumoja kati ya walimu wangu alinipatia kopi ya vitabu vyenye vinazungumuzia maisha na utumishi wa Yesu ao Vitabu vya Injili. Nilisoma vitabu hivyo mara nyingi. Wakati nilikuwa na miaka 18, nilienda Roma ili kusomea kwenye masomo ya juu ya kipapa, yaliyo chini ya mamlaka ya papa. Nilijifunza Kilatini, Kigiriki, historia, filozofia, saikolojia, na teolojia. Hata ikiwa tulirudilia-­rudilia maandiko ya Biblia na kusikia usomaji wa Biblia katika mafundisho ya Siku ya Yenga, hatukujifunza Biblia kabisa.

Ulifikia kuwa musimamizi wa seminere. Hilo liliomba pia kufundisha?

Kazi yangu ilikuwa zaidi sana ya usimamizi. Lakini nilifundisha masomo juu ya maamuzi ya Baraza la Pili la Vatikani.

Sababu gani ulianza kuwa na mashaka juu ya kanisa?

Mambo matatu yalinivuruga. Kanisa lilijiingiza katika mambo ya siasa. Mwenendo mubaya uliachiliwa kati ya viongozi wa dini na wafuasi wao. Na mafundisho fulani ya dini ya Katoliki hayakuonekana kuwa ya kweli. Kwa mufano, namna gani Mungu mwenye upendo anatesa watu milele kisha kifo? Tena, Mungu anataka kabisa turudilie-rudilie sala mara mamia kwa kutumia rozari (chapelet)? *

Ulifanya nini?

Nilisali ili kupata muongozo nikitokwa na machozi kwenye macho. Nilinunua pia kopi moja ya Biblia ya Wakatoliki inayoitwa Bible de Jérusalem, iliyokuwa inatoka tu kuchapishwa katika Kiitaliano, na nikaanza kuisoma. Kisha, Siku ya Yenga moja asubuhi nilipokuwa ninaweka kanzu zangu kisha Misa, wanaume wawili walikuja kwenye seminere. Waliniambia kuwa wao ni Mashahidi wa Yehova. Tulizungumuza kwa zaidi ya saa moja juu ya Biblia na mambo   inasema juu ya alama za kutambulisha dini ya kweli.

Ulikuwa na mawazo gani juu ya wageni hao?

Nilifurahia kusema kwao kwa usadikisho na namna walitaja maandiko kwa wepesi katika tafsiri ya Biblia ya Kikatoliki. Kisha hapo, Shahidi mwengine, anayeitwa Mario, alianza kunitembelea. Alikuwa muvumilivu na muaminifu, kila Siku ya Yenga asubuhi, kuwe mvua ao jua, aligonga kengele ya mulango wa seminere pa saa tatu kamili.

Mapadri wengine walifurahi kuona watu hao wanakutembelea?

Niliwaalika wajiunge katika mazungumuzo yetu, lakini hakuna mumoja kati yao aliyekamata funzo la Biblia kwa uzito. Lakini, mimi nilifurahia funzo hilo. Nilikuwa ninajifunza mambo mazuri, kama vile sababu gani Mungu anaacha mambo mabaya na mateso yaendelee, jambo lenye lilinivuruga kwa miaka mingi.

Wakubwa wako walijaribu kukushawishi uache kujifunza Biblia?

Katika mwaka wa 1975, nilitembelea Roma mara nyingi ili kueleza mawazo yangu. Wakubwa wangu walijaribu kubadilisha mawazo yangu, lakini hakuna mumoja kati yao aliyetumia Biblia. Mwishowe, tarehe 9 Mwezi wa 1, 1976, niliandikia Roma ili kuonyesha wazi kuwa ninaacha dini ya Katoliki. Siku mbili kisha hapo, nilitoka kwenye seminere na nikakamata treni ili kuenda kwa mara ya kwanza kwenye mukutano wa Mashahidi wa Yehova. Mukutano huo ulikuwa kwa kweli mukusanyiko uliokusanya makutaniko mengi. Kila jambo lilikuwa tofauti na mambo nilizoea! Kila Shahidi alikuwa na Biblia yake na alifuata ndani wakati wasemaji walikuwa wanazungumuzia habari mbalimbali.

Watu wa familia yako waliona namna gani mambo hayo yote?

Wengi kati yao walinipinga vikali. Lakini, nilisikia kuwa ndugu yangu mumoja alikuwa anajifunza na Mashahidi katika muji wa Lom­bardy, eneo la kaskazini mwa Italia. Nilienda kumuona, na Mashahidi wa huko walinisaidia kupata kazi na mahali pa kuishi. Kwenye mwisho wa mwaka huo, nilibatizwa na kuwa Shahidi wa Yehova.

Mwishowe, ninajisikia kweli kuwa karibu na Mungu

Kuna jambo unalohuzunikia?

Hakuna hata jambo moja! Mwishowe, ninajisikia kweli kuwa karibu na Mungu, kwa sababu mambo ninajua juu yake yanategemea Biblia, wala si filozofia ao desturi za kanisa. Na ninaweza kuwafundisha wengine kwa usadikisho na bila kuwadanganya.

^ fu. 13 Biblia inajibia waziwazi maulizo hayo na maulizo mengine mengi. Fungua kichwa MAFUNDISHO YA BIBLIA > MAJIBU YA MASWALI YA BIBLIA.