WATU wengi wanaweza kumuona kuwa mwenye sura ya kupendeza; wengine wanaweza kumuona kuwa wa kushangaza. Ana miguu mirefu myembamba, manyoya ya teketeke, na macho makubwa yenye kungaa. Mwili wake una urefu wa sentimetre 12 na nusu, na ana uzito wa gramu 114. Ni nani huyo? Ni munyama mudogo anayeitwa tarsier!

Basi tuchunguze kwa uangalifu sana kiumbe mumoja kati ya viumbe hao, ni kusema, tarsier wa Ufilipino. Macho, masikio, mikono, miguu yake, na mukia wake, vyote vinaonekana kuwa vikubwa sana vinapolinganishwa na mwili wake mudogo. Lakini, kuchunguza kwa uangalifu munyama huyo wa ajabu kunaonyesha kuwa aliumbwa kwa akili nyingi sana.

UWEZO WAKE WA KUSIKIA: Masikio ya tarsier yaliyo membamba kama karatasi yanaweza kujikunja, kujikunjua, na kugeuka ili kunasa sauti ya chini sana. Uwezo wake muzuri wa kusikia unamusaidia kuepuka maadui wake, kama vile paka wa pori, lakini pia unamusaidia kutambua nafasi mawindo yake yanapatikana. Kisha giza kuingia, masikio ya tarsier yanageuka ili kusikia sauti ya panzi, muchwa, mbawakawa, ndege, na vyura. Kisha kichwa chake chote kinaelekea huko na kuongoza macho yake makubwa kuelekea kile kitakachokuwa chakula chake.

NAMNA YAKE YA KUSHIKA: Mikono ya tarsier ilifanywa kwa njia inayomuwezesha abane kwenye matawi membamba. Sehemu za mwisho zenye kuvimba za vidole vyake zinamufanya aweze kushika kama vile sehemu ya gurudumu (pneu) inayogusa chini. Hata wakati analala, tarsier ana lazima ya kubana muti kwa nguvu. Sehemu zenye kuvimba kwenye sehemu ya ndani ya mukia wake zinamusaidia abakie katika hali hiyo mupaka wakati ataamuka.

 MACHO YAKE: Hakuna munyama mwengine mwenye kunyonyesha aliye na macho makubwa sana yanapolinganishwa na ukubwa wa mwili wake. Kwa kweli, jicho moja la tarsier ni kubwa sana kupita ubongo wake! Tarsier hawezi kugeuza macho katika tundu la macho; macho yake yanaangalia tu mbele bila kugeuka. Kuumbwa hivyo ni tatizo kwake? Hapana kabisa. Tarsier ana sehemu ingine ya mwili inayomusaidia sana, ni kusema, shingo yenye kugeuka kwa vyepesi inayomuwezesha kugeuza kichwa digrii 180 upande wowote.

WEPESI WAKE: Miguu mirefu ya tarsier inamuwezesha kuruka sehemu yenye urefu wa metre 6, urefu huo unazidi mara 40 urefu wake mwenyewe! Wakati anawinda, muwindaji huyo mudogo anaruka katika giza vidole vyake vikiwa vyenye kunyooka ili kubana bila kukosea kitu anachowinda.

Mara nyingi tarsiers wanakufa wanapokamatwa, kwanza ni kwa sababu wanapenda kula vidudu na pia kwa sababu hawapendi kukamatwa katika mikono. Hata hivyo, kiumbe huyo wa pekee anaendelea kuvutia watu wa Ufilipino. Karibu kila sehemu ya mwili wa munyama huyo mwenye kuvutia aliye na macho makubwa anayeishi katika pori ni yenye kushangaza.