Ona video zinazopatikana

Ona habari zilizo ndani

 SURA 14

Waliunga Mukono kwa Ushikamanifu Serikali ya Mungu Tu

Waliunga Mukono kwa Ushikamanifu Serikali ya Mungu Tu

WAZO KUBWA KATIKA SURA HII

Watu wa Mungu si sehemu ya ulimwengu, kwa sababu wao ni washikamanifu kwa Ufalme

1, 2. (a) Ni kanuni gani ambayo imekuwa ikiwaongoza wafuasi wa Yesu mupaka leo? (b) Maadui wetu wamefanya nini ili kujaribu kutuangamiza, lakini matokeo yamekuwa nini?

YESU anasimama mbele ya Pilato, ambaye ni muamuzi wa kipagani, lakini mwenye mamlaka sana juu ya taifa la Wayahudi. Wakati huo, Yesu anataja kanuni fulani ambayo imekuwa yenye kuwaongoza wafuasi Wake wa kweli mupaka siku zetu. Alisema hivi: ‘Ufalme wangu si sehemu ya ulimwengu huu. Kama ufalme wangu ungekuwa sehemu ya ulimwengu huu, watumishi wangu wangepigana ili nisitiwe katika mikono ya Wayahudi. Lakini, kama ilivyo, ufalme wangu hautoki katika chanzo hiki.’ (Yoh. 18:36) Ni kweli kwamba Pilato alimuuwisha Yesu, lakini ushindi huo ulikuwa wa muda mufupi tu, kwa sababu Yesu alifufuliwa. Watawala wenye nguvu wa Ufalme wa Roma walijaribu kuwaua wafuasi wa Kristo, lakini walishindwa kabisa. Wakristo walieneza ujumbe wa Ufalme kila mahali katika dunia yote ya wakati wao.​—Kol. 1:23.

2 Kisha Ufalme wa Mungu kuanza kutawala katika mwaka wa 1914, serikali zenye nguvu sana za kijeshi katika historia, zilijaribu kuangamiza watu wa Mungu. Lakini hakuna hata serikali moja ambayo ilifikia kutuangamiza. Watu wa vikundi mbalimbali vya siasa na wakubwa wa serikali (ao guvernema) nyingi walijaribu kutukaza ili tuwaunge mukono katika mapigano yao. Lakini, hawakuweza kutugawanya. Leo, raia wa Ufalme wa Mungu wanaishi karibu katika kila taifa duniani. Hata hivyo, sisi ni ndugu na dada wenye kuungana kabisa duniani pote, na hatujiingize hata kidogo katika mambo ya siasa (ao politike) ya ulimwengu. Umoja wetu ni ushuhuda ambao unaonyesha waziwazi kwamba Ufalme wa Mungu unatawala, na kwamba Mufalme Yesu Kristo anaendelea kuongoza, kusafisha, na kulinda raia wake. Acha tuone namna gani amefanya hivyo, na pia namna ametusaidia kupata ushindi mbalimbali wa kisheria kwa sababu sisi “si sehemu ya ulimwengu.” Jambo hilo litatia nguvu imani yetu.​—Yoh. 17:14.

Kutojiingiza Katika Vita Lilikuwa Jambo la Maana Sana

3, 4. (a) Ni mambo gani yalitendeka kisha kuzaliwa kwa Ufalme mbinguni? (b) Hapo mwanzo watu wa Mungu walielewa kabisa maana ya kutojiingiza katika mambo ya vita? Fasiria.

3 Kisha tu kuzaliwa kwa Ufalme, vita ilitokea mbinguni na Shetani akatupwa duniani. (Soma Ufunuo 12:7-10, 12.) Vita ilitokea pia duniani, na vita hiyo ilijaribu uaminifu wa watu wa Mungu. Hata ikiwa waliazimia kufuata mufano wa Yesu wa kutokuwa sehemu  ya ulimwengu, hapo mwanzo hawakuelewa kabisa maana ya kutojiingiza katika mambo yote ya siasa.

4 Kwa mufano, Buku la 6 la kitabu Aurore du Millénium, *ambacho kilitolewa katika mwaka wa 1904, kiliwashauria Wakristo waepuke kupigana vita. Lakini, kitabu hicho kilionyesha pia kwamba ikiwa Mukristo aliandikishwa katika jeshi, alipaswa kufanya nguvu ili apewe kazi ambayo haimuombe apigane vita. Ikiwa hilo haliwezekani na ikiwa alitumwa katika mapigano, alipaswa kufanya angalisho ili asiue mutu. Ndugu Herbert Senior, ambaye aliishi Uingereza wakati huo, na ambaye alibatizwa katika mwaka wa 1905, alisema hivi juu ya maagizo hayo: “Kulikuwa muvurugo sana katika akili za ndugu. Maagizo hayakuwa wazi. Ndugu hawakujua kabisa ikiwa mutu angeweza kukubali kazi ya askari lakini iwe tu kazi ambayo haimuombe apigane vita.”

5. Gazeti Munara wa Mulinzi la tarehe 1 Mwezi wa 9, 1915, lilianza kusaidia ndugu kuelewa vizuri jambo gani?

5 Lakini, gazeti Munara wa Mulinzi la tarehe 1 Mwezi wa 91915, lilianza kutusaidia kuelewa vizuri jambo hilo. Kuhusu mapendekezo ambayo yalitolewa katika kitabu Étude des Écritures, gazeti hilo lilisema hivi: “Tunajiuliza ikiwa kuingia katika jeshi hata kama hatutapigana katika vita haitakuwa kuvunja kanuni za Maandiko.” Lakini, itakuwa namna gani Mukristo akiambiwa kwamba atauawa, ikiwa anakataa kuvaa nguo ya askari ao anakataa kuingia katika jeshi? Gazeti hilo lilitoa wazo hili: “Kuna ubaya gani kupigwa risasi kwa sababu ya kubaki washikamanifu kwa Mukubwa wa Amani na kwa sababu tunatii agizo Lake, kuliko kupigwa risasi kwa sababu ya kutumikia na kuunga mukono wafalme wa ulimwengu huu, na hivi tuonekane kuwa tunakosa kutii mafundisho ya Mufalme wetu wa Mbinguni? Kati ya vifo hivyo viwili, sisi tutapendelea kifo cha kwanza, ni kusema, kukubali kufa kwa sababu ya ushikamanifu wetu kwa Mufalme wetu wa Mbinguni.” Ijapokuwa usemi huo ulikuwa wenye nguvu, habari ya gazeti hilo ilimalizia kwa kusema hivi: “Hatulazimishe mutu yeyote kufanya hivyo. Ni pendekezo tu.”

6. Mufano wa Ndugu Herbert Senior unatufundisha nini?

6 Ndugu fulani walielewa kwamba kuingia katika jeshi ni vibaya, na walikuwa tayari kupambana na kila jambo ambalo lingetokea. Ndugu Herbert Senior, ambaye alitajwa hapo juu alikuwa mumoja wao. Alisema hivi: “Kwa maoni yangu, hakukuwa tofauti kati ya kupakua masasi kutoka katika mashua [kazi ambayo haifanye mutu kupigana katika vita] na kutia masasi katika bunduki ili kuyapiga.” (Lu. 16:10) Ndugu Senior alikataa kazi ya askari kwa sababu ya zamiri yake, na kwa hiyo, alifungwa. Yeye pamoja na ndugu wengine 4 walikuwa katika kikundi cha watu 16 ambao pia walikataa kazi ya askari kwa sababu ya zamiri yao, na ambao walifungwa katika gereza la Richmond, Uingereza. Wakati fulani, ndugu Herbert na wengine walisafirishwa kwa siri katika mashua mupaka Ufaransa, na kupelekwa kwenye vita. Huko, walihukumiwa kifo. Walitiwa kwenye mustari ili wapigwe masasi na kikundi cha maaskari, lakini hawakuuawa. Kuliko kuuawa walihukumiwa kifungo cha miaka kumi.

“Nilielewa kwamba watu wa Mungu wanapaswa kuishi kwa amani na kila mutu, hata wakati wa vita.”—Simon Kraker (Ona fungu la 7)

7. Kufikia mwanzo wa Vita ya Pili ya Ulimwengu watu wa Mungu walikuwa wameelewa nini?

 7 Kufikia mwanzo wa Vita ya Pili ya Ulimwengu, watu wa Yehova walikuwa wameelewa vizuri maana ya kutojiingiza katika mambo ya vita, na ni nini walipaswa kufanya ili kufuata mufano wa Yesu. (Mt. 26:51-53; Yoh. 17:14-16; 1 Pet. 2:21) Kwa mufano, gazeti Munara wa Mulinzi la tarehe 1 Mwezi wa 11, 1939, lilikuwa na habari ya maana sana yenye kichwa “Kutojiingiza Katika Mambo ya Vita.” Habari hiyo ilisema hivi: “Kanuni ambayo inapaswa kuongoza watu ambao wako katika agano na Yehova ni ile ya kutojiingiza hata kidogo katika mambo ya vita ya mataifa.” Kuhusu habari hiyo, ndugu Simon Kraker, ambaye kisha alitumikia kwenye makao makubwa, Brooklyn, New York, alisema hivi: “Nilielewa kwamba watu wa Mungu wanapaswa kuishi kwa amani na kila mutu, hata wakati wa vita.” Chakula hicho cha kiroho kilitolewa kwa wakati unaofaa na kilisaidia watu wa Mungu wajitayarishe ili kushinda shambulio kubwa zaidi ambalo lingejaribu ushikamanifu wao kwa Ufalme.

Walishambuliwa na Upinzani Ulio Kama ‘Muto’

8, 9. Unabii wa mutume Yohana ulitimia namna gani?

8 Mutume Yohana alitabiri kwamba kisha kuzaliwa kwa Ufalme wa Mungu, katika mwaka wa 1914, nyoka mukubwa, Shetani Ibilisi, angejaribu kuwaangamiza raia wa Ufalme wa Mungu kwa kutapika muto wa mufano. * (Soma Ufunuo 12:9, 15.) Unabii huo wa Yohana ulitimizwa namna gani? Kuanzia mwaka wa 1920,  upinzani ulikuwa mukali sana juu ya watu wa Mungu. Ndugu wengi ambao waliishi Amerika ya Mangaribi wakati wa Vita ya Pili ya Ulimwengu, walifungwa kwa sababu ya ushikamanifu wao kwa Ufalme wa Mungu. Ndugu Kraker pia alifungwa. Kwa kweli, wakati wa vita, Mashahidi wa Yehova zaidi ya wawili walikuwa kati ya watu watatu ambao walifungwa katika gereza mbalimbali za Amerika kwa sababu zamiri yao iliwakataza kujiingiza katika vita.

9 Shetani na watu wake walikusudia kuvunja ushikamanifu wa raia wa Ufalme mahali pote ambapo walipatikana. Mahali pote, katika Afrika, Ulaya, na Amerika, Mashahidi walipelekwa mbele ya tribinali na mbele ya vikundi vya watu wenye kuamua ikiwa mutu ataachiliwa ao hapana. Kwa sababu walikataa kabisa kujiunga katika mambo ya vita, walifungwa, walipigwa na kufanywa vilema. Katika Ujerumani, watu wa Mungu waliteswa sana kwa sababu walikataa kufanya alama ya kusalimia Hitler ao kutoa michango ili kusaidia vita. Karibu Mashahidi 6000 walifungwa katika kambi za mateso za Wanazi, na zaidi ya Mashahidi 1600 Wajerumani na wasio Wajerumani waliuawa na watu ambao walikuwa wanawatesa. Hata hivyo, Ibilisi hakuweza kuwaangamiza watu wa Mungu kwa milele.—Mk. 8:34, 35.

“Dunia” Inameza Ule ‘Muto’

10. “Dunia” ya mufano inamaanisha nini, na namna gani dunia hiyo imesaidia watu wa Mungu?

10 Unabii ambao uliandikwa na mutume Yohana ulionyesha kwamba “dunia,” ni kusema, vikundi fulani ao watu fulani wenye uwezo katika ulimwengu huu ambao ni wenye mawazo mazuri, wangeweza kumeza ule ‘muto’ ambao unafananishwa na mateso. Kwa hiyo, watu wa Mungu wangesaidiwa. Namna gani sehemu hiyo ya unabii imetimizwa? Katika miaka ambayo ilifuata Vita ya Pili ya Ulimwengu, mara nyingi “dunia” ya mufano ilisaidia raia waaminifu wa Ufalme ambao unaongozwa na Masiya. (Soma Ufunuo 12:16.) Kwa mufano, tribinali mbalimbali zenye kujulikana sana zilisaidia kulinda haki ya Mashahidi wa Yehova ya kukataa kuwa askari na ya kukataa kufanya ibada mbalimbali za kutukuza taifa. Kwanza, acha tuchunguze ushindi mbalimbali ambao Yehova amepatia watu wake kuhusu jambo la kukataa kufanya kazi ya askari.​—Zab. 68:20.

11, 12. Ndugu Sicurella na Thlimmenos walipambana na jaribu gani, lakini mambo yalikuwa namna gani mwishowe?

11 Amerika (États-Unis). Anthony Sicurella alilelewa na wazazi Mashahidi wa Yehova. Alikuwa na miaka 15 wakati alibatizwa. Wakati alikuwa na miaka 21, alikubaliwa na baraza la kuandikisha watu katika jeshi: alijulikana kuwa yeye ni muhubiri wa habari njema. Kisha miaka mbili, ni kusema, katika mwaka wa 1950, aliomba akubaliwe kuwa yeye hatakuwa askari kwa sababu ya zamiri yake. Ijapokuwa Biro ya Uchunguzi haikuona ubaya wowote kwa ombi hilo, Biro ya Mambo ya Haki ilimukatalia jambo hilo. Kisha jambo hilo kuamuliwa mara nyingi na tribinali ndogo, Tribinali Kubwa Zaidi ya Amerika ilimusikiliza Ndugu Sicurella na ikavunja uamuzi wa tribinali ndogo na kumupatia Ndugu Sicurella haki yake. Uamuzi huo ulisaidia ili kuwapatia haki raia wengine wa Amerika ambao walikataa kazi ya askari kwa sababu ya zamiri yao.

 12 Ugiriki. Katika mwaka wa 1983, Ndugu Iakovos Thlimmenos alishitakiwa kwamba alikataa kutii wakubwa, kwa sababu alikataa kuvaa nguo ya askari na kwa hiyo, alifungwa. Kisha kufunguliwa, alijaza ombi la kufanya kazi ya mambo ya feza (comptable), lakini ombi lake lilikataliwa. Sababu ambayo walitoa ni kwamba amekwisha kuhukumiwa kwa kuvunja sheria. Alipeleka jambo hilo kwenye tribinali, lakini tribinali za Ugiriki zilimuhukumu kuwa mwenye kosa. Kisha akapeleka jambo hilo kwenye Tribinali ya Haki za Kibinadamu ya Ulaya (THKU). Katika mwaka wa 2000, waamuzi 17 wa Tribinali hiyo walimupatia ndugu ushindi. Na uamuzi huo ulionyesha mufano ambao watu wanapaswa kufuata kwa kupinga kabisa mambo ya ubaguzi. Mbele ya uamuzi huo, katika Ugiriki zaidi ya ndugu 3500 walijulikana kuwa wavunja-sheria kwa sababu hapo zamani walifungwa kwa sababu walikataa kujiingiza katika mambo ya vita. Kisha uamuzi huo muzuri, serikali ya Ugiriki ilitoa sheria ambayo ilionyesha wazi kwamba ndugu hao hawakuwa wavunja-sheria. Pia, sheria ambayo iliwapatia raia wote wa Ugiriki haki ya kuchagua kufanya kazi ingine kuliko kufanya kazi ya askari, ambayo ilikuwa imeundwa miaka mbili tu mbele, ilihakikishwa wakati Katiba ya Ugiriki iliandikwa upya.

“Mbele ya kuingia katika jumba la tribinali, nilimuomba Yehova kwa bidii sana, na kisha nilijisikia kuwa alinisaidia kuwa na utulivu.”—Ivailo Stefanov (Ona fungu la 13)

13, 14. Mambo ambayo Ndugu Stefanov na Bayatyan walipambana nayo, yanaweza kutufundisha nini?

13 Bulgaria. Katika mwaka wa 1994, Ivailo Stefanov alikuwa na miaka 19 wakati aliandikishwa kinguvu katika jeshi. Alikataa kujiunga na jeshi ao kufanya kazi zingine ambazo hazimuombe apigane vita ambazo ziliongozwa na askari. Alihukumiwa na kufungwa miezi 18, lakini aliomba jambo hilo lichunguzwe tena, kwa sababu ya haki yake ya kukataa kufanya kazi ya askari kwa sababu ya zamiri. Kisha muda fulani, jambo hilo lilipelekwa kwenye Tribinali ya Haki za Kibinadamu ya Ulaya. Katika mwaka wa 2001, mbele ya tribinali kuamua jambo hilo, serikali ya Bulgaria ilimaliza jambo hilo pamoja na Ndugu Stefanov kwa amani. Serikali ya Bulgaria ilikubali kwamba Ndugu Stefanov asifanye kazi ya askari na pia ilikubali kwamba raia wote wa Bulgaria ambao wanapenda, wanaweza kufanya kazi zingine ambazo zinaombwa na serikali kuliko kufanya kazi ya askari. *

14 Armenia. Katika mwaka wa 2001, Vahan Bayatyan alifikia miaka ambayo ilimulazimisha mutu kufanya kazi ya askari. * Alifasiria kwamba hawezi kufanya kazi hiyo kwa sababu ya zamiri. Lakini hakuna tribinali ya inchi ambayo ilimupatia sheria. Katika Mwezi wa 9, 2002, alianza kutumikia kifungo cha miaka mbili na nusu, lakini alifunguliwa kisha miezi kumi na nusu. Wakati huo aliomba jambo lake lichunguzwe na Tribinali ya Haki za Kibinadamu ya Ulaya, na ikakubali kumusikiliza. Lakini, tarehe 27 Mwezi wa 10, 2009, tribinali hiyo pia ilimuhukumu. Uamuzi huo ulionekana kuwa ni kushindwa kabisa kwa ndugu wa Armenia ambao walikuwa wanapambana na jambo hilo. Lakini, Baraza Kubwa la THKU, liliamua kuchunguza tena uamuzi huo. Tarehe 7 Mwezi wa 7, 2011, ndugu Vahan Bayatyan alipewa ushindi. Hii ilikuwa ni mara ya kwanza kwa THKU kukubali kwamba haki ya mutu kukataa kazi ya askari kwa sababu ya zamiri inayotegemea dini yake inapaswa  kulindwa. Uamuzi huo ulitegemea wazo la kwamba mutu ana haki na uhuru wa kuwa na dini ambayo anataka, uhuru wa kuwaza na uhuru wa kutumia zamiri yake. Uamuzi huo unalinda haki za Mashahidi wa Yehova, lakini pia haki za maelfu ya watu ambao wanaishi katika inchi ambazo zinapatikana katika Muungano wa Ulaya. *

Vahan Bayatyan katika Jumba la baraza la Tribinali Kubwa ya Haki za Kibinadamu ya Ulaya

Kutukuza Taifa

15. Sababu gani watu wa Yehova wanakataa kujiunga na sherehe za kutukuza taifa?

15 Ili kubaki washikamanifu kwa Ufalme wa Masiya, watu wa Yehova wanakataa kufanya kazi ya askari, na pia wanakataa kwa heshima kufanya sherehe za kutukuza taifa. Tangu kutokea kwa Vita ya Pili ya Ulimwengu, imeonekana kwamba roho ya kupenda sana inchi na kukubali kufa kwa ajili ya inchi imeenea sana duniani. Inchi fulani zinaomba raia wafanye naziri ya kubaki washikamanifu kwa inchi yao, kwa kuapa, kwa kuimba wimbo wa taifa ao kwa kuisalimu bendera ya inchi. Lakini, sisi tumejitoa kikamili kwa Yehova. (Kut. 20:4, 5) Kwa sababu hiyo, tumeteswa sana. Lakini, Yehova ametumia tena “dunia” ya mufano ili kumeza  kabisa sehemu fulani ya upinzani huo. Acha tuzungumuzie ushindi mbalimbali wa ajabu ambao Yehova ametupatia kupitia Kristo katika jambo hili la kutukuza taifa.​—Zab. 3:8.

16, 17. Lillian na William Gobitas walipambana na jaribu gani, na mambo ambayo yaliwapata yanakufundisha nini?

16 Amerika (États-Unis). Katika mwaka wa 1940, Tribinali Kubwa Zaidi ya Amerika iliamua jambo ambalo lilihusu Masomo ya Jimbo la Minersville na Gobitis. Waamuzi munane wa Tribinali hiyo waliamua kwamba Mashahidi wa Yehova hawana haki, lakini mumoja tu ndiye alikuwa upande wetu. Lilian Gobitas, * aliyekuwa na miaka 12, na mudogo yake William aliyekuwa na miaka 10, walipenda kubaki washikamanifu kwa Yehova, kwa hiyo, walikataa kusalimu bendera ao kufanya kiapo. Kwa sababu hiyo, walifukuzwa kwenye masomo. Jambo hilo lilipelekwa kwenye Tribinali Kubwa Zaidi, na tribinali ikasema kwamba mambo ambayo watoto wanaombwa kufanya huko kwenye masomo yanapatana na katiba ao sheria ya Amerika. Na pia kwamba mambo hayo, ni kwa faida ya “umoja wa taifa.” Uamuzi huo uliwasha moto wa mateso makali sana. Watoto wengi Mashahidi walifukuzwa kwenye masomo. Ndugu na dada walifukuzwa kwenye kazi zao, na Mashahidi wengi walishambuliwa vikali na vikundi vya watu. Kitabu L’éclat de notre pays (katika Kiingereza) kilisema kwamba “mateso ambayo Mashahidi walipata kuanzia mwaka wa 1941 mupaka mwaka wa 1943, yalikuwa mateso makubwa zaidi ambayo yanahusu ubaguzi wa dini katika miaka ya 1900 katika inchi ya Amerika.”

17 Ushindi wa maadui wa Mungu ulikuwa wa muda mufupi. Katika mwaka wa 1943, Tribinali Kubwa Zaidi ilichunguza jambo lingine ambalo lilifanana na jambo la Gobitis. Ilikuwa kati ya Académie de Virginie occidentale na Barnette. Mara hiyo, tribinali iliwapatia Mashahidi wa Yehova ushindi. Ilikuwa ni mara ya kwanza katika historia ya Amerika kwamba Tribinali Kubwa Zaidi ibadilishe uamuzi wake katika wakati mufupi kama huo. Kisha uamuzi huo, mateso ya waziwazi ambayo Mashahidi wa Yehova walikuwa wanapata katika inchi ya Amerika yalipunguka sana. Uamuzi huo ulifanya haki za raia wote wa inchi ya Amerika ziheshimiwe zaidi.

18, 19. Pablo Barros alisema ni nini ilimusaidia kubaki nguvu kiroho, na namna gani watumishi wengine wa Yehova wanaweza kuiga mufano wake?

18 Arjentina. Katika mwaka wa 1976, Pablo mwenye miaka saba na Hugo Barros mwenye miaka munane, walifukuzwa kwenye masomo kwa sababu walikataa kusalimu bendera wakati ilikuwa inapandishwa. Siku fulani, kiongozi wa masomo (mwanamuke) alimusukuma Pablo kwa nguvu na kumupiga kwenye kichwa. Aliwaambia watoto hao wabaki kisha masomo kwa muda wa saa moja, na alijaribu kuwakaza wafanye ibada ya kutukuza taifa. Pablo anakumbuka namna aliteswa sana na anasema hivi: “Bila musaada wa Yehova, singeweza kushinda jaribu hilo la kuvunja ushikamanifu wangu.”

19 Wakati jambo hilo lilipelekwa kwenye tribinali, muamuzi aliunga mukono uamuzi wa masomo wa kumufukuza Pablo na Hugo. Lakini, jambo hilo lilipelekwa kwenye Tribinali Kubwa Zaidi ya Arjentina. Katika mwaka wa 1979, tribinali hiyo ilivunja uamuzi wa tribinali ndogo. Ilisema hivi: “Kufukuza mutoto kwenye  masomo kunapingana na haki ya kujifunza ambayo inapatikana katika katiba (Kifungo cha 14) na kunapingana na daraka la serikali la kuhakikisha kwamba watoto wamefanya masomo ya musingi (Kifungo cha 5).” Watoto karibu 1000 Mashahidi walifaidika na ushindi huo. Wengine hawakufukuzwa tena kwenye masomo, na Pablo na Hugo, walikubaliwa kurudi tena kwenye masomo ya serikali.

Mashahidi wengi vijana walibaki waaminifu wakati walijaribiwa

20, 21. Namna gani jambo ambalo liliwapata Roel na Emily Embralinag linatia nguvu imani yako?

20 Ufilipino. Katika mwaka wa 1990, Roel Embralinag, * aliyekuwa na miaka 9, dada yake Emily aliyekuwa na miaka 10, na wanafunzi wengine zaidi ya 65 ambao walikuwa Mashahidi, walifukuzwa kwenye masomo kwa sababu walikataa kusalimu bendera. Ndugu Leonardo, baba ya Roel na Emily, alijaribu kuzungumuza na wakubwa wa masomo, lakini hawakumusikiliza. Wakati hali ilizidi kuwa mbaya, ndugu Leonardo, alipeleka jambo hilo kwenye Tribinali Kubwa Zaidi. Hakuwa na feza wala mutu wa kumutetea ambaye anajua sheria. Familia hiyo ilimuomba Yehova kwa bidii sana ili awaongoze. Wakati wote huo, watoto walikuwa wanachekwa na kutendewa vibaya. Ndugu Leonardo alifikiri kwamba  haitawezekana ashinde, kwa sababu hakuwa na ujuzi wowote kuhusu mambo ya sheria.

21 Kukatokea jambo fulani nzuri. Ndugu Felino Ganal muteteaji wa kisheria, ambaye hapo zamani alitumika katika shirika fulani la sheria lenye kujulikana sana katika inchi, alijitolea ili kutetea familia hiyo. Wakati huo, Ndugu Ganal alikuwa amekwisha kuachana na shirika hilo la sheria na alikuwa sasa Shahidi wa Yehova. Wakati jambo hilo lilichunguzwa na Tribinali Kubwa Zaidi, Waamuzi wote wa Tribinali hiyo, waliwapa Mashahidi ushindi na wakavunja ile sheria ya kuwafukuza watoto kwenye masomo. Kwa mara ingine, wale ambao walitaka kuvunja ushikamanifu wa watu wa Mungu walishindwa tena.

Musimamo Ambao Umeongoza Kwenye Umoja

22, 23. (a) Sababu gani watu wa Yehova wamepata ushindi mwingi wa kisheria wa maana sana? (b) Amani na umoja ambao unapatikana kati ya ndugu duniani pote, unatoa ushuhuda gani?

22 Sababu gani watu wa Yehova wamepata ushindi mwingi wa kisheria wa maana sana? Hatuna nguvu za kisiasa ili kuchochea watu. Hata hivyo, katika kila inchi na kwenye kila tribinali, waamuzi wasiokuwa na upendeleo wametulinda na mashambulizi ya wapinzani ambao wanafanya yao yote ili kutuangamiza. Na kuanzia hapo, tumesaidia inchi nyingi kuheshimu sheria ambayo inapatikana katika katiba zao. Bila shaka, Kristo ametegemeza nguvu ambazo zimefanywa ili kupata ushindi huo mbalimbali. (Soma Ufunuo 6:2.) Sababu gani tunapigania haki yetu ya kisheria? Hatufanye hivyo ili kubadilisha sheria za inchi. Lakini, tunataka tu kuendelea kumutumikia Mufalme wetu, Yesu Kristo, bila vizuizi.​—Mdo. 4:29.

23 Katika ulimwengu ambao unagawanyika kwa sababu ya ugomvi wa kisiasa, na ambao unajaa chuki, Mufalme wetu ambaye anatawala, Yesu Kristo, amebariki nguvu za wafuasi wake katika ulimwengu wote, za kuendelea kubaki na musimamo wa kutojiingiza katika mambo ya siasa ao ya vita. Nguvu za Shetani za kupenda kutugawanya na kutuangamiza, zimeshindwa. Leo, Ufalme umekusanya mamilioni ya watu ambao wamekataa ‘kujifunza vita tena.’ Amani na umoja ambao unapatikana kati ya ndugu duniani pote ni muujiza kabisa. Ni ushuhuda ulio wazi kwamba Ufalme wa Mungu unatawala!​—Isa. 2:4.

^ fu. 4 Buku hilo linaitwa pia La Nouvelle Création. Kisha, mabuku ya kitabu L’Aurore du Millénium yaliitwa Étude des Écritures.

^ fu. 8 Ili kupata mafasirio kuhusu unabii huu, soma kitabu Ufunuo—Upeo Wao Mtukufu U Karibu!, sura ya 27, ukurasa wa 184-186.

^ fu. 13 Uamuzi huo uliomba pia serikali ya Bulgaria iwapatie watu ambao wanakataa kazi ya askari uwezekano wa kufanya kazi ingine, chini ya usimamizi wa serikali.

^ fu. 14 Ili kuelewa habari hii zaidi, soma gazeti “Munara wa Mulinzi la tarehe 1 Mwezi wa 11, 2012, ukurasa wa 29-31.”

^ fu. 14 Kwa kipindi cha zaidi ya miaka 20, serikali ya Armenia imefunga vijana Mashahidi zaidi ya 450. Katika Mwezi wa 11, 2013, wale vijana ambao walikuwa wamebaki walifunguliwa.

^ fu. 16 Jina la familia liliandikwa vibaya katika maandishi ya tribinali.

^ fu. 20 Jina la familia liliandikwa vibaya, ni kusema, Ebralinag, katika maandishi ya tribinali.