Ona video zinazopatikana

Ona habari zilizo ndani

 SURA 13

Wahubiri Wa Ufalme Wanajitetea Kwenye Tribinali

Wahubiri Wa Ufalme Wanajitetea Kwenye Tribinali

WAZO KUBWA KATIKA SURA HII

Kama vile Yesu alitabiri, wafuasi wake wanapambana na upinzani wa serikali ao wa viongozi wa dini kwa sababu ya kazi yao ya kuhubiri

1, 2. (a) Kisha tu Pentekoste ya mwaka wa 33, viongozi wa dini walifanya nini juu ya kazi ya kuhubiri, lakini mitume walitenda namna gani? (b) Sababu gani mitume hawakutii sheria ambayo ilikataza kuhubiri?

TUKO Yerusalemu kisha tu Pentekoste ya mwaka wa 33. Kutaniko la Kikristo limetoka tu kuanzishwa kumepita majuma kidogo. Bila shaka, Shetani anaona kuwa huu ndio wakati muzuri wa kushambulia kutaniko. Mbele ya kutaniko hilo kupata nguvu, Shetani anapenda kuliharibu. Bila kukawia, Shetani anawachochea viongozi wa dini wakataze kazi ya kuhubiri Ufalme. Hata hivyo, mitume wanaendelea kuhubiri bila woga, na watu wengi, wanaume na wanawake ‘wanamuamini Bwana.’​—Mdo. 4:18, 33; 5:14.

Mitume walifurahi sana “kwa sababu walikuwa wamehesabiwa kuwa wenye kustahili kuvunjiwa heshima kwa ajili ya jina lake

2 Jambo hilo linawakasirisha sana viongozi wa dini, wanakataza tena kazi ya kuhubiri, na mara hii wanawatupa mitume katika gereza. Lakini, wakati wa usiku, malaika wa Yehova anafungua milango ya gereza, na asubuhi sana mitume wanatoka inje na wanaanza tena kuhubiri! Wanakamatwa tena na kupelekwa mbele ya viongozi wa dini. Viongozi hao wanawashitaki kwamba wanavunja sheria ambayo iliwakataza kuhubiri. Mitume wanawajibu hivi bila woga: ‘Lazima tumutii Mungu kuwa mutawala kuliko wanadamu.’ Viongozi hao wanakasirika sana na wanataka kuangamiza mitume hao. Ni wakati wenye hatari, kwa hiyo, Gamalieli, mwalimu wa sheria mwenye kuheshimiwa sana anasimama na kuwaonya viongozi hao hivi: ‘Mujiangalie . . . Musijiingize katika mambo ya watu hawa, muwaache.’ Jambo la kushangaza ni kwamba, viongozi hao wanasikiliza shauri la Gamalieli na wanawaachilia mitume. Wanaume hao waaminifu wanafanya nini? Bila kuogopa, wanaendelea, “bila kuacha kufundisha na kutangaza habari njema juu ya Kristo, Yesu.”​—Mdo. 5:17-21, 27-42; Met. 21:1, 30.

3, 4. (a) Ni njia gani ambayo Shetani amekuwa akitumia kwa muda murefu ili kushambulia watu wa Mungu? (b) Tutachunguza nini katika sura hii na katika sura mbili ambazo zitafuata?

3 Mashitaka hayo ambayo yalipelekwa mbele ya Tribinali katika mwaka wa 33, ndio upinzani wa kwanza ambao ulitungwa kwa njia ya sheria ili kupinga kutaniko la Kikristo. Lakini, huo ulikuwa ni mwanzo tu. (Mdo. 4:5-8; 16:20; 17:6, 7) Leo pia, Shetani anaendelea kusukuma wapinzani wa ibada ya kweli ili wawachochee viongozi wa serikali wakataze kazi yetu ya kuhubiri. Wapinzani wanatunga mashitaka ya kila namna juu ya watu wa Mungu. Kwanza, wanatushitaki kuwa sisi tunavuruga usalama wa watu, ni kusema, sisi ni waleta-fujo. Pia, wanasema sisi tunachochea watu wapinge serikali; na hata wametushitaki kuwa sisi ni wachuuzi [wa vitabu]. Lakini kwa wakati ambao unafaa, ndugu zetu wameenda kwenye tribinali ili kuonyesha  kwamba mashitaka hayo ni ya uongo. Wamepata matokeo gani? Namna gani maamuzi ambayo yalitolewa na tribinali kumekwisha kupita miaka mingi yanakuhusu leo? Acha tuchunguze namna ndugu walijitetea kwenye tribinali na tuone namna gani jambo hilo lilisaidia ‘kutetea habari njema’ na kuifanya ijulikane ‘kisheria.’​—Flp. 1:7.

4 Katika sura hii tutakazia sana namna tumetetea haki yetu ya kuwa na uhuru wa kuhubiri. Pia, katika sura mbili ambazo zinafuata, tutachunguza mapambano fulani ya kisheria ambayo tulifanya ili tuendelee kutokuwa sehemu ya ulimwengu, na ili tuendelee kuishi kulingana na kanuni za ule Ufalme.

Sisi Ni Waleta​—Fujo ao Wateteaji Waaminifu wa Ufalme wa Mungu?

5. Mwisho-mwisho wa miaka ya 1930, sababu gani wahubiri wa Ufalme walifungwa, na ndugu ambao walikuwa wanaongoza katika tengenezo waliamua kufanya nini?

5 Mwisho-mwisho wa miaka ya 1930, miji na majimbo yote ambayo yanaunda Inchi ya Amerika (États-Unis), yalilazimisha Mashahidi wa Yehova wawe na kitambulisho ambacho kinawaruhusu kuhubiri. Lakini, ndugu zetu walikataa kwa sababu walijua kwamba wakubwa wa serikali wanaweza kukupatia kikaratasi cha kukuruhusu leo; na kesho wanakunyanganya kikaratasi hicho. Pia, waliamini kabisa kwamba hakuna serikali ambayo ina mamlaka ya kukataza Wakristo kutimiza amri ya Yesu ya kuhubiri ujumbe wa Ufalme. (Mk. 13:10) Kwa hiyo, wahubiri wengi wa Ufalme walifungwa. Jambo hilo, liliwasukuma ndugu ambao walikuwa wanaongoza katika tengenezo, kuenda kujitetea kwenye tribinali. Walipenda kuonyesha kwamba sheria hiyo imewekea Mashahidi wa Yehova vizuizi vyenye kuenda kinyume na Sheria ya inchi, ambayo inawapatia haki ya kuabudu kwa uhuru. Na katika mwaka wa 1938 kulitokea jambo fulani ambalo lilipelekwa kwenye tribinali na ambalo lilisaidia katika mashitaka mengine ambayo yalifuata. Ni jambo gani lilitokea?

6, 7. Familia ya Ndugu Cantwell ilipatwa na jambo gani?

6 Ndugu Newton Cantwell, mwenye miaka 60; bibi yake Esther; na vijana wao Henry, Russell, na Jesse, wote watano walikuwa mapainia wa pekee. Siku ya pili asubuhi, tarehe 26 Mwezi wa 4, 1938, walipanga kupitisha siku moja katika mahubiri katika muji wa New Haven, Connecticut. Hata hivyo, walikuwa wamejitayarisha kwamba hawangerudia kisha siku hiyo moja. Sababu gani? Kwa sababu walikuwa wemefungwa mara nyingi na walitambua kwamba inawezekana wafungwe tena. Hata hivyo, jambo hilo halikupunguza tamaa ya familia hiyo ya kuhubiri ujumbe wa Ufalme. Kwa hiyo, walienda na motokari mbili na wakafika katika muji wa New Haven. Newton alitembeza motokari ya familia yenye kuwa na vichapo vyetu na fono za kubeba kwa mukono; na Henry aliyekuwa na miaka 22 alitembeza motokari ambayo ilikuwa na kikuza-sauti. Lakini, kisha tu saa fulani walikamatwa na polisi kama vile walikuwa wametazamia.

7 Russell, ambaye alikuwa na miaka 18, alikamatwa kwanza, kisha ndugu Newton na dada Esther walikamatwa pia. Jesse, ambaye alikuwa na miaka 16, aliona kwa mbali namna wazazi wake na kaka yake wanafungwa na kupelekwa na polisi. Kwa hiyo, kijana Jesse alibakia peke yake kwa sababu kaka yake mwengine Henry, alikuwa anahubiri upande mwingine wa muji. Hata hivyo, Jesse alichukua fono yake na akaendelea na mahubiri. Wanaume wawili wa dini ya Kikatoliki  walikubali kusikiliza hotuba yenye kurekodiwa ya Ndugu Rutherford yenye kichwa “Maadui.” Lakini wanaume hao walikasirishwa sana na hotuba hiyo na hata wakataka kumupiga Jesse. Kwa upole, Jesse aliamua kuondoka na kuenda mbali nao, lakini kisha tu muda mufupi, alikamatwa na polisi. Kwa hiyo, Jesse pia alifungwa. Dada Esther aliachiliwa. Ndugu Cantwell na vijana wake watatu walishitakiwa. Lakini, walilipa kiasi fulani cha feza, na wakafunguliwa siku hiyohiyo.

8. Sababu gani tribinali ilimuhukumu Jesse Cantwell kuwa ni muleta-fujo?

8 Kisha miezi fulani, ni kusema, Mwezi wa 9, 1938, familia ya ndugu Cantwell ilipelekwa kwenye tribinali ya muji wa New Haven. Ndugu cantwell, Russell, na Jesse walishitakiwa kwamba walikuwa wanaomba michango bila kuwa na kikaratasi ambacho kinawapa ruhusa ya kufanya hivyo. Waliomba jambo hilo lichunguzwe upya na Tribinali Kubwa Zaidi ya Connecticut, hata hivyo, Jesse alihukumiwa kwa shitaka la kwamba anavuruga amani ya watu na kwamba yeye ni muleta-fujo. Sababu gani Jesse alipewa hukumu hiyo? Ni kwa sababu wanaume hao wawili ambao walikuwa wamesikiliza hotuba ya Ndugu Rutherford ambayo ilikuwa imerekodiwa, walishuhudia kwamba hotuba hiyo ilitukana dini yao na kwamba ilikuwa ya uchokozi. Ndugu wenye madaraka katika tengenezo hawakukubali uamuzi huo, kwa hiyo, waliomba jambo hilo lichunguzwe tena na Tribinali Kubwa Zaidi ya Amerika. Hakuna tribinali ingine ambayo inashinda tribinali hiyo katika Amerika.

9, 10. (a) Tribinali Kubwa Zaidi ya Amerika ilitoa uamuzi gani kuhusu mambo ambayo familia ya ndugu Cantwell ilishitakiwa? (b) Uamuzi huo unaendelea kutuletea faida gani?

9 Kuanzia tarehe 29 Mwezi wa 3, 1940, muamuzi Charles E. Hughes na waamuzi wengine munane walisikiliza ushahidi ambao  ulitolewa na Ndugu Hayden Covington, ambaye alikuwa muteteaji wa Mashahidi wa Yehova. * Wakati mwanasheria wa serikali wa muji wa Connecticut alianza kutoa ushahidi ili kuonyesha kwamba Mashahidi wa Yehova ni waleta-fujo, muamuzi mumoja alimuuliza hivi: Ni kweli kwamba watu hawakupendezwa na ujumbe ambao Yesu alikuwa anawatangazia wakati alikuwa hapa duniani? Mwanasheria huyo akajibu hivi: “Ndiyo, na ikiwa ninakumbuka vizuri, Biblia yangu inaonyesha pia namna walimutendea kwa sababu ya kutangaza ujumbe huo.” Kwa kweli, maneno yake yalifunua mambo wazi! Bila kujua, mwanasheria huyo alitia Mashahidi wa Yehova upande mumoja na Yesu na alitia watu ambao walimuua Yesu upande mumoja na serikali ya Connecticut. Tarehe 20 Mwezi wa 5, 1940, waamuzi wote wa Tribinali hiyo walipatia Mashahidi wa Yehova ushindi.

Hayden Covington (mbele, katikati), Glen How (kushoto), na watu wengine. Wanatoka katika jumba la tribinali kisha kupata ushindi

10 Uamuzi huo ulileta faida gani? Uliheshimisha zaidi uhuru wa mutu wa kuchagua dini ambayo anapenda. Hakuna tena serikali ya muji wowote wa Amerika ambayo ingetia sheria ya kumuzuia mutu asiwe na uhuru wa kuchagua dini ambayo anataka. Waamuzi walionyesha pia kwamba Jesse “hakuleta fujo ao hakuvuruga amani ya watu.” Kwa hiyo, uamuzi huo ulionyesha kwamba Mashahidi wa Yehova hawakuwa waleta-fujo. Kwa kweli, uamuzi huo wa kisheria ulikuwa ni ushindi mukubwa kwa watumishi wa Mungu! Tunaendelea kupata faida gani kutokana na uamuzi huo? Ndugu mumoja ambaye ni muteteaji wa Mashahidi wa Yehova anasema hivi: “Haki yetu ya kuabudu kwa uhuru bila kuogopa vizuizi ambavyo si vya haki, inatuwezesha leo kuhubiria watu ujumbe ambao unawaletea tumaini kila mahali ambapo tunaishi.”

Sisi Tunachochea Watu Kupinga Serikali ao Sisi Ni Watangazaji wa ile Kweli?

Chuki Kali ya Quebec Kuelekea Mungu, Kristo, na Uhuru, Ni Aibu kwa Kanada Yote (katika Kiingereza)

11. Ndugu zetu wa Kanada walifanya kampanye gani, na sababu gani?

11 Kuanzia mwaka wa 1940 mupaka mwaka wa 1950, Mashahidi wa Yehova wa inchi ya Kanada walipambana na upinzani mukubwa. Katika mwaka wa 1946, ndugu zetu walifanya kampanye ya siku 16 ya kugawanya trakte ambayo ilikuwa na kichwa Chuki Kali ya Quebec Kuelekea Mungu, Kristo, na Uhuru, Ni Haya kwa Kanada Yote. Walifanya hivyo ili kusaidia watu wajue kwamba serikali inakosa kuheshimu haki ya kila mwanadamu ya kuabudu ao kuwa na dini. Trakte hiyo yenye kurasa ine ilieleza kwa kirefu namna viongozi wa dini walichochea vikundi vya watu kushambulia ndugu zetu, namna polisi waliwatendea kinyama, na namna vikundi vya watu wenye hasira walitendea ndugu zetu kwa jeuri katika jimbo la Quebec. Trakte hiyo ilisema hivi: “Mashahidi wa Yehova wanaendelea kufungwa kinyume na Sheria. Katika Montreal, Mashahidi wa Yehova wako na mashitaka karibu 800.”

12. (a) Kampanye hiyo ya trakte ilisukuma maadui wetu kufanya nini? (b) Ndugu zetu walishitakiwa nini? (Soma pia maelezo mengine.)

12 Maurice Duplessis Kiongozi wa muji wa Quebec, ambaye aliungana mukono na Villeneuve, Kardinali wa dini ya Katoliki, alitangaza kwamba kwa sababu ya trakte hiyo, watapigana vita na Mashahidi wa Yehova “bila huruma.” Bila kukawia, hesabu ya mashitaka kwenye tribinali iliongezeka kutoka 800 mupaka 1600. Dada mumoja painia alisema hivi: “Polisi walitufunga mara nyingi sana, mupaka tukachoka kuhesabu. Mashahidi ambao walikamatwa, walishitakiwa  kwamba wamefanya kosa la kutolea watu “vichapo ambavyo vinachochea watu kupinga serikali.” *

13. Ni nani walikuwa wa kwanza kushitakiwa kwamba wanachochea watu kupinga serikali, na tribinali ilitoa uamuzi gani?

13 Katika mwaka 1947, Ndugu Aimé Boucher na binti zake, Gisèle ambaye alikuwa na miaka 18, na Lucille miaka 11, walikuwa wa kwanza kupelekwa kwenye tribinali kwa sababu ya mashitaka ya kuchochea watu kupinga serikali. Walikuwa wamegawanya trakte Chuki Kali ya Quebec karibu na shamba lao ambalo lilikuwa katika milima, kusini mwa Muji wa Quebec, lakini hawakuonekana kuwa wavunja-sheria wenye kuleta fujo. Ndugu Boucher alikuwa mutu mupole na munyenyekevu ambaye aliishi katika shamba lake na alizoea kuenda katika muji kwa motokari ambayo ilikuwa inakokotwa na farasi. Hata hivyo, familia yake pia ilitendewa mambo hayo mabaya ambayo yalitajwa katika trakte hiyo. Muamuzi wa tribinali ambaye alikuwa anachukia Mashahidi wa Yehova, alikataa kukubali ushuhuda ambao ulihakikisha kwamba familia ya ndugu Boucher haikuwa na kosa lolote. Lakini, aliunga mukono shitaka ambalo lilionyesha kwamba trakte ilichochea chuki na kwamba familia ya ndugu Boucher inapaswa kuhukumiwa. Kwa hiyo, ingeweza kusemwa kwamba maoni ya muamuzi huyo ilikuwa: Ni vibaya sana kusema kweli. Ndugu Boucher na binti yake Gisèle walihukumiwa kuwa wanachochea watu kupinga serikali, na hata Lucille aliyekuwa na miaka 11 tu alilala siku mbili katika gereza. Kwa hiyo, ndugu waliamua kwamba jambo hilo lipelekwe kwenye Tribinali Kubwa Zaidi ya Kanada, na tribinali hiyo ilikubali kusikiliza jambo hilo.

14. Ndugu katika muji wa Quebec walifanya nini wakati wa miaka ya mateso?

14 Kwa wakati huo, ndugu na dada zetu katika Quebec waliendelea kupata mashambulizi makali ya jeuri. Hata hivyo, waliendelea kuhubiri ujumbe wa Ufalme kwa uhodari na mara nyingi walipata matokeo ya ajabu. Katika kipindi cha miaka ine kisha kampanye ya kugawanya trakte ambayo ilianza katika mwaka wa 1946, hesabu ya Mashahidi wa Yehova katika Quebec iliongezeka kutoka watu 300 mupaka watu 1000! *

15, 16. (a) Tribinali Kubwa Zaidi ya Kanada ilitoa uamuzi gani juu ya mambo ambayo familia ya ndugu Boucher ilishitakiwa? (b) Ushindi huo ulikuwa na matokeao gani juu ya ndugu zetu na watu wengine?

15 Mwezi wa 6, 1950, waamuzi kenda wa Tribinali Kubwa Zaidi ya Kanada walisikiliza mashitaka ya ndugu Aimé Boucher. Kisha miezi sita, ni kusema, tarehe 18 Mwezi wa 12, 1950, tribinali hiyo ilipatia Mashahidi wa Yehova ushindi. Sababu gani? Ndugu Glen How, mumoja kati ya Wateteaji wa Mashahidi wa Yehova alifasiria kwamba tribinali ilikubaliana na maelezo ambayo Mashahidi walitoa kwamba “kuchochea watu wapinge serikali” kunamaanisha, kuwasukuma wafanye mambo ya jeuri ao kuchochea waasi serikali. Lakini trakte hiyo “haikuwa na maneno ya kuchochea watu hivyo, ilikuwa tu ni njia ya watu kueleza mawazo yao ambayo inakubaliwa na sheria ya inchi.” Ndugu How alisema tena hivi: “Nilijionea mwenyewe namna Yehova aliwapatia watu wake ushindi.” *

16 Uamuzi huo wa Tribinali Kubwa Zaidi, ulikuwa kabisa ushindi mukubwa ambao Ufalme wa Mungu ulijipatia. Ushindi huo uliondoa ao ulivunja mashitaka mengine 122, ambayo yalionyesha kwamba Mashahidi wa Yehova wa Quebec walichochea watu kupinga serikali. Zaidi ya hilo, uamuzi huo ulionyesha kwamba raia wote wa Kanada na wa Inchi zingine zote ambazo zilitawaliwa na Uingereza,  walikuwa na uhuru wa kusema namna serikali inaendesha mambo. Ushindi huo ulivunja kabisa mipango ya Serikali na ya Dini ya Quebec ya kushambulia uhuru wa Mashahidi wa Yehova. *

Sisi Ni Wachuuzi wa Vitabu​—ao Watangazaji Wenye Bidii wa Ufalme wa Mungu?

17. Serikali fulani zimefanya nini ili kujaribu kulipisha kazi zetu mbalimbali?

17 Kama Wakristo wa wakati wa mitume, watumishi wa Yehova leo “si wachuuzi wa neno la Mungu.” (Soma 2 Wakorintho 2:17.) Hata hivyo, Serikali fulani zinatumia sheria za mambo ya biashara ili kulipisha kazi zetu mbalimbali. Acha tuchunguze mashitaka mawili juu ya jambo hilo.

18, 19. Viongozi wa serikali wa inchi ya Danemark walifanya nini ili kuzuia kazi yetu ya kuhubiri?

18 Danemark. Tarehe 1 Mwezi wa 10, 1932, sheria ilitolewa yenye kusema kwamba mutu ambaye anauzisha vichapo bila kuwa na kikaratasi cha serikali, anavunja sheria. Ndugu zetu hawakuomba vikaratasi hivyo. Siku ambayo ilifuata, wahubiri tano walikuwa katika mahubiri katika muji wa Roskilde, muji ambao unapatikana kwenye kilometre 30 mangaribi mwa muji mukubwa wa Copenhagen. Wakati wa mangaribi, mumoja wao, ni kusema, ndugu August Lehmann, alikuwa amefungwa. Alishitakiwa kwamba alikuwa anauzisha vichapo bila kuwa na kikaratasi cha serikali.

19 Tarehe 19 Mwezi wa 12, 1932, Lehmann alipelekwa kwenye tribinali. Ndugu huyo alionyesha kwamba aliwatembelea watu ili kuwatolea vichapo ambavyo vinategemea Biblia, lakini alikataa shitaka la kwamba alikuwa muuzisha-vichapo. Tribinali ilikubaliana naye, na ikasema hivi: “Mushitakiwa . . . iko na uwezo wa kutosheleza mahitaji yake ya kifeza, na hakupata faida yoyote wala hakuwa na kusudi hilo. Lakini, inaonekana kwamba ni yeye ndiye amepoteza feza zake kwa sababu alitolea watu vichapo kwa bure.” Tribinali iliunga mukono Mashahidi wa Yehova na kuonyesha kwamba kazi ya ndugu Lehmann “haiwezi kulinganishwa na kazi ya biashara.” Hata hivyo, wapinzani wa watu wa Mungu, walikuwa wameazimia kuzuia kazi ya kuhubiri katika inchi yote. (Zab. 94:20) Kwa hiyo, muteteaji wa serikali kwenye tribinali, alipeleka mashitaka hayo kwenye Tribinali Kubwa ya inchi ya Danemark. Ndugu zetu walifanya nini?

20. Tribinali Kubwa zaidi ya Danemark ilitoa Uamuzi gani, na ndugu zetu walifanya nini?

20 Juma moja mbele ya siku ambayo Tribinali Kubwa Zaidi ingesikiliza mashitaka hayo, Mashahidi wa Yehova katika inchi yote ya Danemark waliongeza bidii yao katika kazi ya kuhubiri. Siku ya pili tarehe 3 Mwezi wa 10, 1933, Tribinali ilitoa uamuzi wake. Ilikubaliana na uamuzi ambao ulitolewa na tribinali ya muji wa Roskilde, kwamba ndugu Lehmann hakuvunja sheria. Uamuzi huo ulimaanisha kwamba Mashahidi wa Yehova wangeendelea kuhubiri kwa uhuru. Kwa hiyo, ndugu na dada waliongeza bidii yao katika mahubiri ili kuonyesha shukrani yao kwa Yehova ambaye aliwapatia ushindi huo wa kisheria. Kuanzia hapo mupaka leo, ndugu zetu katika inchi ya Denemark wameendelea kuhubiri habari njema bila kusumbuliwa tena na serikali.

Mashahidi wa Yehova wenye uhodari katika Danemark katika miaka ya 1930

21, 22. Tribinali Kubwa Zaidi ya Amerika ilitoa uamuzi gani juu ya mambo ambayo Ndugu Murdock alishitakiwa?

21 Amerika (États-Unis). Siku ya yenga tarehe 25 Mwezi wa 2, 1940, painia mumoja anayeitwa Robert Murdock, na Mashahidi wengine saba walifungwa wakati walikuwa wanahubiri katika muji wa Jeannette, muji ambao unapatikana karibu na muji wa Pittsburgh,  katika jimbo la Pennsylvania. Walishitakiwa kwamba walikataa kuuza kikaratasi cha serikali ambacho kingewaruhusu kutolea watu vichapo. Ndugu hao waliomba Tribinali Kubwa Zaidi ya inchi ya Amerika isikilize jambo hilo, na ikakubali kuwasikiliza.

22 Tarehe 3 Mwezi wa 5, 1943, Tribinali Kubwa Zaidi ya inchi ya Amerika ilitoa uamuzi ambao uliunga mukono Mashahidi wa Yehova. Tribinali ilipinga sheria ya kuomba Mashahidi kikaratasi ili kutolea watu vichapo, kwa sababu sheria hiyo “inaweza kumufanya mutu asifurahie haki yake ambayo amepewa na Katiba ya Serikali.” Tribinali ilivunja sheria hiyo na kuonyesha kwamba sheria hiyo “inafanya mutu asijisikie huru kueleza maoni yake na kwamba inavunja uhuru wa mutu wa kuchagua dini ambayo anataka.” Muamuzi William O. Douglas ambaye alieleza uamuzi ambao tribinali imechukuwa, alisema kwamba kazi ya Mashahidi wa Yehova “si kuhubiri tu; na kwamba si kugawia tu watu vichapo ambavyo vinazungumuzia mambo ya dini. Lakini kazi hiyo, inatia ndani mambo hayo mawili.” Alisema tena hivi: “Kazi hii ni sawasawa na  . . ile ya kuabudu katika kanisa na kuhubiri kwenye jukwaa.”

23. Sababu gani ushindi mbalimbali ambao tulipata katika mwaka wa 1943 ni wa maana sana kwetu leo?

23 Uamuzi huo ambao Tribinali Kubwa Zaidi ilitoa, ulikuwa ushindi mukubwa sana wa kisheria kwa watu wa Mungu. Ulihakikisha kwamba sisi si wachuuzi wa vitabu, lakini sisi ni watangazaji wa Ufalme. Siku hiyo ya mwaka wa 1943 ambayo hatuwezi kusahau,  Mashahidi wa Yehova walishinda mashitaka mengine 12 kati ya mashitaka 13, kutia ndani shitaka la ndugu Murdock ambalo lilipelekwa kwenye Tribinali Kubwa Zaidi. Maamuzi hayo ambayo yalitolewa, yametuwekea musingi wenye nguvu wakati wapinzani wetu walijaribu tena kutushitaki ili kupinga haki yetu ya kuhubiri ujumbe wa Ufalme waziwazi na nyumba kwa nyumba.

‘Lazima Tumutii Mungu Kuwa Mutawala Kuliko Wanadamu’

24. Tunafanya nini wakati serikali inakataza kazi yetu ya kuhubiri?

24 Sisi watu wa Yehova, tunafurahi sana wakati serikali inatupatia haki yetu ya kuhubiri ujumbe wa Ufalme kwa uhuru. Hata hivyo, wakati serikali inakataza kazi yetu ya kuhubiri, tunabadilisha njia zetu za kuhubiri na tunaendelea kuhubiri kwa njia yoyote ambayo tunaweza. Kama mitume, ni ‘lazima tumutii Mungu kuwa mutawala kuliko wanadamu.’ (Mdo. 5:29; Mt. 28:19, 20) Na kwa wakati huohuo tunapeleka mambo kwenye tribinali ili vizuizi kuhusu kazi yetu viondolewe. Acha tuchunguze mifano mbili.

25, 26. Sababu gani ndugu walienda kwenye Tribinali Kubwa Zaidi, na walipata matokeo gani?

25 Nikaragua. Tarehe 19 Mwezi wa 11, 1952, ndugu Donovan Munsterman, ambaye alikuwa misionere na pia mutumishi wa tawi alienda katika muji mukubwa, Managua, ili kujionyesha kwenye biro ambayo inachunguza mambo ya wageni ambao wanaingia katika inchi. Aliombwa aonane na kapteni Arnoldo García , ambaye alikuwa anasimamia biro hiyo. Kapteni huyo alimuambia ndugu Donovan kwamba Mashahidi wa Yehova “wamekatazwa kuhubiri mafundisho yao na pia kuendeleza kazi yoyote ya dini.” Wakati ndugu Donovan alimuuliza sababu, kapteni García alisema kwamba Mashahidi wa Yehova hawakupewa ruhusa na waziri (ministre) wa serikali ili kufanya kazi yao na kwamba walishitakiwa kuwa wakoministi. Ni nani ambaye aliwashitaki? Viongozi wa dini ya Kikatoliki ya Roma.

Ndugu katika inchi ya Nikaragua wakati kazi yetu ilikatazwa

26 Mara moja ndugu Donovan, alienda kumuona Waziri wa Serikali ambaye anashugulikia mambo ya Dini. Pia alienda kumuona  Raisi Anastasio Somoza García, lakini hakupata matokeo mazuri. Kwa hiyo, ndugu walibadilisha njia zao za kukusanyika na kuhubiri. Walifunga Jumba la Ufalme, wakaanza kukutana katika vikundi vidogo-vidogo, na wakaacha kufanya mahubiri ya barabarani. Hata hivyo, waliendelea kuhubiri ujumbe wa Ufalme. Wakati huohuo, walitia sinyatire kwenye kikaratasi ambacho kiliomba Tribinali Kubwa Zaidi ya Nikaragua ivunje sheria ambayo ilikuwa inakataza Mashahidi kufanya kazi yao. Magazeti ya inchi yaliandika sana kuhusu kukatazwa kwa Mashahidi na pia mambo ambayo yalikuwa katika kikaratasi ambacho walitia sinyatire. Kwa hiyo, Tribinali ya Nikaragua ikakubali kuwasikiliza. Walipata matokeo gani? Tarehe 19 Mwezi wa 6, 1953, waamuzi wote kwenye Tribinali hiyo walitoa uamuzi ambao uliunga Mashahidi wa Yehova mukono. Waamuzi wote waliona kwamba kukataza kazi ya Mashahidi wa Yehova kunavunja sheria ya katiba ya inchi ambayo inalinda uhuru wa mutu kueleza mawazo yake, kutumia zamiri, na kuelezea wengine mambo ambayo anaamini. Pia Tribinali hiyo iliamuru kwamba hali ya amani ambayo ilikuwa kati ya serikali ya Nikaragua na Mashahidi wa Yehova irudishwe.

27. Sababu gani uamuzi wa Tribinali uliwashangaza sana watu wa Nikaragua, na ndugu waliona ushindi huo namna gani?

27 Watu wa Nikaragua walishangaa sana kuhusu uamuzi huo ambao uliunga mukono Mashahidi. Mupaka wakati huo, uvutano wa viongozi wa dini ulikuwa wenye nguvu sana, na Tribinali iliepuka kuingia katika ugomvi na viongozi hao. Na pia, viongozi wa serikali walikuwa wenye nguvu sana, na mara nyingi ilikuwa vigumu kwa Tribinali kuenda kinyume na maamuzi yao. Hata hivyo, ndugu zetu walikuwa na uhakika kwamba walipata ushindi huo kwa sababu walilindwa na Mufalme wao na pia kwa sababu waliendelea kuhubiri.​—Mdo. 1:8.

28, 29. Ni mambo gani ambayo yalitendeka katika inchi ya Zaïre katikati ya miaka ya 1980?

28 Zaïre. Katikati ya miaka ya 1980, inchi ya Zaïre ambayo leo inaitwa Jamuhuri ya Kidemokrasia ya Congo, ilikuwa na wahubiri 35000 hivi. Kwa sababu ya ongezeko hilo kubwa, majengo mapya ya tawi yalikuwa yameanza kujengwa. Katika Mwezi wa 12, 1985, mukusanyiko wa Kimataifa ulifanywa katika muji mukuu wa Kinshasa. Na wahuzuriaji 32000 kutia ndani ndugu na dada kutoka sehemu mbalimbali za dunia walijaza uwanja mukubwa wa michezo wa muji huo. Lakini kisha hapo, hali ya Mashahidi wa Yehova ilianza kubadilika. Ni jambo gani lilitokea?

29 Ndugu Marcel Filteau, misionere kutoka Quebec, Kanada, ambaye alijionea mateso ambayo Mashahidi walipata Quebec, wakati wa uongozi wa Duplessis, alikuwa anatumikia katika inchi ya Zaïre wakati huo. Ndugu Marcel alieleza hivi: “Tarehe 12 Mwezi 3, 1986, ndugu ambao walikuwa wanaongoza walipokea barua ambayo ilionyesha kwamba dini ya Mashahidi wa Yehova imekatazwa kisheria katika Zaïre.” Barua hiyo ilitiwa sinyatire na Raisi wa inchi, Mobutu Sese Seko.

30. Ndugu wa halmashauri ya tawi walilazimika kufanya uamuzi gani mugumu sana, na walifikia uamuzi gani?

30 Siku ambayo ilifuata, radio ya taifa ilitoa tangazo hili: “Hata siku moja, Mashahidi wa Yehova hawatasikilika tena katika Zaïre.” Kisha tangazo hilo, Mashahidi walianza kuteswa kwa sababu ya imani yao. Majumba ya Ufalme yaliharibiwa, ndugu zetu walinyanganywa mali yao, walifungwa, na kupigwa. Hata watoto ambao walikuwa Mashahidi walifungwa. Tarehe 12 Mwezi wa 10, 1988, serikali  ilichukuwa mali ya tengenezo na Jeshi la Usalama la Mobutu likaanza kuishi kwenye majengo ya tawi. Ndugu ambao walikuwa wanaongoza wakati huo waliomba kuonana na Raisi Mobutu, lakini hawakupata jibu lolote. Halmashauri ya Tawi ililazimika kufanya uamuzi mugumu sana. Walipaswa kuamua ikiwa wataenda kwenye Tribinali Kubwa Zaidi ao kungojea kidogo. Ndugu Timothy Holmes, ambaye alikuwa misionere na muratibu wa Halmashauri ya Tawi wakati huo, alisema hivi: “Tulimuomba Yehova atuongoze na atupatie hekima.” Kisha kuzungumuzia jambo hilo na kusali, Halmashauri ya Tawi iliona kwamba si jambo la hekima kuenda kwenye Tribinali wakati huo. Kwa hiyo, walikazia zaidi namna ya kuwatia ndugu na dada moyo na kutafuta namna wanaweza kuendelea na kazi ya kuhubiri.

“Wakati jambo letu lilikuwa linachunguzwa na Tribinali, tuliona namna Yehova anaweza kubadilisha mambo”

31, 32. Tribinali Kubwa Zaidi ya Zaïre ilitoa uamuzi gani wa maana sana, na uamuzi huo uliwezesha ndugu zetu kufanya nini?

31 Kisha miaka fulani, haki za binadamu zilianza kuheshimiwa zaidi na mateso juu ya Mashahidi wa Yehova yalianza kupunguka. Ndugu wa Halmashauri ya Tawi waliona kwamba wakati ulikuwa umefika ili kuenda kwenye Tribinali Kubwa ya Sheria ya Zaïre. Jambo la kufurahisha ni kwamba, Tribinali Kubwa Zaidi ilikubali kuwasikiliza. Tarehe 8 Mwezi wa 1, 1993, ni kusema, kisha miaka saba hivi tangu Raisi akataze kazi yetu, Tribinali ilionyesha kwamba jambo ambalo serikali ilitendea Mashahidi wa Yehova ilikuwa kinyume na sheria na kwa hiyo, ikaturudishia uhuru wetu. Ilikuwa jambo la kushangaza sana! Waamuzi walitia maisha yao katika hatari kwa kuvunja uamuzi ambao Raisi wa inchi alikuwa ametoa. Ndugu Holmes alisema hivi: “Wakati jambo letu lilikuwa linachunguzwa na Tribinali, tuliona namna Yehova anaweza kubadilisha mambo.” (Dan. 2:21) Ushindi huo ulitia nguvu imani ya ndugu zetu. Walitambua kwamba Mufalme, Yesu, aliongoza watu wake ili wajue namna gani na wakati gani wangeenda kwenye Tribinali.

Mashahidi wa Yehova katika Jamuhuri ya Kidemokrasia ya Congo wanafurahia kuwa na uhuru wa kumuabudu Yehova.

 32 Kisha kuvuta sheria ambayo ilikuwa inakataza kazi yetu, biro ya tawi iliruhusiwa kualika tena wamisionere, kujenga majengo mapya ya tawi na kuingiza vichapo vyetu katika inchi. * Watumishi wa Mungu katika dunia yote ni wenye furaha sana kuona namna Yehova anaendelea kulinda hali ya kiroho ya watu wake.​—Isa. 52:10.

‘Yehova Ni Musaidizi Wangu’

33. Tunajifunza nini kutokana na ushindi mbalimbali wa kisheria ambao tulipata?

33 Ushindi wetu mbalimbali wa kisheria ambao tumetoka kuchunguza, unatuhakikishia kwamba Yesu ametimiza ahadi yake ambayo alitoa wakati alisema: “Nitawapa ninyi kinywa [maneno] na hekima, ambayo wapinzani wenu wote wakiwa pamoja hawataweza kushindana nayo wala kubisha.” (Soma Luka 21:12-15.) Mara kwa mara, Yehova amekuwa akitokeza watu walio kama Gamalieli ili walinde watu wake ao amechochea waamuzi na wateteaji wenye uhodari ili watetee haki. Yehova amezuia silaha za wapinzani zisifanye kazi. (Soma Isaya 54:17.) Upinzani hauwezi hata kidogo kuzuia kazi ya Mungu.

34. Sababu gani ushindi mbalimbali wa kisheria ambao tumepata ni wenye kushangaza sana, na ushindi huo unaonyesha nini? (Soma pia kisanduku “ Ushindi Mbalimbali wa Maana Ambao Ulifanya Kazi ya Kuhubiri Ufalme Isonge Mbele.”)

34 Sababu gani ushindi mbalimbali wa kisheria ambao tumepata ni wenye kushangaza sana? Fikiria kidogo mambo haya: Mashahidi wa Yehova si watu wenye kusifiwa sana ao wenye kuwa na uvutano sana. Hatufanye uchaguzi (vote), hatuunge mukono kampanye za kisiasa, na hatujaribu kuchochea wanasiasa. Na ndugu ao dada ambao wamepelekwa kwenye tribinali kubwa, mara nyingi ni watu ambao wanaonekana kuwa “wasio na elimu na wa kawaida tu.” (Mdo. 4:13) Kwa hiyo, kwa maoni ya kibinadamu, haingewezekana tribinali ziwapatie Mashihidi wa Yehova ushindi, na kuwafanya wapinzani wao wa kisiasa na wa kidini wenye nguvu nyingi washindwe. Hata hivyo, mara kwa mara tribinali zimekuwa zikitupatia ushindi! Ushindi mbalimbali wa kisheria ambao tumepata, umeonyesha wazi kwamba tunatembea “machoni pa Mungu, kwa kushirikiana na Kristo.” (2 Kor. 2:17) Kama mutume Paulo sisi pia tunasema maneno haya: ‘Yehova ni musaidizi wangu sitaogopa.’​—Ebr. 13:6.

^ fu. 9 Mashitaka ambayo Ndugu Cantwel alishitakiwa na Jimbo la Connecticut ndio yalikuwa ya kwanza kati ya mashitaka 43 ambayo Ndugu Hayden Covington alitetea kwenye Tribinali Kubwa Zaidi ya inchi ya Amerika. Ndugu Hayden alikufa katika mwaka wa 1978. Lakini bibi yake Dorothy, aliendelea kumutumikia Yehova kwa uaminifu mupaka mwaka wa 2015, wakati alikufa akiwa na miaka 92.

^ fu. 12 Mashitaka hayo yalitegemea sheria ambayo ilitolewa mwaka wa 1606. Sheria hiyo ilimuruhusu muamuzi kuhukumu mutu ikiwa anawaza kwamba mambo ambayo mutu alisema yalichochea chuki, hata ikiwa mambo ambayo yalisemwa yalikuwa ya kweli.

^ fu. 14 Katika mwaka wa 1950, kulikuwa watumishi wa wakati wote 164 katika Quebec. Kati yao, kulikuwa wamisionere 63 ambao walisoma masomo ya Gileadi na ambao walikubali mugao wao hata kama walijua kwamba watapambana na upinzani mukali.

^ fu. 15 Ndugu Glen How alikuwa muteteaji mwenye uhodari. Kuanzia mwaka wa 1943 mupaka mwaka wa 2003, ndugu huyo alitetea kwa ufundi Mashahidi wa Yehova wa Kanada na wa inchi zingine.

^ fu. 16 Unaweza kupata maelezo mengine juu ya habari hii katika gazeti Amuka! la tarehe 22 Mwezi wa 4, 2000, kwenye ukurasa wa 18-24, chini ya kichwa “Vita Si Yenu Bali Ni ya Yehova.”

^ fu. 32 Kisha muda fulani Jeshi la Usalama la Mobutu lilitoka katika majengo ya tawi, hata hivyo, majengo mengine mapya ya tawi yalijengwa mahali pengine.