Ona video zinazopatikana

Ona habari zilizo ndani

 BIBLIA INABADILISHA MAISHA YA WATU

Maisha Yangu Yaliendelea Kuwa Mabaya Sana

Maisha Yangu Yaliendelea Kuwa Mabaya Sana
  • ALIZALIWA MWAKA WA: 1952

  • INCHI : AMERIKA

  • ALIKUWA: MWENYE HASIRA KALI

MAISHA YANGU YA ZAMANI:

Nilikomalia katika muji wa Los Angeles, California, inchi ya Amerika, katika maeneo yenye yalijulikana kwa sababu ya vikundi vya barabarani vyenye kutendea watu mambo mabaya na kwa sababu ya dawa za kulewesha. Wazazi wangu walikuwa na watoto sita, mimi nilikuwa wa pili.

Mama yangu alitukomalisha katika kanisa la kievanjeli. Lakini, wakati nilikuwa kijana, nilikuwa ninaishi maisha ya unafiki. Kila Siku ya Yenga nilikuwa ninaimba pamoja na kikundi cha waimbaji wa kanisa. Na siku zingine za juma nilikuwa ninaenda kujifurahisha na marafiki wangu, nilikuwa ninatumia dawa za kulewesha na kufanya uasherati.

Nilikuwa mwenye hasira kali na ya haraka. Nilitumia kitu chochote kama silaha ili tu nipate ushindi. Mambo yenye nilijifunza kwenye kanisa hayakunisaidia. Nilikuwa ninasema hivi: “Kisasi ni cha Mungu, na ananitumia kulipiza kisasi!” Wakati nilikuwa kwenye masomo ya segondere katika mwisho ya miaka ya 1960, nilichochewa na kikundi kimoja cha kisiasa kinachoitwa Black Panthers chenye kilijulikana kwa sababu ya kupigania haki za watu. Nilijiunga na kikundi cha wanafunzi cha kupigania haki za watu. Mara nyingi tulikuwa tunafanya maandamano ili kupinga mambo yenye hatufurahie, na wakati huo tulikuwa tunafunga masomo kwa muda fulani.

Ilionekana kuwa kufanya maandamano ya kupinga hakukutosheleza tamaa yangu ya kutenda kwa jeuri. Kwa hiyo, nilianza kutendea wengine mambo mabaya kwa sababu ya chuki. Kwa mufano, wakati fulani mimi na rafiki zangu tuliangalia filme zenye kuonyesha mateso ya watumwa Waafrika katika inchi ya Amerika. Kwa sababu tulikasirishwa na ukosefu huo wa haki, tulipiga vijana wazungu wenye walikuwa katika jumba la kuonyeshea filme. Kisha tulienda katika maeneo ambamo wazungu wanaishi, ili kutafuta watu wengine wa kupiga.

Wakati nilikaribia miaka 20, mimi na ndugu zangu tulijulikana kuwa watu wenye kutendea wengine mambo mengi mabaya. Tulipata matatizo na polisi. Mudogo yangu mumoja mwanaume alikuwa katika kikundi chenye kilijulikana sana kwa sababu ya kutendea wengine mambo mabaya, na nikajiunga pia nao. Maisha yangu yaliendelea kuwa mabaya sana.

BIBLIA ILIBADILISHA MAISHA YANGU:

Wazazi wa rafiki yangu mumoja walikuwa Mashahidi wa Yehova. Walinialika kwenye mikutano yao ya Kikristo, na nikakubali. Bila kukawia, niliona kuwa Mashahidi wa Yehova walikuwa tofauti. Kila mutu alikuwa na Biblia na aliitumikisha wakati wa mikutano. Hata watoto walikuwa na habari za kutoa mbele ya watu wote! Nilishangaa kujua kuwa Mungu iko na jina, ni kusema, Yehova, na kusikia jina hilo linatumiwa. (Zaburi 83:18) Kwenye mikutano yao, kulikuwa watu wa inchi mbalimbali, lakini ilikuwa wazi kuwa hawakukuwa na ubaguzi wa rangi.

Mwanzoni sikupenda kujifunza Biblia pamoja na Mashahidi wa Yehova, lakini nilifurahia kuenda kwenye mikutano yao. Mangaribi moja, wakati nilikuwa kwenye mukutano wa Mashahidi wa Yehova, marafiki wangu walienda kusikiliza wachezaji wa muziki. Wakati walikuwa huko, walipiga kijana mumoja mupaka akakufa, kwa sababu alikataa kuwapatia koti yake. Kesho yake walijisifu kwa sababu waliua kijana huyo. Na wakati walisambishwa kwenye tribinali, hawakuona kuwa walikuwa wamefanya kosa kubwa. Wengi wao walihukumiwa kufungwa maisha yao yote katika gereza. Bila shaka, nilifurahi sana kwa sababu sikukuwa pamoja nao mangaribi hiyo. Niliamua kubadilisha maisha yangu na kuanza kujifunza Biblia.

Nilikuwa nimeona ubaguzi mwingi wa rangi. Kwa hiyo, mambo yenye niliona kwa Mashahidi wa Yehova yalinishangaza sana. Kwa mufano, wakati Shahidi mumoja muzungu alisafiri katika inchi ingine, aliacha watoto wake wachungwe katika familia ya Mashahidi weusi. Pia familia moja ya wazungu ilikaribisha katika nyumba yao kijana mweusi mwenye alikuwa na lazima ya mahali pa kuishi. Nikakuwa hakika kabisa kuwa Mashahidi wa Yehova ndio wanatimiza maneno haya ya Yesu katika andiko la Yohana 13:35: ‘Kwa jambo hili wote watajua kwamba ninyi ni wanafunzi wangu, mukiwa na upendo kati yenu wenyewe.’ Nilijua kuwa nimepata ndugu na dada wa kweli.

Wakati nilikuwa ninajifunza Biblia, nilianza kutambua kuwa nilipaswa kubadilisha mawazo yangu. Nilipaswa kufanya upya akili yangu ili niweze kutenda kwa amani, na pia niliona kuwa hayo ndiyo maisha ya muzuri. (Waroma 12:2) Pole kwa pole, nilifanya maendeleo. Katika Mwezi wa 1, 1974, nilibatizwa na kuwa Shahidi wa Yehova.

Nilipaswa kufanya upya akili yangu ili niweze kutenda kwa amani, na pia niliona kuwa hayo ndiyo maisha ya muzuri

Hata kisha kubatizwa, nilipaswa kuendelea kujikaza kuzuia hasira yangu. Kwa mufano, siku moja wakati nilikuwa katika mahubiri ya Kikristo ya nyumba kwa nyumba, nilifuata mwizi mwenye alikuwa ameiba radio katika motokari yangu. Wakati nilimukaribia, aliangusha radio hiyo na akakimbia. Wakati nilielezea wengine wenye tulikuwa nao namna nilipata tena radio yangu, muzee mumoja wa kutaniko aliniuliza hivi: “Stephen, ungefanya nini ikiwa ungekamata mwizi huyo?” Ulizo hilo lilinifanya nifikiri sana na lilinichochea niendelee kujikaza kutenda kwa amani.

Katika Mwezi wa 10, 1974, nikakuwa muhubiri wa wakati wote; nilikuwa ninafundisha watu Biblia kwa saa 100 kila mwezi. Kisha nilipata pendeleo la kujitolea kutumika kwenye makao makubwa ya Mashahidi wa Yehova yenye kuwa Brooklyn, New York. Katika mwaka wa 1978, nilirudi katika muji wa Los Angeles ili kumuchunga mama yangu mugonjwa. Miaka mbili kisha hapo, nilimuoa bibi yangu mupendwa, Aarhonda. Alinisaidia sana kuchunga mama yangu mupaka wakati mama yangu alikufa. Kisha wakati fulani, mimi na Aarhonda tulisoma Masomo ya Biblia ya Gileadi na tulitumwa Panama, na ni hapo tunaendelea kufanya kazi ya umisionere.

Tangu wakati nilibatizwa, nimepambana na hali nyingi zenye zingeweza kunifanya nitende kwa jeuri. Nimejifunza kutoka mahali ambapo watu wanajaribu kunichokoza, ao ninatumia njia zingine ili kufanya hali itulie. Watu wengi, na hata bibi yangu, wamenipongeza juu ya namna nilitenda katika hali hizo. Hata mimi mwenyewe ninashangaa kuona namna nimebadilika! Sijisifu juu ya mabadiliko yenye nimefanya. Lakini, ninaamini kuwa yanaonyesha kama Biblia iko na nguvu ya kubadilisha maisha ya watu.—Waebrania 4:12.

FAIDA YENYE NIMEPATA:

Biblia imenisaidia kuwa na maisha yenye maana, na imenifundisha kutenda kwa amani kabisa. Siwapige tena watu, lakini ninawasaidia kupona kiroho. Na hata nilifundisha Biblia mutu mwenye alikuwa adui yangu kwenye masomo ya segondere! Kisha yeye kubatizwa, tuliishi pamoja katika chumba kimoja kwa muda fulani. Mimi na yeye tuko marafiki wa karibu mupaka leo. Kufikia leo, mimi na bibi yangu tumesaidia watu zaidi ya 80 kuwa Mashahidi wa Yehova kwa kujifunza nao Biblia.

Mimi ni mwenye shukrani sana kwa Yehova kwa sababu amenisaidia kuwa na maisha yenye maana na yenye furaha katikati ya ndugu na dada wa kweli.