Ona video zinazopatikana

Ona habari zilizo ndani

 HABARI KUBWA | YESU ANATUOKOA—NAMNA GANI?

Sababu Gani Tuko na Lazima ya Kuokolewa?

Sababu Gani Tuko na Lazima ya Kuokolewa?

‘Mwanadamu, aliyezaliwa na mwanamuke, ana maisha mafupi na yenye kujaa musukosuko [taabu]. Amechanuka kama ua na kukatiliwa mbali, naye anakimbia kama kivuli wala haendelee kuwako.’—Ayubu 14:1, 2.

Tangu zamani watu wamewaza juu ya namna ingekuwa muzuri sana kuishi milele katika afya ya muzuri na bila kuzeeka. Lakini jambo la kuhuzunisha ni kwamba sisi wanadamu tunakufa. Ayubu alisema maneno yenye kuwa hapo juu kumepita miaka zaidi ya elfu tatu, lakini maneno hayo yangali ya kweli leo.

Tamaa ya kuishi milele ni yenye nguvu sana, na kila mutu iko na tamaa hiyo. Biblia inatuonyesha kuwa Mungu ametia tamaa ya kuishi milele katika mioyo yetu na pia tamaa ya kuelewa maana ya kuishi milele. (Mhubiri 3:11) Kwa hiyo, unaona kuwa ni jambo lenye kueleweka Mungu mwenye upendo aweke ndani yetu tamaa yenye haiwezekane kutimiza? Ikiwa unajibu hapana, haukosee. Neno la Mungu linasema kuwa kifo ni adui na linaahidi kuwa ‘kitaangamizwa.’—1 Wakorintho 15:26.

Bila shaka, kifo ni adui. Hakuna mutu mwenye akili sawa anayefurahia kifo. Wakati hatari inakaribia, tunaiepuka, tunajificha, ao kukimbia. Wakati tunagonjwa, tunatafuta namna ya kupona. Tunafanya kila jambo lenye tunaweza ili kuepuka mambo yenye yanaweza kutuletea kifo.

Kuna sababu yoyote ya kuamini kuwa adui huyo wa tangu zamani ataangamizwa kabisa? Ndiyo. Yehova Mungu, Muumbaji, hakuumba watu ili waishi tu miaka kidogo na kisha wakufe. Katika kusudi lake la mwanzoni, Mungu hakupenda watu wakufe. Alitaka watu waishi milele kwenye dunia, na anatimiza kila jambo lenye anakusudia.—Isaya 55:11.

Basi, namna gani kifo kitamalizwa? Tangu zamani, watu wamejikaza kumaliza kifo, lakini hawajaweza. Mupaka leo, watu wanaendelea kupiganisha kifo. Wanasayansi wamefanya chanjo (vaccin) na madawa yenye yamezuia magonjwa fulani. Wamechunguza kwa uangalifu muundo wa chembe za uriti za viumbe vyenye uzima. Katika maeneo mengi, inakadiriwa kuwa leo watu wanaishi miaka mingi kuliko katika miaka mia moja iliyopita. Lakini, kifo hakijamalizwa. Kama vile Biblia inasema, watu “wote wanarudi mavumbini.”—Mhubiri 3:20.

Habari ya muzuri ni hii: Hatupaswe kutegemea akili ya watu ili kumaliza tatizo hilo la muda murefu. Tayari Yehova Mungu amefanya mupango ili kutuokoa ao kutukomboa kutoka katika kifo, na mutu wa maana katika mupango huo ni Yesu Kristo.