Ona video zinazopatikana

Ona habari zilizo ndani

Je, ni lazima kuoa ao kuolewa ili kupata furaha?

Je, ni lazima kuoa ao kuolewa ili kupata furaha?

Wasomaji Wetu Wanauliza . . .

Je, ni lazima kuoa ao kuolewa ili kupata furaha?

▪ Je, Biblia inafundisha kama ni lazima uoe ao uolewe ili utosheke na upate furaha? Ikiwa mutu hachunguze Neno la Mungu vizuri, anaweza kuwaza kama linafundisha hivyo. Sababu gani?

Kulingana na kitabu cha Mwanzo, Mungu aliona kama ‘haikuwa vizuri’ Adamu abakie peke yake. Kwa hiyo, alimuumba Eva ili awe “kikamilisho” cha Adamu. (Mwanzo 2:18) Neno “kikamilisho” linamaanisha kile kinachofanya kitu kiwe kamili. Tunaweza kujidanganya kwa kuwaza kwamba andiko hilo linaonyesha kama mutu hajieneze ikiwa hajaoa ao hajaolewa. Tena, habari fulani zinazozungumuziwa katika Biblia, kama vile habari ya Ruthu, zinaonyesha kama ndoa inaleta baraka na furaha.

Lakini, je, habari hizo zinatufundisha kama leo ni lazima Wakristo wafunge ndoa na wazae watoto ili wapate fuhaha, wawe kamili, na watosheke? Hapana. Kwa mufano, Yesu Kristo alibaki bila kuoa maisha yake yote; lakini yeye ndiye aliyekuwa mutu kamili zaidi na mwenye kutosheka zaidi. Yesu, aliyekuwa mwenye hekima kuliko watu wote, alikuwa pia mufano mukamilifu wa Yehova, “Mungu mwenye furaha.” (1 Timotheo 1:11; Yohana 14:9) Yesu alitaja mambo yanayomufanya mutu awe mwenye furaha ao mwenye kubarikiwa. (Mathayo 5:1-12) Lakini kati ya mambo hayo hakutaja ndoa.

Sasa, ni kusema kama Biblia inajipinga katika jambo hilo? Hapana. Ili tuelewe vizuri, ni lazima tuchunguze ndoa kupatana na kusudi la Yehova. Wakati Mungu alianzisha ndoa, kusudi lake lilikuwa kwamba ndoa iwaletee watu furaha, urafiki na faraja, na wakati fulani ndoa ilikuwa mupango wa lazima ili kutimiza mapenzi yake. Kwa mufano, kusudi la Mungu lilikuwa kwamba Adamu na Eva ‘wazae, wawe wengi, na wajaze dunia.’ (Mwanzo 1:28) Adamu hangeweza kutimiza kusudi la Mungu peke yake, Eva pia hangeweza. Kila mumoja alikuwa na lazima ya mwengine ili kutimiza kusudi la Mungu.

Vilevile, wakati Yehova alipokuwa anashugulika na taifa la Israeli, alikuwa na kusudi la pekee juu ya ndoa na maisha ya familia. Alitaka watu wake wawe wengi ili wasishindwe na maadui zao. Tena alitaka kabila la Yuda litokeze Masiya, ambaye alipaswa kuwakomboa watu waaminifu kutoka katika zambi na kifo. (Mwanzo 49:10) Ndio sababu wanawake waaminifu wa Israeli waliona kuolewa na kuzaa watoto kuwa pendeleo kubwa; na lilikuwa jambo la haya na la huzuni ikiwa mwanamuke hakuolewa na kuzaa.

Tuseme nini leo? Je, amri ya Mungu ya ‘kujaza dunia’ inawalazimisha Wakristo waoe na wazae watoto hata kama dunia imejaa watu? Hapana. (Mathayo 19:10-12) Leo unabii juu ya Masiya umekwisha kutimia, kwa hiyo, hakuna tena lazima ya kukinga kizazi cha Masiya ao kulinda taifa ambamo mukombozi angepaswa kuzaliwa. Sasa, Wakristo wanapaswa kuwa na mawazo gani juu ya kufunga ndoa ao kutofunga ndoa?

Kwa kweli, tunaweza kusema kama kufunga ndoa ao kutofunga ndoa ni zawadi kutoka kwa Mungu. Kama unavyojua, mutu mumoja anaweza kuwa na lazima ya kufunga ndoa lakini mwengine anaweza kuwa mwenye furaha na mwenye kutosheka hata kama iko peke yake. Ndoa ni mupango mutakatifu unaoweza kutusaidia kupata upendo, urafiki na ni musingi unaofaa ili kuanzisha familia. Tena, Biblia inasema wazi kama wale wanaofunga ndoa katika ulimwengu huu wa magumu watapata matatizo, ao ‘ziki katika mwili wao.’ Pia, Yehova haone kutofunga ndoa kuwa jambo la haya ao la huzuni. Lakini Neno lake linasema kama wale ambao hawafunge ndoa wana faida fulani kuliko wale waliofunga ndoa.​—1 Wakorintho 7:28, 32-35.

Kwa hiyo, Biblia haitie moyo ao haikataze mutu kufunga ndoa ao kutofunga ndoa. Yehova, aliyeanzisha ndoa na familia, anataka watumishi wake wote wawe na furaha na watosheke, iwe ni wenye kufunga ndoa ao hapana.