NDEGE wenye kuruka juu sana wanaweza kubaki angani bila kutumia nguvu nyingi. Albatrosi anayehama​-hama ni mufano muzuri sana katika jambo hilo. Akiwa na mabawa yenye upana wa meta 3.4 na uzito wa kilogramu 8.5, ndege huyo Albatrosi anaweza kuruka maelfu ya kilometa kwa kutumia nguvu chache sana! Siri yake inapatikana katika muundo wa mwili wake na katika ufundi wake wa kuruka juu sana.

Fikiria jambo hili: Anapokuwa akiruka angani, ndege huyo albatrosi anatumia kano ao misuli ya pekee ya mwili wake ambayo inafanya mabawa yake yabaki yenye kunyooshwa kabisa, na hivyo kufanya misuli ya sehemu zingine za mwili isifanye kazi yoyote. Siri nyingine ya ndege huyo ya kuruka juu sana kwa saa nyingi inahusu ufundi wake wa kujua kuruka juu ya bahari kufuatana na namna upepo unavyoenda.

Wakiwa kwenye bahari, ndege hao albatrosi wanapanda juu angani, wanazunguka, na kushuka na wanafanya muzunguko huo tena na tena. Ufundi huo wa kuruka unawasaidia ndege hao wapate tena nguvu za kutosha ambazo walitumia wakati walisafiri. Ni hivi karibuni tu ndipo wanasayansi walielewa namna ndege hao wanavyofanya jambo hilo. Kwa kutumia vyombo vya uchunguzi vya hali ya juu na programu za pekee za kompyuta ao ordinatere, wanasayansi hao walivumbua kwamba ndege hao albatrosi wanapata nguvu mupya ambazo wanahitaji wakati wanazunguka tena na tena kufuatana na namna upepo unavyoenda na kisha wanapanda tena juu zaidi. Wanasayansi wanasema kwamba ndege hao “wanapata nguvu mupya kwa njia nyepesi sana na yenye kuendelea.” Wanapata matokeo gani? Ndege anaweza kuruka juu sana kwa saa nyingi bila kupiga​-piga mabawa yake!

Kujua mambo hayo kuhusu ndege huyo kunaweza kusaidia mafundi kutengeneza vyombo vinavyoruka angani ambavyo havitumie mafuta mengi, labda hata ambavyo vinajisukuma vyenyewe bila mashini.

Unawaza namna gani? Je, namna ya kuruka ya ndege albatrosi ambayo haitumie nguvu nyingi, na pia muundo wa pekee wa mwili wake, mambo yote hayo yalijifanya yenyewe? Ao ni kazi ya uumbaji?