JINA nzuri, ao sifa nzuri ya mutu, ni ya maana sana hivi kwamba katika inchi fulani inalindwa na sheria. Hilo linaweza kutia ndani kulindwa kutokana na uchongezi (ikuwe kupitia machapisho, maneno ao vyombo vya habari). Hilo linatukumbusha maneno haya ya zamani: ‘Ni afazali kuchagua jina badala ya utajiri mwingi; kibali ni bora kuliko hata feza na zahabu.’ (Methali 22:1) Namna gani tunaweza kupata jina nzuri na kuheshimiwa na wengine? Biblia inatupatia mashauri mazuri.

Kwa mufano, tuone mambo yenye Biblia inasema katika Zaburi 15. Ili kujibia ulizo, ‘Ni nani atakayekuwa mugeni katika hema [la Mungu]?’ muandikaji wa zaburi aliandika hivi: ‘Yeye . . . anayezoea kutenda uadilifu na kusema kweli katika moyo wake. Yeye hakuchongea . . . , hakumufanyia mwenzake jambo lolote baya, wala hakumushutumu rafiki yake. Machoni pake mutu yeyote mwenye kuzaraulika hakika amekataliwa . . . Ameapa juu ya jambo lililo baya kwake, na bado yeye habadiliki. . . . Wala hakuchukua rushwa.’ (Zaburi 15:1-5) Hautapenda kumuheshimia mutu mwenye kuishi kulingana na kanuni hizo?

Sifa ingine yenye inaweza kufanya mutu aheshimiwe na wengine ni unyenyekevu. Methali 15:33 inasema hivi: “Kabla ya utukufu hutangulia unyenyekevu.” Fikiria jambo hili: Mutu munyenyekevu anaona wapi anaweza kufanya mabadiliko na anajikaza sana ili kuyafanya. Tena iko tayari kuomba musamaha kama anakosea mutu fulani. (Yakobo 3:2) Tofauti na mutu huyo, mutu mwenye kiburi anakasirika haraka. Methali 16:18 inasema hivi: “Kiburi hutangulia kuanguka, na roho ya majivuno hutangulia kujikwaa.”

Sasa, tuseme nini kama mutu fulani anachafua jina lako nzuri? Utatenda haraka, pengine wakati ungali mwenye kukasirika? Ujiulize hivi: ‘Kama najaribu kutetea jina langu, sitasaidia kufanya uongo huo uenee zaidi?’ Hata kama wakati fulani inaweza kufaa kushitaki mutu kwenye tribinali, Biblia inatoa shauri hili lenye hekima: “Usiende kwa haraka kufanya kesi.” Kuliko kufanya hivyo, “jitetee kwa mwenzako.” (Methali 25:8, 9) * Kutengeneza mambo katika njia hiyo, kunaweza kukuepusha usipoteze feza nyingi zenye ungelipa kwenye tribinali.

Biblia haiko tu kitabu cha mambo ya dini. Ni kitabu chenye kutegemeka ambacho kinaleta muongozo kuhusu maisha. Wote wenye wanatumikisha hekima yake wanakuwa na sifa zenye kufanya mutu aheshimiwe na hilo linachangia kuwa na jina nzuri.