Vipimo vya ufikikaji

Chagua lugha

Hamia kwenye menyu ya pili

Hamia kwenye habari

Mashahidi wa Yehova

Kiswahili

Majumba 3,000 ya Ufalme Yajengwa Nchini Nigeria

Jumamosi, Machi 1, 2014, umati wa watu 823 walikusanyika kwa shangwe katika Jumba la Kusanyiko la Mashahidi wa Yehova lililo katika jiji la Benin City ili kuadhimisha tukio la kihistoria nchini Nigeria. Tangu mpango wa kujenga Majumba ya Ufalme kwenye nchi zilizo na uwezo mdogo kifedha ulipoanzishwa mwaka wa 1999, Mashahidi wa Yehova wamejenga Majumba 3,000 ya Ufalme nchini Nigeria.

Kabla

Mkutano huo ulitia ndani historia fupi ya kazi iliyohusika katika kutafuta sehemu za kufanyia mikutano kwa ajili ya makutaniko nchini Nigeria tangu miaka ya 1920. Mwanzoni, nyumba za watu binafsi na kumbi za kukodi zilitumiwa. Jumba la kwanza kabisa ambalo lilitumiwa na Mashahidi wa Yehova pekee yao kufanyia mikutano, lilikuwa jumba lililojengwa katika jiji la Ilesa, katika mwaka wa 1935 hivi. Kati ya mwaka wa 1938 na 1990, idadi ya makutaniko iliongezeka kwa karibu mara 200 hivi, kutoka 14 hadi 2,681, na ikawa vigumu kwa makutaniko kupata mahali pa kukutania. Baadhi ya Majumba ya Ufalme yalitumiwa na makutaniko sita. Kwingineko, hudhurio lilikuwa kubwa kuliko ukubwa wa jumba hivi kwamba watu walilazimika kusimama nje na kusikiliza mikutano kupitia madirisha. Lakini bado makutaniko mengi yaliendelea kukutanika ndani ya nyumba za watu binafsi na katika madarasa ya shule.

Baada

Mwaka wa 1990, ofisi ya tawi ya Mashahidi wa Yehova ilianza kutegemeza ujenzi wa Majumba ya Ufalme kwa kutoa mikopo kupitia mpango wa Hazina ya Majumba ya Ufalme. Kufikia mwaka wa 1997, Halmashauri za Ujenzi wa Kimkoa zilisaidia makutaniko 105 kujenga au kurekebisha majumba yao. Majumba 13 yaliyojengwa kati ya mwaka wa 1997 hadi mwaka wa 1999, yalijengwa ndani ya siku 7 hadi 15 tu.

Hata baada ya ujenzi huo wa haraka, bado ilikuwa vigumu kuendelea kukimu idadi iliyoongezeka ya Mashahidi wa Yehova nchini Nigeria. Katika Aprili 1998, ofisi ya tawi ilikadiria kwamba Majumba ya Ufalme 1,114 yalihitajika katika nchi hiyo.

Akizungumza katika mkutano huo wa pekee jijini Benin City, Don Trost, mshiriki wa Halmashauri ya Tawi ya Nigeria, aliwaambia hivi wasikilizaji: “Ulikuwa mradi mkubwa sana! Tulijiuliza, ‘Tutaukamilishaje?’” Kuanzia mwaka wa 1999, swali hilo lilijibiwa Vikosi vya Ujenzi wa Majumba ya Ufalme vyenye watu sita hadi nane vilipoanza kusaidia makutaniko kotekote katika nchi hiyo. Kwa kutumia miundo rahisi, vikosi hivyo vimejenga kwa wastani majumba 17 kila mwezi kwa miaka 14 iliyopita.

Baada ya kuwapongeza wasikilizaji kwa yale yaliyotimizwa, Ndugu Trost alieleza kwamba bado kuna mengi ya kufanya. Mwaka wa 2013 kwa wastani, idadi ya Mashahidi wa Yehova nchini Nigeria iliongezeka kwa zaidi ya watu 8,000. Aliendelea kusema hivi: “Ili kukimu ukuzi wa wakati ujao, Majumba 100 ya Ufalme yatahitajiwa kila mwaka.” Katika mwaka wa 2013 kulikuwa na kilele cha Mashahidi 351,000 katika makutaniko zaidi ya 5,700 nchini Nigeria.

Pata Kujua Mengi Zaidi

Majumba ya Ufalme ya Mashahidi wa Yehova—Yanajengwa Jinsi Gani na kwa Nini?

Kwa nini sehemu zetu za ibada zinaitwa Majumba ya Ufalme? Jifunze mengi zaidi kuhusu jinsi sehemu hizi za ibada zisizo na madoido mengi zinavyosaidia makutaniko ya Mashahidi wa Yehova.

Kwa Nini Mashahidi wa Yehova Hawapaiti Mahali Pao pa Ibada Kanisa?

Soma uone maneno “Jumba la Ufalme la Mashahidi wa Yehova” yalitoka wapi na kwa nini sisi huyatumia.