Vipimo vya ufikikaji

Chagua lugha

Hamia kwenye menyu ya pili

Hamia kwenye habari

Mashahidi wa Yehova

Kiswahili

Kufanya Kazi Pamoja na Mashahidi wa Yehova Katika Ujenzi wa Warwick

Kufanya Kazi Pamoja na Mashahidi wa Yehova Katika Ujenzi wa Warwick

Watu wengi wanastaajabishwa sana na roho ya kujidhabihu ya wajenzi wanaojitolea katika mradi wa Warwick. Mkurugenzi wa kampuni iliyounganisha lifti katika majengo alimweleza mjitoleaji mmoja hivi: “Kikosi chenu kinatimiza kazi kubwa. Leo watu wengi hawatumii muda wao katika kazi za kujitolea.”

Mwanamume huyo na wengine waliposikia kwa mara ya kwanza kwamba idadi kubwa ya wafanyakazi watakaojenga makao makuu ya Mashahidi wa Yehova Warwick, New York, ni wajitoleaji, walifikiri kwamba wajitoleaji hao wangekuwa wanafanya kazi mwisho juma tu. Walishangazwa kukutana na watu waliotoka katika maeneo mbalimbali ya nchini Marekani ambao waliacha kazi zao ili kufanya kazi katika mradi huo kwa miezi kadhaa na hata kwa miaka kadhaa.

Kufikia mwishoni mwa mwaka wa 2015, jumla ya Mashahidi 23,000 hivi walikuwa wamejitolea katika mradi wa ujenzi wa Warwick wakishirikiana na familia ya Betheli ya Marekani. Isitoshe, wajenzi 750 hivi ambao si Mashahidi wa Yehova walishiriki katika mradi huo wakisaidia ujenzi uende kulingana na ratiba. Kufanya kazi pamoja na Mashahidi wa Yehova kuliwavutia sana wajenzi hao.

Mazingira Mazuri ya Kazi

Msimamizi wa kazi katika kampuni inayotengeneza madirisha na kuta aliandika hivi: “Watu wote wa kampuni yetu ambao walifanya kazi katika mradi huu wa ujenzi wamestaajabishwa na mtazamo wa watu waliofanya nao kazi. Kwa sababu hiyo tunafurahia kufanya kazi kwenye mradi huu.”

Kampuni nyingine ilitoa wafanyakazi waliojenga mihimili ya majengo ya makazi. Kampuni hiyo ilipokamilisha kazi yake, wafanyakazi watatu wa kampuni hiyo waliazimia kuendelea na kazi kwenye mradi huo wa Warwick. Wakaacha kazi zao na kujiunga na kampuni nyingine iliyokuwa inaendelea na kazi katika eneo hilo la ujenzi.

Sifa za Kikristo zilizoonyeshwa na Mashahidi zilikuwa na matokeo mazuri kwa baadhi ya wafanyakazi. Mwanamume mmoja alifanya kazi katika kampuni iliyoweka misingi ya majengo. Baada ya mwanamume huyo kufanya kazi Warwick kwa miezi michache, mke wake aliona badiliko kubwa la mtazamo na lugha ambayo mume wake alitumia. Akiwa amefurahi, alisema hivi, “Ninashindwa hata kumtambua!”

“Wale Wanawake Mashahidi Watakuja”

Mashahidi wengi waliofanya kazi katika mradi huu wa ujenzi walikuwa wanawake. Waliendesha mabasi, kusafisha vyumba, na kufanya kazi za ukarani. Pia, waliongoza magari barabarani, waliendesha mashine kubwa, waliunganisha nyaya za mawasiliano, kufunika mabomba ili yasiharibiwe na baridi kali, kujenga kuta, kuweka mifumo ya mabomba, na kumwaga zege. Walifanya kazi kwa bidii.

Fundi mmoja wa kuezeka paa ambaye si Shahidi aliguswa moyo kuwaona baadhi ya wenzi wa ndoa wakishuka kutoka kwenye mabasi wakielekea kazini huku wakiwa wameshikana mikono. Pia, alijionea wanawake wakifanya kazi kwa bidii sana katika mradi huo. Alisema hivi: “Mara ya kwanza unapowaona unaweza kufikiri kwamba wanawake hao wamewasindikiza tu waume zao. Lakini unapofika wakati wa kazi, wanaifanya kikamili! Nimefanya kazi za ujenzi katika maeneo mengi ya New York City, lakini sijawahi kuona jambo kama hili.”

Kulikuwa na baridi kali kuliko ilivyo kawaida katika majira ya baridi kali ya mwaka 2014/2015, na mtu angeweza kutamani kubaki nyumbani badala ya kufanya kazi siku nzima kwenye hali hiyo ya hewa. Jeremy, Shahidi aliyehusika katika kazi ya kusimamia ujenzi, anaeleza hivi: “Baridi ilipokuwa kali sana, msimamizi wa kujenga misingi ya majengo wa kampuni moja aliniuliza hivi: ‘Je, wanawake wenu watafanya kazi kesho?’

“‘Ndiyo.’

“‘Hata wale wanaosimama nje ili kuongoza magari barabarani?’

“‘Ndiyo.’

“Baadaye alisema kwamba aliwaambia wanaume wa kampuni yake waje kazini kwa sababu wale wanawake Mashahidi watakuja!”

Madereva wa Mabasi Wafurahia Kazi

Zaidi ya madereva 35 wa mabasi walikodishwa ili kusafirisha wajitoleaji wa mradi wa Warwick mpaka katika eneo la ujenzi.

Kabla ya safari moja kuanza, dereva alinyanyuka na kuwatazama abiria na kusema hivi: “Ninafurahia sana kuwaendesha ninyi Mashahidi. Tafadhali mtumieni mwajiri wangu barua-pepe ili niendelee kuwaendesha ninyi. Nimejifunza mambo mengi kuhusu Biblia kutoka kwenu. Kabla ya kukutana nanyi, sikujua jina la Mungu au kwamba kutakuwa na paradiso duniani. Kwa sasa nimeacha kuogopa kifo. Kipindi hiki pamoja nanyi kimekuwa cha pekee kwangu. Mtaniona katika Jumba la Ufalme siku yangu ya mapumziko.”

Damiana, Shahidi aliyefanya kazi Warwick, alisema hivi: “Siku moja sote tulipokuwa tumepanda basi, dereva wetu alitangaza kwamba alikuwa na maneno machache ya kutueleza. Alisema kwamba alikuwa amewasafirisha Mashahidi 4,000 hivi kutoka katika vituo vyetu mbalimbali vya New York. Kisha akasema hivi: ‘Sisi sote tumepungukiwa kwa njia moja au nyingine, lakini ninyi mnajitahidi kusuluhisha tofauti zenu, na kufanya kazi bega kwa bega. Hilo ni jambo zuri sana.’ Pia akasema kwamba anafurahia kuzungumza nasi.

“Alipomaliza kusema hayo, Shahidi mmoja akamuuliza hivi: ‘Je, unapenda tunapoimba?’

“Akajibu huku akicheka na kusema, ‘Ndiyo! Tuanze kuimba wimbo namba 134?’” *

^ fu. 22 Wimbo 134 katika kitabu Mwimbieni Yehova, una kichwa “Jiwazie Wakati Vitu Vyote Vitakuwa Vipya.” Wimbo huo unaeleza kuhusu shangwe ambayo wale watakaoingia katika ulimwengu mpya wa Mungu watapata.

Pata Kujua Mengi Zaidi

Betheli Ni Nini?

Betheli ni mahali pa pekee sana panapotimiza lengo la maana sana. Jifunze mengi kuhusu wale wanaofanya kazi Betheli.

Mashahidi wa Yehova Ni Watu wa Aina Gani?

Unawafahamu Mashahidi wangapi wa Yehova? Unajua nini hasa kutuhusu?