Vipimo vya ufikikaji

Chagua lugha

Hamia kwenye menyu ya pili

Hamia kwenye habari

Mashahidi wa Yehova

Kiswahili

Video Zinazochangamsha Mioyo

Video Zinazochangamsha Mioyo

“Ni kana kwamba Yehova alikuwa akisikiliza mioyo ya wazazi.” Hivyo ndivyo alivyosema baba mmoja huko Malasia kuhusu mfululizo wa video fupi za vibonzo Uwe Rafiki ya Yehova.

Tangu visehemu vya kwanza vilipotolewa, Mashahidi wa Yehova wametengeneza mfululizo wa video fupi za vibonzo zinazomhusu Caleb na familia yao. Video hizo, ambazo sasa zinapatikana kwenye Tovuti ya jw.org, zinawafundisha watoto mambo muhimu ya kimaadili na ya kiroho, kama vile kwa nini hawapaswi kuiba na jinsi wanavyoweza kusali kwa Mungu.

Video ya kwanza katika mfululizo huo tayari imetafsiriwa katika lugha 131 na hilo limewanufaisha watoto ulimwenguni pote.

Watu Wamezifurahia Sana

Mama mwenye watoto watano aliandika hivi: “Tangu tulipopata DVD Sikiliza, Tii, Upate Baraka juma moja lililopita, tumeitazama mara 50 hivi.”

Millie, mwenye umri wa miaka 12 kutoka Uingereza, ana kaka yake mwenye umri wa miaka 15 anayeitwa Thomas ambaye anaugua ugonjwa wa Down syndrome. Millie aliandika hivi: “Thomas ana video za Caleb kwenye kompyuta yake ndogo ya mkononi, naye huwaonyesha rafiki zake shuleni. Anapenda nyimbo zilizo katika video hizo naye huziimba vizuri sana hivi kwamba dada mmoja alitokwa na machozi alipomsikia akiziimba. Inafurahisha sana kumwona akifanya hivyo.”

Ava, aliyejitambulisha kuwa ana umri wa miaka 8, miezi 9, na siku 25, aliandika hivi: “Caleb na dada yake wanawaelimisha sana watoto.”

Mikaylah aliandika: “Nina umri wa miaka sita. Asanteni kwa DVD ya Sikiliza, Tii, Upate Baraka. Inanifundisha niwasikilize wazazi wangu kwa sababu hilo linamfurahisha Yehova.”

Habari Zenye Maana

Kijana anayetengeneza video za vibonzo ambaye si Shahidi wa Yehova alitazama video ya Ni Vibaya Kuiba. Aliguswa moyo sana hasa alipojua kwamba ni watu wachache walioshiriki kutengeneza video hiyo. Alisema: “Ninajua watu ambao hufanya kazi kwenye studio kubwa na ndogo za kutengeneza video za vibonzo, na nimetamani kufanya kazi katika studio hizo. Lakini mwishowe, kazi na jitihada yao huishia kutengeneza kitu kinachochekesha kidogo kwa saa chache halafu basi. Video zenu za vibonzo zinabadilisha maisha ya watoto, zinawafundisha kutofautisha kati ya lililo sawa na kosa, na zinawasaidia kufanya maamuzi mazuri. Mnafanya jambo muhimu, kazi yenu inawasaidia watu.”

Wazazi ulimwengu pote wanakubaliana na jambo hilo. Mama mmoja aliandika hivi: “Mwana wangu mwenye umri wa miaka mitatu anayeitwa Quinn alikuwa akitazama video Kufanya Urafiki na Yehova. Katikati ya wimbo huo, aliniangalia, akaweka mkono wake mdogo kifuani pake na kusema: ‘Mama, moyo wangu unafurahia sana kutazama video hii.’ ”