Hamia kwenye habari

Hamia kwenye menyu ya pili

Mashahidi wa Yehova

Kiswahili

Biblia Iliyotengenezwa Idumu

Biblia Iliyotengenezwa Idumu

Biblia ndicho kitabu muhimu zaidi kwa Mashahidi wa Yehova. Wao hujifunza Biblia kwa ukawaida na kuitumia kuwafundisha wengine kuhusu habari njema ya Ufalme wa Mungu. (Mathayo 24:14) Kwa sababu hiyo, Biblia zao huchakaa haraka. Hivyo, Mashahidi walifanya jitihada nyingi ili kuhakikisha kwamba Biblia iliyosahihishwa ya Tafsiri ya Ulimwengu Mpya (NWT) toleo la mwaka wa 2013 inavutia na inadumu kwa muda mrefu.

Biblia hiyo mpya ilipaswa kuwa thabiti. Wawakilishi wa Mashahidi wanaoshughulikia kazi ya uchapishaji huko Wallkill, New York, Marekani, walipozungumzia mipango yao pamoja na msimamizi wa kampuni moja ya kujalidi vitabu, msimamizi huyo aliwaambia hivi, “Biblia mnayotafuta haiwezi kupatikana.” Kisha akasema: “Ni jambo lenye kuhuzunisha sana na la kweli kwamba Biblia nyingi zimetengenezwa ili zionekane maridadi na zenye kuvutia juu ya meza au kwenye maktaba—na si ili zidumu kwa muda mrefu.”

Baadhi ya matoleo ya awali ya Tafsiri ya Ulimwengu Mpya yalitengenezwa kwa njia ambayo hayangedumu kwa muda mrefu—hata wakati mwingine karatasi za Biblia hizo zilianza kutoka wakati wa joto kali sana. Wachapishaji walichunguza vifaa vya kutengeneza majalada, gundi, na mbinu mbalimbali za kujalidi vitabu katika jitihada za kutokeza Biblia ambayo ingestahimili hali tofauti tofauti za hewa inapotumiwa. Kwa kutegemea utafiti waliofanya, walitengeneza Biblia za majaribio ili zitumiwe na Mashahidi walio katika maeneo ambapo hali ya hewa huwa kama ile ya Tropiki yenye joto kali na pia katika maeneo yenye baridi kali kama Alaska.

Baada ya miezi sita, Biblia hizo zilirudishwa ili zichunguzwe. Wachapishaji waliiboresha tena na kisha wakatuma Biblia nyingine ili zifanyiwe majaribio. Kwa ujumla, Biblia 1,697 zilijaribiwa. Katika matukio yasiyotazamiwa, Biblia nyingine ziliwekwa kwenye hali zisizofaa. Kwa mfano, Biblia moja iliachwa nje na ikanyeshewa na mvua usiku kucha, hali nyingine ilizama ndani ya maji ya kimbunga. Matokeo ya majaribio hayo na hali hizo zisizotazamiwa yalisaidia sana kujua ikiwa Biblia hiyo ingedumu au la.

Mwaka 2011, majaribio hayo yalipokuwa yakiendelea, Mashahidi walinunua mashine mpya za kujalidi vitabu zenye mwendo wa kasi ili zitumiwe kwenye viwanda vya uchapishaji vilivyoko Wallkill na Ebina, Japani. Lengo halikuwa tu kuchapisha Biblia za kutosha bali pia kuchapisha Biblia zinazofanana kutoka katika maeneo yote mawili.

Majalada Yanayojipinda Yasababisha Matatizo

Mwanzoni mwa mwaka wa 2012, viwanda hivyo viwili vilianza kutumiwa kuchapisha toleo la awali la Biblia ya Tafsiri ya Ulimwengu Mpya ya rangi nyeusi na nyekundu iliyokoza kwa kutumia majalada yaliyotengenezwa kwa plastiki inayozuia joto na maji kupenya. Hata hivyo, mashine hizo mpya zilitumia gundi na vitu vya kutengenezea majalada ambavyo havikuwa vimefanyiwa majaribio. Majalada yaliyotengenezwa yalijipinda sana yalipounganishwa na Biblia. Jitihada za kutatua tatizo hilo hazikufaulu, hivyo uchapishaji ulisimamishwa.

Watengenezaji wa baadhi ya vitu vinavyotumiwa kutengenezea majalada walisema kwamba kujipinda huko ni tatizo ambalo huwa hasa kwa majalada mepesi na si rahisi kulisuluhisha. Hata hivyo, badala ya kutumia majalada magumu, Mashahidi walikuwa wameazimia kuchapisha Biblia yenye jalada jepesi na inayovutia. Baada ya miezi minne ya majaribio yaliyotia ndani kuchanganya gundi za aina mbalimbali pamoja na vitu vya kutengenezea majalada, walipata mchanganyiko ambao ungesaidia kutokeza majalada mepesi yasiyojikunja na kwa sababu hiyo kazi ya uchapishaji wa Biblia ikaanza tena.

Kazi ya Uchapishaji Inasimamishwa Tena

Mnamo Septemba 2012, wachapishaji waliagizwa wasimamishe uchapishaji wa toleo la awali la Tafsiri ya Ulimwengu Mpya, wakaagizwa wagawe nakala zote walizokuwa wamechapisha, kisha wasubiri ili waanze kuchapa toleo lililofanyiwa marekebisho la Biblia hiyo. Biblia hiyo mpya ingetolewa Oktoba 5, 2013, katika mkutano wa kila mwaka wa Watch Tower Bible and Tract Society of Pennsylvania.

Wachapishaji walipokea faili za kielektroniki za Biblia hiyo Ijumaa, Agosti 9, 2013, na uchapishaji ukaanza siku iliyofuata. Walichapisha Biblia ya kwanza iliyokamilika Agosti 15. Kwa majuma saba yaliyofuata, wafanyakazi katika viwanda vya Wallkill na Ebina walifanya kazi usiku na mchana ili kuchapisha na kusafirisha Biblia zaidi ya 1,600,000, ili wahudhuriaji wote wa programu ya mkutano wa kila mwaka wapate nakala zao.

Ingawa Biblia hiyo mpya ni maridadi na imetengenezwa idumu kwa muda mrefu, ujumbe wake unaookoa uhai ndio wenye thamani zaidi. Siku moja baada ya kupokea Biblia yake mpya, mwanamke mmoja nchini Marekani aliandika hivi,“Ninaweza kuielewa Biblia vizuri zaidi kwa sababu ya kupokea toleo hili jipya.”

Pata Kujua Mengi Zaidi

KAZI YA UCHAPISHAJI

Video Fupi: Kukabiliana na Uhitaji wa Biblia

Ona jinsi kiwanda chetu cha uchapishaji nchini Japani kinavyosaidia kukabiliana na uhitaji wa Biblia ulimwenguni.

VITABU NA BROSHUA

Biblia​—Ina Ujumbe Gani?

Kuna ujumbe gani wa msingi wa Biblia?